Sino dagiti Pudno nga Ebanghelisador?

SADINOMAN ti pagtataenganyo, iti maysa wenno sabali a pamay-an ti panagebanghelio a rinugian ni Jesu-Kristo ti nangsagiden iti panagbiagyo. Ngem saan a tunggal maysa nga agkuna a mangibagbagi ken ni Kristo ti mangisaksaknap ti pudno a mensahe ti Sao ti Dios. Saan nga amin nga ebanghelisador​—ita wenno iti napalabas​—ket pinarubroban ti isu met laeng a regta ti panagmisionero nga isut’ mangiladladawan kadagiti ad-adalan ni Kristo idi umuna a siglo.

Pudno, dagiti iglesia iti Kakristianuan addaanda ti napattapatta a 220,000 a misionero nga agtartrabaho iti lubong itatta, ngem maipasá aya dagidiay a misionero ti pakasuotan dagiti pudno nga ebanghelisador? Ti Nakristianuan a panagebanghelio ket saan a nairanta nga agbalin a maysa a langa ti naespirituan nga imperialismo, a sadiay dagiti manangaskasaba agtrabahoda kas dagiti ahente dagiti manangkolonia a pannakabalin ti lubong. (Idiligyo iti Santiago 4:4.) Kasta met, ti Nakristianuan a panagebanghelio saanna nga itantandudo ti makunkuna a mangwayawaya a teolohia ket idagadagna dagiti radikal a panagbalbaliw kadagiti napolitikaan ken sosial a sistema; ket saan met a pampanunoten ni Jesus dagiti agus-usar ti Biblia nga elektroniko a manangasaba a mangipukpukkaw iti bersionda ti “teolohia ti kinarang-ay” kadagiti allon ti TV ken radio. (Juan 17:16; Mateo 6:24) Bueno, ania ngarud ita ti maysa nga ebanghelisador?

Ania ti Pudno nga Ebanghelismo?

Kadagiti orihinal a pagsasao ti Biblia, ti Hebreo ken Griego, ti ebanghelisador ket maysa a manangiwaragawag kadagiti makaparagsak a bambanag, wenno naimbag a damag.a Naimbag a damag iti ania? Maipapan iti pannakaisalakan, iti nalinteg a panagturay, ken iti talna. Kas pangarigan, kuna ti Isaias 52:7: “Naglibnosen kadagidiay bambantay dagiti saksaka ti mangyeg kadagiti naimbag a damdamag, a mangiwaragawag ti talna, a mangyeg kadagiti naimbag a damdamag ti kinaimbag, a mangiwaragawag iti pannakaisalakan, a kunana iti Sion: ‘Ti Diosmo agarin!’”

Mainayon pay, iti pannakaipasngay ti Anak ti Dios, inyanunsio ti anghel kadagiti pastor: “Dikay agbuteng, ta, adtoy! iyegankayo ti naimbag a damag ti dakkel a ragsak a maipaayto kadagiti amin a tattao, ta ita nga aldaw naiyanak kadakayo ti maysa a Manangisalakan, isu ti Kristo nga Apo.” (Lucas 2:10, 11) Gapuna, ti naimbag a damag naisentro ken Jesu-Kristo.

Agarup 30 a tawen kamaudiananna, simrek ni Jesus iti sinagoga iti siudad ti Nasaret iti aldaw ti Panaginana ket nagtakder a nangibasa: “Ket intedda kenkuana ti libro ni mammadto nga Isaias, ket idi binistradna ti libro natumpunganna ti disso a nakaisuratan daytoy: ‘Ti espiritu ni Jehova adda kaniak, ta pinulotannak a mangted kadagiti naimbag a damag kadagiti napanglaw.’” Kalpasan ti panangbasana, “linukotna ti libro ket intedna iti tumultulong ket nagtugaw; ket dagiti matada amin idiay sinagoga sikikitada kenkuana. Ket nangrugi a nagkuna kadakuada: ‘Ita nga aldaw daytoy a kasuratan a naidanon kadagiti lapayagyo ket natungpalen.’” Kaawatan a ni Jesus ket maysa a manangaskasaba ti naimbag a damag, ket ti naimbag a damag nga inwaragawagna ti naisentro “iti pagarian ti Dios.”​—Lucas 4:17-21; 8:1.

Ni Jesus indiligna ti panagebangheliona iti trabaho a panagani ket kinunana a “ti anien adu, ngem bassit dagiti agani.” (Mateo 9:36-38) Gapuna, isut’ nangsanay ken nangibaon kadagiti paspasurotna nga agbalinda met nga ebanghelisador. (Mateo, kapitulo 10; Lucas, kapitulo 10) Kas met laeng ti Mannursuroda, ti sentro ti panangaskasabada ket “ti pagarian dagiti langlangit.” (Mateo 10:7) Nupay kasta, ti panangikaskasaba ti Pagarian ket saan a limitado kadagiti apostoles.

Idi bimtak ti pannakaidadanes iti agdadamo pay laeng a kongregasion Kristiano idiay siudad ti Jerusalem, ti pakasarsaritaan ti historia idiay Aramid 8:1 salaysayenna a “naiwarawarada amin kadagiti dagdaga ti Judea ken Samaria.” Dagidiay kadi nawarawara nga ad-adalan ket naglemlemmengda ken kumkumlebda iti buteng? Saan, ta ituloy ti Ara 8 bersikulo 4: “Dagidi ngarud naiwarawara napanda kadagiti amin a luglugar nga inkaskasabada ti naimbag a damag ti sao.” Iti kastoy a pamay-an adu nga apit ti inani dagiti immuna-siglo nga ebanghelisador.

Makapainteres, ta ti libro nga A Theological Word Book of the Bible kunaenna: “Iti BT [Baro a Tulag] ti panangaskasaba awan pakainanaiganna kadagiti panagsersermon kadagiti nakumberte, nga isut’ masansan a kaipapananna, no di ket kanayon a maipapan iti pannakaiwaragawag ti ‘naimbag a damdamag iti Dios’ iti di Nakristianuan a lubong.” Gapuna, amin dagiti Kristiano ket ebanghelisadorda, ket ti panagebanghelioda saan a limitado iti panagsasao kadagiti kapammatianda.

Ngem ania ti tema ti moderno-aldaw a panagebanghelio? Impadto ni Jesus a maipaay iti kaaldawantayo a “daytoy naimbag a damag ti pagarian maikaskasabanto iti amin a mapagnaedan a daga kas pammaneknek iti isuamin a nasnasion; ket kalpasanna umayton ti panungpalan.” (Mateo 24:14) Ket binilin ni Jesus saan laeng a dagiti nakakita ti iyuulina no di ket dagiti masanguanan pay a paspasurotna iti panagbalindanto a “dagiti saksi[na] agpadpada idiay Jerusalem ken iti isuamin a Judea ken Samaria ken agingga iti ungto ti daga.”​—Aramid 1:8; kitaenyo met ti Mateo 28:19, 20.

Gapuna, ti kangrunaan a paset ti mensahe ti ebanghelisador isu ti naimbag a damag ti Pagarian ni Jehova a Dios kadagiti im-ima ti dinutokanna nga Agturay, ni Jesu-Kristo, ti Prinsipe ti Kappia. (Isaias 9:6) Ket ramanen amin dayta dagiti kinapudno a sinasasao ni Jesus ken indanon dagiti adalanna. Dagiti pudno nga ebanghelisador itatta ti simamatalek nga agtalinaed iti daytoy maymaysa a tema.

Asino ti Mangipangpangruna iti Pudno nga Ebanghelismo?

Ti pudno nga ebanghelisador agdaydayawda ken Jehova kas Dios. Isu ti Naindaklan nga Ebanghelista; isu ti Mangipangpangruna iti panangikaskasaba ti naimbag a damag. (Galacia 3:8; Apocalipsis 10:7) Ket tarigagayanna nga amin a tattao iti sadinoman ket makangngeg ken agtulnog iti mensahena. “Kinapudnona a makitak a ti Dios saan a mangidumduma kadagiti tattao,” kuna ni apostol Pedro iti bassit a tallaong idiay puerto a Mediteraneo sadi Cesarea. “No di ket uray ania a nasion dagiti agbuteng ken agaramid ti kinalinteg makaay-ayoda kenkuana. Ti sao nga inturongna kadagiti annak ti Israel ti panangikaskasaba ti naimbag a damag ti talna a maipuon ken Jesu-Kristo: daytoy Daydiay Apo dagiti isuamin.”​—Aramid 10:34-36.

Impadto ti Biblia nga iti kaaldawantayo dagiti ebanghelisador apitenda manen ti dakkel nga ani. (Apocalipsis 14:15, 16) Basaenyo iti sumaganad nga artikulo ti sumagmamano kadagiti kapadasan a laklak-amen dagiti Saksi ni Jehova bayat a makiramanda iti daytoy a trabaho a panagani. Sukimatenyo ti rekord ti panangaskasabada kadagiti panid 12 agingga iti 15 daytoy a magasin. Kalpasanna makisao kadagiti Saksi ni Jehova inton sumarungkarda iti pagtaenganyo ket kitaenyo no dikay umanamong nga isuda dagiti pudno nga ebanghelisador itatta.

[Dagiti Footnote]