“Makidangadangkay a Sipipinget Maipaay iti Pammati”!

“Makidangadangkay a sipipinget maipaay iti pammati a namimpinsan a naiyawat kadagiti sasanto.”​—JUDAS 3.

1. Iti ania nga anag a makidangdangadang dagiti pudno a Kristiano ita?

KANAYON a narigat ti sasaaden dagiti soldado a makigubgubat. Darepdepem a naaruatanka iti amin a kasapulam a pakigubat sa agmartsa iti nawatiwat iti amin a kita ti paniempo, a lumasatka iti nainget a panagsanay iti panagaramat kadagiti armas, wenno nasken a salaknibam ti bagim iti amin a napeggad a kasasaad a makapapatay wenno makadangran. Nupay kasta, saan a makiraman dagiti pudno a Kristiano kadagiti gubat dagiti nasion. (Isaias 2:2-4; Juan 17:14) Kaskasdi, nasken a ditay pulos liplipatan a no an-anagen, makigubgubattayo. Nakaro ti gura ni Satanas ken ni Jesu-Kristo ken kadagiti pasurotna ditoy daga. (Apocalipsis 12:17) No ar-arigen, agpasalista kas soldado a makigubat iti naespirituan dagiti amin a mangikeddeng nga agserbi ken Jehova a Dios.​—2 Corinto 10:4.

2. Kasano ti panangdeskribir ni Judas iti pannakidangadang dagiti Kristiano, ket kasano a ti suratna matulongannatayo nga agibtur iti dayta?

² Maitutop la unay, insurat ti kabsat ni Jesus iti ina a ni Judas: “Dungdunguen, nupay inar-aramidko ti tunggal panagregget nga agsurat kadakayo maipapan iti pannakaisalakan nga ik-ikutantayo a sapasap, nasarakak a masapul nga agsuratak kadakayo tapno bagbagaankayo a makidangadangkay a sipipinget maipaay iti pammati a namimpinsan a naiyawat kadagiti sasanto.” (Judas 3) Iti panangidagadag ni Judas kadagiti Kristiano a ‘makidangadangda a sipipinget,’ nangaramat iti termino a mainaig iti sao para iti “tuok.” Wen, mabalin a narigat daytoy a dangadang, makatuok pay ketdi! Marigatankay kadi no dadduma nga agibtur iti daytoy a dangadang? Matulongannatayo ti ababa ngem nabileg a surat ni Judas. Idagadagna a sarangtentayo ti imoralidad, raemen ti autoridad nga insaad ti Dios, ken agtalinaed iti ayat ti Dios. Kitaentayo no kasano nga iyaplikar daytoy a balakad.

Sarangtenyo ti Imoralidad

3. Ania a napeggad a kasasaad ti nakaipasanguan ti kongregasion Kristiano idi kaaldawan ni Judas?

³ Naimatangan ni Judas a saan nga amin a padana a Kristiano ket mangab-abak iti pannakigubatda ken Satanas. Agpegpeggad ti arban. Kas insurat ni Judas, “nakalibas a simrek” dagiti rinuker a tattao. Di madmadlaw nga itantandudo dagitoy a tattao ti imoralidad. Ken sisisikap nga inkalinteganda dagiti aramidda, “a pagbalbalinenda ti di kaikarian a kinamanangaasi ti Diostayo kas pambar maipaay ti nalulok a kababalin.” (Judas 4) Nalabit, kas kadagiti sumagmamano a nagkauna a Gnostico, inkalinteganda a no ad-adu ti basol ti maysa a tao, ad-adda nga umawat iti parabur ti Dios​—isu a, no an-anagen, nasaysayaat no ad-adu ti basolna! Wenno nalabit impagarupda a saan ida a dusaen ti naasi a Dios. Aniaman ti kasasaad, nagbiddutda.​—1 Corinto 3:19.

4. Ania a tallo a Nainkasuratan nga ehemplo ti napalabas a panangukom ni Jehova ti dinakamat ni Judas?

⁴ Binalusingsing ni Judas ti rinuker a panagrasrasonda babaen ti panangdakamatna iti tallo nga ehemplo ti panangukom ni Jehova kadagiti naglabas a panawen: maibusor kadagiti Israelita a “saan a mangipakpakita iti pammati”; maibusor kadagiti “anghel a . . . pinanawanda ti bukodda nga umiso a lugar” tapno makipagbasolda kadagiti babbai; ken maibusor kadagiti agnaed iti Sodoma ken Gomorra, a “nakiabigda nga aglablabes unay . . . ken simmurotda iti lasag maipaay iti di nakaisigudan a pannakausar.” (Judas 5-7; Genesis 6:2-4; 19:4-25; Numeros 14:35) Iti tunggal kaso, siiinget a dinusa ni Jehova dagiti managbasol.

5. Makinpadto idi un-unana ti inadaw ni Judas, ket kasano nga inyebkas daydi a padto ti sigurado a kaitungpalanna?

⁵ Iti ud-udina, tinukoy ni Judas ti ad-adda pay a nasaklaw a panangukom. Inadawna ti padto ni Enoc​—sasao a di masarakan iti aniaman a paset ti naipaltiing a Kasuratan.a (Judas 14, 15) Impadto ni Enoc ti tiempo a panangukom ni Jehova kadagiti amin a nadangkes ken dagiti dakes nga aramidda. Makapainteres, nagsao ni Enoc iti wagas a napasamaken ti imbagana, ta dagiti panangukom ti Dios ket sigurado a dumteng a kas man la napasamakdan. Mabalin a rinabrabak dagiti tattao ni Enoc ken idi kamaudiananna ni Noe, ngem nalmes amin dagidi a managuyaw iti sangalubongan a Layus.

6. (a) Ania ti masapul a maipalagip kadagiti Kristiano idi kaaldawan ni Judas? (b) Apay nga ipapusotayo koma dagiti palagip ni Judas?

⁶ Apay nga insurat ni Judas dagitoy a nadiosan a panangukom? Agsipud ta ammona nga adda sumagmamano a naitimpuyog kadagiti kongregasion dagiti Kristiano idi kaaldawanna a mangar-aramid kadagiti basol a kas karugit ken kadakes dagiti basol a nakaigapuan dagidi a napalabas a panangukom. Gapuna, insurat ni Judas a nasken a mapalagipan dagiti kongregasion maipapan iti sumagmamano a pamunganayan a naespirituan a kinapudno. (Judas 5) Nalawag a nalipatanda a makitkita ni Jehova a Dios ti ar-aramidenda. Wen, no igagara dagiti adipenna a salungasingen dagiti lintegna, a tulawanda ti bagbagida ken dagiti sabsabali, makitana dayta. (Proverbio 15:3) Masaktan unay kadagita nga aramid. (Genesis 6:6; Salmo 78:40) Nakaskasdaaw a panunoten a datayo a nanumo laeng a tattao maapektarantayo ti rikrikna ti Soberano nga Apo ti uniberso. Inaldaw a siiimatang kadatayo, ket no ikagumaantayo a suroten dagiti addang ti Anakna a ni Jesu-Kristo, ti kababalintayo pagrag-oenna ti pusona. Ngarud, ditay koma paiden dagita a palagip ni Judas no di ket ipapusotayo.​—Proverbio 27:11; 1 Pedro 2:21.

7. (a) Apay a nasken nga agpatulong a dagus dagidiay agar-aramid iti nadagsen a basol? (b) Kasano a maliklikantay amin ti imoralidad?

⁷ Saan laeng a siiimatang ni Jehova no di ket agtignay. Tangay Dios ti kinahustisia, dusaenna dagiti managdakdakes​—iti panawen nga inkeddengna. (1 Timoteo 5:24) Dagidiay agkuna a napalabas laeng a historia dagiti panangukomna ken saan a maseknan iti dakes nga ar-aramidenda, al-allilawenda laeng ti bagbagida. Anian a nagpateg nga agpatulong a dagus kadagiti Kristiano a panglakayen ti asinoman ita nga agar-aramid iti imoralidad! (Santiago 5:14, 15) Mabalin a pagnakemennatayo amin ti pangta nga isango ti imoralidad iti naespirituan a pannakidangadangtayo. Tinawen nga adda dagiti mabiktima​—dagiti indibidual a mailaklaksid iti tengngatayo, a ti kaaduan kadakuada gapu iti awanan panagbabawi a panangaramidda kadagiti imoral nga aramid. Masapul a sititibker nga ikeddengtayo a sarangten ti aniaman a sulisog a mangiturong kadatayo iti dayta a direksion.​—Idiligyo ti Mateo 26:41.

Raemenyo ti Autoridad nga Insaad ti Dios

8. Siasino dagiti “nadayag” a nadakamat iti Judas 8?

⁸ Ti maysa pay a parikut a tinaming ni Judas isu ti kinaawan panagraem iti autoridad nga insaad ti Dios. Kas pagarigan, iti Judas bersikulo 8 binabalawna dagiti isu met laeng a nadangkes a tattao gapu ta “agsasaoda a sibabassawang kadagidiay nadayag.” Siasino dagitoy a “nadayag”? Imperpektoda a lallaki, ngem addaanda kadagiti rebbengen nga impabaklay kadakuada ti nasantuan nga espiritu ni Jehova. Kas pagarigan, addaan idi dagiti kongregasion kadagiti panglakayen, a nadutokan a mangipastor iti arban ti Dios. (1 Pedro 5:2) Adda met dagiti agdaldaliasat a manangaywan, kas ken apostol Pablo. Ket ti bagi dagiti panglakayen sadi Jerusalem nagakemda kas bagi a manarawidwid, a mangar-aramid kadagiti desision a mangapektar iti intero a kongregasion Kristiano. (Aramid 15:6) Madanagan unay ni Judas ta adda sumagmamano iti kongregasion nga agsasao a sibabassawang, wenno mangtabtabbaw, iti kakasta a lallaki.

9. Aniada nga ehemplo maipanggep iti kinaawan panagraem iti autoridad ti dinakamat ni Judas?

⁹ Kas panangkondenar iti kasta nga awanan panagraem a panagsasao, iti Judas bersikulo 11, dinakamat ni Judas ti tallo pay nga ehemplo kas pammalagip: da Cain, Balaam, ken Core. Di inkankano ni Cain ti naayat a balakad ni Jehova ken sipapakinakem nga insayangkatna ti makapapatay a gurana. (Genesis 4:4-8) Namin-ano a nakaawat ni Balaam iti ballaag nga awan duadua a naggapu iti mannakabalin a gubuayan​—nga uray ti kabaian nga asnona nagsao kenkuana! Ngem agimbubukodan nga impatuloy ni Balaam nga isikat ti ili ti Dios. (Numeros 22:28, 32-34; Deuteronomio 23:5) Adda bukod nga akem ni Core, ngem saan a napnek. Immalsa iti kaemmaan idi a tao ditoy daga, ni Moises.​—Numeros 12:3; 16:1-3, 32.

10. Kasano a ti sumagmamano ita matnagda iti palab-og ti ‘nabassawang a panagsao kadagiti nadayag,’ ket apay a rebbeng a liklikan ti kasta a panagsasao?

¹⁰ Anian a silalawag nga isurodatayo dagitoy nga ehemplo a mangipangag iti balakad ken mangraem kadagidiay inikkan ni Jehova kadagiti pagrebbengan! (Hebreo 13:17) Naglaka ti mangdillaw kadagiti nadutokan a panglakayen, ta imperpektoda, a kas kadatayo amin nga imperpekto. Ngem no dagiti laeng biddutda ti kitkitaentayo ken ditay raemen ida, saan ngata nga “agsasao[tayo] a sibabassawang kadagidiay nadayag”? Iti Judas bersikulo 10, dinakamat ni Judas dagidiay ‘agsasao a sibabassawang kadagiti amin a bambanag a pudno a saanda nga ammo.’ No dadduma, adda dagiti mangbabalaw iti desision ti bagi dagiti panglakayen wenno ti hudisial a komite. Ngem saanda nga ammo amin a detalye nga inusig dagiti panglakayen a nakaibatayan ti desisionda. Isu nga apay nga agsaoda a sibabassawang maipapan kadagiti banag a saanda nga ammo? (Proverbio 18:13) Dagidiay agtultuloy a mangbabalaw mabalin a pagsisinaenda ti kongregasion ken nalabit mayarigda pay ketdi kadagiti napeggad a “bato a nailemmeng iti uneg ti danum” kadagiti panagtitipon dagiti agkakapammatian. (Judas 12, 16, 19) Ditay kayat a pagpeggaden dagiti sabsabali iti naespirituan. Imbes ketdi, determinado koma ti tunggal maysa kadatayo a mangipateg kadagiti responsable a lallaki gapu iti panagbannogda ken debosionda iti arban ti Dios.​—1 Timoteo 5:17.

11. Apay a saan a sibabassawang nga inukom ni Miguel ni Satanas?

¹¹ Nangdakamat ni Judas iti ehemplo ti maysa a nangraem iti nadutokan nga autoridad. Insuratna: “Idi a ni Miguel nga arkanghel naaddaan ti pannakisusik iti Diablo ket nakisupsuppiat maipapan iti bagi ni Moises, saanna a naitured nga iyeg ti panangukom maibusor kenkuana iti nabassawang a sasao, no di ket kinunana: ‘Babalawennaka koma ni Jehova.’” (Judas 9) Adda dua nga agsupadi a leksion nga isuro daytoy makapainteres a salaysay, a ni laeng Judas ti nangilanad iti naipaltiing a Kasuratan. Iti maysa a dasig, isuronatayo nga ipabiangtay ken Jehova ti panangukom. Nabatad a kayat ni Satanas nga usaren iti di umiso a pamay-an ti bangkay ti matalek a lalaki a ni Moises tapno maitandudo ti ulbod a panagdayaw. Anian a nagdakes! Ngem sipapakumbaba a liniklikan ni Miguel ti mangukom, ta ni laeng Jehova ti addaan iti dayta nga autoridad. No kasta, ad-adda a rebbeng a liklikantayo ti mangukom kadagiti matalek a lallaki a mangikagkagumaan nga agserbi ken Jehova.

12. Ania ti maadal dagidiay addaan pagrebbengan iti kongregasion Kristiano iti ulidan ni Miguel?

¹² Iti sabali a dasig, dagidiay addaan autoridad iti kongregasion makasursuroda met koma ken Miguel. Ngamin, nupay ni Miguel ti “arkanghel,” panguluen dagiti amin nga anghel, dina inabuso ti pannakabalinna, uray iti sidong ti makaparurod a kasasaad. Sursuroten a naimbag dagiti matalek a panglakayen dayta a pagwadan, a bigbigenda a ti panangabuso iti autoridadda ket kinaawan panagraem iti kinasoberano ni Jehova. Adu ti kunaen ti surat ni Judas maipapan kadagiti lallaki nga addaan nadayaw nga akem kadagiti kongregasion ngem inabusoda ti pannakabalinda. Kas pagarigan, iti Judas bersikulo 12 agingga iti 14, siiinget a kinondenar ni Judas dagiti “papastor a mangpakan iti bagbagida nga awanan buteng.” (Idiligyo ti Ezequiel 34:7-10.) Iti sabali a pannao, ti bukodda a pagimbagan ti impangpangrunada, saan a ti arban ni Jehova. Adu ti maadal dagiti panglakayen ita iti kakasta a dakes nga ehemplo. Wen, dagiti sasao ni Judas ditoy silalawag a deskribirenda ti ditay kayat a pagbalinan. No agimbubukodtayo, saannatayo a soldado ni Kristo; makumikomtayo unay iti bukodtayo a pagimbagan. Imbes ketdi, agbiagtay koma a mayannurot iti sasao ni Jesus: “Ad-adu ti kinaragsak iti panangted ngem iti panangawat.”​—Aramid 20:35.

“Pagtalinaedenyo ti Bagbagiyo iti Ayat ti Dios”

13. Apay a sipapasnek a tarigagayantay koma amin ti agtalinaed iti ayat ti Dios?

¹³ Iti ud-udi ti suratna, impaay ni Judas daytoy makaliwliwa a balakad: “Pagtalinaedenyo ti bagbagiyo iti ayat ti Dios.” (Judas 21) Maymaysa laeng a banag ti tumulong kadatayo a makiranget iti Nakristianuan a dangadang, nga isu ti panagtalinaed iti ayat ni Jehova a Dios. Ngamin, ayat ti kangrunaan a galad ni Jehova. (1 Juan 4:8) Insurat ni Pablo kadagiti Kristiano sadi Roma: “Kumbinsidoak nga uray ti ipapatay wenno ti biag wenno dagiti anghel wenno dagiti gobierno wenno dagiti bambanag nga addan wenno dagiti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua didatayto kabaelan nga isina manipud iti ayat ti Dios nga adda ken Kristo Jesus nga Apotayo.” (Roma 8:38, 39) Ngem, kasanotayo a makapagtalinaed iti dayta nga ayat? Imutektekanyo dagiti tallo a banag a mabalintay nga aramiden, sigun ken Judas.

14, 15. (a) Ania ti kayat a sawen ti panangpatibker iti bagbagitayo iti “kasasantuan a pammati[tayo]”? (b) Kasanotay a masukimat ti kasasaad ti naespirituan a kabaltayo?

¹⁴ Umuna, kunaen kadatayo ni Judas nga itultuloytayo a pabilgen ti bagbagitayo iti “kasasantuan a pammati[tayo].” (Judas 20) Kas nakitatayo iti immun-una nga artikulo, agtultuloy daytoy. Mayarigtayo kadagiti pasdek a masapul nga ad-adda a mapalagda tapno saan a madadael ti kumarkaro a panangrarit ti paniempo. (Idiligyo ti Mateo 7:24, 25.) Isu a saan koma nga aglablabes ti talektayo iti bagitayo. Imbes ketdi, usigentayo no sadino a mapabilegtayo ti bagbagitayo iti pundasion ti pammatitayo, tapno tumibkertayo, agbalin nga ad-adda a matalek a soldado ni Kristo. Kas pagarigan, mabalintay nga amirisen dagiti paset ti naespirituan a kabal a nadeskribir iti Efeso 6:11-18.

¹⁵ Ania ti kasasaad ti naespirituan a kabaltayo? Nalagda kadi a kas rebbengna ti “dakkel a kalasag ti pammati[tayo]”? No taliawentayo dagiti kallabes a tawen, madlawtay kadi a gimminadtayo, kas ti manmano a pannakigimong, panagmawmaw ti regta iti ministerio, wenno pannakapukaw ti gagar nga agadal? Serioso ti kakasta a pagilasinan! Nasken nga agtignaytay itan ket ipasdek ken patibkerentay ti bagbagitayo iti kinapudno.​—1 Timoteo 4:15; 2 Timoteo 4:2; Hebreo 10:24, 25.

16. Ania ti kayat a sawen ti panagkararag buyogen ti nasantuan nga espiritu, ket ania ti kanayon koma a dawatentayo ken Jehova?

¹⁶ Ti maikadua a pamay-an tapno makapagtalinaedtayo iti ayat ti Dios isu ti agtultuloy a “panagkararag buyogen ti nasantuan nga espiritu.” (Judas 20) Kaipapanan dayta ti panagkararag iti sidong ti impluensia ti espiritu ni Jehova ken maitunos iti Saona nga impaltiing ti espiritu. Ti panagkararag ket napateg a pamay-an ti iyaadani ken Jehova ken panangyebkas iti debosiontayo kenkuana. Pulos a ditay koma liwliwayan daytoy naisangsangayan a pribilehio! Ket no agkararagtayo, mabalintay ti dumawat​—iti kinapudnona, itultuloytayo ti dumawat​—iti nasantuan nga espiritu. (Lucas 11:13) Dayta ti kabilgan a puersa a magun-odantayo. Buyogen ti kasta a tulong, kanayon a makapagtalinaedtayo iti ayat ti Dios ken makapagibtur kas soldado ni Kristo.

17. (a) Apay a nagpaiduma ti ulidan ni Judas no maipapan iti asi? (b) Kasano a maitultuloy ti tunggal maysa kadatayo nga ipakita ti asi?

¹⁷ Maikatlo, indagadag ni Judas nga itultuloytayo nga ipakita ti asi. (Judas 22) Nagpaiduma ti mismo nga ulidanna iti daytoy a banag. Nainkalintegan a madanagan gapu iti kinadakes, imoralidad, ken apostasia a nakastrek iti kongregasion Kristiano. Nupay kasta, saan a naglagaw, a dina pinanunot a napeggad unay ti kasasaad ket di mabalin nga ipakita ti “nadungngo” a galad kas iti asi. Saan, ginutugotna ketdi dagiti kakabsatna nga itultuloyda nga ipakita ti asi aginggat’ mabalin, a siaanus a makirinnasonda kadagidiay agduadua ken ‘rabsutenda [pay ketdi] manipud iti apuy’ dagidiay adda iti ngarab ti nadagsen a basol. (Judas 23; Galacia 6:1) Anian a nagsayaat a pammagbaga para kadagiti panglakayen kadagitoy nariribuk a tiempo! Ikagumaanda met nga ipakita ti asi no adda pangibatayan iti dayta, ngem agtalinaedda a natibker no kasapulan. Kasta met, kayattay amin nga ipakita ti asi iti tunggal maysa. Kas pagarigan, imbes a sakiten ti nakemtayo dagiti babassit a di pagkikinnaawatan, sibubuslon koma a mamakawantayo.​—Colosas 3:13.

18. Kasanotay a makapagballigi iti naespirituan a pannakidangadangtayo?

¹⁸ Saan a nalaka ti pannakigubattayo. Kas kuna ni Judas, ‘nainget a pannakidangadang’ daytoy. (Judas 3) Nabileg dagiti kabusortayo. Saan laeng a ni Satanas no di ket ti nadangkes a lubongna ken dagiti bukodtayo a pagkapuyan ti kabusortayo. Ngem, naan-anay a makapagtalektayo nga agballigitayo! Apay? Agsipud ta addatayo iti dasig ni Jehova. Ginibusan ni Judas ti suratna babaen ti panangipalagipna a maikari ni Jehova iti “dayag, kinatan-ok, pannakabalin ken kinaturay iti isuamin a napalabas a kinaagnanayon ken ita ken iti isuamin a kinaagnanayon.” (Judas 25) Saan kadi a makapaamanga a panunoten dayta? No kasta, mapagduaduaan kadi a daytoy met laeng a Dios ‘maigaganakayo iti panakaitibkol’? (Judas 24) Saan! Determinado koma ti tunggal maysa kadatayo nga agtultuloy a mangsaranget iti imoralidad, mangraem iti autoridad nga insaad ti Dios, ken agtalinaed iti ayat ti Dios. Iti kasta, sangsangkamaysa a sagrapentayto ti nadayag a balligi.

[Footnote]

Dagiti Pangrepaso a Saludsod

◻ Kasano nga isuronatayo ti surat ni Judas a mangsaranget iti imoralidad?

◻ Apay a nagpateg ti panangraem iti autoridad nga insaad ti Dios?

◻ Ania ti pagdaksan ti di umiso a panangaramat iti autoridad iti kongregasion?

◻ Kasanotayo a makapagtalinaed iti ayat ti Dios?

[Ladawan iti panid 15]

Saan a kas kadagiti soldado a Romano, makidangdangadang dagiti Kristiano iti naespirituan

[Ladawan iti panid 18]

Agserserbi dagiti Kristiano a papastor, saan a gapu iti bukodda a pagimbagan, no di ket gapu iti ayat