Datayo ti Kita nga Addaan Pammati

Panangikasaba iti Pagarian iti Altiplano Idiay Peru

ITI nagbaetan ti makindaya ken makinlaud a kabambantayan ti Andes Mountains​—iti beddeng ti Bolivia ken Peru​—masarakan ti Altiplano. “Nangato a patad,” wenno “tanap,” ti kayulogan ti naganna. Nalawa ti pasetna a masakupan ti Bolivia.

Ti Altiplano ket 100 kilometro ti kalawana, nasurok a 1,000 kilometro ti kaatiddogna, ken agarup 3,700 metro ti promedio a kangatona manipud iti patar ti baybay. No ageroplanokayo sadiay manipud iti igid ti baybay a kabesera ti Peru, ti siudad ti Lima, malabsanyo ti naabbungotan iti niebe nga El Misti, ti bulkan a 5,822 metro ti katayagna a dumanon iti ulep. Masaripatpatan dagiti naabbungotan iti niebe a pantok ti Nevado Ampato ken Nevado Coropuna a nasurok nga 6,000 metro ti katayagda. Sa giddato a matannawagan ti nalawa a tanap​—ti Altiplano iti makin-abagatan a paset ti Peru.

Kabesera ti Peruvian Altiplano ti Puno, a masarakan iti makin-amianan a laud a pungto ti Lake Titicaca, ti kangatuan a danaw iti lubong a mabalin a pagdaliasatan. Gapu ta nasurok a 3 kilometro ti kangato dayta a rehion, mabayag bassit sa mairuam dagiti bisita iti nalamiis a puyupoy ti angin. Agnanaed iti igid ti Lake Titicaca dagiti Indian a Quechua ken Aymara. Masarakan ida a nakakawes iti natayengteng a nalabaga, berde, wenno asul nga agtartrabaho kadagiti chacras, wenno babassit a talon. Nupay Español ti kangrunaan a lenguahe idiay Peru, agsasao met iti Quechua ken Aymara dagiti taga Altiplano.

Panangidaulo iti Panangasaba

Iti di pay nabayag, adu kadagiti napakumbaba ken nagaget nga umili a Quechua ken Aymara ti pagsasaona ti nakagun-od iti umiso a pannakaammo iti kinapudno manipud iti Biblia. Maigapu daytoy a nangnangruna iti nabaknang a pammendision ni Jehova iti kinapinget dagiti amin-tiempo a manangiwaragawag iti Pagarian nga agserserbi kas special pioneer.

Kas pagarigan, naibaon da José ken Silvia kas special pioneer idiay ili ti Putina, agarup 50 kilometro manipud Lake Titicaca. Iti las-ud ti dua a bulan, nakaidaulo ni Silvia iti 16 a panagadal iti Biblia iti pagtaengan, ken 14 ti inyadalan ni José. Kalpasan laeng ti innem a bulan, nagbalin nga 41 ti 23 a bilang dagiti agibumbunannag ti kongregasion. Kabayatanna, ti 48 a bilang dagiti makigimgimong ket dimmanon iti 132, ti kangatuan pay laeng a bilang.

“Iti panangyurnos kadagiti gimong ti kongregasion kadagitoy naiputputong a purok,” kuna ni José, “nakitami a nasayaat a mairugi babaen ti Palawag Publiko ken Panagadal iti Libro ti Kongregasion. Nalaklaka a maawis dagiti kabbaro nga interesado a tumabuno kadagitoy a gimong.”

Dua a babbai nga agkabsat​—maysa ti payunir​—ti damo a nangidanon iti naimbag a damag iti naiputputong a purok ti Muñani, agarup 20 kilometro manipud idiay Putina. Sadiay nga inyadalanda iti Biblia ti maysa a bulsek a managan Lucio.a Inawis ni Lucio ni adingna a Miguel, maysa a Katoliko a misionero a laigo ken lider iti kabangibang a purok. Idi sinaludsodan ti gayyemna no apay a linawas idiay Muñani, kinuna ni Miguel a mapmapan sadiay tapno agsursuro iti maipapan ken Jehova ken ti Saona. Idin naisaludsodda: “Apay a ditay agadal iti Biblia ditoy?” Gapu ta interesado dagiti kapurokan ni Miguel, inyurnos a dagus dagiti Saksi ti pannakaangay dagiti gimong sadiay.

Inranud ni Miguel kadagiti dadduma ti naadalna. Ngem ti ngay saadna kas Katoliko a misionero a laigo ken teniente gobernador? Iti naminsan a miting dagiti pumurok, impakaammona ti panaglusulosna kas Katoliko a misionero. Masapul aya a mangdutokda iti sabali? Adda agdengdengngeg a nagkuna: “Apay a masapul pay la ti sabali a misionero idinto ta kinapudno ti maad-adaltayo?” Siempre, tuktukoyenna dagiti bambanag nga isursuro dagiti Saksi ni Jehova. Kinuna pay ti maysa: “Dikam umanamong a siksika la ti aglusulos. Apay a ditay aglusulos amin?” Ket amin a timmabuno sangsangkatunos nga impukkawda: “Aglusulostayon!”

Iti simmaganad a miting dagiti pumurok, nagsasaritaanda ti maipanggep kadagiti imahen ken krusipiho. Maysa a lalaki ti nangibaga a basaenda amin ti Deuteronomio 7:25, a kunana: “Ti kinitikitan a ladladawan dagiti didiosda puoranyonto ida iti apuy: dikanto aguman ti pirak wenno balitok, a kalupkopda, dikanto met alaen ida a maipaay kenka, di la ket ta masiloanka kadagita: ta dayta ti makarimon ken Jehova a Diosmo.”

Kalpasanna, kiniddaw ti lalaki a dagiti umanamong a mapuoran ti amin nga imahen itayagda ti imada. Sangsangkamaysada a nangitayag a dagus iti imada. (Aramid 19:19, 20) Ita, 23 kadagiti 25 a pamilia iti purok ti agad-adal iti Sao ti Dios. Dua ti agserserbi kas di bautisado nga agibumbunannag, ken lima a pagassawaan ti nakaplano nga agkasar tapno nadalusda iti imatang ni Jehova.​—Tito 3:1; Hebreo 13:4.

Panagusar iti Cassette Recording iti Panangisuro

Gapu ta adu ti di makabael nga agbasa ken agsurat idiay Altiplano, dakkel ti maitulong dagiti video ken cassette recording ti Watch Tower a naipatarus kadagiti pagsasao idiay a lugar​—uray iti panangyadal iti Biblia iti pagtaengan. Maysa nga special pioneer a managan Dora ti mangyad-adal iti broshur nga Ania ti Kalikaguman ti Dios Kadatayo? babaen ti panangusarna iti audio cassette. Kada maipangngegna ti maysa a parapo, saludsodanna ti agad-adal iti Biblia mainaig iti kalkalpasda a nangngeg.

Kanayon nga ibrodkas ti estasion ti radio idiay a lugar dagiti linaon ti broshur a Kalikaguman iti pagsasao a Quechua. Kasta met ti maar-aramid kadagiti linaon ti magasin nga Agriingkayo! iti Español. Gapuna, nagbalin a pamiliar ti mensahe ti Pagarian iti adu nga umili ken kayatda ti makasursuro pay no sumarungkar dagiti Saksi ni Jehova iti pagtaenganda.

Ti Altiplano ket saan a makaawis iti kaaduan a tattao ngem saan dayta a mailinged iti imatang ti Dios. Gapu iti ayat ni Jehova iti sangatauan, adu a tattao iti kabambantayan ti Altiplano idiay Andes ti makitimtimpuyogen iti bunggoy a mangitantan-ok iti nadayag a balay ti pudno a panagdayaw.​—Haggeo 2:7.

[Footnote]