Dagiti Saksi ni Jehova—Pudnoda nga Ebanghelisador
1 Imparebbeng ni Jesu-Kristo ti panagebanghelio kadagiti amin nga adalanna, nga espesipiko a binilinna ida a mangikasaba iti naimbag a damag ti Pagarian. (Mat. 24:14; Ara. 10:42) Nangipasdek dagidi immuna nga adalan iti padron maipapan iti daytoy babaen ti panagsaoda nga awan sardayna maipapan iti Pagarian—saan laeng a kadagiti lugar a pagdaydayawan no di pay ket iti sadinoman a pakasarakanda kadagiti tattao iti publiko ken iti binalaybalay. (Ara. 5:42; 20:20) Kas Saksi ni Jehova itatta, impaneknektayo a datayo dagiti pudno a Kristiano nga ebanghelisador, a mangikaskasaba iti mensahe ti Pagarian iti 232 a dagdaga ken binautisarantayo ti nasurok a maysa a milion a kabbaro nga adalan itay laeng napalabas a tallo a tawen! Apay a nakabalballigi ti trabahotayo a panagebanghelio?
2 Gutugotennatayo ti Naimbag a Damag: Dagiti ebanghelisador ket manangaskasaba, wenno mensahero iti naimbag a damag. Gapuna, addaantayo iti makaparagsak a pribilehio a mangipakaammo iti Pagarian ni Jehova—ti kakaisuna a pudno a naimbag a damag a maidiaya iti nariribuk a sangatauan. Magagarantayo iti naisangsangayan a pannakaammo a nagun-odtayo maipapan iti baro a langlangit a mangiturayto a sililinteg iti baro a daga a buklen ti matalek a sangatauan iti umad-adanin a Paraiso. (2 Ped. 3:13, 17) Datayo laeng ti nangabrasa iti daytoy a namnama, ket magagarantayo a mangiburay iti dayta kadagiti sabsabali.
3 Tigtignayennatayo ti Pudno nga Ayat: Ti panagebanghelio ket trabaho a makaispal biag. (Roma 1:16) Dayta ti gapuna a pagrag-oantayo unay nga irakurak ti mensahe ti Pagarian. Kas pudno nga ebanghelisador, adda ayattayo kadagiti tattao, ket dayta ti mangtignay kadatayo a mangiburay iti naimbag a damag kadakuada—kadagiti pamiliatayo, kaarruba, gagayyem, ken iti adu a sabsabali pay. Ti amin-kararua a panangitungpal iti daytoy a trabaho isu ti maysa kadagiti kasayaatan nga ebkas ti napaypayso nga ayattayo kadagiti sabsabali.—1 Tes. 2:8.
4 Tulongannatayo ti Espiritu ti Dios: Ipanamnama kadatayo ti Sao ti Dios a no aramidentay ti trabahotayo a panagmula ken panagsibug iti bin-i ti Pagarian, ni Jehova ti “mangpadakkel iti dayta.” Kasta ti eksakto a makitkitatayo iti organisasiontayo itatta. (1 Cor. 3:5-7) Ti espiritu ti Dios ti tumulong kadatayo iti trabahotay a panagebanghelio ken mangipaay kadatayo iti dakkel a balligi.—Joel 2:28, 29.
5 Maitunos iti pammaregta ti 2 Timoteo 4:5 nga ‘aramidentay ti trabaho ti managebanghelio,’ sapay koma ta ti ayattayo kadagiti amin a tattao ti mangtignay kadatayo a mangiburay iti makaparagsak a naimbag a damag ti Pagarian iti amin a gundaway, nga agtalektayo nga itultuloy a bendisionan ni Jehova ti trabahotayo.