Makidangdangadangka Kadi iti Riknam?
ITI kaaduan a paset ti biagna, marigatan ni Lena a mangraem iti bagina. “Dandani awanen ti panagraemko iti bagik gapu kadagiti tawtawen ti seksual a pannakaabusok idi ubingak,” kinunana. “Mariknak a kasla awan pulos serserbik.” Ni Simone malaglagipna met ti kinaagtutubona ket kunana, “Kasla adda kurang iti biagko ket mariknak a saanak unay a napateg.” Agparang a nasaknap ita ti nakaro a ladingit a resulta dagiti kasta a rikna. Sigun iti maysa nga organisasion a mangipapaay iti balakad kadagiti tin-edyer babaen ti telepono, nganngani kagudua kadagiti agteltelepono kadakuada ti mangyebkas iti “agtultuloy a rikna ti nababa a panangipateg iti bagi.”
Sigun iti dadduma nga eksperto, marikna ti dadduma nga adda pagkuranganda no adda mangiparikna nga awan serserbida. Tumanor ti kasta a kapanunotan no ti maysa ket kanayon a mapagungtan, nakaro ken sikakas-ang a mababalaw, wenno maabuso. Aniaman ti rason, mabalin a mangpakapuy ken makadangran pay ketdi dagiti ibungana. Ti maysa a nabiit pay a medikal a panagadal ipakitana a dagiti addaan iti negatibo a rikna maipapan iti bagida agannayasda a di agtalek iti bagida ken kadagiti sabsabali, isu a di inggagara a madadaelda ti nasinged ken nainggayyeman a relasionda kadagiti dadduma. “No an-anagen,” kuna ti report mainaig iti dayta a panagadal, “isuda met laeng ti ‘agar-aramid’ kadagiti mismo a pagam-amkanda a kasasaad.”
Dagiti tattao nga addaan iti kasta a rikna ket masansan a biktima ti aw-awagan ti Biblia kas ti bukodda a “mangrirriribuk a pampanunot.” (Salmo 94:19) Mariknada nga awan pulos ti maaramidda a naimbag. No adda di nasayaat a pasamak, insigida a babalawenda ti bagida. Nupay adda dagiti mangpadayaw kadakuada gapu kadagiti gapuananda, mariknada a kasda la impostor a maibutaktakto. Gapu ta patienda a saanda a maikari iti kinaragsak, adu ti naaddaan iti kababalin a makadangran iti bagida ket mariknada a dida kabaelan nga ilinteg dayta. Ni Lena, a nadakamat itay, naadaan iti nakaro a sakit mainaig iti pannangan kas resulta ti pannakapukaw ti panagraemna iti bagina, ket aklonenna, “Mariknak a diak kabaelan a balbaliwan ti aniaman.”
Dagiti kadi makidangdangadang iti kasta a “mangrirriribuk a pampanunot” didanto pulos makalung-aw manipud iti kasta a rikna? Adda kadi ti mabalinmo a maaramid tapno maparmek ti kasta a rikna? Nangipasdek ti Biblia kadagiti prinsipio ken praktikal a balakad a nakatulong iti adu a tattao nga agballigi iti pannakidangadangda. Ania ti sumagmamano kadagitoy a prinsipio, ken kasano a nakatulong dagitoy tapno dagiti agsagsagaba makasapulda iti rag-o iti biag? Ilawlawag dayta ti sumaganad nga artikulo.