Salsaludsod Dagiti Agbasbasa
Ti kadi sasao ni Esteban iti Aramid 7:59 ipamatmatna a ni Jesus ti rumbeng a pagkararagan?
Kuna ti Aramid 7:59: “Inub-uborda ni Esteban iti batbato bayat a nagdawdawat ken kinunana: ‘Apo Jesus, awatem ti espirituk.’” Namagpanunot dayta kadagiti dadduma yantangay kuna ti Biblia a ni Jehova ti “Managdengngeg iti kararag.” (Salmo 65:2) Ni Jesus kadi a talaga ti nagkararagan ni Esteban? Ipamatmat kadi dayta a ni Jesus isu met laeng ni Jehova?
Kuna ti King James Version a ni Esteban “immararaw iti Dios.” Maawatantay ngarud no apay nga adu ti umanamong iti kinuna ti komentarista iti Biblia a ni Matthew Henry: “Ni Kristo ti pagkarkararagan ni Esteban iti dayta a gundaway isu a ni Kristo met koma ti pagkararagantayo.” Ngem saan nga umiso dayta a kapanunotan. Apay?
Ti Barnes’ Notes on the New Testament sipupudno nga admitirenna: “Ti sao a Dios ket awan iti orihinal, isu a saan a karaman dayta iti patarus. Awan dayta kadagiti nagkauna [a manuskrito] wenno bersion.” Kasano a naiserrek ti sao a “Dios” iti daytoy a bersikulo? Ti eskolar a ni Abiel Abbot Livermore inawaganna dayta kas “maysa a pagarigan ti narelihiosuan a kapanunotan sigun iti pammati dagiti agipatpatarus.” Gapuna, kaaduan a moderno a patarus inikkatda ti sao a Dios.
Ngem adu a bersion ti agkuna a ni Esteban ‘nagkararag’ ken ni Jesus. Ken ti footnote ti New World Translation of the Holy Scriptures-With References ipakitana a ti termino a “nagdawdawat” kaipapananna met ti “pakaasi; kararag.” Saanna kadi nga ipasimudaag a ni Jesus ti Mannakabalin-amin a Dios? Saan. Ti Vine’s Expository Dictionary of Old and New Testament Words ilawlawagna nga iti dayta a kaso, ti orihinal a Griego a sao nga e·pi·ka·leʹo kaipapananna: “Umawag, agpakaasi; . . . agapelar iti maysa nga autoridad.” Inusar ni Pablo dayta met laeng a sao idi kinunana: “Agapelarak ken Cesar!” (Aramid 25:11) Maitutop ngarud ti kuna ti The New English Bible a ni Esteban “immawag” ken ni Jesus.
Ania ti nangtignay ken ni Esteban nga agapelar? Sigun iti Aramid 7:55, 56, ni Esteban, “yantangay napnuan iti nasantuan nga espiritu, minatmatanna ti langit ket nakitana ti dayag ti Dios ken ni Jesus nga agtaktakder iti makannawan ti Dios.” Kadawyanna a ni Jehova ti pangiturturongan ni Esteban kadagiti kiddawna babaen ti nagan ni Jesus. Ngem gapu ta nasirmatana ni napagungar a Jesus iti dayta a kanito, agparang a narikna ni Esteban a mabalinna ti direkta nga agapelar kenkuana, a kunkunana: “Apo Jesus, awatem ti espirituk.” Ammo ni Esteban a naikkan ni Jesus iti autoridad a mangpagungar kadagiti natay. (Juan 5:27-29) Kiniddawna ngarud ken ni Jesus a saluadanna ti espiritu, wenno puersa ti biagna, agingga a dumteng ti aldaw inton isu ket pagungaren ni Jesus iti imortal a biag idiay langit.
Dayta ngata nga ababa a balikas ni Esteban ipamatmatna a ni Jesus ti pagkararagan? Saan a pulos. Nalawag a pinagduma ni Esteban da Jehova ken Jesus yantangay ibaga ti salaysay a nakitana ni Jesus “nga agtaktakder iti makannawan ti Dios.” Maysa pay, manmano dagita a pasamak. Ti kakaisuna a sabali pay nga umasping a balikas a naiturong ken ni Jesus isu ti sasao ni apostol Juan, a direkta a nakisarita ken ni Jesus idi nakitana iti maysa a sirmata.—Apocalipsis 22:16, 20.
Nupay maiparbeng nga iturong dagiti Kristiano ti amin a kararagda ken ni Jehova a Dios, saan met nga agbaliw ti pammatida a ni Jesus “ti panagungar ken ti biag.” (Juan 11:25) Kas ken Esteban, ti panagtalek iti pannakabalin ni Jesus a mangpagungar kadagiti pasurotna ket makatulong ken mangsaranay kadatayo kadagiti panawen ti pannakasubok.