Dagiti Bendision nga Iyeg ti Naimbag a Damag

“Ni Jehova pinulotannak a mangibaga iti naimbag a damag kadagidiay naemma. Imbaonnak a mangpatapat iti nasnaayan iti pusona, . . . a mangliwliwa kadagidiay amin nga agledleddaang.”​—ISAIAS 61:1, 2.

1, 2. (a) Inyam-ammo ni Jesus ti bagina kas ti ania, ken kasano? (b) Aniada a bendision ti iyeg ti naimbag a damag nga impakaammo ni Jesus?

ITI maysa a Sabbath idi rugrugi ti ministeriona, adda ni Jesus iti sinagoga ti Nazaret. Sigun iti rekord, “nayawat kenkuana ti lukot ni mammadto nga Isaias, ket inukradna ti lukot ket nasarakanna ti lugar a nakaisuratan daytoy: ‘Ti espiritu ni Jehova adda kaniak, agsipud ta pinulotannak a mangideklara ti naimbag a damag.’” Binasa ni Jesus ti dadduma pay a padto iti kasuratan. Kalpasanna, nagtugaw ket kinunana: “Ita nga aldaw daytoy a kasuratan a kangkangngegyo natungpalen.”​—Lucas 4:16-21.

² Iti daytoy a wagas, inyam-ammo ni Jesus ti bagina kas ti naipadto nga ebanghelisador, ti mangipakaammo iti naimbag a damag ken mangyeg iti liwliwa. (Mateo 4:23) Ket nagimbag la ketdi ti damag nga impakaammo ni Jesus! Kinunana kadagiti agdengdengngeg: “Siak ti silaw ti lubong. Ti sumurot kaniak saanto a pulos magna iti sipnget, no di ket ikutannanto ti silaw ti biag.” (Juan 8:12) Kinunana pay: “No agtalinaedkayo iti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.” (Juan 8:31, 32) Wen, addaan ni Jesus “iti sasao ti agnanayon a biag.” (Juan 6:68, 69) Silaw, biag, wayawaya​—awan duadua a bendision dagitoy a nasken a tagipatgen!

3. Ania a naimbag a damag ti insuro dagiti adalan ni Jesus?

³ Kalpasan ti Pentecostes 33 K.P., intultuloy dagiti adalan ti trabaho ni Jesus a panagebanghelio. Inkasabada ti “naimbag a damag ti pagarian” kadagiti Israelita ken kadagiti tattao iti nasnasion. (Mateo 24:14; Aramid 15:7; Roma 1:16) Dagidiay nangipangag naammuanda ti maipapan ken Jehova a Dios. Nawayawayaanda iti narelihiosuan a pannakaadipen ket nagbalinda a paset ti baro a naespirituan a nasion, “ti Israel ti Dios,” a dagiti kamengna addaanda iti namnama a makipagturay nga agnanayon iti Apoda, ni Jesu-Kristo, idiay langit. (Galacia 5:1; 6:16; Efeso 3:5-7; Colosas 1:4, 5; Apocalipsis 22:5) Anian nga agkakaimbag dagita a bendision!

Panagebanghelio Ita

4. Kasano a matungtungpal ita ti bilin a maikasaba ti naimbag a damag?

⁴ Iti tulong ti umad-adu a “dakkel a bunggoy” ti “sabsabali a karnero,” itultuloy ita dagiti napulotan a Kristiano nga itungpal ti naimpadtuan a bilin nga orihinal a naipaannong ken Jesus. (Apocalipsis 7:9; Juan 10:16) Kas resultana, maikaskasaba ti naimbag a damag iti kasaknap a di pay naimatangan idi. Iti 235 a daga ken teritoria, rimmuar dagiti Saksi ni Jehova tapno ‘ibagada ti naimbag a damag kadagidiay naemma . . . , a patapatanda ti nasnaayan a puso, nga iwaragawagda ti wayawaya kadagidiay nakautibo ken luktan a naimbag ti matmata uray dagiti balud; nga iwaragawagda ti tawen ti naimbag a nakem iti biang ni Jehova ken ti aldaw ti pammales iti biang ti Diostayo; a liwliwaenda dagiti amin nga agledleddaang.’ (Isaias 61:1, 2) Gapuna, ti panagebanghelio dagiti Kristiano ket agtultuloy a mangyeg iti bendision iti adu a tattao ken pudno a liwliwa kadagidiay “adda iti aniaman a kita ti rigat.”​—2 Corinto 1:3, 4.

5.No maipapan iti panangikasaba iti naimbag a damag, kasano a naiduma dagiti Saksi ni Jehova kadagiti relihion ti Kakristianuan?

⁵ Pudno nga adda nadumaduma a kita ti panagebanghelio dagiti relihion ti Kakristianuan. Adu ti mangibaon kadagiti misioneroda iti sabali a pagilian tapno mangkomberte. Kas pagarigan, ireport ti The Orthodox Christian Mission Center Magazine ti maipapan iti trabaho dagiti Orthodox a misionero idiay Madagascar, makin-abagatan nga Africa, Tanzania, ken Zimbabwe. Nupay kasta, iti mismo nga Orthodox Church, ken iti dadduma a relihion ti Kakristianuan, kaaduan a kamengda ti saan a makipaspaset iti daytoy a trabaho. Maisupadi iti dayta, amin a dedikado a Saksi ni Jehova ti mangikagkagumaan a makiraman iti panagebanghelio. Bigbigenda a ti panangipakaammo iti naimbag a damag ket pammaneknek a napudno ti pammatida. Kinuna ni Pablo: “Buyogen iti puso watwaten ti maysa ti pammati maipaay iti kinalinteg, ngem buyogen iti ngiwat mangaramid ti maysa iti publiko a panangideklara maipaay iti pannakaisalakan.” Mayarig a natay ti pammati nga awan ti panagtignayna.​—Roma 10:10; Santiago 2:17.

Naimbag a Damag a Mangyeg Kadagiti Agnanayon a Bendision

6. Ania a naimbag a damag ti maikaskasaba ita?

⁶ Ikaskasaba dagiti Saksi ni Jehova ti kasayaatan pay la a damag. Ipabasada kadagiti interesado a tattao ti kuna ti Biblia nga indaton ni Jesus ti biagna tapno makaadani ti sangatauan iti Dios, mapakawan dagiti basolda, ken maaddaanda iti namnama a biag nga agnanayon. (Juan 3:16; 2 Corinto 5:18, 19) Ipakaammoda a naipasdeken idiay langit ti Pagarian ti Dios iti sidong ti napulotan nga Ari, ni Jesu-Kristo, ket asidegen a pagpatinggaenna ti kinadakes ditoy daga ken iwanwanna ti pannakaisubli ti Paraiso. (Apocalipsis 11:15; 21:3, 4) Kas kaitungpalan ti padto ni Isaias, ipakpakaammoda kadagiti kaarrubada nga itan ti “tawen ti naimbag a nakem iti biang ni Jehova,” bayat a mabalin pay nga ipangag ti sangatauan ti naimbag a damag. Ipakdaarda met nga asidegen “ti aldaw ti pammales iti biang ti Diostayo,” inton ikisapna dagiti di agbabawi a managbasol.​—Salmo 37:9-11.

7. Ania a kapadasan ti mangipakita nga agkaykaysa dagiti Saksi ni Jehova, ket apay a tagtagiragsakenda ti kasta a panagkaykaysa?

⁷ Iti lubong a napno iti trahedia ken didigra, daytoy laeng ti naimbag a damag a mangyeg iti agnanayon a gunggona. Dagidiay mangipangag iti dayta agbalinda a paset ti nagkaykaysa, sangalubongan nga agkakabsat a Kristiano a di mangipalubos nga agsisinada gapu iti panagduduma ti nasion, tribu, wenno takder iti biag. ‘Kinawesanda ti bagbagida iti ayat, ta dayta ket naan-anay a singgalut ti panagkaykaysa.’ (Colosas 3:14; Juan 15:12) Nagminar daytoy iti maysa a pagilian idiay Africa itay napan a tawen. Iti maysa nga agsapa, nariing ti kabesera a siudad gapu iti kanalbuong. Madama ti maysa nga iyaalsa iti gobierno. Idi nagbalin dayta a sinnalisal dagiti tribu, naumsi ti maysa a Saksi a pamilia gapu ta sinaranayda ti padada a Saksi a naggapu iti sabali a tribu. Insungbat ti pamilia: “Dagiti Saksi ni Jehova laeng ti adda iti pagtaenganmi.” Para kadakuada, saan a napateg ti panagduma ti tribu; ti napateg isu ti Nakristianuan nga ayat​—ti panangsaranay kadagiti agkasapulan. Inkomento ti saan a Saksi a kabagianda: “Dagiti kameng ti amin a relihion liniputanda dagiti kapammatianda. Dagiti laeng Saksi ni Jehova ti di nangaramid iti kasta.” Adu ti kasta a padamag manipud kadagiti pagilian a nawarawara gapu iti panagdadangadang dagiti umili. Ipakitada a pudno nga ‘ay-ayaten [dagiti Saksi ni Jehova] ti intero a timpuyog dagiti kakabsat.’​—1 Pedro 2:17.

Ti Naimbag a Damag Balbaliwanna ti Tattao

8, 9. (a) Ania a panagbalbaliw ti maaramid dagidiay mangipangag iti naimbag a damag? (b) Aniada a kapadasan ti mangyilustrar iti bileg ti naimbag a damag?

⁸ Adda pakainaigan ti naimbag a damag iti inawagan ni Pablo a “biag itan ken daydiay nga umay.” (1 Timoteo 4:8) Saan laeng a mangyeg iti nagsayaat ken natalged a namnama iti masanguanan no di pay ket pasayaatenna ti “biag itan.” Kas indibidual, dagiti Saksi ni Jehova ket iwanwanwan ti Sao ti Dios, ti Biblia, tapno maitunosda ti biagda iti pagayatan ti Dios. (Salmo 119:101) Mapabaro ti personalidadda bayat a sukayenda dagiti galad kas iti kinalinteg ken kinasungdo.​—Efeso 4:24.

⁹ Usigenyo ti kapadasan ni Franco. Problemana ti panagpungpungtotna. No adda dina magustuan, rumasuk a dagus ket mangperdi iti bambanag. Nagadal iti Biblia ni baketna kadagiti Saksi ni Jehova, ket ti kababalinda kas Kristiano ti in-inut a timmulong ken Franco a mangbigbig a kasapulanna ti agbalbaliw. Nakipagadal iti Biblia kadagiti Saksi ket nasursurona nga iparangarang ti talna ken panagteppel a bunga ti nasantuan nga espiritu. (Galacia 5:22, 23) Isu ti maysa kadagiti 492 a nabautisaran idiay Belgium kabayatan ti 2001 a tawen ti serbisio. Usigenyo met ni Alejandro. Adikto unay iti droga daytoy nga agtutubo nga uray la nagbiag babaen ti basura, nga agsukain iti mabalinna nga ilako tapno masuportaranna ti bisiona. Idi agtawen iti 22, inawis dagiti Saksi ni Jehova nga agadal iti Biblia, ket immannugot. Inaldaw a binasana ti Biblia ken timmabuno kadagiti Nakristianuan a gimong. Nagbiit a dinalusanna ti biagna, ket iti uneg ti innem laeng a bulan, kualipikadon a makiraman iti trabaho a panagebanghelio​—maysa kadagiti 10,115 a nangasaba idiay Panama idi napan a tawen.

Ti Naimbag a Damag​—Bendision Kadagiti Naemma

10. Siasino dagiti mangipangag iti naimbag a damag, ket kasano a mabalbaliwan ti panangmatmatda?

¹⁰ Impadto ni Isaias a maikasaba ti naimbag a damag kadagiti naemma. Siasino dagitoy a naemma? Isuda dagiti dineskribir ti libro ti Aramid a “siuumiso nga agannayas iti agnanayon a biag.” (Aramid 13:48) Napakumbabada a tattao a masarakan iti amin a paset ti kagimongan, a silulukat ti pusoda iti mensahe ti kinapudno. Mabigbigda a nabakbaknang nga amang dagiti bendision nga iyeg ti panagaramid iti pagayatan ti Dios ngem iti aniaman a maitukon ti sekular a lubong. (1 Juan 2:15-17) Ngem kasano a dagiti Saksi ni Jehova matukayda dagiti puso bayat ti panagebanghelioda?

11. Sigun ken Pablo, kasano koma ti pannakaikasaba ti naimbag a damag?

¹¹ Bueno, usigenyo ti ulidan ni apostol Pablo, a nagsurat kadagiti taga Corinto: “Idi immayak kadakayo, kakabsat, saanak nga immay a buyogen ti nadaeg a panagsasao wenno sirib a mangidekdeklara kadakayo ti sagrado a palimed ti Dios. Ta inkeddengko a saan nga ammuen ti aniaman a banag kadakayo malaksid ken Jesu-Kristo, ken isuna a nailansa.” (1 Corinto 2:1, 2) Saan a nagpakpakalaing ni Pablo kadagiti agdengdengngeg babaen ti pannakaammona. Dagiti laeng naipaltiing a kinapudno ti insurona, dagiti kinapudno a linaon ita ti Biblia. Imutektekanyo met ti pammaregta ni Pablo iti padana nga ebanghelisador a ni Timoteo: “Ikasabam ti sao, naganetgetka koma iti dayta.” (2 Timoteo 4:2) Masapul nga ikasaba ni Timoteo “ti sao,” ti mensahe ti Dios. Insurat pay ni Pablo ken ni Timoteo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.”​—2 Timoteo 2:15.

12. Kasano a sursuroten ita dagiti Saksi ni Jehova ti balakad ken ulidan ni Pablo?

¹² Suroten dagiti Saksi ni Jehova ti ulidan ni Pablo, agraman ti balakadna ken Timoteo. Bigbigenda ti bileg ti Sao ti Dios ken usarenda a naimbag dayta bayat nga ikagumaanda nga ipabasa kadagiti kaarrubada dagiti maitutop a sasao ti namnama ken liwliwa. (Salmo 119:52; 2 Timoteo 3:16, 17; Hebreo 4:12) Pudno, usarenda a naimbag dagiti literatura a naibatay iti Biblia tapno ad-adu a pannakaammo iti Biblia ti magun-odan dagiti interesado a tattao. Ngem kanayon nga ikagumaanda nga ipabasa kadagiti tattao ti mismo a Kasuratan. Ammoda a ti naipaltiing a Sao ti Dios tignayenna ti puso dagiti napakumbaba a tattao. Mapatibker met ti mismo a pammatida no usarenda ti Biblia iti kasta a wagas.

‘Liwliwaenyo ti Amin nga Agledleddaang’

13. Iti tawen 2001, aniada a pasamak ti nagresulta iti nasaknap a panagkasapulan iti panangliwliwa kadagidiay agledleddaang?

¹³ Addada napasamak a didigra iti tawen 2001, ket kas resultana, adu nga indibidual ti nagkasapulan iti liwliwa. Itay napan a Setiembre, nakadkadlaw dayta idiay Estados Unidos idi inatake dagiti terorista ti World Trade Center idiay New York ken ti Pentagon iti asideg ti Washington, D.C. Naklaat ti intero a pagilian kadagita a panagatake! Kadagiti kasta a pasamak, inkagumaan dagiti Saksi ni Jehova nga itungpal ti annongenda a ‘mangliwliwa iti amin nga agledleddaang.’ Sumagmamano a kapadasan ti mangyilustrar no kasano nga imbanagda dayta.

14, 15. Iti agduma a gundaway, kasano a sieepektibo nga inusar dagiti Saksi ti kasuratan a mangliwliwa kadagiti malmaldaangan?

¹⁴ Maysa a payunir a Saksi ti nakisarita iti maysa a babai iti igid ti lansangan ket inimtuodna no ania ti kapanunotan ti babai maipapan iti nabiit pay nga iyaatake dagiti terorista. Nagsangit ti babai. Kinunana a maladingitan ken kayatna ti tumulong. Imbaga ti Saksi a maseknan unay ti Dios kadatayo amin, sana imbasa ti Isaias 61:1, 2. Kinuna ti babai a malmaldaangan ti adu a tattao isu a matmatanna a lohikal dagita a nadiosan a sasao. Inawatna ti maysa a tract ket kiniddawna a sarungkaran ti Saksi iti pagtaenganna.

¹⁵ Dua a mangaskasaba a Saksi ti nakisarita iti maysa a lalaki a madama nga agtartrabaho. Intukonda kenkuana dagiti makaliwliwa a sasao ti Kasuratan a mainaig iti nabiit pay a trahedia iti World Trade Center. Impalubosna a basaenda ti 2 Corinto 1:3-7, a naglaon iti kastoy a sasao: “Umadu ti pannakaliwliwa . . . babaen iti Kristo.” Nagyaman ti lalaki ta adda awit dagiti kaarrubana a Saksi a makaliwliwa iti sabsabali, isu a kinunana: “Sapay koma ta bendisionan ti Dios ti nagsayaat a trabaho nga ar-aramidenyo.”

16, 17. Ania a dua a kapadasan ti mangipakita a nabileg ti Biblia a tumulong kadagiti indibidual a malmaldaang wenno mariribukan gapu kadagiti trahedia?

¹⁶ Maysa a Saksi nga agsarsarungkar kadagiti interesado a tattao ti nakisarita iti anak ti maysa a babai a nangipakita iti interes idi. Kinunana a maseknan iti sasaaden dagiti tattao kalpasan ti nabiit pay a trahedia. Nasdaaw ti lalaki ta inwayaan ti Saksi ti simmarungkar kadagiti tattao tapno komustaen ti kasasaadda. Kinuna ti lalaki nga isu ket agtartrabaho iti asideg ti World Trade Center idi napasamak ti panagatake ket nakitana ti amin a napasamak. Idi inyimtuodna no apay nga ipalpalubos ti Dios ti kinadakes, nangibasa ti Saksi kadagiti teksto iti Biblia, agraman ti Salmo 37:39, a nagkuna: “Ti pannakaisalakan dagidiay nalinteg aggapu ken Jehova; isu ti sarikedkedda iti tiempo ti riribuk.” Sidadayaw a dinamag ti lalaki no komusta ti Saksi ken ti pamiliana, inawisna nga agsublinto manen, sana inyebkas ti naimpusuan a panagyamanna iti isasarungkarna.

¹⁷ Maysa kadagiti rinibu a malmaldaangan a liniwliwa dagiti Saksi ni Jehova kadagiti simmaruno nga aldaw kalpasan ti iyaatake dagiti terorista ket maysa a babai a nakasarita dagiti Saksi idi mangaskasabada kadagiti kaarrubada. Talaga a marurod ti babai iti napasamak ket nagimdeng bayat nga imbasada ti Salmo 72:12-14: “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada, ket ti darada napategto kadagiti matana.” Anian a nagbagas dagita a sasao! Kiniddaw ti babai a basaen manen dagiti Saksi dagita a bersikulo ket inawisna ida iti balayna tapno ituloyda ti saritaan. Kalpasanna, nairugi ti maysa a panagadal iti Biblia.

18. Kasano a tinulongan ti maysa a Saksi dagiti kaarrubana idi naawis nga idauluanna ida iti kararag?

¹⁸ Maysa a Saksi ti agtartrabaho iti restawran iti maysa a nabaknang a komunidad a mangyaleng-aleng iti naimbag a damag ti Pagarian. Kalpasan ti iyaatake dagiti terorista, agparang a naikuleng ti komunidad. Iti rabii ti Biernes kalpasan ti panagatake, kiniddaw ti manedyer ti restawran a rummuar amin nga empleado ket mangiggemda iti kandela, nga agulimekda iti sumagmamano a kanito kas pananglagip kadagiti biktima. Kas panangraem iti riknada, rimmuar ti Saksi ket siuulimek a nagtakder iti bangketa. Ammo ti manedyer nga isu ket maysa a ministro a Saksi ni Jehova, isu a kalpasan ti kanito ti panagmennamenna, kiniddaw ti manedyer nga idauluanna ti grupo iti panagkararag. Immannugot ti Saksi. Iti kararagna, dinakamatna ti nasaknap a panagleddaang, ngem kinunana a saanda koma nga agleddaang a kasla awanen ti namnama. Tinukoyna met ti panawen inton awanen ti kasta a nakaal-alingget a pasamak ken mabalin nga umadani ti amin a tattao iti Dios ti liwliwa babaen ti umiso a pannakaammo iti Biblia. Kalpasan nga imbalikasda ti “Amen,” immasideg ti manedyer iti Saksi, nagyaman, ket rinakepna, a kunana a dayta pay laeng ti kasayaatan a kararag a nangngegna. Kasta met ti inaramid ti nasurok nga 60 a tattao nga adda iti ruar ti restawran.

Bendision iti Komunidad

19. Ania a kapadasan ti mangipakita nga annugoten ti dadduma ti nangato a pagalagadan dagiti Saksi ni Jehova?

¹⁹ Nangnangruna kadagitoy nga aldaw, pagimbagan dagiti komunidad no adda dagiti umilida nga aktibo a Saksi ni Jehova​—kas napaneknekan ti adu. Kasano koma a saan a nasayaat nga impluensia ti tattao a mangitantandudo iti talna, kinamapagpiaran, ken nadalus a moral? Iti maysa a pagilian iti Makintengnga nga Asia, nakasarita dagiti Saksi ti maysa a retirado nga opisial iti dati nga ahensia ti seguridad ti pagilian. Kinunana a nadutokan idi nga agimbestigar kadagiti nadumaduma a narelihiosuan nga organisasion. Idi inimbestigarna dagiti Saksi ni Jehova, inapresiarna ti kinamapagpiaran ken nasayaat a konduktada. Dayawenna ti natibker a pammatida, ken gapu ta naibatay iti Kasuratan dagiti sursuroda. Nagpayadal ngarud iti Biblia daytoy a lalaki.

20. (a) Ania ti ipakita ti natrabahuan dagiti Saksi ni Jehova itay napan a tawen? (b) Ania ti mangipamatmat nga adu pay ti matrabaho, ket ania ti panangmatmattayo iti pribilehiotayo nga agebanghelio?

²⁰ Dagitoy a sumagmamano a kapadasan a nadakamat iti daytoy nga artikulo, nupay rinibu koma ti mabalin nga isalaysay, ket nalawag a mangipakita nga okupado unay dagiti Saksi ni Jehova kabayatan ti 2001 a tawen ti serbisio.a Minilion a tattao ti nakasaritada, liniwliwada ti adu a malmaldaangan, ket nabendisionan ti trabahoda a panagebanghelio. Adda 263,431 a nangisimbolo iti dedikasionda iti Dios babaen ti panagpabautisar. Iti sangalubongan, ti bilang dagiti ebanghelisador ket ngimmato iti 1.7 porsiento. Ken ti 15,374,986 a bilang ti timmabuno iti tinawen a Panglaglagip iti ipapatay ni Jesus ipakitana nga adu pay ti matrabaho. (1 Corinto 11:23-26) Sapay koma ta itultuloytayo a biroken dagiti naemma a mangipangag iti naimbag a damag. Ket bayat nga agtultuloy ti tawen ti naimbag a nakem iti biang ni Jehova, itultuloytayo koma a liwliwaen dagiti ‘nasnaayan ti pusoda.’ Anian a naparaburan a pribilehio ti tagtagiragsakentayo! Sigurado a maikunatayo amin ti sasao ni Isaias: “Di bumurong nga agragsakakto ken Jehova. Ti kararuak agrag-onto iti Diosko.” (Isaias 61:10) Sapay koma ta agtultuloy nga usarennatayo ti Dios bayat a tungtungpalenna daytoy a padto: “Pagtubuento ti Soberano nga Apo Jehova ti kinalinteg ken ti panangidaydayaw iti sanguanan dagiti amin a nasion.”​—Isaias 61:11.

[Footnote]

Malagipyo Pay Kadi?

• Kasano a nagunggonaan dagiti naemma babaen ti naimbag a damag nga inkasaba ni Jesus?

• Aniada a bendision ti nasagrap dagidiay nangipangag iti panagebanghelio dagiti adalan ni Jesus idi umuna a siglo?

• Kasano a nakagunggona kadagiti interesado a tattao ita ti naimbag a damag?

• Ania ti panangmatmattayo iti pribilehiotayo kas ebanghelisador?

[Tsart iti panid 19-22]

REPORT TI 2001 A TAWEN SERBISIO DAGITI SAKSI NI JEHOVA ITI SANGALUBONGAN

(Kitaem ti bound volume)

[Dagiti Ladawan iti panid 15]

Kanayon a silalagip dagiti Saksi ni Jehova iti annongenda nga agebanghelio

[Dagiti ladawan iti panid 17]

Dagidiay mangipangag iti naimbag a damag agbalinda a kameng ti nagkaykaysa ken sangalubongan nga agkakabsat