Kasano a Masarangetmo Dagiti Negatibo a Rikna?

NAPADASAM kadin ti naaddaan iti negatibo a rikna? Kinapudnona, addaantayo amin iti kasta a rikna. Nasaknap ita ti rigat ti panagbiag, kinaranggas, ken nakaro a kinaawan hustisia. Di pagsiddaawan nga adu ti malapunos iti liday, pannakakonsiensia, ken pannakarikna iti kinaawan pateg.

Mabalin a napeggad dagita a rikna. Dagita ti mabalin a mangikkat iti panagtalektayo iti bagitayo, iti abilidadtayo nga agrason, ken iti rag-otayo. Kuna ti Biblia: “Impakitam kadi a naupayka iti aldaw ti rigat? Kurangto ti bilegmo.” (Proverbio 24:10) Kasapulantayo ti bileg wenno pigsa tapno makapagtultuloytayo nga agbiag iti daytoy nariribuk a lubong. Gapuna, napateg nga itultuloytayo a kontrolen dagiti negatibo a rikna.a

Mangipapaay ti Biblia iti sumagmamano a balakad a nabileg a pangontra kadagiti negatibo a rikna. Ni Jehova a Dios, ti Namarsua ken Mangtagtaginayon iti amin a biag, dina kayat a sumukoka gapu iti pannakaupaymo wenno kinaawan namnamam. (Salmo 36:9) Gapuna, usigentayo ti tallo a pamay-an no kasano a makatulong ti Saona tapno masarangettayo dagiti negatibo a rikna.

Sipapanunotka Koma a Maseknan ti Dios Kenka

Ipagarup ti dadduma a tattao nga awan ti waya ti Dios a mangtaming kadagiti personal a rikriknatayo. Kasta kadi ti riknam? Kinapudnona, ipanamnama ti Biblia kadatayo a maseknan ti Namarsua kadagiti riknatayo. Kinuna ti salmista: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” (Salmo 34:18) Anian a makaliwliwa a maammuan a ti mannakabalin-amin a Soberano ket adda iti asidegtayo no marigrigatantayo!

Ti Dios ket saan a nakayakay. Kuna ti Biblia a ti “Dios ket ayat.” (1 Juan 4:8) Ipatpategna dagiti tattao ken maseknan kadagidiay agsagsagaba. Kas pagarigan, idi naadipen dagiti Israelita idiay Egipto agarup 3,500 a tawen ti napalabasen, kinuna ti Dios: “Di mapagduaduaan a nakitak ti pannakaparigat ti ilik nga adda idiay Egipto, ket nangngegko ti ikkisda kas imbunga dagidiay mangdagdagdag kadakuada nga agtrabaho; agsipud ta ammok unay dagiti rigat a sagsagabaenda. Ket bumabaak tapno ispalek ida.”​—Exodo 3:7, 8.

Naan-anay a maawatan ti Dios ti riknatayo. Ngamin, “isu daydiay nangaramid kadatayo, ket saan a datayo.” (Salmo 100:3) Gapuna, uray no kasla saandatayo a maawatan dagiti padatayo a tattao, sigurado a maawatannatayo ti Dios. Kuna ti Sao ti Dios: “Saan nga iti wagas nga ikikita ti tao, agsipud ta ti maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.” (1 Samuel 16:7) Ammo ti Dios uray ti kaunggan a rikriknatayo.

Siempre, ammo met ni Jehova dagiti biddut ken pagkapuyantayo. Ngem agyamantayo ta manangpakawan ti naayat a Namarsua kadatayo. Kinuna ti napaltiingan a mannurat ti Biblia a ni David: “Kas iti maysa nga ama mangipakita iti asi iti annakna, ni Jehova nangipakita iti asi kadagidiay agbuteng kenkuana. Ta pagaammona unay ti pannakapormatayo, a laglagipenna a tapoktayo.” (Salmo 103:13, 14) Mabalin a bin-ig a dakes ti makitkitatayo iti bagitayo, ngem saan a kasta ti panangmatmat ti Dios kadatayo. Kitaenna no ania ti naimbag kadatayo ket lipatenna ti dakes a naaramidantayo no la ket ta pagbabawyantayo dagiti basoltayo.​—Salmo 139:1-3, 23, 24.

Gapuna, no mariknatayo a kasla awan ti serserbitayo, nasken a pagreggetantayo a sarangten dayta. Nasken a laglagipentayo no ania ti panangmatmat kadatayo ti Dios!​—1 Juan 3:20.

Agbalinka a Nasinged iti Dios

Ania ti pagimbaganna no matmatantayo ti bagitayo sigun iti panangmatmat kadatayo ti Dios? Dayta ti makatulong kadatayo nga agbalin a nasinged iti Dios​—ti sumaganad nga addang tapno maparmektayo dagiti negatibo a rikna. Talaga kadi a posible dayta?

Kas naayat nga Ama, sigagagar ni Jehova a Dios a tumulong kadatayo tapno agbalintayo a nasinged kenkuana. Idagadag kadatayo ti Biblia: “Umadanikayo iti Dios, ket isu umadaninto kadakayo.” (Santiago 4:8) Utobem daytoy nakaskasdaaw a kinapudno: Nupay nakapuy ken managbasoltayo, mabalin a maaddaantayo iti nasinged a personal a relasion iti Soberano iti uniberso.

Iti Biblia, impalgak ti Dios ti maipapan kenkuana tapno maam-ammotayo kas maysa a persona. Babaen ti regular a panangbasa iti Biblia, maammuantayo dagiti makaay-ayo a galad ti Dios.b Bayat nga ut-utobentayo ti kasta a pannakaammo, mariknatayo a nasingsingedtayo ken Jehova. Nalawlawag a mabigbigtayo ti talaga a kinasiasinona​—maysa a naayat, naasi nga Ama.

Ad-adda pay a pagimbagantayo no utobentayo ti mabasbasatayo iti Biblia. Sumingedtayo iti nailangitan nga Amatayo babaen ti panangtulad ken panangipapusotayo iti pampanunotna, nga ipalubostayo a dagita ti mangatur, mangliwliwa, ken mangiwanwan kadatayo. Nangnangruna a kasapulan nga aramidentayo dayta no adda dagiti pakaburiboran wenno pakadanagantayo. Kastoy ti inyebkas ti salmista: “No madanagan ken mariribukak, sika ti mangliwliwa ken mangparagsak kaniak.” (Salmo 94:19, Ti Baro a Naimbag a Damag Biblia) Makaliwliwa unay ti Sao ti Dios. No sipapakumbaba nga awatentayo ti mensahe ti kinapudno, mariknatayto nga in-inut a mapukaw ti negatibo a rikna ket masuktan dayta iti liwliwa ken talna a ti laeng Dios ti makaipaay. Iti kasta, arigna liwliwaennatayo ni Jehova no kasano a ti naayat a nagannak liwliwaenna ti nasaktan wenno naupay nga anakna.

Ti maysa pay a tulbek iti panagbalin a gayyem ti Dios ramanenna ti regular a pannakisarita kenkuana. Ipanamnama kadatayo ti Biblia nga “uray ania ti dawatentayo maitunos iti pagayatan [ti Dios], denggennatayo.” (1 Juan 5:14) Aniaman ti pagbutbutngan wenno pakadanagantayo, mabalintayo nga ikararag dayta iti Dios ken kiddawen ti tulongna. No ibukboktayo iti Dios ti linaon ti pusotayo, maaddaantayto iti talna ti panunot. Insurat ni apostol Pablo: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.”​—Filipos 4:6, 7.

No adda sursurotem nga eskediul para iti regular a panagbasa iti Biblia, panagutob, ken panagkararag, sigurado a suminged ti relasionmo iti nailangitan nga Amam. Dayta a relasion ti nabileg a pangontra kadagiti negatibo a rikna. Ania pay ti makatulong?

Ipamaysam ti Panunotmo iti Sigurado a Namnama iti Masanguanan

Uray no maipasangotayo kadagiti karirigatan a kasasaad, kabaelantayo nga ipamaysa ti pampanunottayo kadagiti naimbag a bambanag. Kasano? Ipapaayannatayo ti Dios iti sigurado a namnama iti masanguanan. Ginupgop ni apostol Pedro daytoy a nakaskasdaaw a namnama babaen kadagitoy a sasao: “Adda baro a langlangit ken baro a daga nga ur-urayentayo sigun iti kari [ti Dios], ket kadagitoy agtaeng ti kinalinteg.” (2 Pedro 3:13) Ania ti kayat a sawen dayta?

Ti sasao a “baro a langlangit” tukoyenna ti maysa a gobierno​—ti nailangitan a Pagarian ti Dios a ni Jesu-Kristo ti agturay. Ti “baro a daga” tukoyenna ti maysa a baro a kagimongan dagiti tattao ditoy daga a mangtagtagiragsak iti anamong ti Dios. Iti sidong ti turay ti “baro a langlangit,” mawayawayaan dayta a kagimongan iti amin a banag a pakaigapuan dagiti negatibo a rikna. Maipapan kadagiti matalek a tattao nga agbiagto iti dayta a kagimongan, impanamnama kadatayo ti Biblia a ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”​—Apocalipsis 21:4.

Umanamongkayo la ketdi a makaparagsak ken makaparegta dayta a kari. Dayta ti makagapu a ti masanguanan nga isagsagana ti Dios para kadagiti pudno a Kristiano ket tinukoy ti Biblia kas “ti naragsak a namnama.” (Tito 2:13) Maiwaksitayo dagiti negatibo a rikna no ipamaysatayo ti pampanunottayo kadagiti kari ti Dios para iti sangatauan, agraman dagiti rason no apay a mapagtalkan ken sigurado dagita a kari.​—Filipos 4:8.

Ti namnamatayo a maisalakan ket inyasping ti Biblia iti kabal ti ulo. (1 Tesalonica 5:8) Kadagiti nagkauna a tiempo, di pulos makigubat ti maysa a soldado no awan ti kabal ti ulona. Ammona a dayta ti mangsalaknib iti ulona tapno saan a madangran wenno saan unay a masaktan. No kasano a dayta a kabal salaknibanna ti ulo, ti namnama salaknibanna ti panunot. No sangkapanunottayo dagiti makapabileg iti namnamatayo, maiwaksitayo dagiti negatibo a rikna a kas iti panagbuteng ken panagduadua.

No kasta, posible a masarangettayo dagiti negatibo a rikna. Kabaelam nga aramiden dayta! Utobem no ania ti panangmatmat kenka ti Dios, umadanika kenkuana, ken ipamaysam ti pampanunotmo iti namnama iti masanguanan. Iti kasta, masiguradom a matagiragsakmonto ti tiempo inton awanen dagiti negatibo a rikna!​—Salmo 37:29.

[Footnotes]

[Blurb iti panid 19]

“Ammok unay dagiti rigat a sagsagabaenda.”​—EXODO 3:7, 8

[Blurb iti panid 20]

“No madanagan ken mariribukak, sika ti mangliwliwa ken mangparagsak kaniak.”​—SALMO 94:19, TI BARO A NAIMBAG A DAMAG BIBLIA

[Blurb iti panid 21]

“Ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo.”​—FILIPOS 4:7

[Kahon/Ladawan iti panid 20, 21]

Dagiti Makaliwliwa a Teksto Maipapan ken Jehova a Dios

“Jehova, maysa a Dios a naasi ken managparabur, nabannayat nga agunget ken naruay iti naayat a kinamanangngaasi ken kinapudno.”​—EXODO 34:6.

“Agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”​—2 CRONICAS 16:9.

“Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”​—SALMO 34:18.

“Sika, O Jehova, naimbagka ken sisasagana a mamakawan.”​—SALMO 86:5.

“Ni Jehova naimbag iti isuamin, ket dagiti asina addada iti amin nga ar-aramidna.”​—SALMO 145:9.

“Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng. Siak tulongankanto.’”​—ISAIAS 41:13.

“Bendito koma . . . ti Ama dagiti nadungngo nga asi ken ti Dios ti amin a liwliwa.”​—2 CORINTO 1:3.

“Pagtalgedentayto dagiti pusotayo iti sanguananna maipapan iti aniaman a pangkondenaran kadatayo dagiti pusotayo, agsipud ta ti Dios dakdakkel ngem kadagiti pusotayo ket ammona ti amin a bambanag.”​—1 JUAN 3:19, 20.

[Kahon/Dagiti Ladawan iti panid 22]

Sibaballigi a Nadaeranda Dagiti Negatibo a Rikna

“Mammartek ni tatangko, ket adu ti sinagabak a rigat gapu kenkuana. Diak pulos narikna a napategak. Ngem idi nakipagadalak iti Biblia kadagiti Saksi ni Jehova, naammuak ti kari a biag nga agnanayon ditoy daga. Naragsakanak gapu iti daytoy a namnama. Gapuna, nagbalin a regular a paset ti biagko ti panagbasa iti Biblia. Kanayon nga adda Biblia iti sibayko. No mariknak dagiti negatibo a rikna, pidutek ti Biblia ket agbasaak kadagiti makaliwliwa a teksto. Ti pannakabasak kadagiti agkakaimbag a galad ti Dios ti mangipanamnama kaniak a napategak iti imatangna.”​—Kátia, agtawen iti 33.c

“Adiktoak iti arak, marihuana, cocaine, crack cocaine, ken agsaysay-upak iti rugby. Nagpalpalamaak gapu ta napukawen ti dandani amin a sanikuak. Ngem idi nakipagadalak iti Biblia kadagiti Saksi ni Jehova, nagbaliw nga interamente ti panagbiagko. Naam-ammok ti Dios kas maysa a Persona. Nupay makonkonsiensiaak ken mariknak nga awan serserbik, nasursurok ti agtalek iti naayat a kinamanangngaasi ti Dios. Ammok nga agtultuloy a pabilgennak ti Dios tapno maparmekko dagiti negatibo a riknak. Ti kasayaatan a kanito iti biagko ket idi naammuak ti kinapudno iti Biblia.”​—Renato, agtawen iti 37.

“Sipud kinaubingko, masansan nga idiligko ti bagik ken manongko. Kanayon a mariknak a nakapkapuyak. Awan ti panagtalekko iti bagik ket pagduaduaak dagiti abilidadko. Ngem diak simmuko. Kanayon a nagkararagak ken Jehova, ket tinulongannak tapno maparmekko dagita a negatibo a riknak. Makaparegta a maammuan a ti Dios talaga nga ay-ayaten ken ipatpategnak!”​—Roberta, agtawen iti 45.

[Footnote]