Kasano nga Agtigtignay ti Espiritu ti Dios iti Kaaldawantayo?
NAYANAK a pilay. Inaldaw a nakatugaw iti asideg ti ruangan ti templo a maawagan Napintas tapno makilimos kadagidiay sumrek iti templo. Ngem iti naminsan, nakaawat daytoy nga agpalpalama a pilay iti sagut a napatpateg nga amang ngem ti sumagmamano laeng a babassit a sinsilio. Immimbag!—Aramid 3:2-8.
Nupay da apostol Pedro ken Juan ti ‘nangpatakder’ kenkuana ket iti kasta “napatibker dagiti dapan dagiti sakana,” dida inako nga isuda ti nangpaimbag. Apay a saan? Inlawlawag a mismo ni Pedro: “Lallaki a taga Israel, apay a pagsidsiddaawanyo daytoy, wenno apay a matmatmatandakami a kasla ket babaen ti kabukbukodan a pannakabalin wenno nadiosan a debosion nga isu pinapagnami?” Wen, agpada a binigbig da Pedro ken Juan a saan a babaen ti bilegda no di ket babaen ti nasantuan nga espiritu ti Dios a napasamak dayta.—Aramid 3:7-16; 4:29-31.
Iti daydi a tiempo, adda ti kasta a “mannakabalin nga ar-aramid” a mangpaneknek a supsuportaran ti Dios ti kongregasion Kristiano a nabiit pay idi a nabuangay. (Hebreo 2:4) Ngem kinuna ni apostol Pablo a no natungpalen ti nakairantaan dagitoy, “agsardengdanto.”a (1 Corinto 13:8) Gapuna, awan ti makitatayo itan iti pudno a kongregasion Kristiano nga aniaman nga inanamongan ti Dios a panangpaimbag, padpadto, wenno panangparuar kadagiti demonio.
Ngem kayat kadi a sawen daytoy a saanen nga agtigtignay ti nasantuan nga espiritu ti Dios? Adayo a kasta! Usigentayo ti sumagmamano a pamay-an no kasano ti panagtignay ti espiritu ti Dios idi umuna a siglo ken iti kaaldawantayo.
“Ti Espiritu ti Kinapudno”
Mangipakaammo, manglawag, mangipalgak kadagiti kinapudno. Dayta ti maysa a pamay-an a panagtignay ti nasantuan nga espiritu ti Dios. Idi umad-adanin ti ipapatayna, kinuna ni Jesus kadagiti adalanna: “Adu pay a bambanag ti sawek kadakayo, ngem dikay kabaelan nga awiten ida iti agdama. Nupay kasta, inton dumteng dayta a maysa, ti espiritu ti kinapudno, idalannakayto iti amin a kinapudno.”—Juan 16:12, 13.
Naiparukpok “ti espiritu ti kinapudno” idi Pentecostes 33 K.P. idi nabautisaran iti nasantuan nga espiritu ti agarup 120 nga adalan a naguummong iti makinngato a siled idiay Jerusalem. (Aramid 2:1-4) Maysa ni apostol Pedro kadagiti presente iti dayta a tinawen a piesta. Napno iti nasantuan nga espiritu, “timmakder” ni Pedro ket imbuksilan, wenno inlawlawagna, dagiti kinapudno maipapan ken Jesus. Insalaysayna, kas pagarigan, no kasano a “naitan-ok iti makannawan nga ima ti Dios” “ni Jesus a Nazareno.” (Aramid 2:14, 22, 33) Ti espiritu ti Dios ti nangtignay met ken Pedro a situtured a nangikuna iti kastoy kadagiti Judio nga agdengdengngeg kenkuana: “Ti intero a balay ti Israel ammuenna koma nga awan duadua a ti Dios pinagbalinna nga agpadpada nga Apo ken Kristo, daytoy Jesus nga inlansayo.” (Aramid 2:36) Gapu iti mensahe ni Pedro nga impaltiing ti espiritu, ag-tallo ribu a tao ti “naimpusuan a nangabrasa iti saona” ken nabautisaran. Ti ngarud nasantuan nga espiritu ti Dios ti nangiturong kadakuada iti kinapudno.—Aramid 2:37-41.
Mangisuro ken mangpalagip met ti nasantuan nga espiritu ti Dios. Kinuna ni Jesus: “Ti katulongan, ti nasantuan nga espiritu, nga ibaonto ti Ama iti naganko, dayta a maysa isuronanto kadakayo ti isuamin a bambanag ket ipalagipna ti isuamin a bambanag nga imbagak kadakayo.”—Juan 14:26.
Kasano ti panangisuro ti nasantuan nga espiritu? Impaawat ti espiritu ti Dios kadagiti adalan dagiti banag a nangngegda idi ken Jesus ngem saanda unay a natarusan. Kas pagarigan, ammo dagiti apostol nga idi naisaklang ni Jesus, kinunana iti Romano a gobernador ti Judea a ni Poncio Pilato: “Ti pagariak saan a paset daytoy a lubong.” Ngem kalpasan ti agarup 40 nga aldaw, idi agpalangiten ni Jesus, impagarup pay latta dagiti apostol a maipasdek ditoy daga ti Pagarian. (Juan 18:36; Aramid 1:6) Nalawag nga idi laeng kalpasan a naiparukpok ti nasantuan nga espiritu ti Dios idi Pentecostes 33 K.P. a naawatan a naimbag dagiti apostol ti kayat a sawen ni Jesus.
Mangpalagip met ti espiritu ti Dios. Impalagipna dagiti nadumaduma a pannursuro ni Jesus. Kas pagarigan, iti tulong ti nasantuan nga espiritu, naaddaan iti baro a kaipapanan dagiti padto maipapan iti ipapatay ken panagungar ni Kristo. (Mateo 16:21; Juan 12:16) Ti pananglagipda kadagiti insuro ni Jesus ti nangpatured kadagiti apostol a nangidepensa iti takderda iti sanguanan dagiti ari, mahistrado, ken panguluen ti relihion.—Marcos 13:9-11; Aramid 4:5-20.
Mainayon pay, inturong ti nasantuan nga espiritu ti Dios dagiti nagkauna a Kristiano a mangasaba iti nabunga a teritoria. (Aramid 16:6-10) Tinignay met ti espiritu ti Dios dagiti nagkauna a Kristiano a makiraman iti panangisurat iti Sao ti Dios, ti Biblia, a pakagunggonaan ti intero a sangatauan. (2 Timoteo 3:16) Nalawag ngarud nga agtigtignay ti nasantuan nga espiritu iti nagduduma a wagas idi umuna a siglo. Saan a naipaay dayta tapno laeng maaramid dagiti milagro.
Ti Nasantuan nga Espiritu iti Kaaldawantayo
Agtigtignay met ti nasantuan nga espiritu maipuon kadagiti pudno a Kristiano iti kaaldawantayo. Nabatad daytoy iti maysa a bassit a grupo dagiti agad-adal iti Biblia idiay Allegheny, Pennsylvania, E.U.A., iti maudi a kagudua ti maika-19 a siglo. Kayat idi dagitoy napasnek nga agad-adal iti Biblia a maammuan ti “kinapudno.”—Juan 8:32; 16:13.
Maipapan iti panangbirokna iti Nainkasuratan a kinapudno, kastoy ti kinuna ti maysa a miembro daytoy a grupo, ni Charles Taze Russell: “Inkarkararagko . . . a maikkat koma iti puso ken isipko ti aniaman a di nainkalintegan nga agserbi a tubeng ket iturongnak ti espirituna iti umiso a pannakaawat.” Sinungbatan ti Dios daytoy a napakumbaba a kararag.
Iti naanep a panangsukimat ni Russell ken dagiti kakaduana iti Kasuratan, adu a banag ti naammuanda. Kinuna ni Russell: “Natakuatanmi nga iti las-ud ti adu a siglo, pinagbibingayan dagiti nagduduma a sekta ken partido dagiti doktrina ti Biblia, nga inlaokda dagitoy iti natauan a pattapatta ken kamali.” Nagbanag daytoy iti inawaganna a “napukaw a kinapudno.” Wen, nagaburan dagiti Nainkasuratan a kinapudno iti nakaad-adu a napaganuan a sursuro a nakastrek iti Kakristianuan iti adu a siglo. Ngem desidido ni Russell a mangammo ken mangipakaammo iti kinapudno.
Babaen kadagiti panid ti Zion’s Watch Tower and Herald of Christ’s Presence, situtured a binabalaw ni Russell ken dagiti kakaduana dagiti narelihiosuan a doktrina a di mangisursuro iti pudno maipapan iti Dios. Maisupadi iti isursuro ti kaaduan a relihion, naawatanda a matay ti kararua, a tanem ti pagtungpalantayo no mataytayo, ken ni Jehova ti maymaysa a pudno a Dios ket saan ngarud a paset ti Trinidad.
Ngem kas namnamaenyo, nakapungtot dagiti klero ti Kakristianuan iti kasta a panangibutaktak iti di umiso a sursuro. Gapu ta kayatda a salimetmetan ti kinaturay ken saadda, adu a Katoliko ken Protestante a klero ti nangorganisar kadagiti kampania a nairanta a mangpadakes ken Russell. Ngem saan a naupay ni Russell ken dagiti kakaduana. Nagpannurayda iti panangiwanwan ti espiritu ti Dios. Kinuna ni Russell: “Impanamnama ti Apotayo . . . nga isuronatayo ti nasantuan nga espiritu ti Ama, a naibaon maigapu ken iti panangidawat ni Jesus a Mannubbot, Manangibabaet ken Panguluentayo.” Ket pudno nga insurona ida! Intultuloy dagitoy a napasnek nga Estudiante ti Biblia ti imminum iti nasin-aw a dandanum ti kinapudno iti Biblia ken inwaragawagda dagitoy iti intero a lubong.—Apocalipsis 22:17.
Nasurok a maysa a siglon a madadaan ti organisasion dagiti Saksi ni Jehova iti moderno nga aldaw nga agpapaidalan iti nasantuan nga espiritu ti Dios. Bayat a progresibo a palpalawagen ti espiritu ni Jehova ti naespirituan a panagkitada, situtulok dagiti Saksi a mangaramid iti kasapulan a panagbalbaliw tapno maikomprontar ti panunotda iti napabaro a pannakaawat.—Proverbio 4:18.
“Dakayto Dagiti Saksik”
Impakita ni Jesus ti maysa pay a pannakaiparangarang ti nasantuan nga espiritu ti Dios idi kinunana kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik . . . agingga iti kaadaywan a paset ti daga.” (Aramid 1:8) Matungtungpal agingga ita ti kari ni Jesus nga ipaayanna iti “pannakabalin” ken “nasantuan nga espiritu” dagiti adalanna tapno maitungpalda ti trabaho nga impaannong ti Dios kadakuada.
Kas grupo, agdindinamag dagiti Saksi ni Jehova gapu iti panangasabada. (Kitaenyo ti kahon.) Kinapudnona, ipakpakaammo dagiti Saksi ni Jehova ti mensahe ti kinapudno iti nasurok a 230 a pagilian ken grupo dagiti isla. Iti sidong ti aniaman a kasasaad, uray no agpeggad ti biagda kadagiti lugar nga adda gubat, situtured nga ipakpakaammoda ti Pagarian ti Dios. Ti regtada iti Nakristianuan a ministerio ket nabileg a pakakitaan ti panagtignay ti nasantuan nga espiritu iti kaaldawantayo. Ket nalawag a bembendisionan ni Jehova a Dios ti panagreggetda.
Kas pagarigan, idi napan a tawen, nasurok a maysa a bilion nga oras ti nabusbos iti pannakaikaskasaba ti naimbag a damag ti Pagarian ti Dios. Ania ti resultana? Adda 323,439 a tattao a nangisimbolo iti dedikasionda iti Dios babaen ti panagpabautisarda. Mainayon pay, 4,433,884 a linawas a panagadal iti Biblia iti pagtaengan ti naidaulo kadagiti kabbaro nga interesado a tattao. Amin-amin, 24,607,741 a libro, 631,162,309 a magasin, ken 63,495,728 a broshur ken bokleta ti naipaima. Pudno a maysa daytoy a nabileg a pammaneknek nga agtigtignay ti espiritu ti Dios!
Ti Espiritu ti Dios ken Dakayo
No ipangag ti maysa a tao ti naimbag a damag, agbiag a mayannurot kadagiti pagalagadan ti Dios, ken iyebkasna ti pammatina iti naipaay a subbot, maikkan iti gundaway a maaddaan iti nadalus a takder iti imatang ti Dios. Kadagiti kasta a tattao, kinuna ni apostol Pablo: ‘Ti Dios ikabilna ti nasantuan nga espirituna kadakayo.’—1 Tesalonica 4:7, 8; 1 Corinto 6:9-11.
Adu nga agkakaimbag a bendision ti itden ti pannakaadda iti espiritu ti Dios. Ania a bendision? Kastoy ti kuna ti naipaltiing a Sao ti Dios: “Ti bunga ti espiritu ket ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, [ken] panagteppel.” (Galacia 5:22, 23) Gapuna, ti nasantuan nga espiritu ti Dios ket nabileg a puersa nga agpaay iti naimbag, a tumulong kadatayo a mangiparangarang kadagiti nadiosan a galad.
Maysa pay, no basaenyo ti Biblia ken iyaplikaryo ti maadalyo, matulongannakayo ti espiritu ti Dios a rumang-ay iti sirib, pannakaammo, pannakaawat, panagdesision, ken abilidad nga agpanunot. Naikkan ni Ari Solomon iti “kinasirib ken pannakaawat a kasta unay, ken kinalawa ti puso” agsipud ta ti Dios imbes a dagiti tao ti inkagumaanna nga ay-aywen. (1 Ar-ari 4:29) Yantangay inikkan ni Jehova ni Solomon iti nasantuan nga espiritu, sigurado a dina ipaidam ti nasantuan nga espirituna kadagidiay agtarigagay a mangay-ayo kenkuana ita.
Ti nasantuan nga espiritu ti Dios tulonganna met dagiti Kristiano a mangsaranget ken ni Satanas ken kadagiti demonio, iti daytoy dakes a sistema ti bambanag, ken kadagiti dakes a tarigagay ti managbasol a lasag. Kasano a posible dayta? Sumungbat ni apostol Pablo: “Ta kadagiti amin a bambanag addaanak iti bileg gapu iti daydiay mangted kaniak iti pannakabalin.” (Filipos 4:13) Mabalin a saan nga ikkaten ti nasantuan nga espiritu dagiti pakasuotan wenno sulisog; ngem matulongannakayo a mangibtur kadagita. No agpannuraytayo iti espiritu ti Dios, maaddaantayo iti “pannakabalin a nalablabes ngem ti gagangay” tapno mapagballigiantayo ti aniaman a parikut wenno rigat.—2 Corinto 4:7; 1 Corinto 10:13.
No usigenyo ti amin a pammaneknek, di pagduaduaan nga agtigtignay ita ti nasantuan nga espiritu ti Dios. Ti espiritu ni Jehova ti mangpappapigsa kadagiti adipenna a mangpaneknek maipapan kadagiti naindaklan a panggepna. Agtultuloy a mangipalpalgak kadagiti gilap ti naespirituan a lawag, ken pabilgenna ti pammatitayo, a tulongannatayo nga agtalinaed a nasungdo iti Namarsua kadatayo. Anian a yamantayo ta tinungpal ti Dios ti karina babaen ti panangtedna iti nasantuan nga espiritu kadagiti matalek nga adipenna ita!
[Footnote]
a Kitaenyo ti artikulo nga “Apay a Dagiti Namilagruan a Sagsagut ti Espiritu Nagsardengen?” iti Pagwanawanan a Pebrero 15, 1972, panid 117-22.
[Kahon iti panid 10]
No Ania ti Kuna Dagiti Dadduma Maipapan Kadagiti Saksi ni Jehova
“Bayat a mangtangtangdan dagiti dadduma a relihion kadagiti konsultant a mangawis kadagiti tattao kadagiti simbaan wenno tamtamingenda dagiti agdama nga isyu kas iti homoseksualidad ken aborsion, saan a makikomkompromiso dagiti Saksi iti agbaliwbaliw a lubong. Sistematiko a mangaskasabada pay laeng iti intero a daga.”—The Orange County Register ti Orange County, California, E.U.A.
“No maipapan iti panangisaknap iti pammati, manmano dagiti denominasion a kas kapinget . . . dagiti Saksi ni Jehova.”—The Republic ti Columbus, Indiana, E.U.A.
“Isuda laeng ti mangidandanon iti ‘naimbag a damag’ kadagiti balbalay ken mangyap-aplikar kadagiti prinsipio ti Biblia.”—Życie Literackie, Poland.
“Iti kasaknapan pay laeng a kampania a panangasaba, nairakuraken dagiti Saksi ni Jehova ti mensahe ni Jehova iti intero a lubong.”—News-Observer, Tamaqua, Pennsylvania, E.U.A.
[Dagiti Ladawan iti panid 9]
Ti nasantuan nga espiritu ti Dios lawagannatayo iti naespirituan,
. . . patanorenna dagiti agkakaimbag a Nakristianuan a galad,
. . . ken tulongannatayo iti sangalubongan a trabaho a panangasaba