Salsaludsod Dagiti Agbasbasa
Idi nakita ni Juan ti “dakkel a bunggoy” a mangipapaay iti sagrado a panagserbi iti templo ni Jehova, ania a paset ti templo ti pangar-aramidanda iti daytoy?—Apocalipsis 7:9-15.
Rasonable a kunaen a ti dakkel a bunggoy ket agdaydayaw ken Jehova iti maysa kadagiti naindagaan a paraangan ti naindaklan a naespirituan a templona, nangruna ti paraangan nga umarngi iti makinruar a paraangan ti templo ni Solomon.
Idi un-unana, naikuna a ti dakkel a bunggoy ket naespirituan a katupag, wenno mangiladladawan iti daydi Paraangan dagiti Gentil idi panawen ni Jesus. Nupay kasta, ti kanayonan a panagsukisok ipalgakna ti lima a makagapu no apay a saan a kasta. Umuna, saan nga amin a paset ti templo ni Herodes ket adda iladladawanda a katupagna iti naindaklan a naespirituan a templo ni Jehova. Kas pagarigan, iti templo ni Herodes adda ti Paraangan dagiti Babbai ken Paraangan ti Israel. Dagiti lallaki ken babbai agpadpada a makastrek iti Paraangan dagiti Babbai, idinto ta dagiti laeng lallaki ti mapalubosan a sumrek iti Paraangan ti Israel. Iti naindagaan a paraangan ti naindaklan a naespirituan a templo ni Jehova, saan nga agsina no agdayaw dagiti lallaki ken babbai. (Galacia 3:28, 29) Gapuna, awan ti katupag ti Paraangan dagiti Babbai ken ti Paraangan ti Israel iti naespirituan a templo.
Maikadua, awan ti Paraangan dagiti Gentil iti impaay ti Dios nga arkitektural a plano ti templo ni Solomon wenno iti templo a nasirmata ni Ezequiel; wenno uray iti templo nga imbangon ni Zorobabel. Gapuna, awan ti pangibatayan tapno ibaga a ti Paraangan dagiti Gentil ket addaan iti naespirituan a katupag iti urnos ti naindaklan a naespirituan a templo ni Jehova maipaay iti panagdayaw. Daytoy ket nangruna no mausig ti sumaganad a punto.
Maikatlo, ti Paraangan dagiti Gentil ket binangon ti Edomita nga Ari a ni Herodes tapno maipadayag ti bagina ken magun-odna ti pabor ti Roma. Nalabit rinugian ni Zorobabel a tinarimaan ti templo idi 18 wenno 17 K.K.P. Ilawlawag ti The Anchor Bible Dictionary: “Ti pagayatan ti turay ti imperio iti Laud [Roma] . . . kalikagumanna ti templo a dakdakkel ngem kadagidiay adda kadagiti kapada a makindaya a siudad.” Nupay kasta, naaramiden ti rukod ti mismo a templo. Ilawlawag ti diksionario: “Nupay masapul nga agpada a mismo ti rukod ti Templo a kas kadagiti immun-una [dagiti templo da Solomon ken Zorobabel], ti Bantay ti Templo ket saan a nalimitaran ti mabalin a kadakkelna.” Gapuna, pinalawa ni Herodes ti templo babaen ti pananginayonna iti maaw-awagan ita a Paraangan dagiti Gentil. Apay koma a ti patakder nga addaan iti kasta nga aglikmut ket addaan iti mangiladawan a katupag iti urnos ti naespirituan a templo ni Jehova?
Maikapat, nganngani amin—ti bulsek, pilay, ken dagiti di nakugit a Gentil—mabalinda ti sumrek iti Paraangan dagiti Gentil. (Mateo 21:14, 15) Pudno, nagserbi ti paraangan para iti adu a di nakugit a Gentil nga agtarigagay a mangipaay kadagiti daton iti Dios. No dadduma idiay a nagpalawag ni Jesus iti bunggoy ken namindua a pinaruarna dagiti agsuksukat iti kuarta ken komersiante, nga imbagana nga imbabainda ti balay ni Amana. (Mateo 21:12, 13; Juan 2:14-16) Kaskasdi, kuna ti The Jewish Encyclopedia: “Daytoy makinruar a paraangan, no an-anagen, saan a paset ti Templo. Saan a sagrado ti nagsaadanna, ken mabalin a sumrek ti asinoman.”
Maikalima, ti Griego a sao a (hi·e·ron’) a naipatarus a “templo” a nausar a mangtukoy iti Paraangan dagiti Gentil “tuktukoyenna ti intero a patakder, imbes a ti laeng pasdek ti Templo,” kuna ti A Handbook on the Gospel of Matthew, da Barclay M. Newman ken Philip C. Stine. Maisupadi iti dayta, ti Griego a sao a (na·os’) a naipatarus a “templo” iti sirmata ni Juan maipapan iti dakkel a bunggoy ket ad-adda nga espesipiko. Iti konteksto ti templo ti Jerusalem, masansan a tumukoy dayta iti Kasasantuan, ti pasdek ti templo, wenno kadagiti paraangan ti templo. No dadduma, naipatarus dayta a “santuario.”—Mateo 27:5, 51; Lucas 1:9, 21; Juan 2:20.
Dagiti miembro ti dakkel a bunggoy al-alagadenda ti pammati iti subbot a daton ni Jesus. Nadalusda iti naespirituan ta “linabaanda dagiti pagan-anayda ket pinapudawda ida iti dara ti Kordero.” Gapuna, naideklarada a nalinteg a namnamaenda nga agbalin a gayyem ti Dios ken maispal iti dakkel a rigat. (Santiago 2:23, 25) Iti adu a wagas, kasda la dagiti proselita idiay Israel a nagpasakup iti Linteg ti tulag ken nagdayaw a kadua dagiti Israelita.
Siempre, saan a nagserbi dagidiay a proselita iti makin-uneg a paraangan, iti pagar-aramidan dagiti padi iti annongenda. Awan met dagiti miembro ti dakkel a bunggoy iti makin-uneg a paraangan ti naespirituan a templo ni Jehova, paraangan a mangirepresentar iti kasasaad dagiti perpekto, nalinteg nga annak a tattao a miembro ti “nasantuan a kinapadi” ni Jehova bayat ti kaaddada ditoy daga. (1 Pedro 2:5) Ngem kas naibaga ken ni Juan babaen ti panglakayen manipud langit, ti dakkel a bunggoy ket talaga nga adda iti templo, saan nga iti ruar ti templo a maibilang a naespirituan a Paraangan dagiti Gentil. Anian a pribilehio dayta! Ken anian ti panangitampokna a masapul a taginayonen ti tunggal maysa ti naespirituan ken moral a kinadalus!
[Diagram/Ladawan iti panid 31]
(Para iti aktual a pannakaurnosna, kitaem ti publikasion)
Ti Templo ni Solomon
1. Pasdek ti Templo
2. Makin-uneg a Paraangan
3. Makinruar a Paraangan
4. Agdan iti Paraangan ti Templo