Dagiti Saludsod Manipud Kadagiti Agbasbasa
Sigun iti Mateo 17:20, di mapaimbag dagiti apostol ti maysa a masakit a barito ‘gapu iti bassit a pammatida.’ Nupay kasta, iti Marcos 9:29 nainaig ti dida pannakapaimbag iti kinapateg ti panagkararag. Apay nga agsupadi dagiti makagapu a nadakamat iti nagduma a salaysay ti Ebanghelio?
Kinapudnona, agkanayon dagiti dua a salaysay, saan nga agsupadi. Kitaentayo nga umuna ti Mateo 17:14-20. Impadamag ti maysa a tao nga adda kissiw ti baritona ngem di mapaimbag dagiti adalan ni Jesus. Pinaimbag ni Jesus ti barito babaen ti panangparuarna iti demonio a mangparparigat kenkuana. Insaludsod dagiti adalan no apay a dida mapaksiat ti demonio. Sigun iti salaysay ni Mateo, insungbat ni Jesus: “Gapu iti bassit a pammatiyo. Ta pudno kunak kadakayo, No addaankayo iti pammati a kas iti kabassit ti bukel ti mustasa, kunaenyonto iti daytoy a bantay, ‘Umaliska manipud ditoy nga agturong sadiay,’ ket umalisto dayta, ket awanto ti di mabalin kadakayo.”
Ita umallatiwtayo iti Marcos 9:14-29, a pakasarakantayo iti ad-adu pay a detalye. Kas pagarigan, innayon ti Marcos 9:17 ti detalye nga iti daytoy a kaso ti panagkissiw ket maigapu iti dakes nga espiritu. Nasken a laglagipentayo nga iti dadduma pay a paset ti Biblia kunana a pinaimbag ni Jesus dagiti agkissiw ken linuganan ti demonio. (Mateo 4:24) Iti daytoy a naisalsalumina a kasasaad, ti panagatake ti sakit ket maigapu iti “umel ken tuleng nga espiritu,” kayatna a sawen, dakes nga espiritu, kas pasingkedan ni mangngagas a Lucas. (Lucas 9:39; Colosas 4:14) Imutektekanyo ti sasao iti Marcos 9:18 a, “Sadinoman a pakakemmegan [ti demonio] kenkuana.” No kasta, saan a patinayon ti panangparparigat ti demonio iti barito, sagpaminsan laeng. Kaskasdi, dagiti adalan saanda a mapaksiat ti demonio ket iti kasta umimbag ti ubing. Idi inimtuodda no apay, kinuna ni Jesus: “Daytoy a kita di mabalin a maparuar babaen iti aniaman malaksid no babaen iti kararag.”
Nupay kasta, ti naannad a panangbasa iti salaysay ni Marcos ipakitana nga awan panagsupadina iti inlanad ni Mateo. Iti Marcos 9:19, mabasatayo nga inay-ay ni Jesus ti kinaawan pammati dayta a kaputotan. Ket iti Mr 9 bersikulo 23, nailanad a kinunana iti ama ti ubing: “Amin a bambanag mabalin iti maysa no isu addaan iti pammati.” Gapuna impaganetget met ni Marcos ti kinapateg ti pammati. Iti Mr 9 bersikulo 29, nangipaay laeng ni Marcos iti kanayonan a detalye. Innayon ni Marcos ti kinuna ni Jesus maipapan iti panagkararag, nga agpada a di inraman da Mateo ken Lucas.
Gapuna, ania ti maikunatayo? Adda dagiti gundaway a dagiti 12 nga apostol ken dagiti 70 nga adalan pinaruarda dagiti dakes nga espiritu. (Marcos 3:15; 6:13; Lucas 10:17) Ngem iti daytoy a gundaway di kabaelan dagiti adalan a paruaren ti demonio. Apay? No pagtitiponentayo dagiti detalye a nadakamat iti nagduduma a salaysay, maikunatayo a saanda idi a nakasagana a mangaramid iti kasta iti daytoy a gundaway. Nalabit a ti maysa a makagapu isu ti kita ti demonio a limmugan, tangay agparang a nagduduma ti personalidad, paginteresan, ken uray kabaelan dagiti demonio. Iti daytoy a kasasaad, nangnangruna a kasapulan ti nabileg a pammati ken nasged a panangikararag iti tulong ti Dios. Siempre, adda kasta a pammati ni Jesus. Supsuportaran met idi ti Manangipangag iti kararag, ti Amana. (Salmo 65:2) Saan laeng a kabaelan ni Jesus a paimbagen ti agsagsagaba a barito babaen ti panangparuarna iti demonio no di ket inaramidna dayta.