Ebanghelisador ti Amin a Pudno a Kristiano
“Kantaanyo ni Jehova, bendituenyo ti naganna. Iti inaldaw-aldaw ibagayo ti naimbag a damag ti panangisalakanna.”—SALMO 96:2.
1. Ania a naimbag a damag ti masapul a mangngeg dagiti tattao, ket kasano a naisangsangayan dagiti Saksi ni Jehova no maipapan iti panangisaknap iti kasta a damag?
ITI lubong nga inaldaw ti didigra, pudno a makaliwliwa a maammuan ti ipalgak ti Biblia nga asidegen nga agpatingga ti gubat, krimen, bisin, ken pannakairurumen. (Salmo 46:9; 72:3, 7, 8, 12, 16) Saan kadi a naimbag a damag dayta a masapul a mangngeg ti tunggal maysa? Kasta ti panangmatmat dagiti Saksi ni Jehova. Iti sadinoman, agdindinamagda a mangikaskasaba “iti naimbag a damag ti maysa a banag a nasaysayaat.” (Isaias 52:7) Pudno, adu a Saksi ti naidadanes gapu iti determinasionda a mangipakaammo ti naimbag a damag. Ti ngamin pagimbagan ti tattao ti pampanunotenda. Anian a kinaregta ken kinapinget ti pinaneknekan dagiti Saksi!
2. Ania ti maysa a rason a naregta dagiti Saksi ni Jehova?
2 Ti kinaregta dagiti Saksi ni Jehova ita ket mayasping iti regta dagiti Kristiano idi umuna a siglo. No maipapan kadakuada, umiso ti kinuna ti pagiwarnak ti Romano Katoliko a L’Osservatore Romano: “Apaman a nabautisaran dagiti immuna Kristiano, nariknada a pagrebbenganda nga irakurak ti Ebanghelio. Dagiti adipen insarsaritada ti Ebanghelio.” Apay a nakaregregta dagiti Saksi ni Jehova, kas kadagidi nagkauna a Kristiano? Umuna, naggapu a mismo ken Jehova a Dios ti naimbag a damag nga ipabpablaakda. Adda pay kadi nasaysayaat a pakaigapuan ti kinaregtada? Mangaskasabada maitunos iti kuna ti salmista: “Kantaanyo ni Jehova, bendituenyo ti naganna. Iti inaldaw-aldaw ibagayo ti naimbag a damag ti panangisalakanna.”—Salmo 96:2.
3. (a) Ania ti maikadua a rason a naregta dagiti Saksi ni Jehova? (b) Ania ti nairaman iti “panangisalakan [ti Dios]”?
3 Ti sasao ti salmista ti mangipalagip kadatayo iti maikadua a rason no apay a naregta dagiti Saksi ni Jehova. Ti mensaheda ket maipapan iti pannakaisalakan. Adda dagiti agtartrabaho iti tay-ak ti medisina, kagimongan, ekonomia, wenno dadduma pay tapno mapasayaatda ti kasasaad ti biag dagiti padada a tao, ket makomendaran dagita a panagregget. Ngem limitado unay ti aniaman a maaramidan ti maysa a tao iti padana no idilig iti “panangisalakan [ti Dios].” Babaen ken Jesu-Kristo, ispalen ni Jehova dagiti naemma manipud iti basol, sakit, ken ipapatay. Agbiag nga agnanayon dagidiay maispal! (Juan 3:16, 36; Apocalipsis 21:3, 4) Ita, ti pannakaisalakan ti maysa kadagiti ‘nakaskasdaaw nga aramid’ nga ipakpakaammo dagiti Kristiano kas panagtignayda iti sasao a: “Ti dayag [ti Dios] ideklarayo kadagiti nasion, kadagiti amin nga ili ti nakaskasdaaw nga ar-aramidna. Ta ni Jehova naindaklan ken maidaydayaw iti kasta unay. Isu nakaam-amak iti ngatuen dagiti amin a sabali a didios.”—Salmo 96:3, 4.
Ti Ulidan ti Apo
4-6. (a) Ania ti maikatlo a rason a naregta dagiti Saksi ni Jehova? (b) Kasano nga impakita ni Jesus ti kinaregtana a mangikasaba iti naimbag a damag?
4 Naregta dagiti Saksi ni Jehova gapu iti maikatlo a rason. Sursurotenda ti ulidan ni Jesu-Kristo. (1 Pedro 2:21) Dayta a perpekto a tao naimpusuan nga inawatna ti annongen a “mangibaga iti naimbag a damag kadagidiay naemma.” (Isaias 61:1; Lucas 4:17-21) Nagbalin ngarud nga ebanghelisador, a mangipakpakaammo iti naimbag a damag. Sinursorna ti Galilea ken Judea tapno ‘ikasabana ti naimbag a damag ti pagarian.’ (Mateo 4:23) Ket gapu ta ammona nga adu ti mangipangag iti dayta a naimbag a damag, kinunana kadagiti adalanna: “Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.”—Mateo 9:37, 38.
5 Maitunos iti kararagna, sinanay ni Jesus ti dadduma nga agbalin nga ebanghelisador. Idi agangay, imbaonna dagiti apostolna a bukbukodda ket kinunana kadakuada: “Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” Saan aya a nasaysayaat koma no nangyurnosda laengen kadagiti programa a mangrisut kadagiti agdama idi a parikut ti kagimongan? Wenno nakipasetda koma iti politika tapno pasardengenda ti agraraira idi a panagkunniber? Saan. Imbes ketdi, impasdek ni Jesus ti pagalagadan iti amin a Kristiano nga ebanghelisador idi kinunana kadagiti pasurotna: “Bayat a mapankayo, mangasabakayo.”—Mateo 10:5-7.
6 Kalpasanna, imbaon ni Jesus ti sabali a grupo dagiti adalan a mangiwaragawag: “Ti pagarian ti Dios immasidegen.” Idi nagawidda tapno ipadamagda ti balligi ti panangasabada, naragsakan unay ni Jesus. Inkararagna: “Idaydayawka iti publiko, Ama, Apo ti langit ken daga, agsipud ta dagitoy a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga.” (Lucas 10:1, 8, 9, 21) Dagiti adalan ni Jesus, a dati a nagaget a mangngalap, mannalon, ken dadduma pay, ket nayarig kadagiti maladaga no idilig kadagiti nangato ti adalda a relihioso a papangulo iti nasion. Ngem nasursuruan dagiti adalan a mangiwaragawag iti kasayaatan pay la a naimbag a damag.
7. Idi nagpalangit ni Jesus, siasino ti immuna a kinasabaan dagiti pasurotna maipapan iti naimbag a damag?
7 Idi nagpalangit ni Jesus, nagtultuloy dagiti pasurotna a nangirakurak iti naimbag a damag ti pannakaisalakan. (Aramid 2:21, 38-40) Siasino ti immuna a kinasabaanda? Napanda kadi kadagiti nasion a di makaam-ammo iti Dios? Saan. Nangasabada nga umuna idiay Israel, ti ili a makaam-ammo ken Jehova iti nasurok a 1,500 a tawenen. Adda kadi karbenganda a mangasaba iti nasion a datin nga agdaydayaw ken ni Jehova? Wen. Kinuna ni Jesus kadakuada: “Dakayto dagiti saksik agpadpada idiay Jerusalem ken iti intero a Judea ken Samaria ken agingga iti kaadaywan a paset ti daga.” (Aramid 1:8) Masapul a mangngeg ti Israel ti naimbag a damag kas iti dadduma a nasion.
8. Kasano a tultuladen ita dagiti Saksi ni Jehova dagiti pasurot ni Jesus idi umuna a siglo?
8 Umasping iti dayta, mangaskasaba ita dagiti Saksi ni Jehova iti intero a daga. Makidangdanggayda iti anghel a nakita ni Juan nga “addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili.” (Apocalipsis 14:6) Iti tawen 2001, aktiboda iti 235 a daga ken teritoria, agraman kadagiti gagangay a mamatmatan a Kristiano a pagilian. Saan kadi a maiparbeng a mangasaba dagiti Saksi ni Jehova kadagiti lugar a nakaipasdek ti Kakristianuan kadagiti iglesiana? Kasta ti panangmatmat ti dadduma ken mabalin nga ibilangda ti kasta a panagebanghelio kas “panagtakaw iti karnero.” Nupay kasta, silalagip dagiti Saksi ni Jehova iti pannakaseknan ni Jesus kadagidiay nasingpet a Judio idi kaaldawanna. Nupay adda papadi idi panawenda, saan a nagkedked ni Jesus a nangipakaammo kadakuada ti naimbag a damag. “Simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” (Mateo 9:36) No masarakan dagiti Saksi ni Jehova dagiti nasingpet a tattao a di makaam-ammo ken Jehova ken iti Pagarianna, dida kadi ipakaammo ti naimbag a damag kadakuada gapu ta addan sabali a relihionda? Saan ti sungbattayo, kas panangsurot iti ulidan dagiti apostol ni Jesus. Nasken a maikasaba ti naimbag a damag “kadagiti amin a nasion,” nga awan ti maipuera.—Marcos 13:10.
Nagebanghelio Amin a Nagkauna a Kristiano
9. Idi umuna a siglo, siasino kadagiti kameng ti kongregasion Kristiano ti nakiraman iti panangasaba?
9 Siasino ti nakiraman iti panangasaba idi umuna a siglo? Ipakita ti kinapudno a nagebanghelio ti amin a Kristiano idi. Kuna ti autor a ni W. S. Williams: “Pagaammo idi nga amin a Kristiano iti nagkauna nga Iglesia . . . inkasabada ti ebanghelio.” Maipapan kadagiti pasamak idi aldaw ti Pentecostes 33 K.P., kuna ti Biblia: “[Dagiti lallaki ken babbai] napnoda amin iti nasantuan nga espiritu ket nangrugida nga agsao iti nagduduma a pagsasao, kas iti impaay kadakuada ti espiritu tapno sawenda.” Karaman kadagiti nangasaba dagiti lallaki ken babbai, ubbing ken nataengan, adipen ken siwayawaya a tao. (Aramid 1:14; 2:1, 4, 17, 18; Joel 2:28, 29; Galacia 3:28) Idi napilitan a pumanaw ti adu a Kristiano idiay Jerusalem gapu iti pannakaidadanes, “dagidiay naiwarawara nagsaknapda iti daga nga idekdeklarada ti naimbag a damag ti sao.” (Aramid 8:4) Nangasaba amin “dagidiay naiwarawara,” saan laeng a ti sumagmamano a nadutokan.
10. Ania ti dua nga annongen a naibanag sakbay ti pannakadadael ti sistema dagiti Judio?
10 Kasta ti kasasaad kadagidi a panawen. Impadto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Iti kaitungpalan dayta a padto idi umuna a siglo, naisaknap ti naimbag a damag sakbay a dinadael dagiti buyot ti Roma ti narelihiosuan ken napolitikaan a sistema dagiti Judio. (Colosas 1:23) Kanayonanna, tinungpal ti amin a pasurot ni Jesus ti bilinna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Dagiti nagkauna a Kristiano dida ginutugot a mamati ken Jesus dagiti naemma sada binaybay-an lattan dagitoy, kas ar-aramiden ita ti dadduma a relihion. Imbes ketdi, sinuruanda dagitoy nga agbalin nga adalan ni Jesus, a grinupogrupoda kadagiti kongregasion, ket sinanayda a mangasaba ken mangaramid kadagiti adalan. (Aramid 14:21-23) Sursuroten ita dagiti Saksi ni Jehova dayta a pagwadan.
11. Siasino ita ti makiramraman iti panangipakaammo iti kasayaatan a damag iti sangatauan?
11 Kas panangsurot iti ulidan da Pablo, Bernabe ken dadduma pay a nagbiag idi umuna a siglo, adu a Saksi ni Jehova ti nagmisionero kadagiti sabali a pagilian. Pudno a makagunggona ti trabahoda, yantangay dida nakiraman iti politika wenno iti dadduma pay a banag a maisupadi iti panangikasaba iti naimbag a damag. Nagtulnogda iti bilin ni Jesus: “Bayat a mapankayo, mangasabakayo.” Ngem saan a misionero iti sabali a pagilian ti kaaduan a Saksi ni Jehova. Adu kadakuada ti mangmangged iti sekular, ket dadduma ti ages-eskuela. Adda dagiti pamiliado. Ngem ikaskasaba ti amin a Saksi ti naimbag a damag a naadalda. Ubbing ken natataengan, lallaki ken babbai, siraragsak nga aramidenda ti idagdagadag ti Biblia: “Ikasabam ti sao, naganetgetka koma iti dayta iti mainugot a panawen, iti nariribuk a panawen.” (2 Timoteo 4:2) Kas kadagiti Kristiano idi umuna a siglo, itultuloyda nga “awan sarday a mangisuro ken mangideklara iti naimbag a damag maipapan iti Kristo, a ni Jesus.” (Aramid 5:42) Ipakpakaammoda ti kasayaatan a damag iti sangatauan.
Proselitismo Wenno Panagebanghelio?
12. Ania ti proselitismo, ket ania ti agdama a panangmatmat iti dayta?
12 Ti Griego a sao a pro·se’ly·tos kaipapananna maysa a “nakomberte.” Dayta ti naggapuan ti Iloko a sao a “proselitismo” a kaipapananna “panangkomberte.” Kadagitoy a panawen, kuna ti dadduma a dakes ti proselitismo. Maysa a dokumento nga impablaak ti World Council of Churches ti nangdakamat pay ketdi iti “basol a proselitismo.” Apay? Kuna ti Catholic World Report: “Gapu iti awan sardayna a reklamo ti Orthodox Church, namatmatan ti ‘proselitismo’ a kas puersado a panangkomberte.”
13. Ania ti sumagmamano a pagarigan ti dakes a proselitismo?
13 Dakes kadi ti proselitismo? Mabalin. Kinuna ni Jesus a ti proselitismo nga ar-aramiden idi dagiti eskriba ken Fariseo ket pagdaksan dagiti nakomberteda. (Mateo 23:15) Wen, saan nga umiso ti “puersado a panangkomberte.” Sigun iti historiador a ni Josephus, kas pagarigan, idi a ni John Hyrcanus a Macabeo pinarmekna dagiti Idumeano, “impalubosna nga agtalinaedda iti pagilianda la ketdi no agpakugitda ken situtulokda nga agtungpal kadagiti linteg dagiti Judio.” No kayat dagiti Idumeano ti agbiag iti sidong ti turay dagiti Judio, masapul nga alagadenda ti pammati dagiti Judio. Ibaga kadatayo dagiti historiador nga idi maikawalo a siglo K.P., pinarmek ni Carlomagno dagiti pagano a Saxon iti amianan a Europa ket siraranggas a pinuersada ida a kinomberte.a Ngem kasano kapasnek dagiti nakomberte a Saxon wenno Idumeano? Kas pagarigan, ti kadi Idumeano nga ari a ni Herodes naimpusuan ti panagtulnogna iti Linteg ni Moises nga impaltiing ti Dios idinto ta ginandatna nga ipapatay ti maladaga idi a Jesus?—Mateo 2:1-18.
14. Ania dagiti pamay-an ti dadduma a misionero ti Kakristianuan tapno mapilitan ti tattao nga agpakomberte?
14 Nainkapilitan kadi ti panangkomberte ita? Kasta ti dadduma no an-anagen. Adda dagiti misionero ti Kakristianuan a naipadamag a mangituktukon iti panagbalin nga eskolar iti ballasiw-taaw para kadagiti agpakomberte. Wenno kalikagumanda nga agdengngeg iti sermonda ti maysa a mabisbisinan a refugee tapno makaala iti rasion a taraon. Sigun iti sasao a nayebkas iti maysa a kombension dagiti obispo ti Orthodox idi 1992, “no dadduma agusar ti proselitismo iti material a banag kas panggargari ken nadumaduma a kita ti kinaranggas.”
15. An-annuroten kadi dagiti Saksi ni Jehova ti proselitismo sigun iti moderno a kayulogan dayta a sao? Ilawlawagyo.
15 Saan nga umiso ti panangpilit kadagiti tattao a baliwanda ti relihionda. Saan a kasta ti pamay-an dagiti Saksi ni Jehova.b Gapuna, dida an-annuroten ti proselitismo sigun iti moderno a kayulogan dayta a sao. Imbes ketdi, kas kadagiti Kristiano idi umuna a siglo, ikasabada ti naimbag a damag iti isuamin. Asinoman a boluntario a dumngeg ket maawis a gumun-od iti kanayonan a pannakaammo babaen ti panagadal iti Biblia. Masursuro dagita nga interesado a tattao ti maaddaan iti pammati—a naan-anay a naibatay iti umiso a pannakaammo iti Biblia—iti Dios ken kadagiti panggepna. Kas resultana, umawagda iti nagan ti Dios a Jehova agpaay iti pannakaisalakan. (Roma 10:13, 14, 17) Adda kadakuada no ipangagda ti naimbag a damag wenno saan. Awan ti pinnilitan; ta no adda, awan serserbi ti pannakakomberte. Tapno makaay-ayo iti Dios, masapul a naimpusuan ti panagdayaw.—Deuteronomio 6:4, 5; 10:12.
Panagebanghelio iti Moderno a Panawen
16. Kasano ti panagrang-ay ti trabaho a panangasaba dagiti Saksi ni Jehova iti moderno a panawen?
16 Iti moderno a panawen, ikaskasaba dagiti Saksi ni Jehova ti naimbag a damag ti Pagarian kas dakdakkel a kaitungpalan ti Mateo 24:14. Ti magasin a Pagwanawanan ti maysa a kangrunaan nga instrumento iti panangasabada.c Idi naipablaak ti umuna nga isyu Ti Pagwanawanan idi 1879, nayimprenta ti agarup 6,000 a kopia iti maymaysa a pagsasao. Iti tawen 2001, kalpasan ti nasurok a 122 a tawen, nayimprenta iti 23,042,000 a kopia iti 141 a pagsasao. Maitunos iti dayta nga iyaadu, rimmang-ay ti trabaho a panangasaba dagiti Saksi ni Jehova. Pagdiligenyo ti sumagmamano a ribu nga oras a nabusbos iti panangasaba iti kada tawen idi maika-19 a siglo ken ti 1,169,082,225 nga oras a nausar iti panangasaba iti tawen 2001. Usigenyo ti 4,921,702 a promedio a libre a mayad-adalan iti Biblia iti kada bulan. Anian a nagdakkel ti nairingpas a trabaho! Ket imbanag dayta ti 6,117,666 nga aktibo a mangikaskasaba iti Pagarian.
17. (a) Ania a kita dagiti didiosen ti maidaydayaw ita? (b) Aniaman ti pagsasao, nasionalidad, wenno takderda iti kagimongan, ania ti nasken a maammuan ti tunggal maysa?
17 Kuna ti salmista: “Amin dagiti didios ti il-ili didiosda nga awanan pateg; ngem no maipapan ken Jehova, inaramidna ti mismo a langlangit.” (Salmo 96:5) Iti agdama a sekular a lubong, maidaydayaw ti nasionalismo, simbolo ti pagilian, natan-ok a tattao, material a bambanag, ken uray ti mismo a kinabaknang. (Mateo 6:24; Efeso 5:5; Colosas 3:5) Kinuna ni Mohandas K. Gandhi: “Mamatiak unay . . . a manmano laengen ita ti Kristiano idiay Europa. Ni Mammon [kinabaknang] ti pudno a daydayawenda.” Iti kinapudnona, masapul a maikasaba ti naimbag a damag iti sadinoman. Tunggal maysa, aniaman ti pagsasao, nasionalidad, wenno takderna iti kagimongan, masapul a maammuanna ti maipapan ken ni Jehova ken kadagiti panggepna. Sapay koma ta ipangag ti amin ti kuna ti salmista: “Ipaayyo ken Jehova ti dayag ken pigsa. Ipaayyo ken Jehova ti dayag a kukua ti naganna”! (Salmo 96: 7, 8) Dagiti Saksi ni Jehova ket tumultulong kadagiti sabsabali nga agadal maipapan ken Jehova tapno siuumiso a maipadayagda ti Dios. Dakkel ti magunggona dagidiay mangipangag. Ania ti magunggonada? Mausig dagita iti sumaruno nga artikulo.
[Footnotes]
a Sigun iti The Catholic Encyclopedia, kabayatan ti Repormasion ti panangipilit iti relihion kadagiti tattao ket nagminar iti daytoy a pagsasao: Cuius regio, illius et religio (Ti anagna: “No asino ti agturay iti pagilian, isu ti mangikeddeng no ania ti relihion ti pagilian.”)
b Iti maysa a miting ti United States International Religious Freedom Commission idi Nobiembre 16, 2000, pinagduma ti maysa a timmabuno ti trabaho dagiti Saksi ni Jehova ken dagidiay puersado a mangkomkomberte. Naikuna a no mangasaba dagiti Saksi ni Jehova kadagiti sabsabali, aramidenda dayta iti wagas a mabalin latta a kunaen ti tao, “Diak interesado,” ket iserrana ti ridaw.
c Ti kompleto a paulo ti magasin ket Ti Pagwanawanan Mangibumbunannag iti Pagarian ni Jehova.
Kasanoyo nga Ilawlawag?
• Apay a naregta nga ebanghelisador dagiti Saksi ni Jehova?
• Apay a mangasaba dagiti Saksi ni Jehova uray kadagiti lugar a nakaipasdek ti Kakristianuan kadagiti iglesiana?
• Apay a dagiti Saksi ni Jehova dida an-annuroten ti proselitismo sigun iti moderno a kayulogan dayta a sao?
• Kasano ti panagrang-ay ti trabaho a panangasaba dagiti Saksi ni Jehova iti moderno a panawen?
[Ladawan iti panid 9]
Naregta nga ebanghelisador ni Jesus ket sinanayna ti dadduma a mangaramid iti dayta a trabaho
[Ladawan iti panid 10]
Nangasaba amin a kameng ti kongregasion idi umuna a siglo
[Ladawan iti panid 11]
Saan nga umiso ti panangpilit kadagiti tattao a baliwanda ti relihionda