Panangsaranget iti “Siit iti Lasag”

“Umdasen kenka ti di kaikarian a kinamanangngaasik.”​—2 CORINTO 12:9.

1, 2. (a) Apay a ditay pagsiddaawan no maipasangotayo kadagiti pakasuotan ken parikut? (b) Apay a natalged ti riknatayo iti laksid dagiti pakasuotan?

“AMIN dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Apay a kasta? Ipetteng ngamin ni Satanas nga agserserbi laeng ti tao iti Dios gapu iti personal nga interes, ket kayatna a paneknekan dayta. Pinakdaaran naminsan ni Jesus dagiti matalek nga apostolna: “Kinalikaguman ni Satanas nga ikutannakayo tapno yakayakennakayo a kas iti trigo.” (Lucas 22:31) Pagaammo unay ni Jesus nga ipalpalubos ti Dios a suotennatayo ni Satanas babaen dagiti nasaem a parikut. Siempre, dina kayat a sawen nga amin a pakarigatantayo iti biag ket direkta a nagtaud ken Satanas wenno kadagiti demoniona. (Eclesiastes 9:11) Ngem desidido ni Satanas a mangusar iti aniaman a pamay-an nga ammona tapno dadaelenna ti kinatarnawtayo.

² Kuna ti Biblia a ditay koma pagsiddaawan dagiti pakasuotantayo. Aniaman ti umapay kadatayo, gagangay ken manamnama. (1 Pedro 4:12) Kinapudnona, ‘ti isu met laeng a bambanag a sagsagabaen maitungtungpalda iti intero a timpuyog ti kakabsattayo ditoy lubong.’ (1 Pedro 5:9) Iti kaaldawantayo, nakaro ti panangparigat ni Satanas iti amin nga agserserbi iti Dios. Pagay-ayat ti Diablo a makita nga agtuoktayo iti adu nga arig siit a parikut. Tapno maaramidna dayta, usarenna ti sistema ti bambanagna iti wagas a mangpaapges iti aniaman a ‘siit iti lasagtayo.’ (2 Corinto 12:7) Nupay kasta, saan koma a madadael ti kinatarnawtayo gapu laeng kadagiti panangatake ni Satanas. No kasano a ni Jehova ‘agaramidto iti dalan a pagruaran’ tapno maibturantayo ti pannulisog, kasta met laeng ti aramidenna no maipasangotayo kadagiti parikut nga arig siit iti lasagtayo.​—1 Corinto 10:13.

No Kasano a Sarangten ti Siit

3. Ania ti sungbat ni Jehova iti kiddaw ni Pablo nga ikkatenna ti siit iti lasagna?

³ Impakaasi ni apostol Pablo nga ikkaten ti Dios ti siit iti lasagna. “Maigapu itoy namitlo a nagpakaasiak iti Apo tapno sumina koma kaniak dayta.” Ania ti sungbat ni Jehova iti napinget a pakaasi ni Pablo? “Umdasen kenka ti di kaikarian a kinamanangngaasik; ta ti pannakabalinko maan-anay iti pagkapuyan.” (2 Corinto 12:8, 9) Usigentay daytoy a sungbat ket amirisentayo no kasano a matulongannatayo a mangsaranget iti aniaman nga arig siit a parikut a mangpasakit kadatayo.

4. Kadagiti ania a wagas a nagunggonaan ni Pablo iti di kaikarian a kinamanangngaasi ni Jehova?

⁴ Imutektekanyo ta indagadag ti Dios nga apresiaren koma ni Pablo ti di kaikarian a kinamanangngaasi a naiparangarang kenkuana babaen ken Kristo. Kinapudnona, naparaburan ni Pablo iti adu a wagas. Nupay panatiko idi a bumusbusor kadagiti pasurot ni Jesus, siaayat nga inted ni Jehova kenkuana ti pribilehio nga agbalin nga adalan. (Aramid 7:58; 8:3; 9:1-4) Kalpasanna, siaasi nga impaannong ni Jehova ti adu a makapagagar a trabaho ken pribilehio ken ni Pablo. Nalawag kadatayo ti leksion. Uray kadagiti karigatan a panawen, adu latta ti tagtagiragsakentayo a bendision a rumbeng a pagyamanantayo. Ditay koma lipatan ti aglaplapusanan a kinaimbag ni Jehova gapu kadagiti pakasuotan.​—Salmo 31:19.

5, 6. (a) Kasano nga insuro ni Jehova ken ni Pablo a ti pannakabalin ti Dios ket “maan-anay iti pagkapuyan”? (b) Kasano a ti ulidan ni Pablo pinaneknekanna nga ulbod ni Satanas?

⁵ Adda sabali pay a pamay-an a mangipakita nga umdasen ti di kaikarian a kinamanangngaasi ni Jehova. Ti pannakabalin ti Dios ket umdasen a tumulong no masuottayo. (Efeso 3:20) Insuro ni Jehova ken ni Pablo a ti pannakabalin ti Dios ket “maan-anay iti pagkapuyan.” Kasano? Siaayat nga impaayna ken Pablo ti amin a bileg a kasapulanna a mangsaranget kadagiti pakasuotanna. Kas banagna, ti panagibtur ken nalawag a panagtalek ni Pablo iti Dios paneknekanna iti amin a Kristiano a ti pannakabalin ni Jehova ket tumultulong iti daytoy nakapuy ken managbasol a tao. Ita, usigenyo ti epektona iti Diablo, a nangipapan nga agserbi laeng dagiti tattao iti Dios no nanam-ay ken saan a nariribuk ti biag. Ti kinatarnaw ni Pablo ket tungpa iti rupa dayta a manangpardaya!

⁶ Ni Pablo ket dati a bumusbusor iti Dios kas ken Satanas, a manangidadanes kadagiti Kristiano, naregta a Fariseo nga awan duadua a nangtagiragsak iti nasaliwanwan a biag gapu ta naggapu iti nabaknang a pamilia. Ngem idi agangay, ni Pablo ket nagserbi ken Jehova ken ni Kristo kas “ti kanunumuan kadagiti apostol.” (1 Corinto 15:9) Sipapakumbaba a nagpasakup iti autoridad ti Kristiano a bagi a manarawidwid idi umuna a siglo. Ken simamatalek a nagibtur iti laksid ti siit iti lasagna. Kasta unay ti rurod ni Satanas ta di impalubos ni Pablo a bumaaw ti regtana gapu kadagiti pakasuotan iti biag. Pulos a dina linipatan ti namnamana a makipagturay ken Kristo iti nailangitan a Pagarian. (2 Timoteo 2:12; 4:18) Awan ti siit, kasano man kasakit, ti nangikkat iti regtana. Sapay koma ta agtultuloy met a narayray ti kinaregtatayo! Iti panangsaranayna kadatayo kadagiti pakasuotan, ikkannatayo ni Jehova iti dignidad babaen ti pribilehio a tumulong a mangpaneknek nga ulbod ni Satanas.​—Proverbio 27:11.

Napateg Dagiti Probision ni Jehova

7, 8. (a) Kasano a pabpabilgen ni Jehova dagiti adipenna ita? (b) Apay a nagpateg ti inaldaw a panagbasa ken panagadal iti Biblia iti panangsaranget iti siit iti lasagtayo?

⁷ Iti kaaldawantayo, pabilgen ni Jehova dagiti matalek a Kristiano babaen ti nasantuan nga espirituna, ti Saona, ken ti Nakristianuan a panagkakabsattayo. Kas ken apostol Pablo, mayallatiwtayo ken Jehova dagiti dadagsentayo babaen ti kararag. (Salmo 55:22) Nupay mabalin a saan nga ikkaten ti Dios dagiti pakasuotantayo, maitedna kadatayo ti sirib a mangsaranget kadagita, uray kadagidiay narigat nga ibturan. Mapatibker met ni Jehova ti pakinakemtayo​—nga itedna ti “pannakabalin a nalablabes ngem ti gagangay”​—tapno makapagibturtayo.​—2 Corinto 4:7.

⁸ Kasano a magun-odtayo dayta a tulong? Masapul a siaanep nga adalentayo ti Sao ti Dios, ta dita a masarakantayo dagiti natalged a pangliwliwana. (Salmo 94:19) Iti Biblia, mabasatayo dagiti makatukay a sasao dagiti adipen ti Dios bayat nga immararawda iti tulongna. Nasayaat a pagpampanunotan dagiti sungbat ni Jehova, a masansan a naglaon kadagiti makaliwliwa a sasao. Ti panagadal ket mangpabileg kadatayo tapno ‘ti pannakabalin a nalablabes ngem ti gagangay biang koma ti Dios ket saan nga agtaud iti bagbagitayo.’ No kasano a masapul a mangantayo iti pisikal a taraon iti inaldaw tapno nasalun-at ken napigsatayo, masapul met a regular a mangantayo iti sao ti Dios. Ar-aramidentayo kadi dayta? No wen, makitatayo a ti panangawattayo iti “pannakabalin a nalablabes ngem ti gagangay” ket tumulong tapno maibturantayo ti aniaman a piguratibo a siit iti lasag a nalabit mangparparigat kadatayo ita.

9. Kasano a matulongan dagiti panglakayen dagidiay addaan kadagiti parikut?

⁹ Dagiti Kristiano a panglakayen a managbuteng iti Dios agbalinda a “paglemmengan a lugar manipud iti angin” ti riribuk, “lugar a pakaitalimengan manipud iti natutudo a bagyo” dagiti parikut. No kayat dagiti panglakayen a maragpat dayta naipaltiing a kualipikasion, nasken a sipapakumbaba ken sipapasnek a kiddawenda ken Jehova ti “dila dagidiay nasursuruan” tapno ammoda a liwliwaen dagidiay agsagsagaba babaen ti umiso a sasao. Ti sasao dagiti panglakayen ket mayarig iti apaglabas a tudo a mangpalamiis ken mangliwliwa iti pusotayo bayat dagiti narikut a tiempo iti biagtayo. Babaen ti ‘panagsao a makaliwliwa kadagiti malmaldaangan a kararua,’ pudno a supsuportaran dagiti panglakayen dagiti naespirituan a kakabsatda a mabalin a napaksuyan wenno malmaldaangan gapu iti sumagmamano a siit iti lasagda.​—Isaias 32:2; 50:4; 1 Tesalonica 5:14.

10, 11. Kasano a dagiti adipen ti Dios mapabilegda ti dadduma a naipasango iti nakaro a pannubok?

¹⁰ Amin nga adipen ni Jehova ket paset ti nagkaykaysa a Nakristianuan a pamiliana. Wen, ‘kamengnatayo ti maysa ken maysa,’ ket “pagrebbengantayo nga ayaten ti maysa ken maysa.” (Roma 12:5; 1 Juan 4:11) Kasano a maibanagtayo daytoy a rebbengen? Sigun iti 1 Pedro 3:8, maaramidtayo dayta babaen ti ‘panangipakitatayo iti pannakipagmaymaysa ti rikna, addaan iti nainkabsatan a panagayat, [ken agbalin a] nadungngo a mannakipagrikna’ kadagiti amin a kapammatiantayo. No kadagidiay naipasango iti mamagsaniit a siit iti lasag, ubbingda man wenno nataengan, maipaayantayo amin ida iti naisangsangayan nga atension. Kasano?

¹¹ Nasken nga ikagumaantayo ti agbalin a sensitibo iti sagsagabaenda. No ditay ammo ti makipagrikna wenno maseknan, mabalin a di ginagara a mapadegdegtayo ti sagsagabaenda. No ammotayo dagiti pakasuotanda, matignaytayo nga agannad no ania ti sawentayo, kasano nga ibaga dayta, ken no kasanotayo nga agtignay. Ti panagbalintayo a positibo ken makapabileg ket makatulong a mangep-ep iti dadduma nga apges nga iyeg ti aniaman a siit a mangparparigat kadakuada. Iti kasta, makapabilegtayo a saranay kadakuada.​—Colosas 4:11.

No Kasano a Nagballigi ti Dadduma

12-14. (a) Ania ti inaramid ti maysa a Kristiano tapno masarangetna ti kanser? (b) Kasano a tinulongan ken pinaregta dagiti naespirituan a kakabsatna daytoy a sister?

¹² Bayat nga umad-adanitayo iti panungpalan daytoy maudi nga al-aldaw, inaldaw a dumegdegdeg “dagiti ut-ot ti panagrigat.” (Mateo 24:8) Gapuna, agparang a masuot amin a tattao ditoy daga, nangnangruna dagiti matalek nga adipen ni Jehova, nga agporporsegi a mangaramid iti pagayatanna. Kas pagarigan, usigenyo ti maysa a Kristiano a payunir. Natakuatan nga adda kanserna ket masapul a maoperaan tapno maikkat ti dadduma a glandula ti bagina. Idi naammuanda ken ni lakayna daytoy a sakitna, dagus a sipapasnek ken napaut nga immararawda ken Jehova. Kalpasan dayta, kinunana a nariknada ti naidumduma a talna. Kaskasdi, inibturanna ti adu a rigat, nangnangruna dagiti dakes nga epekto ti panagpaagasna.

¹³ Tapno ammona ti aramidenna, inkagumaanna a nagadal iti adu nga impormasion maipapan iti kanser. Nagkonsulta kadagiti doktorna. Kadagiti Ti Pagwanawanan, Agriingkayo!, ken dadduma pay a Nakristianuan a publikasion, nabasana dagiti personal a kapadasan a mangipakita no kasano a pinakired dagiti indibidual ti pakinakemda idi naipasangoda iti dayta a sakit. Nagbasa met kadagiti mainaig a teksto iti Biblia a mangipakita iti abilidad ni Jehova a mangsaranay kadagiti adipenna bayat dagiti pakarigatan, agraman ti dadduma pay a makatulong nga impormasion.

¹⁴ Maysa nga artikulo maipapan iti panangsaranget iti pannakaupay ti nangdakamat kadagitoy a nainsiriban a sasao: “Ti maysa a mangiputputong iti bagina sapulennanto ti kabukbukodanna nga iniimut a tarigagay.” (Proverbio 18:1) Nangbalakad ngarud dayta nga artikulo: “Diyo iputputong ti bagiyo.”a Kuna ti sister: “Adu ti nagkuna nga ikarkararagandak; dadduma ti nagtelepono kaniak. Dua a panglakayen ti regular a nagtelepono tapno komustaendak. Nakaawatak kadagiti sabong ken kard. Addada pay nagsagana kadagiti taraon. Adu met ti nagboluntario a mangkadua kaniak nga agpaagas.”

15-17. (a) Kasano a sinaranget ti maysa a Kristiano dagiti pakarigatan a resulta ti pannakaaksidentena? (b) Kasano a timmulong dagiti kakongregasionna?

¹⁵ Maysa a nabayagen nga agserserbi ken Jehova idiay New Mexico, E.U.A., ti namindua a naaksidente iti lugan. Nadunor ti tengnged ken abagana, a nangpakaro iti arthritis-na a mangparparigat kenkuana iti nasuroken a 25 a tawen. Kinunana: “Nakapuy ti tengngedko ken marigatanak nga agawit iti aniaman a nadagdagsen ngem iti dua a kilo. Ngem dakkel ti naitulongna kaniak ti napasnek a panagkararag ken Jehova. Kasta met ti panagadalmi kadagiti artikulo Ti Pagwanawanan. Adda maysa a nangkomento iti Mikias 6:8, a kinunana a ti napakumbaba a pannakipagna iti Dios kalikagumanna nga ammotayo ti limitasiontayo. Daytoy ti timmulong kaniak a mangbigbig nga iti laksid ti sasaadek, saanak a rumbeng a maupay, nupay basbassit ti tiempo a mabusbosko iti ministerio ngem iti namnamaek. Ti napateg isu ti panagserbi iti Dios buyogen ti nadalus a motibo.”

¹⁶ Kinunana pay: “Kanayon a komendaran dagiti panglakayen ti reggetko a makigimong ken mangasaba. Arakupendak dagiti agtutubo kas pangkablaaw. Naanus unay kaniak dagiti payunir ken masansan a baliwanda ti eskediulda no saan a kombiniente kaniak. No saan a nasayaat ti panniempo, ikuyogdak nga agsarungkar wenno mangyadal iti Biblia. Ket gapu ta diak makaawit iti bag, dadduma nga agibumbunannag ti mangawit iti literaturak no sumurotak a mangasaba.”

¹⁷ Imutektekanyo no kasano a dagiti panglakayen iti kongregasion ken dagiti kapammatian nakatulongda kadagitoy dua a sister tapno masarangetda dagiti arig siit nga an-annayenda. Nangitukonda iti praktikal ken naayat a tulong a maitutop kadagiti espesipiko a parikut iti naespirituan, pisikal, ken emosion. Saankayo kadi a maguyugoy a tumulong met kadagiti kakabsat nga addaan kadagiti parikut? Dakayo nga agtutubo, makatulongkayo met kadagidiay kakongregasionyo a makidangdangadang kadagiti siit iti lasagda.​—Proverbio 20:29.

18. Ania a pammabileg ti itden kadatayo dagiti pakasaritaan ti biag a maipabpablaak iti Pagwanawanan ken Agriingkayo! a magasin?

¹⁸ Nangipablaak ti magasin a Pagwanawanan ken Agriingkayo! iti adu a pakasaritaan ken kapadasan ti biag dagiti Saksi a nangsaranget, ken madama a mangsarsaranget, kadagiti parikut iti biag. Bayat a regular a basbasaenyo dagita nga artikulo, makitayo nga adu kadagiti naespirituan a kakabsatyo iti intero a lubong ti nakapagibtur kadagiti rigat iti biag, ipupusay ti ing-ingungoten gapu iti didigra, ken napeggad a kasasaad gapu iti gubat. Adda dagidiay nabaldado gapu iti sakit. Adu ti di makaaramid kadagiti simple a bambanag iti biag a tagtagilag-anen dagidiay nakaradkad. Nakaro a parigaten ida dagiti sakitda, nangnangruna no dida maaramidan ti dati a magapgapuananda kadagiti Nakristianuan nga aktibidad. Anian a yamanda iti tulong ken suporta dagiti kakabsatda, agtutubo ken nataengan!

Mangyeg Ragsak ti Panagibtur

19. Apay a naragsak ni Pablo iti laksid dagiti arig siit a pakasuotan ken pagkapuyanna?

¹⁹ Nagrag-oan ni Pablo ti pammabileg ti Dios kenkuana. Kinunana: “Siraragsak unay . . . nga agpasindayagakto pay ketdi no maipapan kadagiti pagkapuyak, tapno ti pannakabalin ti Kristo agtalinaed koma kaniak kas iti maysa a tolda. Gapuna pagragsakak dagiti kinakapuy, dagiti pannakainsulto, dagiti panagkasapulan, dagiti pannakaidadanes ken pakarigatan, maipaay ken Kristo. Ta inton nakapuyak, iti kasta nabilegak.” (2 Corinto 12:9, 10) Gapu kadagiti personal a kapadasanna, sikokompiansa a maikuna ni Pablo: “Saanak nga agsasao maipapan iti kaaddak iti kinakirang, ta, kadagiti aniaman a kasasaadko, naadalko ti mapnek. Iti kinapudnona ammok no kasano ti agbalin a nanumo kadagiti pagtaraon, iti kinapudnona ammok no kasano ti maaddaan iti kinaruay. Iti amin a banag ken kadagiti amin a kasasaad naadalko ti palimed agpadpada no kasano ti mabsog ken no kasano ti mabisinan, agpadpada no kasano ti maaddaan iti kinaruay ken no kasano ti agsagaba iti kinakirang. Ta iti amin a bambanag addaanak iti bileg gapu iti daydiay mangmangted kaniak iti pannakabalin.”​—Filipos 4:11-13.

20, 21. (a) Apay mangyeg rag-o ti panangmennamenna “iti bambanag a di makita”? (b) Aniada a “bambanag a di makita” ti kayatyo a maimatangan iti Paraiso a daga?

²⁰ Gapuna, no ibturantayo ti aniaman a piguratibo a siit iti lasagtayo, makaay-ayonto kadatayo ti panangipakita kadagiti amin a tattao a naan-anay ti pannakabalin ni Jehova babaen dagiti pagkapuyantayo. Insurat ni Pablo: “Saankami a sumuko . . . Pudno unay a ti kinataomi iti uneg mapabpabaro iti inaldaw-aldaw. Ta nupay ti rigat ket apagkanito ken nalag-an, pataudenna kadakami ti dayag a naringringbaw pay ti dagsenna ken agnanayon; bayat a pagtalinaedenmi ti matmatami . . . iti bambanag a di makita. Ta ti bambanag . . . a di makita agnanayonda.”​—2 Corinto 4:16-18.

²¹ Kaaduan ita nga agserserbi ken Jehova ti mangnamnama nga agbiagda iti Paraiso a daga ken tagiragsakenda dagiti bendision nga inkarina. Dagita a bendision ti kasla ‘ditay makita’ ita. Ngem umad-adanin ti tiempo inton makitatayo a mismo dagita a bendision, ken tagiragsaken ida iti agnanayon. Maysa kadagita a bendision isu ti bang-ar nga iyeg ti panagbiag nga awanan kadagiti arig siit a parikut! Ti Anak ti Dios “dadaelenna dagiti aramid ti Diablo” ken “pukawenna daydiay addaan iti pannakabalin a mangyeg iti ipapatay.”​—1 Juan 3:8; Hebreo 2:14.

22. Iti ania a makapagtalektayo, ken ania koma ti determinasiontayo?

²² No kasta, aniaman a siit iti lasag ti mangparparigat kadatayo ita, itultuloytayo a sarangten dayta. Kas ken Pablo, addaantayo iti bileg a mangaramid iti dayta gapu ken Jehova, a sipaparabur a mangipapaay iti pannakabalin kadatayo. Inton agbiagtayo iti Paraiso a daga, bendituentayo ni Jehova a Diostayo iti inaldaw gapu iti amin a nakaskasdaaw nga inaramidna agpaay kadatayo.​—Salmo 103:2.

[Footnote]

Ania ti Sungbatyo?

• Apay ken kasano a padasen ti Diablo a dadaelen ti kinatarnaw dagiti pudno a Kristiano?

• Kasano a ti pannakabalin ni Jehova “maan-anay iti pagkapuyan”?

• Kasano a dagiti panglakayen ken ti dadduma mapabilegda dagidiay pinarigat dagiti parikut?

[Ladawan iti panid 18]

Namitlo nga inkararag ni Pablo nga ikkaten ti Dios ti siit iti lasagna