Dagiti Naragsak nga Adipen ni Jehova

“Naragsak dagidiay sipapanunot iti naespirituan a kasapulanda.”​—MATEO 5:3.

1. Ania ti pudno a kinaragsak, ken ania ti ipakitana?

IPATPATEG ti ili ni Jehova ti ik-ikutanda a kinaragsak. Kinuna ni salmista a David: “Naragsak ti ili a ti Diosna isu ni Jehova!” (Salmo 144:15) Ti kinaragsak ket pannakarikna iti kinatalged. Ti napalaus a kinaragsak​—a dumanon iti kaunggan ti pusotayo​—ket resulta ti pannakaammo a tagtagiragsakentayo ti anamong ni Jehova. (Proverbio 10:22) Ipakita ti kasta a kinaragsak nga addaantayo iti nasinged a relasion iti nailangitan nga Amatayo ken ammotayo nga ar-aramidentayo ti pagayatanna. (Salmo 112:1; 119:1, 2) Makapainteres ta nangdakamat ni Jesus ti siam a pakaibatayan ti ragsaktayo. Ti panangusig kadagita babaen iti daytoy nga artikulo ken iti sumaganad, tulongannatayo a mangbigbig no kasano kadakkel ti ragsak a masagraptayo no simamatalek nga agserbitayo ‘iti naragsak a Dios,’ ni Jehova.​—1 Timoteo 1:11.

Sipapanunot iti Naespirituan a Kasapulantayo

2. Iti ania a gundaway a nagsao ni Jesus maipapan iti kinaragsak, ken ania ti panglukat a sasaona?

² Idi 31 K.P., imbitla ni Jesus ti maysa kadagiti kalalatakan a palawag. Naawagan dayta kas ti Sermon iti Bantay gapu ta impalawag dayta ni Jesus iti bantay a tumannawag iti Baybay ti Galilea. Kuna ti Ebanghelio ni Mateo: “Idi nakitana dagiti bunggoy isu simmang-at idiay bantay; ket idi nakatugawen immay kenkuana dagiti adalanna; ket linuktanna ti ngiwatna ket inrugina nga insuro ida, a kunkunana: ‘Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.’” No literal nga ipatarus, kastoy ti kuna ti panglukat a sasao ni Jesus: “Naragsak dagiti napanglaw (no) iti espiritu,” wenno “Naragsak dagiti agpalpalama iti espiritu.” (Mateo 5:1-3; Kingdom Interlinear; footnote ti New World Translation of the Holy Scriptures​—With References) Kuna ti Today’s English Version: “Naragsak dagidiay ammoda a napanglawda iti naespirituan.”

3. Kasano a mangyeg iti ragsak ti kinapakumbaba?

³ Iti sermonna iti bantay, impatuldo ni Jesus nga adayo a naragragsak ti tao no bigbigenna nga isu ket agkasapulan iti naespirituan. Dagiti napakumbaba a Kristiano, a naan-anay a mangbigbig iti kinamanagbasolda, ipakaasida ken ni Jehova ti pammakawanna maibatay iti pangsubbot a daton ni Jesus. (1 Juan 1:9) Iti kasta, maaddaanda iti talna ti panunot ken pudno a kinaragsak. “Naragsak daydiay a ti iyaalsana mapakawan, a ti basolna maabbongan.”​—Salmo 32:1; 119:165.

4. (a) Kadagiti ania a wagas a maipakitatayo a sipapanunottayo iti naespirituan a kasapulantayo ken dagiti sabsabali? (b) Ania ti ad-adda a mangparayray iti ragsaktayo no silalagiptayo iti naespirituan a kasapulantayo?

⁴ No sipapanunottayo kadagiti naespirituan a kasapulantayo, matignaytayo a mangbasa iti Biblia iti inaldaw, mangaprobetsar iti naespirituan a taraon nga ipapaay “ti matalek ken masirib nga adipen” iti “umiso a tiempo,” ken regular a tumabuno kadagiti Nakristianuan a gimong. (Mateo 24:45; Salmo 1:1, 2; 119:111; Hebreo 10:25) No adda panagayattayo iti kaarruba, maseknantayo iti naespirituan a kasapulan dagiti sabsabali ken tignayennatayo a sireregta a mangikasaba ken mangisuro iti naimbag a damag ti Pagarian. (Marcos 13:10; Roma 1:14-16) Naragsaktayo no iranudtayo dagiti kinapudno ti Biblia. (Aramid 20:20, 35) Ad-adda pay a rumayray ti ragsaktayo no mennamennaentayo ti nakaskasdaaw a namnama mainaig iti Pagarian ken dagiti bendision nga iyeg dayta a Pagarian. No iti “bassit nga ipastoran” dagiti napulotan a Kristiano, ti namnama mainaig iti Pagarian kaipapananna ti imortal a biag idiay langit kas paset ti gobierno a Pagarian ni Kristo. (Lucas 12:32; 1 Corinto 15:50, 54) No iti “sabsabali a karnero,” kaipapananna ti biag nga agnanayon iti paraiso a daga iti sidong dayta a Pagarian a gobierno.​—Juan 10:16; Salmo 37:11; Mateo 25:34, 46.

No Kasano a Naragsak Dagiti Agledleddaang

5. (a) Ania ti kayat a sawen ti ebkas a “dagidiay agleddaang”? (b) Kasano a maliwliwa dagiti kasta a malmaldaangan?

⁵ Kasla saan nga agtunos dagiti sasao a mangiladawan iti sumaruno a kinaragsak a dinakamat ni Jesus. Kinunana: “Naragsak dagidiay agleddaang, yantangay maliwliwadanto.” (Mateo 5:4) Kasano koma a naragsak ti tao a malmaldaangan? Tapno matarusan ti kaipapanan ti balikas ni Jesus, masapul nga usigentayo no ania a panagleddaang ti tuktukoyenna. Ibaga ni adalan a Santiago a ti managbasol a kasasaadtayo ti maysa a pakaigapuan ti panagleddaangtayo. Insuratna: “Dalusanyo dagiti imayo, dakayo a managbasol, ket gugoranyo dagiti pusoyo, dakayo a di makapangngeddeng. Agladingit ken agleddaang ken agsangitkayo. Ti panagkatawayo agbalin koma a panagleddaang, ket ti panagrag-oyo panagliday. Agpakumbabakayo iti imatang ni Jehova, ket itan-oknakayto.” (Santiago 4:8-10) Dagidiay pudno a malmaldaangan gapu iti managbasol a kasasaadda ket maliwliwa no maammuanda a mabalin a mapakawan dagiti basolda no watwatenda ti pammati iti pangsubbot a daton ni Kristo ken pudno nga agbabawida babaen ti panangaramidda iti pagayatan ni Jehova. (Juan 3:16; 2 Corinto 7:9, 10) Iti kasta, mabalinda ti maaddaan iti nagsayaat a relasion ken ni Jehova ken mangnamnama iti biag nga agnanayon tapno makapagserbi ken maidaydayawda ti Dios. Mangyeg dayta kadakuada iti pudno a kinaragsak.​—Roma 4:7, 8.

6. Apay a malmaldaangan ti dadduma, ken kasano a maliwliwada?

⁶ Karaman kadagiti tuktukoyen ni Jesus dagidiay malmaldaangan gapu kadagiti makarimon a kasasaad nga agraraira ditoy daga. Inyaplikar ni Jesus iti bagina ti padto iti Isaias 61:1, 2, nga agkuna: “Ti espiritu ti Soberano nga Apo Jehova adda kaniak, gapu ta ni Jehova pinulotannak a mangibaga iti naimbag a damag kadagidiay naemma. Imbaonnak a mangpatapat iti nasnaayan ti pusona, . . . a mangliwliwa kadagidiay amin nga agledleddaang.” Agaplikar met kadagiti napulotan a natda dayta a bilin, ket tungtungpalenda dayta a trabaho iti tulong dagiti kakaduada, ti “sabsabali a karnero.” Makipaspasetda amin iti simboliko a panangtanda kadagiti muging “dagiti tattao nga agsensennaay ken umas-asug gapu iti amin a nakarimrimon a bambanag a maar-aramid iti tengngana [apostata a Jerusalem, a mangiladawan iti Kakristianuan].” (Ezequiel 9:4) Maliwliwa dagiti kasta a malmaldaangan babaen ti “naimbag a damag ti pagarian.” (Mateo 24:14) Maragsakanda a makaammo a ti dakes a sistema ti bambanag ni Satanas ket asidegen a suktan ti nalinteg a baro a lubong ni Jehova.

Naragsak Dagiti Naalumamay

7. Ania ti saan a kaipapanan ti sao a “naalumamay”?

⁷ Intuloy ni Jesus ti Sermonna iti Bantay: “Naragsak dagiti naalumamay ti kababalinda, yantangay tawidendanto ti daga.” (Mateo 5:5) Ti kinaalumamay ket masansan a maipagarup a mangipakita iti kinakapuy. Ngem saan a kasta. Iti panangilawlawagna iti anag ti sao a naipatarus kas “naalumamay,” insurat ti maysa nga eskolar ti Biblia: “Ti kangrunaan a kababalin ti tao a [naalumamay] ket napigsa ti panagteppelna. Dina kaipapanan a namikki, emosional, wenno naulimek. Maysa dayta a kontrolado a kinabileg.” Kinuna ni Jesus maipapan iti bagina: “Naalumamay ti kababalinko ken napakumbaba ti pusok.” (Mateo 11:29) Kaskasdi, situtured nga indepensa ni Jesus dagiti nalinteg a prinsipio.​—Mateo 21:12, 13; 23:13-33.

8. Iti ania a mainaig unay ti kinaalumamay, ken apay a kasapulantayo dayta a galad no iti relasiontayo kadagiti sabsabali?

⁸ No kasta, ti kinaalumamay ket mainaig unay iti panagteppel. Kinapudnona, agkadua ti kinaalumamay ken panagteppel idi dinakamat ni apostol Pablo “ti bunga ti espiritu.” (Galacia 5:22, 23) Masukay ti kinaalumamay babaen ti tulong ti nasantuan nga espiritu. Maysa dayta a Nakristianuan a galad a tumulong tapno maaddaantayo iti kappia kadagiti adda iti ruar ken uneg ti kongregasion. Insurat ni Pablo: “Kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa.”​—Colosas 3:12, 13.

9. (a) Apay a saan laeng a kadagiti padatayo a tattao a maipakita ti kinaalumamay? (b) Kasano a dagiti naalumamay “tawidendanto ti daga”?

⁹ Ngem saan laeng a kadagiti padatayo a tattao a maipakitatayo ti kinaalumamay. Maiparangarangtayo met dayta no sidadaan nga agpasakuptayo iti kinasoberano ni Jehova. Ni Jesu-Kristo ti kangrunaan nga ulidan no iti dayta a banag. Idi adda ditoy daga, imparangarangna ti kinaalumamay ken naan-anay a nagpasakup iti pagayatan ni Amana. (Juan 5:19, 30) Isu ti kangrunaan a mangtawid iti daga yantangay isu ti nadutokan nga Agturay iti dayta. (Salmo 2:6-8; Daniel 7:13, 14) Iranudna dayta a tawid kadagiti 144,000 a “makipagtawid,” a napili “manipud iti sangatauan” tapno “agturayda a kas ar-ari iti daga.” (Roma 8:17; Apocalipsis 5:9, 10; 14:1, 3, 4; Daniel 7:27) Ni Kristo ken dagiti kakaduana iturayandanto ti minilion nga arig karnero a lallaki ken babbai a mangsagrapto iti naragsak a kaitungpalan ti padto ti salmo: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—Salmo 37:11; Mateo 25:33, 34, 46.

Naragsak Dagidiay Mabisin iti Kinalinteg

10. Ania ti maysa a pamay-an a mapennek dagidiay “mabisin ken mawaw iti kinalinteg”?

¹⁰ Daytoy ti sumaruno a kinaragsak a dinakamat ni Jesus bayat ti palawagna iti bantay ti Galilea: “Naragsak dagidiay mabisin ken mawaw iti kinalinteg, yantangay mapennekdanto.” (Mateo 5:6) No kadagiti Kristiano, ni Jehova ti mangikeddeng iti pagalagadan ti kinalinteg. Gapuna, dagidiay mabisin ken mawaw iti kinalinteg arigna a mabisin ken mawawda iti panangiwanwan ti Dios. Ammoda a managbasol ken imperpektoda ket tarigagayanda ti anamong ni Jehova. Anian a ragsakda no maadalda iti Sao ti Dios a no agbabawi ken dumawatda iti pammakawan maibatay iti pangsubbot a daton ni Kristo, mabalinda ti maaddaan iti nalinteg a takder iti imatang ti Dios!​—Aramid 2:38; 10:43; 13:38, 39; Roma 5:19.

11, 12. (a) Kasano a maibilang a nalinteg dagiti napulotan a Kristiano? (b) Kasano a ti kakadua dagiti napulotan napennek ti pannakawawda iti kinalinteg?

¹¹ Kinuna ni Jesus a naragsak dagita a tattao yantangay “mapennekdanto.” (Mateo 5:6) Dagiti napulotan a Kristiano a naayaban nga ‘agturay kas ar-ari’ a kadua ni Kristo idiay langit ket naideklara a “nalinteg maipaay iti biag.” (Roma 5:1, 9, 16-18) Pinulotan ida ni Jehova kas naespirituan nga annakna. Makipagtawidda ken ni Kristo, a naayabanda kas ar-ari ken papadi iti nailangitan a Pagarian a gobiernona.​—Juan 3:3; 1 Pedro 2:9.

¹² Ti kakadua dagiti napulotan saanda pay a naideklara a nalinteg maipaay iti biag. Ngem adda met kinalinteg a nakita ni Jehova kadakuada maibatay iti pammatida iti naibukbok a dara ni Kristo. (Santiago 2:22-25; Apocalipsis 7:9, 10) Naibilangda a nalinteg kas gagayyem ni Jehova nga agur-uray iti pannakaispal bayat ti “dakkel a rigat.” (Apocalipsis 7:14) Iti sidong ti “baro a langlangit,” ad-adda a mapennekto ti pannakawawda iti kinalinteg inton agbalinda a paset ti baro a daga a ‘pagtaenganto ti kinalinteg.’​—2 Pedro 3:13; Salmo 37:29.

Naragsak Dagiti Naasi

13, 14. Kadagiti ania a praktikal a pamay-an a maipakitatayo a naasitayo, ken ania dagiti iyegna a gunggona kadatayo?

¹³ Iti panangituloyna iti Sermonna iti Bantay, kinuna ni Jesus: “Naragsak dagiti naasi, yantangay maipakitaandanto iti asi.” (Mateo 5:7) Iti legal a panangmatmat, ti asi ket tumukoy iti konsiderasion nga ipakita ti hues iti maysa a nakabasol babaen ti dina panangipataw iti naan-anay a dusa nga ipalubos ti linteg. Ngem no iti Biblia, ti orihinal a sasao a naipatarus kas “asi” kaaduanna a tumukoy iti ebkas ti naayat a konsiderasion a mangbang-ar kadagidiay daksanggasat. Gapuna, siaaktibo nga ipakita dagiti naasi ti kinamanagayatda. Ti ilustrasion ni Jesus maipapan iti naimbag a Samaritano ket nasayaat a pagarigan ti maysa a tao a “nagtignay a siaasi” agpaay iti maysa nga agkasapulan.​—Lucas 10:29-37.

¹⁴ Tapno mapasaran ti kinaragsak nga iyeg ti panagbalin a naasi, masapul a mangipakitatayo iti kinaimbag kadagidiay agkasapulan. (Galacia 6:10) Naasian ni Jesus idi makitana dagiti tattao. “Simnek ti asina kadakuada, agsipud ta kaslada karkarnero nga awanan pastor. Ket rinugianna nga isuro ida iti adu a banag.” (Marcos 6:34) Ammo ni Jesus a ti naespirituan a banag ti kangrunaan a kasapulan ti sangatauan. Maipakitatayo met a naasitayo no iranudtayo kadagiti tattao ti kangrunaan a kasapulanda​—ti “naimbag a damag ti pagarian.” (Mateo 24:14) Mabalintayo ti mangitukon iti praktikal a tulong kadagiti padatayo a Kristiano, balo, ken ulila ken ‘agsaotayo iti makaliwliwa kadagiti malmaldaangan a kararua.’ (1 Tesalonica 5:14; Proverbio 12:25; Santiago 1:27) Saan laeng a mangyeg iti kinaragsak ti panangaramid iti dayta no di ket magun-odtayo pay ti asi ni Jehova.​—Aramid 20:35; Santiago 2:13.

Nasin-aw a Puso ken Mannakikappia

15. Kasanotay a masalimetmetan ti nasin-aw a puso ken agbalin a mannakikappia?

¹⁵ Kastoy ti kinuna ni Jesus maipapan iti maikanem ken maikapito a kinaragsak: “Naragsak dagiti nasin-aw ti pusoda, yantangay makitadanto ti Dios. Naragsak dagiti mannakikappia, yantangay maawagandanto iti ‘annak ti Dios.’” (Mateo 5:8, 9) Saan laeng a nadalus iti moral ti maysa a nasin-aw a puso no di ket saan pay a namulitan iti naespirituan ken naipamaysa ti debosionna ken ni Jehova. (1 Cronicas 28:9; Salmo 86:11) Ti orihinal a sao a naipatarus kas ‘mannakikappia’ literal a kaipapananna “maysa a mamagkappia.” Dagiti mannakikappia ket addaan iti natalna a relasion kadagiti Kristiano a kakabsatda ken, agingga a mabalin, kadagiti kaarrubada. (Roma 12:17-21) ‘Sapulenda ti talna ket surotenda dayta.’​—1 Pedro 3:11.

16, 17. (a) Apay a naawagan dagiti napulotan kas “annak ti Dios,” ken kasano a ‘makitada ti Dios’? (b) Kasano a ti “sabsabali a karnero” ‘makitada ti Dios’? (c) Kasano ken kaano a naan-anay nga agbalin nga “annak ti Dios” ti “sabsabali a karnero”?

¹⁶ Kadagiti mannakikappia a nasin-aw ti pusoda, naikari a “maawagandanto iti ‘annak ti Dios’” ken “makitadanto ti Dios.” Dagiti napulotan a Kristiano ket nayanak iti espiritu ken inampon ni Jehova kas “annak” bayat a sibibiagda ditoy daga. (Roma 8:14-17) No mapagungarda tapno maitipon ken ni Kristo idiay langit, agserbida iti saklang ni Jehova ken literal a makitada ti Dios.​—1 Juan 3:1, 2; Apocalipsis 4:9-11.

¹⁷ Ti mannakikappia a “sabsabali a karnero” agserbida ken ni Jehova iti sidong ti Nasayaat a Pastor, ni Kristo Jesus, nga agbalin kas ti ‘Agnanayon nga Amada.’ (Juan 10:14, 16; Isaias 9:6) Kadagidiay agballigi iti maudi a pannubok kalpasan ti Milenio a Panagturay ni Kristo, amponento ida ni Jehova kas annakna ditoy daga ket tagiragsakenda ti “nadayag a wayawaya ti annak ti Dios.” (Roma 8:21; Apocalipsis 20:7, 9) Bayat nga ur-urayenda dayta a tiempo, awaganda ni Jehova kas Amada, yantangay indedikarda kenkuana ti biagda, a bigbigenda nga isu ti Gubuayan ti Biagda. (Isaias 64:8) Kas kada Job ken Moises idi ugma, ‘makitada ti Dios’ babaen ti mata ti pammatida. (Job 42:5; Hebreo 11:27) Babaen ‘dagiti mata ti pusoda’ ken babaen ti umiso a pannakaammo iti Dios, malasinda dagiti agkakaimbag a galad ni Jehova ken ikagumaanda a tuladen babaen ti panangaramidda iti pagayatanna.​—Efeso 1:18; Roma 1:19, 20; 3 Juan 11.

18. Maibatay kadagiti immuna a pito a kinaragsak a dinakamat ni Jesus, siasino dagiti pudno a naragsak ita?

¹⁸ Nakitatayo a dagidiay sipapanunot iti naespirituan a kasapulanda, dagidiay agledleddaang, naalumamay, mabisin ken mawaw iti kinalinteg, naasi, nasin-aw ti pusoda, ken mannakikappia makasarakda iti pudpudno a ragsak iti panagserbida ken ni Jehova. Kaskasdi, masansan a makapasarda iti ibubusor, pannakaidadanes pay ketdi. Dayta kadi ti mangikkat iti ragsakda? Mausig dayta a saludsod iti sumaganad nga artikulo.

Panagrepaso

• Ania a ragsak ti mapasaran dagidiay sipapanunot iti naespirituan a kasapulanda?

• Kadagiti ania a pamay-an a maliwliwa dagidiay agledleddaang?

• Kasanotay a maiparangarang ti kinaalumamay?

• Apay a masapul a naasi, nasin-aw ti puso, ken mannakikappiatayo?

[Ladawan iti panid 10]

“Naragsak dagidiay sipapanunot iti naespirituan a kasapulanda”

[Dagiti Ladawan iti panid 10]

“Naragsak dagidiay mabisin ken mawaw iti kinalinteg”

[Ladawan iti panid 10]

“Naragsak dagiti naasi”