Adda Kadi Pagimbagan ti Panagkararag?

GISTAY tunggal maysa ti nakarikna a kasapulanna ti agkararag. Kinapudnona, napasnek nga agkarkararag dagiti kameng ti nganngani amin a relihion. Kas pagarigan, maminribu kada aldaw a mabalin nga ikararag ti maysa a Budista ti “Mamatiak ken Amida Buddha.”

Gapu kadagiti agtultuloy a parikut iti intero a lubong, nainkalintegan a saludsoden: Ania ti namnamaen dagiti tattao a maganabda iti panagkararag? Adda kadi pagimbagan dagiti kararag?

Apay nga Agkararag ti Tattao?

Adu a taga Oriente ti agkararag kadagiti inapoda ken kadagiti didiosen ti Shinto wenno Tao. Aramidenda ti kasta tapno makapasada kadagiti eksaminasion idiay eskuelaan, maaddaanda iti naimbag nga apit, wenno tapno saanda nga agsakit. Babaen dagiti kararag, namnamaen dagiti Budista a malawlawaganda. Sipapasnek nga agkararag dagiti Hindu kadagiti kaykayatda a didiosen tapno magun-odda ti pannakaammo, kinabaknang, ken proteksion.

Dadduma a Katoliko ti mangipapan a makatulongda iti sangatauan no ipamaysada ti biagda kas monghe wenno madre kadagiti monasterio wenno kombento, a kanayonda nga aglualo. Minilion a Katoliko ti umararaw ken Maria babaen dagiti naikabesa a lualo, nalabit iti tulong ti rosario. Kadagiti pagilian iti Oriente, adu ti mangus-usar kadagiti prayer wheel (kas iti makitayo iti makinkannigid a ladawan). Baliksen dagiti Protestante ti Kararag ti Apo, nupay iyebkasda met iti Dios ti rikriknada iti bukodda a sasao. Adu a Judio ti agbiahe iti adayo tapno mapanda agkararag iti Makinlaud a Pader idiay Jerusalem, a namnamaenda a mabangon manen ti templo ken dumteng ti baro a panawen ti kinarang-ay ken kinatalna.

Nupay napasnek nga agkarkararag ti minilion a tattao, marigrigatan ti sangatauan kadagiti lumanlanlan a parikut ti kinapanglaw, pannakaadikto, narakrak a pamilia, krimen, ken gubat. Gapu ngata ta saan nga umiso ti kararag dagitoy a tattao? Mainaig iti dayta, talaga kadi nga adda umim-imdeng kadagiti kararag?

Adda Kadi Umim-imdeng Kadagiti Kararag?

Awan serserbi dagiti kararag malaksid no adda mangipangag kadagita. No agkararag ti tao, mangipakita dayta a patienna nga adda espiritu nga agdengdengngeg. Nupay kasta, saan a mayallatiw dagiti kararag babaen dagiti aweng laeng. Adu a tattao ti mamati nga adda maysa a makabasa iti panunot daydiay agkarkararag. Asino ngay dayta?

Dakkel a misterio kadagiti managsirarak no kasano a tumaud dagiti pampanunot kadagiti binilion a neuron a mangbukel iti cerebral cortex ti utektayo. Ngem nainkalintegan a mabasa Daydiay nangdisenio iti utek dagita a pampanunot. Awan sabali no di ti Namarsua kadatayo, ni Jehova a Dios. (Salmo 83:18; Apocalipsis 4:11) Masapul a maiturong dagiti kararag kenkuana. Ngem ipangag kadi ni Jehova ti amin a kararag a maiturong kenkuana?

Maipangag Kadi Amin a Kararag?

Managkararag idi ni David nga ari ti nagkauna nga Israel. Kas pinaltiingan ti Dios a salmista, inkantana: “O sika a dumngeg iti kararag, kenka ti umayandanto dagiti amin a lasag.” (Salmo 65:2) Maawatan ni Jehova ti kararag a nayebkas iti aniaman kadagiti rinibu a pagsasao ti sangatauan. Nupay awan ti utek ti tao a makalaon iti kasta a kaadu nga impormasion, dina kayat a sawen a di kabaelan ti Dios nga imdengan ti amin nga agkararag kenkuana iti pamay-an nga anamonganna.

Ngem ni Jesu-Kristo​—a managkararag met idi a tao​—impalgakna a saan nga amin a kararag ket makaay-ayo iti Dios. Paliiwenyo ti kinuna ni Jesus maipapan iti kadawyan idi nga aramid a panangulit-ulit kadagiti naikabesa a lualo. Sigun iti Jerusalem Bible dagiti Katoliko, kinunana: “No agkararagkayo dikay tumanawtaw a kas iti ar-aramiden dagiti pagano, ta ipagarupda a maipangagda no usarenda ti adu a sasao.” (Mateo 6:7) Saantay a manamnama nga ipangag ni Jehova dagiti kararag a di mangyebkas iti pudpudno a rikriknatayo.

No apay a di makaay-ayo iti Dios ti dadduma a kararag, impasimudaag ti maysa a proverbio ti Biblia: “Ti di mangyallingag iti lapayagna iti panangdengngegna iti linteg, uray pay ti kararagna makarimon.” (Proverbio 28:9) Kuna ti sabali pay a proverbio: “Ni Jehova adayo kadagiti nadangkes; ngem ipangagna ti kararag dagiti nalinteg.” (Proverbio 15:29) Idi nakabasol iti nadagsen dagiti panguluen ti nagkauna a Juda, kinuna ni Jehova: “Intono itayagyo dagiti im-imayo, ilingedkonto dagiti matak kadakayo; wen, intono agaramidkayo kadagiti adu a lualo, diakto ipangag; dagiti im-imayo napnoda iti dara.”​—Isaias 1:1, 15.

Dinakamat ni apostol Pedro ti maysa pay a makagapu a di ipangag ti Dios dagiti kararag. Insurat ni Pedro: “Dakayo nga assawa a lallaki, agtultuloykayo a makipagtaeng [kadagiti assawayo] iti umasping a pamay-an maitunos iti pannakaammo, nga itudinganyo ida iti dayaw a kas iti maysa a narasrasi a basehas, ti nababaian, yantangay makipagtawidkayo met kadakuada iti di kaikarian a parabur ti biag, tapno saan koma a malappedan dagiti kararagyo.” (1 Pedro 3:7) Saan a maipangag dagiti kararag ti tao a mangyaleng-aleng iti kasta a balakad!

Nalawag nga adda dagiti pagannurotan a masapul a maragpat tapno maipangag dagiti kararag. Nupay kasta, adu nga agkarkararag ti di mangikankano kadagiti kalikaguman ti Dios kadatayo. Dayta ti makagapu a saan a simmayaat ti lubong iti laksid dagiti napasnek a kararag.

Ania ngarud ti kalikaguman ti Dios tapno maipangag dagiti kararagtayo? Ti sungbat ket mainaig iti mismo a panggep ti kararagtayo. Kinapudnona, no kayattay a maammuan no adda met laeng pagimbagan dagiti kararag, masapul a matarusantay ti panggepda. Apay a pinagbalin ni Jehova a posible para kadatayo ti makisarita kenkuana?

[Picture Credit Line iti panid 3]

G.P.O., Jerusalem