Dagiti Milagro ni Jesus​—Pudno Wenno Parbo?

“DAGITI tattao nangyegda kenkuana [ni Jesus] iti adu a tattao a nagunggan ti sairo; ket pinaruarna dagiti espiritu babaen iti sao, ken inagasanna amin nga agsagsagaba iti nakaro.” (Mateo 8:16) “Bimmangon [ni Jesus] ket binabalawna ti angin ken kinunana iti baybay: ‘Agtalnaka! Agulimekka!’ Ket nagtalna ti angin, ket naglinak unay.” (Marcos 4:39) Ania ti makunayo kadagitoy a salaysay? Patienyo kadi nga agpayso a napasamak dagita, wenno matmatanyo kadi a sarsarita laeng dagita a salaysay, nga adda laeng iladladawanda?

Adu ita ti talaga nga agduadua no talaga a napasamak idi dagiti milagro ni Jesus. Gapu kadagiti panagrang-ay iti siensia, kas ti teleskopio ken mikroskopio, ti panagsukisok iti law-ang ken genetic engineering, saan a nakappapati kadagiti tattao dagiti damag maipapan kadagiti milagro wenno datdatlag a gapuanan ti Dios.

Patien dagiti dadduma a di nakappapati wenno adda la iladladawan dagiti salaysay maipapan kadagiti milagro. Sigun iti mannurat ti maysa a libro nga agkuna a mangus-usig iti “pudno” a Jesus, dagiti salaysay maipapan kadagiti milagro ni Kristo ket awan nakaidumaanda kadagiti “nakomersialan a pablaak” tapno maisaknap ti Kristianidad.

Addada mangmatmat nga interamente a pangallilaw dagiti milagro ni Jesus. No dadduma, ni Jesus a mismo ti pabasolenda iti dayta. Sigun ken ni Justin Martyr idi maikadua a siglo K.P., dagiti manangbabalaw ken ni Jesus “awaganda pay isuna a salamangkero ken mangal-allilaw kadagiti tattao.” Ibaga ti dadduma a ni Jesus “saanna nga inaramid dagiti milagrona kas maysa a propeta a Judio, no di ket kas maysa a salamangkero, maysa a nasanay kadagiti templo dagiti pagano.”

Ti Kaipapanan ti Imposible

Nalabit patienyo nga iti likudan dagiti kasta a panagduadua, adda dakkel a rason no apay nga agalikaka dagiti tattao a mamati kadagiti milagro. Para kadakuada, kasla narigat wenno imposible pay ketdi a patien a mapasamak dagiti milagro babaen kadagiti saan a gagangay a puersa. “Basta, awan ti milagro,” kinuna ti maysa nga agtutubo a nagpabigbig kas agnostiko. Sana inadaw ti sasao ti maika-18 siglo a pilosopo a taga Scotland a ni David Hume, a nangisurat: “Ti milagro ket pananglabsing kadagiti linteg ti nakaparsuaan.”

Ngem adu ti bumdeng a mangipetteng nga imposible ti maysa a datdatlag a pasamak. Ti The World Book Encyclopedia awaganna ti milagro kas “maysa a pasamak a saan a mailawlawag babaen dagiti naipasdek a linteg ti nakaparsuaan.” No ibatay iti dayta a depinasion, ti kaaduan a tattao idi laeng napalabas a siglo mabalin nga ibilangda a “milagro” ti panagdaliasat iti law-ang, awanan kable a komunikasion, ken satellite navigation. Sigurado ngarud a di nainsiriban nga ipetteng nga imposible dagiti milagro gapu laeng ta saantayo a mailawlawag dagita maibasar iti agdama a pannakaammo.

No sukimatentayo ti sumagmamano a Nainkasuratan nga ebidensia a mangpampaneknek kadagiti milagro ni Jesu-Kristo, ania ti maammuantayo? Pudno kadi wenno parbo laeng dagiti milagro ni Jesus?