Pannagna iti Dana ti Rumanraniag a Lawag

“Ti dana dagidiay nalinteg ket kas iti naraniag a lawag a lumawlawag a lumawlawag agingga nga immaldaw unayen.”​—PROVERBIO 4:18.

1, 2. Ania ti tinagiragsak dagiti adipen ti Dios kas resulta ti rumanraniag a naespirituan a lawag manipud ken ni Jehova?

SIASINO pay koma ti nasaysayaat a makailadawan iti epekto ti sumingsingising nga init iti nariwet a rabii no saan a ti mismo a Gubuayan ti lawag, ni Jehova a Dios? (Salmo 36:9) ‘No ti bannawag tenglenna dagiti ungto ti daga,’ kuna ti Dios, ‘ti daga pagbalbaliwenna ti bagina kas iti pila iti baba ti maysa a pangselio, ket agsaad ti bambanag a kas iti pagan-anay.’ (Job 38:12-14) Bayat a rumanraniag ti init, lumawlawag ti buya ti daga, no kasano nga agbalbaliw met ti langa ti maysa a nalukneng a pila apaman a maipadalan iti dayta ti maysa a pangselio nga addaan iti disenio.

² Ni Jehova met laeng ti Gubuayan ti naespirituan a lawag. (Salmo 43:3) Bayat nga adda ti lubong iti nakaro a kinasipnget, ti pudno a Dios agtultuloy a lawaganna dagiti adipenna. Ania ti resultana? Sumungbat ti Biblia: “Ti dana dagidiay nalinteg ket kas iti naraniag a lawag a lumawlawag a lumawlawag agingga nga immaldaw unayen.” (Proverbio 4:18) Babaen ti rumanraniag a lawag manipud ken ni Jehova, agtultuloy a lumawlawag ti dana dagiti adipenna. Maguggugoran ti organisasion, doktrina, ken moralidadda gapu iti dayta.

Ti Rumanraniag a Lawag Gugoranna ti Organisasion

3. Ania a kari ti linaon ti Isaias 60:17?

³ Babaen ken ni propeta Isaias, impakpakauna ni Jehova: “Imbes a ti gambang mangyegakto iti balitok, ket imbes a ti landok mangyegakto iti pirak, ket imbes a ti kayo, gambang, ket imbes a ti batbato, landok.” (Isaias 60:17) Maibilang a panagrang-ay no ti nababa ti kalidadna a material ket masukatan iti de kalidad a material. Umasping iti dayta, rimmang-ay dagiti Saksi ni Jehova mainaig kadagiti urnos ti organisasionda kabayatan “ti panungpalan ti sistema ti bambanag,” wenno “kadagiti maudi nga aldaw.”​—Mateo 24:3; 2 Timoteo 3:1.

4. Ania nga urnos ti nangrugi idi 1919, ken kasano a nakagunggona dayta?

⁴ Iti rugrugi ti maudi nga al-aldaw, dagiti kongregasion dagiti Estudiante ti Biblia, kas pannakaawag idi kadagiti Saksi ni Jehova, ibutosda no siasino ti agbalin a papanglakayen ken diakonoda. Nupay kasta, adda dagiti panglakayen a saan a napasnek nga agebanghelio. Saanda laeng nga agkedked a mangasaba no di ket upayenda pay a mangasaba dagiti dadduma. Gapuna idi 1919, adda baro a takem a nayussuat iti tunggal kongregasion―ti panagbalin a direktor ti serbisio. Ti direktor ti serbisio ket saan nga imbutos ti kongregasion, no di ket teokratiko nga insaad ti sanga nga opisina ti ili ti Dios. Dagiti annongen ti nadutokan a direktor iramanna ti panangorganisar iti trabaho a panangasaba, panangikeddeng kadagiti teritoria, ken panangiparegta iti pannakipaset iti tay-ak ti ministerio. Kadagiti simmaruno a tawtawen, kasta unay a naparayray ti trabaho a panangikasaba iti Pagarian.

5. Ania a panagrang-ay ti napasamak idi dekada 1920?

⁵ Ad-adda a naparegta ti amin a kameng ti kongregasion idi naidagadag nga ‘Ipablaak, ipablaak, ipablaak, ti Ari ken ti pagarianna,’ kabayatan ti 1922 a kombension dagiti Estudiante ti Biblia idiay Cedar Point, Ohio, U.S.A. Nangrugi idi 1927, naorganisar ti panangasaba agingga a naikeddeng a ti Domingo ti kasayaatan nga aldaw tapno makipaset iti panagbalaybalay a trabaho. Apay nga iti dayta nga aldaw? Gapu ta ti Domingo ti aldaw nga awan trabaho ti kaaduan a tattao. Dagiti Saksi ni Jehova ita iparparangarangda ti kasta met laeng nga espiritu babaen ti panangdanonda kadagiti tattao kadagiti tiempo a dakdakkel ti posibilidad nga adda dagitoy kadagiti pagtaenganda, kas koma kadagiti ngudo ti lawas ken kadagiti rabii.

6. Idi 1931, ania a resolusion ti napatalgedan, ken kasano nga inapektaranna ti trabaho a panangiwaragawag iti Pagarian?

⁶ Idi malem ti Domingo, Hulio 26, 1931, sibibileg a naiparegta ti trabaho a panangiwaragawag iti Pagarian idi napatalgedan ti maysa a resolusion kabayatan ti kombension idiay Columbus, Ohio, U.S.A., ken kalpasanna iti intero a lubong. Kastoy ti sagudayen ti dadduma a paset ti resolusion: “Ad-adipennakami ni Jehova a Dios a nadutokan a mangitungpal iti trabaho agpaay iti naganna, ken, kas panagtulnog iti bilinna, mangidanon iti mensahe nga inkasaba ni Jesu-Kristo, ken mangipakaammo kadagiti tattao a ni Jehova ti pudno ken Mannakabalin-amin a Dios; gapuna, siraragsak a bigbigen ken awatenmi ti nagan nga imbaga ni Apo Dios, ket tarigagayanmi ti mabigbig ken maawagan kas dagiti saksi ni Jehova.” (Isaias 43:10) Anian a naglawag nga ipakita dayta a baro a nagan no ania ti kangrunaan nga aktibidad ti amin a mangaw-awit iti dayta a nagan! Wen, adda trabaho nga intalek ni Jehova a pakipasetan ti amin nga adipenna. Talaga nga adu ti nangipangag iti dayta!

7. Ania a panagbalbaliw ti nairugi idi 1932, ken apay?

⁷ Adu a panglakayen ti sipapakumbaba a nangipamaysa iti biagda iti trabaho a panangasaba. Ngem iti dadduma a lugar, adda dagiti nabutosan a panglakayen a siiinget a di umanamong iti kapanunotan a rumbeng a mangasaba ti amin a kameng ti kongregasion. Nupay kasta, saan a nalapdan ti kanayonan a panagrang-ay. Idi 1932, dagiti kongregasion ket nakaawat iti instruksion babaen Ti Pagwanawanan nga isardengdan ti panangibutos kadagiti panglakayen ken diakono. Imbes ketdi, mangibutosda laengen iti maysa a komite ti serbisio a buklen dagiti naespirituan a lallaki a makipaspaset iti trabaho a panangasaba. Ti panangaywan ket naitalek kadagidiay aktibo a makipaspaset iti ministerio, banag a nangpadur-as iti trabaho.

Nangyeg Kadagiti Panagrang-ay ti Naparaniag a Lawag

8. Ania a panagrang-ay ti dimteng idi 1938?

⁸ Ti lawag ket “lumawlawag a lumawlawag.” Idi 1938, namimpinsan a naikkaten ti panagbutos. Amin nga adipen iti kongregasion ket teokratiko a madutokanen iti sidong ti panangiwanwan “ti matalek ken masirib nga adipen.” (Mateo 24:45-47) Dayta a panagbalbaliw ti dagus nga inyaplikar ti dandani amin a kongregasion dagiti Saksi ni Jehova, ket nagtultuloy a nagbunga ti trabaho a panangsaksi.

9. Idi 1972, ania nga urnos ti nayussuat, ken apay a maysa dayta a panagrang-ay?

⁹ Idi Oktubre 1, 1972, nangrugi a maannurot ti sabali pay a panagbalbaliw mainaig kadagidiay mangay-aywan iti kongregasion. Kadagiti kongregasion dagiti Saksi ni Jehova iti sangalubongan, saanen a maymaysa a panglakayen ti agserbi kas adipen wenno manangaywan iti kongregasion. Imbes ketdi, nayussuat a maysa a bagi dagiti panglakayen ti agserbi kas manangaywan. Dayta a baro nga urnos ket nangipaay iti dakkel a pammabileg kadagiti nataengan a lallaki tapno ragpatenda dagiti kualipikasion a makalikaguman kadagidiay agbalin a mamangulo iti kongregasion. (1 Timoteo 3:1-7) Kas resultana, adu a kakabsat a lallaki ti nakapadas nga agakem kadagiti nagduduma nga annongen iti kongregasion. Anian a nagdakkel ti naaramidanda no iti panangipastor kadagiti adu a kabbaro a nangawat iti kinapudno iti Biblia!

10. Ania nga urnos ti naipatungpal idi 1976?

¹⁰ Dagiti kameng ti Bagi a Manarawidwid ket naorganisar iti innem a komite. Nangrugi idi Enero 1, 1976, dagita a komite ti mangimaton kadagiti amin nga aktibidad ti organisasion ken dagiti kongregasion iti intero a lubong. Anian a bendision a ti amin nga aspeto ti trabaho mainaig iti Pagarian ket imatmatonan ‘ti adu a manangbalakad’!―Proverbio 15:22; 24:6.

11. Ania a panagrang-ay ti nayussuat idi 1992, ken apay?

¹¹ Idi 1992, napasamak ti sabali pay a panagrang-ay a mayarig iti napasamak idi kadagiti Israelita ken kadagiti dadduma a nagsubli manipud pannakakautibo idiay Babilonia. Kadagidi a tiempo, kurang dagiti Levita nga agserbi idiay templo. Gapuna, adda dagiti saan nga Israelita a Netineo a nakaitalkan dagiti kanayonan nga annongen tapno tumulong kadagiti Levita. Maitunos iti dayta, idi 1992, adda dagiti kanayonan nga annongen a naitalek kadagiti dadduma a paset ti “sabsabali a karnero” tapno matulonganda ti klase matalek ken masirib nga adipen a mangimaton iti dumakdakkel nga annongen ditoy daga. Nadutokanda kas katulongan kadagiti komite ti Bagi a Manarawidwid.―Juan 10:16.

12. Kasano a ni Jehova dinutokanna ti talna kas manangaywan kadatayo?

¹² Ania ti resulta amin dagitoy? “Dutokakto ti talna kas dagiti manangaywanmo ken ti kinalinteg kas dagiti manangitudingmo iti akem,” kuna ni Jehova. (Isaias 60:17) Adda “talna” iti tengnga dagiti adipen ni Jehova ita, ket ti panagayat iti “kinalinteg” ti nagbalin a ‘manangituding iti akemda’―ti puersa a mangtigtignay kadakuada nga agserbi iti Dios. Organisadoda no maipapan iti panangikasaba iti Pagarian ken iti panangaramid kadagiti adalan.―Mateo 24:14; 28:19, 20.

Ni Jehova Lawlawaganna Dagiti Doktrina

13. Idi dekada 1920, kasano a linawlawagan ni Jehova ti pannakaawat dagiti adipenna kadagiti doktrina?

¹³ In-inut met a linawlawagan ni Jehova ti pannakaawat dagiti adipenna kadagiti doktrina. Ti Apocalipsis 12:1-9 ti maysa a pagarigan. Ti salaysay dakamatenna ti tallo a simboliko a karakter: “maysa a babai” a masikog sa nagpasngay, maysa a “dragon,” ken “maysa nga anak, maysa a lalaki.” Ammoyo kadi no siasino ti irepresentar ti tunggal maysa kadakuada? Natukoy ti kinasiasinoda iti artikulo a napauluan “Birth of the Nation (Pannakaipasngay ti Nasion),” a nagparang iti Marso 1, 1925 nga isyu ti The Watch Tower. Dayta nga artikulo ti nangted kadagiti adipen ti Dios iti nalawlawag a pannakaawat kadagiti padto maipapan iti pannakaipasngay ti Pagarian, maysa a naun-uneg a pannakaawat a nangitampok nga adda dua a nagduma nga organisasion​—ti organisasion ni Jehova ken ti organisasion ni Satanas. Kalpasanna idi 1927/28, nabigbig dagiti adipen ti Dios a saan a nainkasuratan ti panangrambak iti Krismas ken panagkasangay isu nga insardengda a rambakan dagita.

14. Ania dagiti doktrina ti kinapudno a limmawag idi dekada 1930?

¹⁴ Idi dekada 1930, nalawlawagan ti tallo pay a doktrina ti kinapudno. Dagiti Estudiante ti Biblia nabayagen nga ammoda a ti dakkel nga umariwekwek, wenno “dakkel a bunggoy,” a nadakamat iti Apocalipsis 7:9-17 ket naiduma manipud 144,000 a makipagturay ken ni Kristo kas ar-ari ken papadi. (Apocalipsis 5:9, 10; 14:1-5) Ngem nagtalinaed a nalidem ti kinasiasino ti dakkel nga umariwekwek. No kasano a ti isisingising ti init aramidenna a nalawag ti buya dagiti bambanag, idi 1935 bimmatad ti kinasiasino ti dakkel nga umariwekwek kas dagidiay makalasat “iti dakkel a rigat,” nga addaan iti namnama a biag nga agnanayon ditoy daga. Idi agangay, iti dayta met laeng a tawen, maysa a pannakalawlawag ti nangapektar kadagiti ages-eskuela a Saksi ni Jehova iti sumagmamano a pagilian. Nupay nabara ti panagayat iti pagilian iti intero a lubong, nabigbig dagiti Saksi a saan a basta pormalidad ti panagsaludo iti bandera. Iti simmaganad a tawen, nailawlawag ti sabali pay a doktrina a kinapudno―natay ni Kristo iti maysa nga istaka, saan nga iti krus.―Aramid 10:39.

15. Kaano ken kasano a nayunay-unay ti kinasagrado ti dara?

¹⁵ Kalpasan unay ti Gubat Sangalubongan II, idi a ti panangyalison iti dara ti nagbalin a gagangay a pamay-an ti panangagas kadagiti nasugatan a soldado, nalawlawagan ti maipapan iti kinasagrado ti dara. Ti Hulio 1, 1945 nga isyu ti The Watchtower indagadagna “kadagiti amin nga agdaydayaw ken ni Jehova a mangnamnama iti agnanayon a biag iti baro a nalinteg a lubongna a raemenda koma ti kinasagrado ti dara ken annurotenda dagiti nalinteg a pagalagadan ti Dios maipapan iti daytoy a napateg a banag.”

16. Kaano a naipablaak ti New World Translation of the Holy Scriptures, ken ania ti dua nga agkakaimbag nga aspetona?

¹⁶ Idi 1946, nagminar a kasapulan ti baro a patarus ti Biblia maitunos kadagiti kabaruan a kamalig ti pannakaammo ken saan a natulawan kadagiti sursuro a naibatay kadagiti tradision ti Kakristianuan. Nangrugi ti kasta a panagipatarus idi Disiembre 1947. Idi 1950, naipablaak ti New World Translation of the Christian Greek Scriptures. Sa nangrugi idi 1953, nagsasaruno a naipablaak iti lima a tomo ti Ingles a Hebreo a Kasuratan. Idi 1960, naipablaak ti kaudian a tomona, dandani 12 a tawen sipud idi nangrugi dayta a proyekto. Idi 1961, naipablaak ti kompleto a New World Translation of the Holy Scriptures iti maysa a tomo. Magun-odanen iti adu a pagsasao ken addaan daytoy iti sumagmamano nga agkakaimbag nga aspeto. Insublina ti nadibinuan a nagan a Jehova. Malaksid iti dayta, mabalin pay nga agtultuloy a paunegen ti pannakaawat kadagiti nadibinuan a kinapudno gapu ta literal ti panangipatarusna kadagiti orihinal a teksto.

17. Ania ti nalawlawagan idi 1962?

¹⁷ Idi 1962, nailawlawag no siasino ‘dagiti nangatngato nga autoridad’ a nadakamat iti Roma 13:1 ken no agingga iti ania nga agpasakup dagiti Kristiano kadakuada. Ti naannad a panangsukimat iti maika-13 a kapitulo ti Roma ken kadagiti teksto iti Kasuratan kas iti Tito 3:1, 2 ken 1 Pedro 2:13, 17 pinagbalinna a nalawag a ti ebkas a ‘dagiti nangatngato nga autoridad’ tukoyenna dagiti natauan nga agtuturay a gobierno, saan ket a ni Jehova a Dios ken Jesu-Kristo.

18. Ania a sumagmamano a kinapudno ti nalawlawagan idi dekada 1980?

¹⁸ Iti simmaganad a tawen, nagtultuloy a limmawag ti dana dagiti nalinteg. Idi 1985, nalawlawagan no ania ti kaipapanan ti maideklara kas nalinteg “maipaay iti biag” ken nalinteg kas gayyem ti Dios. (Roma 5:18; Santiago 2:23) Idi 1987, nailawlawag a naimbag no ania ti kaipapanan ti Nakristianuan a Jubileo.

19. Kasano a nangipaay ni Jehova iti kanayonan a naespirituan a lawag kadagiti kallabes a tawtawen?

¹⁹ Idi 1995, ad-adda a limmawag ti pannakaawat maipapan iti panaglalasin “dagiti karnero” ken ‘dagiti kalding.’ Idi 1998, detalyado a nailawlawag ti kaipapanan ti templo a nasirmata ni Ezequiel, a matungtungpalen iti agdama. Idi 1999, nalawlawagan no kaano ken kasano a ‘ti makarimon a banag ket agtakder iti nasantuan a disso.’ (Mateo 24:15, 16; 25:32) Ket idi 2002, nagun-od ti naun-uneg a pannakaawat no ania ti kaipapanan ti panagdayaw iti Dios “buyogen ti espiritu ken kinapudno.”―Juan 4:24.

20. Iti ania a sabali pay a benneg a tinagiragsak ti ili ti Dios ti pannakagugor?

²⁰ Malaksid kadagiti panagrang-ay mainaig iti organisasion ken doktrina, adda met dagiti pannakagugor mainaig iti Nakristianuan a kondukta. Kas pagarigan, idi 1973, natarusan a “pakatulawan iti lasag” ti panagusar iti tabako ket namatmatan dayta kas nadagsen a basol. (2 Corinto 7:1) Maysa a dekada kalpasanna, ti Enero 15, 1984 nga isyu Ti Pagwanawanan inlawlawagna ti takdertayo maipapan iti panangusar iti paltog. Dagitoy ket sumagmamano laeng a pagarigan ti rumanraniag a lawag iti panawentayo.

Itultuloyyo ti Magna iti Dana ti Rumanraniag a Lawag

21. Ania a kababalin ti tumulong kadatayo a makapagtultuloy a magna iti dana ti rumanraniag a lawag?

²¹ “Mabalin a narigat nga akseptaren ken iyaplikar dagiti dumteng a panagbalbaliw,” admitiren ti maysa a nabayagen a panglakayen. Ania ti nakatulong kenkuana a nangakseptar iti adu a pannakagugor a nasaksianna iti las-ud ti 48 a tawen a panagserbina kas manangiwaragawag iti Pagarian? Kinunana: “Kangrunaan a makatulong ti umiso a panangmatmat. No pagkedkedam nga akseptaren ti maysa a pannakagugor, maud-udikanton idinto ta umab-abante ti organisasion. Kadagiti kasasaad a kasla marigatanak a mangakseptar kadagiti panagbalbaliw, utobek ti kinuna ni Pedro ken ni Jesus: ‘Apo, iti siasino ti papananminto? Addaanka iti sasao ti agnanayon a biag.’ Kalpasanna, imtuodek iti bagik, ‘Papanak koma―iti kinasipnget ti lubong?’ Dayta ti nakatulong kaniak a makidanggay iti organisasion ti Dios.”​—Juan 6:68.

22. Ania ti iyegna a pagimbagan kadatayo no itultuloytayo ti magna iti lawag?

²² Awan duadua nga adda ti lubong iti kasipngetan. Bayat nga agtultuloy ti pananglawag ni Jehova kadagiti adipenna, ad-adda nga agminar ti nakaidumaanda kadagidiay adda iti lubong. Ania ti ipapaayna kadatayo dayta a lawag? Bueno, no kasano a ti lawag manipud iti napigsa a silaw a nakaturong iti maysa a likkaong iti nasipnget a kalsada dina ikkaten dayta a likkaong, ti lawag manipud iti Sao ti Dios dina ikkaten dagiti palab-og. Nupay kasta, ti lawag ti Dios tulongannatayo a mangliklik kadagita tapno maitultuloytayo ti magna iti dana ti rumanraniag a lawag. Itultuloytayo ngarud ti umimdeng kadagiti naimpadtuan a sasao ni Jehova, “kas iti pagsilawan nga agsilsilnag iti nasipnget a disso.”​—2 Pedro 1:19.

Malagipyo Kadi?

• Ania dagiti impaay ni Jehova a panagrang-ay iti organisasionna?

• Aniada a pannakagugor dagiti doktrina ti inyeg ti rimmaniag a lawag?

• Ania dagiti panagbalbaliw a personal a nasaksianyo, ken ania ti timmulong kadakayo a nangakseptar kadagita?

• Apay a kayatyo nga itultuloy ti magna iti dana ti rumanraniag a lawag?

[Dagiti Ladawan iti panid 27]

Idi 1922, ti kombension idiay Cedar Point, Ohio, pinaregtana dagiti Estudiante ti Biblia nga itungpalda ti trabaho ti Dios

[Ladawan iti panid 29]

Ti “New World Translation of the Christian Greek Scriptures” a nairuar idi 1950 babaen ken ni N. H. Knorr

[Picture Credit Line iti panid 26]

© 2003 BiblePlaces.com