Panagserbi iti Kongregasion nga Agus-usar iti Ganggannaet a Lenguahe
“NAKAKITAAK iti sabali pay nga anghel nga agtaytayab iti nagtangatangan,” insurat ni apostol Juan, “ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili.” (Apocalipsis 14:6) Kas kaitungpalan daytoy naimpadtuan a sirmata, maikaskasaba ti naimbag a damag ti Pagarian ti Dios iti intero a lubong iti nadumaduma a pagsasao wenno lenguahe. Adu kadagitoy ti lenguahe dagiti imigrante nga agnanaed kadagiti lugar nga adayo kadagiti nakayanakanda a pagilian. Mangmangngegan met dagitoy a tattao ti naimbag a damag manipud kadagiti nareregta a Saksi ni Jehova a nagadal iti ganggannaet a lenguahe.
Maysaka kadi kadagiti Saksi nga agserserbi iti kongregasion nga agus-usar iti ganggannaet a lenguahe? Wenno pangpanggepem kadi nga aramiden ti kasta? Tapno agballigika iti panggepmo, rumbeng a di agimbubukodan ti motibom ken umiso ti kababalinmo. Yantangay kalatmo a tulongan ti sabsabali a mangammo iti kinapudno iti Sao ti Dios, addaanka iti kasayaatan a motibo—ti panagayat iti Dios ken iti padam a tattao. (Mateo 22:37-39; 1 Corinto 13:1) Ti tarigagay a tumulong iti sabsabali a mangammo iti Dios ket adayo a napigpigsa a pakagutugotan ngem iti basta pannakaay-ayo iti pannakilangen, taraon, ken kultura dagiti dimo kailian. Kasla kadi narigat unay kenka ti agadal iti sabali a lenguahe? No kasta, makatulong no maaddaanka iti umiso a panangmatmat. “Saanmo nga itulok a ti lenguahe ti mangpadanag unay kenka,” kinuna ni James, a nagadal iti Hapones. No pampanunotem nga adun ti nakaadal iti sabali a lenguahe, mapabilegka nga aganus ken mangtaginayon iti positibo a panangmatmat. Kasano ngarud a makaadalka iti sabali a lenguahe? Ania ti makatulong kenka a makibagay iti kongregasion nga agus-usar iti dayta a lenguahe? Ken ania ti rumbeng nga aramidem tapno natibker a kanayon ti espiritualidadmo?
Agporsegi a Mangadal iti Lenguahe
Adu ti pamay-an iti panangadal iti maysa a lenguahe. Agsasabali ti pamay-an dagiti estudiante ken mannursuro nga agadal ken agisuro. Ngem iti kaaduan nga estudiante, nabibiit ken nalaklaka ti agadal no tumabunoda iti sumagmamano a klase nga isursuro ti maysa a kualipikado a mannursuro. Ti panangbasa iti Biblia ken kadagiti publikasion a naibasar iti Biblia iti ad-adalem a lenguahe ken panangdengngeg iti aniaman a rekord a magun-odan ti makatulong kenka a rumang-ay iti bokabulariom ken pannakaammom kadagiti termino nga us-usaren dagiti Saksi ni Jehova. Makatulong met ti radio, TV, ken nai-video a programa nga addaan iti maitutop a linaon tapno maawatam ti lenguahe ken kulturada. No maipapan iti kapaut dagiti sesion ti panagadal, ti panangadal iti sumagmamano a banag iti kada aldaw ket kaaduanna a mas epektibo ngem iti sesion ti panagadal a makabannog ti kapautna ngem manmano a maaramid.
Ti panagadal iti sabali a lenguahe ket kayarigan ti panagadal nga aglangoy. Saanmo a masursuro ti aglangoy no agbasbasaka laeng iti libro. Masapul a tumapog ken agpisawpisawka. Kasta met laeng no iti panangadal iti lenguahe. Narigat nga aramiden no agad-adalka laeng. Masapul a makipulapolka kadagiti tattao kaanoman nga adda gundawaymo—dumngegka iti panagsasaoda, kaduaem ida, ken kangrunaan iti amin, makisaritaka! Dagiti Nakristianuan nga aktibidad ti nagsayaat a pangaramidan iti dayta. Ti ad-adalem ket masansan a mayaplikarmo a dagus iti ministerio iti tay-ak. “Kasla makapadanag,” insurat ni Midori, nga agad-adal iti Tsino, “ngem makita dagiti bumalay ti panangikagumaanmi a Saksi. Dayta ti manggutugot kadakuada a dumngeg. Masapul laeng a kunami, ‘Maragsakanak a makiam-ammo kenka,’ iti lenguaheda, ket makitamton a maragsakanda a makisarita kenka!”
Dakkel met a makatulong dagiti Nakristianuan a gimong. Iti tunggal gimong, padasem ti agkomento uray maminsan laeng. Nupay makapanerbios iti damo, dika agdanag. Ti kongregasion kayatna nga agballigika! Kastoy ti kinuna ni Monifa, nga agad-adal iti Koreano: “Agyamanak unay iti kabsat a makikatkatugaw kaniak kabayatan dagiti gimong. Insuratna ti kaipapanan ti sumagmamano a sasao para kaniak. Talaga a makatulong kaniak ti kinadungngo ken kinaanusna a tumulong.” Bayat a rumangrang-ay ti bokabulariom, mangrugin a makitunos ti panunotmo iti baro a lenguahe—direkta nga inaigmonton ti sasao iti irepresentarda imbes nga ipatarusmo iti sao-por-sao.
Ti umuna a kalatmo nga agadal iti lenguahe ket tapno ‘mangyebkas iti sasao a nalaka a maawatan.’ (1 Corinto 14:8-11) Nupay mabalin a mannakaawat ti tattao, mabalin a saanda unay a magutugot a dumngeg iti mensahem no masansan nga agkamalika wenno saan a makaay-ayo ti bengngatmo. No iti damo ket ammuemon ti husto a panagibalikas ken gramatika, saankanto a makapataud kadagiti saan a nasayaat nga ugali a narigat a maikkat. Kastoy ti isingasing ni Mark a nagadal iti Swahili: “Kiddawem kadagiti nalaing iti dayta a lenguahe a korehirenda ti kakaruan a kamalim, ken agyamanka iti kasta nga aramidenda!” Siempre, agbalinka a nakonsiderar iti panawen ken panagregget dagidiay tumultulong kenka iti kasta a wagas. Nupay mabalin a kiniddawmo iti maysa a korehirenna dagiti insuratmo, padasem nga isagana dagiti palawagmo ken komentom babaen kadagiti sasao a datin nga ammom wenno nakitamon ti kayuloganda. Daytoy ti mangpapartak iti proseso ti panagsursurom ken makatulong kenka nga agsao buyogen ti kompiansa.
Itultuloymo ti Rumang-ay
“Ti panangadal iti sabali a lenguahe ti karirigatan nga inaramidko,” kinuna ni Monifa. “Adda idi dagiti kanito a kayatkon ti sumardeng. Ngem malagipko ti maysa nga iyad-adalak iti Biblia a kaay-ayona a denggen dagiti nauneg a naespirituan a kinapudno iti simple a panagsaok iti Koreano ken ti ragsak ti kakabsat no rumang-ayak uray bassit laeng.” No kasta, saanka a maupay a dagus. Ti kalatmo ket tapno maisurom kadagiti sabsabali dagiti makaispal biag a Nainkasuratan a kinapudno. (1 Corinto 2:10) Gapuna, ti panagadalmo a mangisuro iti Biblia iti sabali a lenguahe kalikagumanna ti naipamaysa ken napaut a panagregget. Bayat ti panagadalmo, saanmo a tingitingen ti panagrang-aymo babaen ti negatibo a panangidiligmo iti bagim iti sabsabali. Agduduma ti kapartak ken wagas ti irarang-ay dagiti agad-adal iti sabali a lenguahe. Nupay kasta, makatulong no sipapanunotka iti panagrang-aymo. (Galacia 6:4) “Ti panangadal iti sabali a lenguahe ket kaasping ti panagagdan,” insurat ni Joon, a nagadal iti Tsino. “Inton pagarupem a kasla saanka a makaad-adayo, pagammuan ta maamirismo a rimmang-ayka gayamen.”
Ti panagadal iti baro a lenguahe ket tungpal biag a panangikagumaan. No kasta, pagragsakam koma ti agadal iti baro a lenguahe, ket saanmo a panunoten a masapul a perpektoka iti dayta. (Salmo 100:2) Natural laeng nga agkamalika. Paset dagita ti panagadal. Idi rinugian ti maysa a Kristiano ti mangasaba iti lenguahe nga Italiano, kastoy ti inyimtuodna iti maysa a bumalay, “Ammom kadi ti sagad ti biag?” idinto ta “panggep ti biag” ti kayatna koma nga ibaga. Ti maysa a kabsat nga agad-adal iti Polako inawisna ti kongregasion nga agkansionda iti aso imbes nga iti kanta. Ken babaen ti bassit laeng a panagbalbaliw ti ayug, ti maysa nga agad-adal iti Tsino imparegtana kadagiti dumdumngeg a Tsino a maaddaanda iti pammati iti estante dagiti libro ni Jesus imbes nga iti subbot. Ti pagimbagan dagiti kamali ket matulongandaka a manglagip kadagiti husto a termino.
Pannakipagtrabaho iti Kongregasion
Saan laeng a ti panagduduma ti lenguahe ti mamagsisina iti tattao. Ti panagduduma ti kultura, puli, ken nasion ti masansan a mangpakpakaro iti pannakasinasina ti sangatauan. Ngem mabalin a maparmek dagitoy a lapped. Sigun iti kapaliiwan ti maysa nga eskolar a mangan-anag iti kasasaad ti Tsino ti pagsasaona a narelihiosuan a grupo idiay Europa, dagiti Saksi ni Jehova “saklawenda ti amin a nasion.” Insuratna a kadagiti Saksi, “saan a napateg ti puli, sa maysa la a pamuspusan ti lenguahe tapno maawatantayo ti sao ti Dios.” Kinapudnona, ti panangyaplikar kadagiti prinsipio ti Biblia ti tumultulong kadagiti pudno a Kristiano tapno saanda a masinasina gapu iti nagduduma a nasionalidadda. Kadagidiay nangikawes iti ‘baro a personalidad, awan ti Griego wenno Judio wenno ganggannaet.’—Colosas 3:10, 11.
Amin a miembro ti kongregasion rumbeng ngarud nga ikagumaanda a taginayonen ti panagkaykaysa. Kalikaguman daytoy ti situtulok a pannakibagay kadagiti naiduma a panagpampanunot, panagrikna, ken panangaramid iti bambanag. Malapdan ti panagsisina nga ibunga ti panagduduma ti nasionalidad babaen ti dimo panangipangpangruna kadagiti nagdudumaan ti pagduyosan ti tunggal maysa. (1 Corinto 1:10; 9:19-23) Sursuruem a tagiragsaken dagiti kasayaatan nga aspeto ti amin a kultura. Laglagipem a ti di agimbubukodan nga ayat isu ti tulbek kadagiti nasayaat a relasion ken pudno a panagkaykaysa.
Kaaduan a kongregasion nga agus-usar iti ganggannaet a lenguahe ti mangrugi kas babassit a grupo. Masansan a dagidiay agad-adal iti baro a lenguahe, agraman dagidiay nabiit pay a nangrugi nga agadal kadagiti prinsipio ti Biblia ti kaaduan a mangbukel iti dayta. Gapuna, dagiti di panagkikinnaawatan ket ad-adda a rumsua kadagiti kasta a grupo ngem kadagiti dadakkel ken nabayagen a kongregasion. Dagiti nataengan a Kristiano rumbeng ngarud nga ikagumaanda ti agbalin a nabileg a sadiri iti kongregasion. Ti naayat ken naasi a sasao ken aramid ti makatulong a mangpataud iti makaay-ayo a lugar a mabalin a mangparang-ay iti espiritualidad dagiti kabbaro.
Dagidiay agboluntario a tumulong iti maysa a kongregasion nga agus-usar iti ganggannaet a lenguahe masapul a rasonableda met iti namnamaenda iti sabsabali. Kastoy ti kinuna ni Rick a maysa a panglakayen iti kasta a kongregasion: “Saan a kas kadagiti kakabsat kadagiti dadakkel a kongregasion nga agus-usar iti lokal a lenguahe, dadduma a saan pay a nabayag a Saksi ti mabalin a saan pay unay a nasanay a mangorganisar iti kongregasion. Ngem ti pagkuranganda nga abilidad ket masansan a malitupan iti ayat ken kinabara. Ket adu dagiti interesado a sumsumrek iti kinapudno.” Babaen ti regular nga itatabuno kadagiti Nakristianuan nga aktibidad ken panagsakripisio iti aniaman a kabaelam nga aramiden, pudno a matulongam ti kongregasion uray bayat nga agad-adalka pay laeng iti ganggannaet a lenguahe. No adda ti sangsangkamaysa a panagtrabaho, makatulong ti amin tapno rumang-ay ti kongregasion.
Panangtaginayon iti Natibker nga Espiritualidad
Adda kabsat a medio kabbaro iti maysa a kongregasion nga agus-usar iti ganggannaet a lenguahe. Nangngegna ti maysa nga ina a tumultulong iti anakna a mangisagana iti komento. “Ngem Nanang, saan kadi a mabalin nga ababa laeng ti komentok?” impakaasi ti ubing. “Saan, anakko,” insungbat ti ina. “Bay-antayo a dagiti agsursuro iti pagsasaotayo ti sumungbat iti ababa.”
Maupay, kumapsut ti pakinakem, ken kumapuy ti espiritualidad ti maysa a nataengan no saan latta a nasayud ti pannakikomunikarna nupay adun a bulan wenno tawtawen nga agad-adal. “Nalakaak idi a maldaang kadagiti mismo a limitasionko,” malagip ni Janet, a nalaing itan iti Espaniol. Ni Hiroko, a nakasursuron iti Ingles malagipna a mapampanunotna idi: ‘Dagiti aso ken pusa iti teritoria ad-adu pay ti maawatanda nga Ingles ngem siak.’ Kinuna met ni Kathie: “Idi immakarak iti kongregasion nga agus-usar iti Espaniol, awan metten ti iyad-adalak iti Biblia ken sarsarungkarak idinto ta nagadu idi. Panagriknak ket awan unay ti maar-aramidak.”
Ditoy a kasapulan ti positibo a kababalin. Idi naupay, kastoy ti pinanunot ni Hiroko: “No kabaelan ti dadduma, kabaelak met.” Kinuna ni Kathie: “Pinampanunotko ni lakayko. Nasayaat ti irarang-ayna ken nagadu ti maar-aramidanna iti kongregasion. Dayta ti nakatulong kaniak a mangdaer iti pakarigatan tapno maitultuloyko ti rumang-ay. Nagadu pay ti nasken a pagreggetan, ngem lumalaingakon a mangasaba ken mangisuro.” Kinuna met ni lakayna a Jeff: “Makapaupay no dimo maawatan ti aniaman kadagiti pakaammo ken napagsasaritaan iti miting dagiti panglakayen. Masapul nga agbalinak a napudno ken napakumbaba ken damagek dagiti detalye. Naimbag laengen ta maragsakan a tumulong dagiti kakabsat.”
Masapul nga ipangpangrunam a pabilgen ti espiritualidadmo tapno saan a kumapuy dayta bayat nga agserserbika iti kongregasion nga agus-usar iti ganggannaet a lenguahe. (Mateo 5:3) Kastoy ti kinuna ni Kazuyuki, nga adu a tawenen a tumultulong kadagiti grupo a Portugues ti lenguaheda: “Nasken a naan-anay a mataraonankami iti naespirituan. Dayta ti makagapu nga agadalkami a sangapamiliaan ken agsaganakami para kadagiti gimong iti mismo a pagsasaomi ken kasta met iti Portugues.” Dadduma ti tumabuno sagpaminsan kadagiti gimong a maangay iti mismo a pagsasaoda. Kanayonanna, nasken ti maaddaan iti umdas nga inana.—Marcos 6:31.
Tingitingem Dagiti Bambanag
No planom ti umakar iti maysa a kongregasion nga agus-usar iti sabali a lenguahe, masapul a tingitingem dagiti pagsayaatan ken pagmadianna no aramidem dayta. (Lucas 14:28) Mainaig iti daytoy, dagiti kapatgan nga ikabilangam isu ti espiritualidadmo ken ti relasionmo ken ni Jehova. Buyogam iti kararag ti panangtingitingmo iti kasasaadmo. Ikabilangam ti asawam ken ti annakyo. Saludsodam ti bagim, ‘Ipalubos aya dagiti kasasaadko ken umdas aya ti kinatibker ti espiritualidad ken pakinakemko a mangibanag iti kasta kapaut a proyekto?’ Nainsiriban nga aramidem ti kasayaatan agpaay iti espiritualidadyo a sangapamiliaan. Adu latta ti maaramid ken makasarakka latta iti aglaplapusanan a rag-o iti sadinoman a pagserbiam kas agibumbunannag ti Pagarian.
Adu a gunggona ti masagrap dagidiay agserserbi iti kongregasion nga agus-usar iti ganggannaet a lenguahe. Kastoy ti kinuna ni Barbara, a kadua ni lakayna nga immakar iti maysa a kongregasion dagiti Espaniol: “Daytoy ti maysa kadagiti kararagsakan a kapadasan iti biagko. Kas man la naadalko manen ti kinapudno ti Biblia. Agyamanak unay iti gundaway, nangruna ta dimi kabaelan ti agmisionero iti sabali a pagilian.”
Iti intero a lubong, rinibu nga ordinario a tattao a nadumaduma ti edadda ti agad-adal iti sabali a lenguahe tapno mairakurakda ti naimbag a damag. No maysaka kadakuada, taginayonem a nadalus ti motibom ken positibo ti kababalinmo. Kangrunaan iti amin, agtalekka a bendisionan ni Jehova dagiti panagreggetmo.—2 Corinto 4:7.
[Ladawan iti panid 18]
Nabibiit ken nalaklaka ti agadal no tumabunoka kadagiti klase nga isursuro ti maysa a kualipikado a mannursuro
[Ladawan iti panid 20]
Saan koma nga agpeggad ti naespirituan a salun-atmo bayat nga agad-adalka iti ganggannaet a lenguahe