Salsaludsod Dagiti Agbasbasa

Iti nagkauna nga Israel, ania ti ipamatmat ti milagro a lawag a naawagan no dadduma a Shechinah a nagparang iti Kasasantuan iti tabernakulo ken iti templo?

Ni Jehova, a naayat nga Ama ken Manangsalaknib iti ilina, imparangarangna iti Israel ti kaaddana iti nakakadkadlaw a pamay-an. Ti maysa a pamay-an nga inaramidna dayta ket babaen ti naraniag nga ulep nga adda iti lugar a pagdayawan kenkuana.

Dayta a nakakadkadlaw a lawag irepresentarna ti di makita a kaadda ni Jehova. Makita dayta iti Kasasantuan a siled iti tabernakulo ken iti templo a binangon ni Solomon. Dayta a milagro a lawag dina ipamatmat a literal nga adda ni Jehova iti dayta a siled. Ti Dios ket saan a mabalin a malaon ti aniaman a patakder a binangon dagiti tattao. (2 Cronicas 6:18; Aramid 17:24) Babaen dayta a karkarna a lawag iti santuario ti Dios a mangiparangarang iti mangsalaknib a presensia ni Jehova, mapatalgedan iti nangato a padi ken maipatalgedna met kadagiti amin nga Israelita nga aywanan ken ipaay ni Jehova dagiti kasapulanda.

Kalpasan ti pannakaisurat ti Biblia, daytoy a lawag ket naawagan Shechinah (shekhi·nahʹ) iti Aramaiko a lenguahe, maysa a sao a kaipapananna “dayta nga agnaed” wenno “ti panagnaed.” Daytoy a termino ket saan nga agparang iti Biblia ngem masarakan dayta kadagiti Aramaiko a patarus ti Hebreo a Kasuratan, a pagaammo met kas dagiti Targum.

Idi impaayna dagiti bilin no kasano a mabangon ti tabernakulo, kinuna ni Jehova ken ni Moises: “Masapul nga ikabilmo ti kalub iti rabaw ti Lakasa, ket iti Lakasa ikabilmonto ti pammaneknek nga itedkonto kenka. Ket agparangakto kenka sadiay ken makisaoak kenka manipud ngatuen ti kalub, manipud iti nagbaetan ti dua a kerubin nga adda iti rabaw ti lakasa.” (Exodo 25:21, 22) Ti Lakasa a nadakamat ket maysa a baul a nakalupkopan iti balitok nga adda iti Kasasantuan. Adda dua a balitok a sinan-kerubin iti rabaw ti kalub ti Lakasa.

Sadino nga agtimek ni Jehova? Impaayna ti sungbat idi kinunana ken ni Moises: “Iti ulep agparangakto iti ngatuen ti kalub.” (Levitico 16:2) Nagtalinaed daytoy nga ulep iti ngatuen ti sagrado a Lakasa iti nagbaetan ti dua a balitok a sinan-kerubin. Saan nga ibaga ti Biblia no kasano kangato dayta nga ulep wenno kasano kaadayona iti ngatuen dagiti sinan-kerubin.

Dayta a naranga nga ulep pinaglawagna ti Kasasantuan. Kinapudnona, dayta laeng ti gubuayan ti lawag iti dayta a siled, isu a saan nga agar-arikap ti nangato a padi no sumrek iti kaunggan a siled bayat ti Aldaw ti Panangabbong. Isu ket agtaktakder iti presensia ni Jehova.

Dayta kadi a milagro a lawag adda aniaman a kaipapananna kadagiti Kristiano? Nasirmata ni apostol Juan ti maysa a siudad nga ‘awan ti rabii.’ Dayta a siudad isu ti Baro a Jerusalem, a buklen dagiti napulotan a Kristiano a napagungar tapno makipagturay ken ni Jesus. Ti lawag iti dayta a siudad ket saan a naggapu iti init wenno iti bulan. Ti dayag ni Jehova a Dios direkta a lawaganna dayta nga organisasion, no kasano a ti Shechinah nga ulep linawaganna ti Kasasantuan. Kasta met, ti Kordero a ni Jesu-Kristo isu ti “pagsilawan” dayta a siudad. Kas resultana, dayta a “siudad” iburayna ti naespirituan a lawag ken bendisionna kadagiti naispal a tattao manipud iti amin a nasion tapno agserbi a giyada.​—Apocalipsis 21:22-25.

Gapu ta aglaplapusanan ti kasta a bendision a maaw-awatda manipud iti Dios, makapagtalek dagiti agdaydayaw ken ni Jehova nga isu ti manangsalaknib a Pastor ken nadungngo nga Amada.