Agbutengka ken ni Jehova​—Agragsakka!

“Naragsak ti tao nga agbuteng ken Jehova.”​—SALMO 112:1.

1, 2. Ania ti iyeg ti panagbuteng ken ni Jehova?

SAAN a nalaka a magun-od ti kinaragsak. Ti pudno a kinaragsak ket resulta dagiti umiso a desision, ti panangaramid iti umiso ken panangliklik iti di umiso. Ti Nangaramid kadatayo, ni Jehova, impaayna kadatayo ti Saona, ti Biblia, tapno isurona no kasanotayo a matagiragsak ti kasayaatan a wagas ti panagbiag. Masagraptayo ti pudpudno a pannakapnek ken kinaragsak no agpaiwanwantayo ken ni Jehova, a mangipakita nga adda panagbutengtayo iti Dios.​—Salmo 23:1; Proverbio 14:26.

² Iti daytoy nga artikulo, usigentayo dagiti pagarigan iti Biblia ken iti moderno nga aldaw a mangipakita no kasano a ti pudno a panagbuteng iti Dios papigsaenna ti maysa tapno masarangetna dagiti sulisog a mangaramid iti di umiso ken pakirdenna a mangaramid iti umiso. Maammuantayo ditoy no kasano a mangyeg iti kinaragsak ti panagbuteng iti Dios babaen ti panangtignayna kadatayo a mangilinteg iti maysa a di umiso a dana, kas inaramid idi ni Ari David. Makitatayo met a ti panagbuteng ken ni Jehova ket maysa a pudno a napateg a galad a maipatawid dagiti nagannak kadagiti annakda. Kinapudnona, ipanamnama kadatayo ti Sao ti Dios: “Naragsak ti tao nga agbuteng ken Jehova.”​—Salmo 112:1.

Panangpasubli iti Napukaw a Ragsak

3. Ania ti nakatulong ken ni David tapno maisubli ti relasionna iti Dios kalpasan ti panagbasolna?

³ Kas inusigtayo iti napalabas nga artikulo, napaay ni David a nangipakita iti umiso a panagbuteng iti Dios iti tallo a di malipatan a gundaway ket nagbasol. Ngem ipakita ti tignayna idi dinisiplina ni Jehova nga isu ket managbuteng iti Dios. Ti panagamanga ken panagraemna iti Dios ti nangtignay kenkuana a mangadmitir iti basolna, mangilinteg iti danana, ken mangipasdek manen iti nasayaat a relasionna ken ni Jehova. Nupay nagsagaba ni David ken dagiti dadduma gapu kadagiti basolna, nagtultuloy ti panangsuporta ken panangbendision kenkuana ni Jehova gapu iti napasnek a panagbabawina. Sigurado a makapabileg ti kapadasan ni David kadagiti Kristiano ita a nalabit makaaramid iti nadagsen a basol.

4. Kasano a ti panagbuteng iti Dios tulonganna ti maysa nga agbalin manen a naragsak?

⁴ Usigenyo ti napasamak ken ni Sonja.a Nupay agserserbi kas amin-tiempo a ministro, nakitimpuyog kadagiti dakes a kakadua, natnag iti saan a Nakristianuan nga aramid, ken masapul a mailaksid manipud iti kongregasion Kristiano. Idi nakapampanunot, inaramid ni Sonja ti amin a kabaelanna tapno mailintegna ti relasionna ken ni Jehova. Idi agangay, naisubli ni Sonja iti kongregasion. Iti baet amin dagita, saan a napukaw ni Sonja ti tarigagayna nga agserbi ken ni Jehova. Idi agangay, nagsubli iti amin-tiempo a ministerio kas payunir. Kalpasanna, nakiasawa iti maysa a mapagwadan a Kristiano a panglakayen, ket siraragsak ita nga agserserbida ken lakayna iti kongregasion. Nupay maladingitan ni Sonja iti temporario a pannakaisiasina iti Nakristianuan a dana, maragsakan gapu ta tinulongan ti panagbutengna iti Dios tapno maisublina ti relasionna ken ni Jehova.

Nasaysayaat ti Agsagaba Ngem ti Makabasol

5, 6. Ilawlawagyo no kasano ken apay nga inispal ni David ti biag ni Saul iti dua a daras.

⁵ Siempre, nasaysayaat latta no ti maysa maliklikanna ti agbasol gapu iti panagbutengna iti Dios. Kasta ti napasamak ken ni David. Naminsan, bayat nga isu ket birbiroken ni Saul ken ti tallo ribu a buyotna, simrek ni Saul iti maysa a rukib​—iti mismo a paglemlemmengan ni David ken dagiti tattaona. Indagadag dagiti buyot ni David a papatayenna ni Saul. Saan aya nga inted ti Dios dayta a kanito tapno papatayen ni David ti kangrunaan a kabusorna? Nagin-inayad ni David nga immasideg ken ni Saul ket gineppasna ti pandilingna. Ngem gapu ta adda panagbuteng ni David iti Dios, naburibor latta ti konsiensiana uray no kasla saan met a makadangran dayta nga inaramidna. Pinagwawara ni David dagiti masmasdaaw a tattaona, a kunkunana: “Narigat a pagarupen, iti biangko, manipud panangmatmat ni Jehova, nga aramidek daytoy a banag iti apok, ti pinulotan ni Jehova, babaen ti panangyunnatko iti imak maibusor kenkuana, ta isu ti pinulotan ni Jehova.”b​—1 Samuel 24:1-7.

⁶ Iti sabali a gundaway, nagpakarso iti rabii ni Saul ken dagiti buyotna ket immapay kadakuada ti “nargaan a turog manipud ken Jehova.” Di napupuotan a nakastrek ni David ken ti natured a kaanakanna a ni Abisai iti tengnga ti kampo ket naasitganda ti matmaturog a ni Saul. Magagaranen ni Abisai a manggudas ken ni Saul. Ngem linapdan ni David, nga inyimtuodna: “Siasino ti nangyunnat iti imana maibusor iti pinulotan ni Jehova ket nagtalinaed nga awanan basol?”​—1 Samuel 26:9, 12.

7. Ania ti nanglapped ken ni David nga agbasol?

⁷ Apay a ni David dina pinapatay ni Saul idinto ta namindua nga adda gundawayna a mangaramid iti dayta? Saan a gapu iti butengna ken ni Saul no di ket gapu ta adda umiso a panagbutengna ken ni Jehova. Kaykayat ni David ti agsagaba no kasapulan ngem iti agbasol iti Dios. (Hebreo 11:25) Naan-anay nga agtalek nga aywanan ni Jehova dagiti adipenna, a pakairamanan ni David. Ammo ni David a mangyeg iti ragsak ken adu a bendision ti panagtulnog ken panagtalek iti Dios, idinto a mapukawna ti anamong ti Dios no dina ikabilangan ti panangmatmat ti Dios. (Salmo 65:4) Ammona met a tungpalen ti Dios ti karina nga isaadna ni David kas ari ken ikkatenna ni Saul iti inkeddengna a tiempo ken pamay-an.―1 Samuel 26:10.

Mangyeg iti Ragsak ti Panagbuteng iti Dios

8. Kasano a matuladtayo ti kababalin ni David idi isu ket naipasango iti rigat?

⁸ Kas Kristiano, ammotayo a dumteng ti pannakaumsi, pannakaidadanes, ken dadduma pay a pannubok. (Mateo 24:9; 2 Pedro 3:3) No dadduma, mabalin a maipasangotayo pay kadagiti parikut a pakairamanan dagiti padatayo nga agdaydayaw. Nupay kasta, ammotayo a makitkita ni Jehova ti amin a banag, im-imdenganna dagiti kararagtayo ken, iti umiso a tiempo, ilintegna dagiti bambanag sigun iti pagayatanna. (Roma 12:17-21; Hebreo 4:16) Gapuna, imbes nga agbutengtayo kadagiti kabusor, ti Dios ti pagbutngantayo ken isu ti pagpannurayantayo iti pannakaisalakan. Kas ken David, ditay kayat ti agibales, ken ditay met ikompromiso dagiti nalinteg a prinsipio tapno laeng maliklikantayo ti agsagaba. Inton agangay, mangyeg dayta iti kinaragsak. Ngem kasano?

9. Mangted iti pagarigan no kasano a ti panagbuteng iti Dios ket mangyeg iti kinaragsak iti laksid ti pannakaidadanes.

⁹ “Malagipko ti maysa nga ina ken ti tin-edyer a balasangna a di gimmatang iti kard ti politika gapu iti neutral a takderda kas Kristiano,” insalaysay ti maysa a nabayagen a misionero idiay Africa. “Siuulpit a rinanggasan sa pinagawid ida dagiti bunggoy ti lallaki. Bayat ti panagawidda, inkagumaan a liniwliwa ti ina ti agsangsangit nga anakna, a marigatan a mangtarus no apay a napasamak ti kasta. Saanda a naragsak iti dayta a kanito, ngem nadalus ti konsiensiada. Idi agangay, nakaragragsakda gapu ta nagtulnogda iti Dios. No gimmatangda iti kard ti politika, nalabit a naragragsakan koma ti bunggoy. Mabalin a pinainum pay ida dagiti lallaki iti soft drink ken agsalsala a palikmutanda ti agina agingga iti panagawidda. Ngem no nagkompromiso ti balasang ken ti inana, sigurado a nakaladladingitdanto.” Saanda a napasaran dayta gapu iti panagbutengda iti Dios.

10, 11. Ania dagiti naimbag a resulta ti panagbuteng iti Dios ti maysa a babai?

¹⁰ Ti panagbuteng iti Dios mabalin met nga agresulta iti kinaragsak no maipasango kadagiti pakasuotan mainaig iti panangraem iti kinasagrado ti biag. Idi sikog ni Mary ti maikatlo nga anakna, indagadag kenkuana ti doktor nga iparegregna dayta. “Napeggad ti kasasaadmo,” kinuna ti doktor. “Mabalin a makapasarka iti komplikasion iti aniaman a kanito ket matayka iti las-ud ti 24 nga oras. Matayto met ti ubing. Aniaman kadagita, awan ti garantia nga agbalin a normal ti ubing.” Makipagad-adalen ni Mary iti Biblia kadagiti Saksi ni Jehova ngem saan pay a bautisado. “Kaskasdi,” kuna ni Mary, “inkeddengkon ti agserbi ken ni Jehova, ket determinadoak nga agtultuloy nga agtulnog kenkuana, aniaman ti mapasamak.”​—Exodo 21:22, 23.

¹¹ Bayat ti panagsikogna, nagtultuloy nga okupado ni Mary iti panagadal iti Biblia ken panangaywan iti pamiliana. Idi agangay, naipasngay ti ubing. “Narigrigat daytoy a panaganakko no idilig iti dua nga immuna, ngem awan dagiti serioso a komplikasion,” kuna ni Mary. Timmulong ken ni Mary ti panagbuteng iti Dios tapno mataginayonna a nadalus ti konsiensiana, ket nabautisaran di nagbayag. Bayat ti panagdakkel ti ubing, nasursurona met ti agbuteng ken ni Jehova, ket agserserbi itan iti maysa kadagiti sanga nga opisina dagiti Saksi ni Jehova.

‘Papigsaenyo ti Bagiyo Babaen ken Jehova’

12. Kasano a ti panagbuteng iti Dios pinabilegna ni David?

¹² Saan laeng a naliklikan ni David ti agaramid iti dakes gapu iti panagbutengna ken ni Jehova. Dayta pay ti nangpabileg kenkuana nga agtignay nga awan panagpangadua ken nainsiriban iti sidong dagiti narigat a kasasaad. Iti makatawen ken uppat a bulan, nagkamang ni David ken dagiti tattaona idiay Siclag nga ili ti Filistia tapno malibasanda ni Saul. (1 Samuel 27:5-7) Naminsan, idi nakapanaw da David, rimmaut dagiti Amalekita ket pinuoranda ti siudad ken innalada dagiti assawa a babbai, annak, ken ar-arban. Apaman a nakaawid ken nakitada ti napasamak, nagsangsangit ni David ken dagiti tattaona. Dagus a nasukatan iti pungtot dayta a panagladingit, ket nagnunumuan dagiti tattao nga uborenda ni David. Nupay naburiboran, saan a naawanan ni David iti namnama. (Proverbio 24:10) Ti panagbutengna iti Dios ti nangtignay kenkuana nga agtalek ken ni Jehova, ket ‘pinapigsana ti bagina babaen ken Jehova.’ Buyogen ti tulong ti Dios, nakamatan ken nabawi da David ti amin nga innala dagiti Amalekita.​—1 Samuel 30:1-20.

13, 14. Kasano a ti panagbuteng iti Dios natulonganna ti maysa a Kristiano a mangaramid kadagiti umiso a pangngeddeng?

¹³ Maipaspasango met ita dagiti adipen ti Dios kadagiti kasasaad nga agkalikagum iti panagtalek ken ni Jehova ken kinatured tapno makapagtignay nga awan panagpangadua. Alaentayo a pagarigan ni Kristina. Idi isu ket agtutubo pay, nakipagadal ni Kristina iti Biblia kadagiti Saksi ni Jehova. Ngem kayatna ti agbalin a pianista iti konsierto, ket dakkel ti rimmang-ayanna tapno maragpatna dayta. Maysa pay, alusiisen a mangasaba isu a mabuteng a mangawat kadagiti responsabilidad a kakuyog ti panagpabautisar. Ngem bayat nga intultuloy ni Kristina ti nagadal iti Sao ti Dios, nangrugi a mariknana ti bileg ti Biblia. Nasursuronan ti agbuteng ken ni Jehova, ken nabigbigna a namnamaen ni Jehova ti panangayat kenkuana dagiti adipenna iti amin a puso, isip, kararua, ken pigsada. (Marcos 12:30) Dayta ti nangtignay kenkuana a mangidedikar iti bagina ken ni Jehova ken agpabautisar.

¹⁴ Kiniddaw ni Kristina ti tulong ni Jehova tapno makaaramid iti naespirituan a panagrang-ay. “Ammok a ti biag ti maysa a pianista iti konsierto kalikagumanna ti masansan a panagbiahe ken ti panangitungpal kadagiti kontrata a panagtokar iti agingga 400 a konsierto kada tawen,” kuna ni Kristina. “Gapuna, inkeddengko ti agbalin laengen a maestra tapno masuportarak ti bagik iti pinansial bayat nga agserbiak kas amin-tiempo nga ebanghelisador.” Ngem iti dayta a tiempo, nayurnosen ti umuna a konsiertona iti kalalatakan a pagkonsiertuan a pasdek iti pagilianda. “Dayta ti umuna ken maudi a konsiertok,” kunana. Kalpasan dayta, nakiasawa ni Kristina iti maysa a Kristiano a panglakayen. Agserserbida ita iti maysa kadagiti sanga nga opisina dagiti Saksi ni Jehova. Maragsakan ta inikkan ni Jehova iti bileg a mangaramid kadagiti umiso a pangngeddeng ken maus-usarna ita ti tiempo ken pigsana nga agserbi iti Dios.

Napateg a Tawid

15. Ania ti kayat nga ipatawid ni David kadagiti annakna, ken kasanona nga inaramid dayta?

¹⁵ “Umaykayo, dakayo nga annak, umimdengkayo kaniak,” insurat ni David. “Ti panagbuteng ken Jehova isunto ti isurok kadakayo.” (Salmo 34:11) Kas maysa nga ama, desidido ni David a mangipatawid kadagiti annakna ti maysa a napateg a banag​—ti pudpudno, natimbeng, makagunggona a panagbuteng ken ni Jehova. Babaen ti sao ken aramid, impakita ni David no ania a klase a Dios ni Jehova, maysa a naayat, manangisakit, manangpakawan nga Ama kadagiti annakna ditoy daga, saan ket a maysa a namandar ken nakabutbuteng a Dios a mangsipsiput lattan kadagidiay manglabsing kadagiti lintegna. “Siasino ti mangbilbilang kadagiti biddut?” inyimtuod ni David. Kalpasanna, kas panangipamatmat iti panagtalekna a saan a dagiti bidduttayo ti kanayon a sipsiputan ni Jehova, innayonna: “Dinak panungsungbaten kadagiti saan a nakadkadlaw a banag!” Masigurado ni David a no ikagumaanna nga aramiden no ania ti naimbag, agbalin a makaay-ayo ken ni Jehova ti sasao ken pampanunotna.​—Salmo 19:12, 14, Byington.

16, 17. Kasano a dagiti nagannak maisuroda kadagiti annakda ti panagbuteng ken ni Jehova?

¹⁶ Agserbi ni David kas ulidan kadagiti nagannak ita. “Pinadakkeldakami dagiti nagannakmi iti wagas a nariknami a naragsakkami gapu ta addakami iti kinapudno,” kuna ni Ralph, nga agserserbi ita a kadua ti kabsatna iti maysa a sanga nga opisina dagiti Saksi ni Jehova. “Idi ubbingkami pay, iramramandakami kadagiti saritaanda maipapan kadagiti aktibidad ti kongregasion, ket rimmayray ti interesmi iti kinapudno kas kadakuada. Sinursuruandakami a maaddaan iti kompiansa a kabaelanmi ti mangipaay iti makaay-ayo a panagserbi ken ni Jehova. Kinapudnona, iti adu a tawen, nagnaed ti pamiliami iti maysa a pagilian nga addaan iti dakkel a panagkasapulan kadagiti agibumbunannag iti Pagarian, ket timmulongkami a nangipasdek kadagiti baro a kongregasion.

¹⁷ “Agtultuloy ti pannagnami iti dana ti kinalinteg saan a gapu iti nagadu a nainget a pagannurotan, no di ket gapu ta nakitami kadagiti dadakkelmi a pudno, naasi unay, ken nakaim-imbag ni Jehova. Inkagumaanda nga am-ammuen a naimbag ni Jehova ken pinagreggetanda nga ay-aywen ti Dios, ket nasursuromi kadakuada ti pudpudno a panagbuteng iti Dios ken panagayat kenkuana. Uray no makabasolkami idi, saan nga imparikna dagiti dadakkelmi a dinakam ay-ayatenen ni Jehova; wenno dida sipupungtot a nangipabaklay kadakami kadagiti saan a nainkalintegan a restriksion. Kaaduanna, sikakalma a kasaritadakami, a no dadduma uray la makalua ni Nanang gapu iti panangikagumaanna a mangdanon iti pusomi. Nagballigi ti kasta a pamay-anda. Nasursuromi babaen ti sasao ken aramid dagiti dadakkelmi a nagsayaat a banag ti panagbuteng ken ni Jehova ken imbes a makapadagsen, maysa a rag-o ti panagbalin kas maysa kadagiti Saksina.”​—1 Juan 5:3.

18. Ania ti masagraptayo no agbutengtayo iti pudno a Dios?

¹⁸ Kas paset “ti maudi a sasao ni David,” kastoy ti mabasa: “No ti agturturay iti sangatauan nalinteg, agturturay buyogen ti panagbuteng iti Dios, iti kasta dayta ket kasla iti lawag ti bigat, no agsilnag ti init.” (2 Samuel 23:1, 3, 4) Ni Solomon, ti anak ken kasuno ni David, nalawag a naawatanna ti kaipapanan dagitoy a sasao yantangay kiniddawna nga ipaay kenkuana ni Jehova ti “puso a natulnog” ken ti abilidad a ‘mangilasin iti naimbag ken dakes.’ (1 Ar-ari 3:9) Nabigbig ni Solomon a ti panagbuteng ken ni Jehova ket mangyeg iti sirib ken kinaragsak. Idi agangay, ginupgopna ti libro nga Eclesiastes babaen kadagitoy a sasao: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao. Ta ti met laeng pudno a Dios iyegnanto ti tunggal kita ti aramid iti pannakaukom mainaig iti tunggal nailemmeng a banag, no dayta ket naimbag wenno dakes.” (Eclesiastes 12:13, 14) No ipangagtayo dayta a balakad, sigurado a mapaneknekantayo a “ti bunga ti kinapakumbaba ken ti panagbuteng ken Jehova” ket saan laeng a sirib ken kinaragsak no di pay ket “kinabaknang ken dayag ken biag.”​—Proverbio 22:4.

19. Ania ti tumulong kadatayo a mangtarus ‘iti panagbuteng ken Jehova’?

¹⁹ Maibatay kadagiti pagarigan iti Biblia ken moderno-aldaw a kapkapadasan, nakitatayo a positibo ti epektona iti biag dagiti pudno nga adipen ni Jehova ti umiso a panagbuteng iti Dios. Ti kasta a panagbuteng saannatayo laeng a lapdan a mangaramid iti banag a di makaay-ayo iti nailangitan nga Amatayo no di ket ikkannatayo pay iti tured a mangsango kadagiti kabusortayo ken iti bileg a mangandur kadagiti pakasuotan ken pakarigatan a sumangbay kadatayo. Gapuna, agtutubotayo man wenno nataengan, sipapasnek koma nga agadaltayo iti Sao ti Dios, mennamennaentayo ti maad-adaltayo, ken umadanitayo ken ni Jehova babaen ti regular ken naimpusuan a panagkararag. No aramidentayo dagita, saantay laeng a masarakan “ti mismo a pannakaammo iti Dios” no di ket maawatantayo pay “ti panagbuteng ken Jehova.”​—Proverbio 2:1-5.

[Footnotes]

Mailawlawagyo Kadi?

Kasano a ti panagbuteng iti Dios

• matulonganna ti maysa a nakaaramid iti serioso a basol tapno maisublina ti relasionna iti Dios?

• mangyeg iti ragsak iti laksid dagiti pakasuotan ken pannakaidadanes?

• pabilgennatayo a mangaramid iti pagayatan ti Dios?

• agserbi kas maysa a napateg a patawid kadagiti annaktayo?

[Ladawan iti panid 26]

Saan a pinapatay ni David ni Ari Saul gapu iti panagbutengna ken ni Jehova

[Dagiti Ladawan iti panid 29]

Ti panagbuteng iti Dios ket maysa a nagpateg a galad a maipatawid dagiti nagannak kadagiti annakda