Agmasiribka​—Agbutengka iti Dios!

“Ti panagbuteng ken Jehova isu ti rugi ti sirib.”​—PROVERBIO 9:10.

1. Apay a narigat a matarusan ti adu a tattao ti panagbuteng iti Dios?

ADDA panawen idi a namatmatan a pakaidayawan ti maysa no isu ket managbuteng iti Dios. Ngem ita, adu ti mangibilang a saanen a napateg ti panagbuteng iti Dios, maysa a galad a narigatda a maawatan. ‘No ti Dios ket ayat,’ mabalin nga isaludsodda, ‘apay ngarud a masapul a pagbutngak?’ Para kadakuada, ti buteng ket maysa a di makaay-ayo ken mamagsidduker pay ketdi a rikna. Ngem ti pudno a panagbuteng iti Dios nalawlawa ti kaipapananna, ken kas maammuantayo madamdama, dayta ket saan laeng a maysa a rikna wenno emosion.

2, 3. Ania ti iraman ti pudno a panagbuteng iti Dios?

² Iti Biblia, makaay-ayo ti pannakausar ti panagbuteng iti Dios. (Isaias 11:3) Maysa daytoy a napasnek a panangbigbig ken panangraem iti Dios, maysa a nabileg a tarigagay a di mangpagura kenkuana. (Salmo 115:11) Karaman iti dayta ti panangbigbig ken siiinget a panangannurot kadagiti moral a pagalagadan ti Dios ken ti panagtarigagay nga agbiag maitunos iti ibaga ti Dios nga umiso wenno di umiso. Ipatuldo ti maysa a reperensia a ti kasta nga umiso a panagbuteng ket ebkas “ti panagraem iti Dios nga agresulta iti nainsiriban a tignay ken iti panangliklik iti amin a kita ti kinadakes.” Maitutop ngarud nga ibaga kadatayo ti Sao ti Dios: “Ti panagbuteng ken Jehova isu ti rugi ti sirib.”​—Proverbio 9:10.

³ Kinapudnona, ti panagbuteng iti Dios saklawenna ti adu nga aspeto ti biag dagiti tattao. Saan laeng a nainaig dayta iti sirib no di pay ket iti rag-o, talna, kinarang-ay, kinapaut, namnama, panagtalek, ken kompiansa. (Salmo 2:11; Proverbio 1:7; 10:27; 14:26; 22:4; 23:17, 18; Aramid 9:31) Dakkel met ti pakainaiganna iti pammati ken ayat. Kinapudnona, iramanna ti intero a relasiontayo iti Dios ken kadagiti padatayo a tattao. (Deuteronomio 10:12; Job 6:14; Hebreo 11:7) Ti panagbuteng iti Dios iramanna ti natibker a panagtalektayo a personal a maseknan kadatayo ti nailangitan nga Amatayo ken sidadaan a mangpakawan kadagiti salungasingtayo. (Salmo 130:4) Dagiti laeng awan panagbabawida a managdakdakes ti addaan iti rason a maamak iti Dios.a―Hebreo 10:26-31.

Sursuruen ti Agbuteng iti Dios

4. Ania ti makatulong tapno ‘masursurotayo ti agbuteng ken ni Jehova’?

⁴ Yantangay napateg ti panagbuteng iti Dios no iti panangaramid kadagiti nainsiriban a desision ken iti pananggun-od kadagiti bendision ti Dios, kasano a ‘masursurotayo ti umiso a panagbuteng ken ni Jehova’? (Deuteronomio 17:19) Nailanad iti Kasuratan ti adu a pagarigan dagiti lallaki ken babbai a nagbuteng iti Dios tapno “pakasursuruantayo.” (Roma 15:4) Tapno matarusantayo no ania a talaga ti kaipapanan ti panagbuteng iti Dios, usigentayo ti biag ti maysa kadagita a pagarigan, ni Ari David iti nagkauna nga Israel.

5. Kasano a nakatulong ti panangipastor tapno masursuro ni David ti agbuteng ken ni Jehova?

⁵ Ni Jehova inlaksidna ti umuna nga ari ti Israel a ni Saul gapu ta nagbuteng daytoy kadagiti tattao imbes nga iti Dios. (1 Samuel 15:24-26) Iti sabali a bangir, paneknekan ti kabibiag ni David ken ti nasinged a relasionna ken ni Jehova nga isu ket pudno a managbuteng iti Dios. Idi ubing pay, masansan nga ipaarabna dagiti karnero ni amana. (1 Samuel 16:11) Nakatulong la ketdi ken ni David dagiti panagipastorna iti naariwanas a rabii tapno matarusanna no ania ti panagbuteng iti Dios. Nupay bassit laeng ti matarusan ni David no iti kalawa ti uniberso, umiso ti nagtengna a konklusion―maikari ti Dios iti panagraem ken panagdayawtayo. “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam, ania ti mortal a tao tapno sipapanunotka kenkuana, ken ti anak ti naindagaan a tao tapno aywanam?”​—Salmo 8:3, 4.

6. Ania ti narikna ni David idi makitana ti kinanaindaklan ni Jehova?

⁶ Umiso ti pannakarikna ni David iti panagamanga idi idiligna ti kinabassitna iti naglawa ken nabituen a langlangit. Imbes a maaliaw, dayta a pannakaammo ti nangtignay kenkuana a mangidaydayaw ken ni Jehova ket kinunana: “Ti langlangit idekdeklarada ti dayag ti Dios; ket maipapan iti aramid ti im-imana ibagbaga ti tangatang.” (Salmo 19:1) Gapu iti kasta a panagamanga iti Dios, ad-adda a nayadani ni David ken ni Jehova ken natignay a mangadal ken mangtulad kadagiti perpekto a dana ti Dios. Panunotenyo ti narikna ni David idi inkantana ken ni Jehova: “Naindaklanka ken agar-aramidka iti nakaskasdaaw a bambanag; sika ti Dios, sika laeng. Isuronak, O Jehova, maipapan iti dalanmo. Magnaakto iti kinapudnom. Pagkaykaysaem ti pusok nga agbuteng iti naganmo.”​—Salmo 86:10, 11.

7. Kasano a ti panagbuteng iti Dios tinulonganna ni David a makibakal ken ni Goliat?

⁷ Idi rimmaut dagiti Filisteo iti daga ti Israel, ti kangrunaan a soldadoda a ni Goliat, nga agtayag iti agarup tallo a metro, inumsina dagiti Israelita, a kasla ibagbagana: ‘Mangipasangokayo iti lalaki a makirupak kaniak! No isu ti mangabak, agserbikamto kadakayo.’ (1 Samuel 17:4-10) Nagbuteng ni Saul ken ti intero a buyotna―ngem saan a nagbuteng ni David. Ammona a ni Jehova ti rumbeng a pagbutngan, saan a ti asinoman a tao, kasanoman kabilegna. “Umayak kenka nga addaanak iti nagan ni Jehova ti buybuyot,” kinuna ni David ken ni Goliat, “ket isuamin daytoy a kongregasion maammuandanto a saan a babaen ti kampilan wenno uray babaen ti pika a mangisalakan ni Jehova, agsipud ta kukua ni Jehova ti bakal.” Babaen ti pallatibong ken maysa a bato―ken buyogen ti tulong ni Jehova―napapatay ni David ti higante.―1 Samuel 17:45-47.

8. Ania ti isuro kadatayo dagiti nailanad iti Biblia a pagarigan dagiti nagbuteng iti Dios?

⁸ Nalabit a maipaspasangotayo kadagiti bangen wenno kabusor a mayarig kadagidiay nakaipasanguan ni David. Ania ti mabalintayo nga aramiden? Matamingtayo dagita iti wagas nga inaramid ni David ken ti dadduma a matalek a tattao idi ugma―buyogen ti panagbuteng iti Dios. Ti panagbuteng iti Dios ringbawanna ti panagbuteng iti tao. Ti matalek nga adipen ti Dios a ni Nehemias indagadagna kadagiti kailianna nga Israelita, a pangpangtaan idi dagiti kabusor: “Dikay agbuteng maigapu kadakuada. Ni Jehova a naindaklan ken Daydiay nakaam-amak salimetmetanyo iti panunotyo.” (Nehemias 4:14) Babaen ti tulong ni Jehova, nagballigi da David, Nehemias, ken dadduma pay a matalek nga adipen ti Dios no maipapan iti panangitungpalda kadagiti annongen nga intalek ti Dios. Buyogen ti panagbuteng iti Dios, maaramidtayo met ti kasta.

Panangsango Kadagiti Parikut Buyogen ti Panagbuteng iti Dios

9. Iti sidong dagiti ania a kasasaad nga impakita ni David ti panagbutengna iti Dios?

⁹ Kalpasan a pinapatay ni David ni Goliat, adu pay a panagballigi ti impaay ni Jehova kenkuana. Ngem ti managimon a ni Saul ginandatna a papatayen ni David babaen ti bukodna nga ima ken kalpasanna babaen ti maysa a buyot. Nupay impanamnama ni Jehova nga agbalin ni David kas ari, adu a tawen a naglemmeng, nakibakal, ken naguray ni David iti tiempo nga inkeddeng ni Jehova a panagarina. Iti las-ud amin dagita, impakita ni David ti panagbutengna iti pudno a Dios.―1 Samuel 18:9, 11, 17; 24:2.

10. Kasano nga impakita ni David ti panagbutengna iti Dios idi naipasango iti peggad?

¹⁰ Naminsan, nagkamang ni David iti salinong ni Aquis, ti ari iti Filisteo a siudad ti Gat, ti ili ni Goliat. (1 Samuel 21:10-15) Dagiti adipen ti ari imbilangda ni David kas kabusor ti nasionda. Kasano a nagtignay ni David iti dayta a napeggad a kasasaad? Sipapasnek a nagkararag ken ni Jehova. (Salmo 56:1-4, 11-13) Nupay masapul nga aginmamauyong tapno makalibas, ammo ni David a ni Jehova ti pudpudno a nangispal kenkuana babaen ti panangbendision ti Dios kadagiti panagreggetna. Ti naimpusuan a panagpannuray ken panagtalek ni David ken ni Jehova ipakitana nga isu ket pudno a managbuteng iti Dios.―Salmo 34:4-6, 9-11.

11. Kasano a maipakitatayo ti panagbuteng iti Dios iti sidong ti pannubok, kas iti inaramid ni David?

¹¹ Kas ken David, maipakitatayo ti panagbuteng iti Dios babaen ti panagtalektayo iti karina a tulongannatayo a mangsaranget kadagiti parikuttayo. “Iyadanim ken Jehova ti dalanmo, ket agkammatalekka kenkuana, ket isu agtignayto,” kinuna ni David. (Salmo 37:5) Dina kayat a sawen dayta a basta iyallatiwtayo ken ni Jehova dagiti parikuttayo ket isu ti makaammo a mangrisut kadagita nga awan man la ti aramidentayo a panangikagumaan. Saan a basta inkararag ni David ti tulong ti Dios sana impabiang dagiti bambanag nga awan man la ti inaramidna. Imbes ketdi, tinamingna dagiti parikutna babaen ti panangusarna kadagiti pisikal nga abilidad ken kinasaririt nga impaay ni Jehova kenkuana. Ngem ammo ni David a saan nga agballigi ti tao no agpannuray laeng iti bukodna a pigsa. Kasta met kadatayo. No naaramidtayon ti amin a kabaelantayo, italektayo ken ni Jehova dagiti bambanag. Kinapudnona, masansan nga awan ti maaramidantayo no di ti agpannuray ken ni Jehova. Isu dayta ti gundawaytayo a mangipakita iti personal a panagbutengtayo iti Dios. Makaliwliwa kadatayo ti naimpusuan a sasao ni David: “Ti kinasinged ken Jehova kukua dagidiay agbuteng kenkuana.”​—Salmo 25:14.

12. Apay a nasken nga ipapusotayo dagiti kararagtayo, ken ania a kababalin ti rumbeng a liklikantayo?

¹² Nasken ngarud nga ipapusotayo dagiti kararag ken relasiontayo iti Dios. No umadanitayo ken ni Jehova, masapul a ‘patientayo nga isu adda ken isu agbalin a mananggunggona kadagidiay sipapasnek a mangsapsapul kenkuana.’ (Hebreo 11:6; Santiago 1:5-8) Ket no tulongannatayo, rebbengna nga ‘ipakitatayo a managyamantayo,’ kas imbalakad kadatayo ni apostol Pablo. (Colosas 3:15, 17) Pulos a ditay koma tultuladen dagidiay dineskribir ti maysa nga aduan iti kapadasan a napulotan a Kristiano: “Matmatanda ti Dios a kasla maysa a serbidor idiay langit,” kinunana. “No adda kasapulanda, kayatda nga iti apagkitek ti ramayda, insigida nga umasideg ti Dios kadakuada. Ket no maaladan ti kayatda, papanawenda manen.” Ti kasta a kababalin ipalgakna ti kinaawan ti panagbuteng iti Dios.

No Mapukaw ti Panagbuteng iti Dios

13. Kaano a di naipakita ni David ti panagraemna iti Linteg ti Dios?

¹³ Gapu ta napasaran ni David ti tulong ni Jehova kabayatan ti rigatna, naparayray ti panagbutengna iti Dios ken napabileg ti panagtalekna kenkuana. (Salmo 31:22-24) Nupay kasta, iti tallo a di malipatan a gundaway, saan a naipakita ni David ti panagbutengna iti Dios, a nagturong iti nakalkaldaang a resulta. Ti umuna ket mainaig iti panangyurnosna a mayakar idiay Jerusalem ti lakasa ti tulag ni Jehova babaen ti maysa a kareson imbes a babaen ti panangibaklay dagiti Levita, kas imbilin ti Linteg ti Dios. Idi a ni Uzzah a mangiturturong iti kareson iniggamanna ti Lakasa tapno di matuang, natay nga insigida gapu iti dayta nga “awan panagraemna a tignay.” Wen, nakabasol iti nadagsen ni Uzzah, ngem no an-anagen, ti saan a panangsalimetmet ni David iti umiso a panagraem iti Linteg ti Dios ti puon ken gapu dayta a trahedia. Ti panagbuteng iti Dios kaipapananna ti panangaramid kadagiti bambanag sigun iti urnosna.​—2 Samuel 6:2-9; Numeros 4:15; 7:9.

14. Ania ti resulta ti panangbilang ni David kadagiti lallaki ti Israel?

¹⁴ Idi agangay, babaen ti pananggargari ni Satanas, binilang ni David no mano ti mannakigubat a lallaki iti Israel. (1 Cronicas 21:1) Ipakita dayta nga inaramidna a napukaw ti panagbutengna iti Dios, a nagresulta iti ipapatay ti 70,000 nga Israelita. Nupay nagbabawi ni David iti imatang ni Jehova, nakaro latta ti sinagabana ken ti sinagaba dagiti tattao.​—2 Samuel 24:1-16.

15. Ania ti makagapu a natnag ni David iti seksual a basol?

¹⁵ Ti sabali pay a temporario a pannakapukaw ti panagbuteng iti Dios ket nagresulta iti imoral a pannakirelasion ni David ken ni Bat-seba, ti asawa ni Urias. Ammo ni David a dakes ti pannakikamalala wenno ti uray panangtarigagay laeng iti asawa ti sabali. (Exodo 20:14, 17) Nangrugi ti parikut idi nakita ni David nga agdigdigus ni Bat-seba. Ti umiso a panagbuteng iti Dios ti nangtignay koma ken ni David a dagus a mangibaw-ing iti mata ken panunotna iti sabali a banag. Imbes ketdi, nabatad nga ‘intultuloy a minatmatan’ ni David ti babai agingga a ti kinarugso ti nangringbaw iti panagbutengna iti Dios. (Mateo 5:28; 2 Samuel 11:1-4) Nalipatan ni David nga ikabilangan ti nadekket a relasionna ken ni Jehova.―Salmo 139:1-7.

16. Ania dagiti dakes a bunga a sinagaba ni David gapu iti basolna?

¹⁶ Nagbunga ti pannakikamalala ni David ken ni Bat-seba. Di nagbayag kalpasanna, imbaon ni Jehova ti propetana a ni Natan tapno ibutaktakna ti basol ni David. Nakapampanunot met laeng ni David ket naisubli ti panagbutengna iti Dios ken nagbabawi. Nagpakpakaasi a di koma ilaklaksid ni Jehova wenno dina koma ik-ikkaten ti espirituna manipud kenkuana. (Salmo 51:7, 11) Ni Jehova pinakawanna ni David ken pinalag-anna ti pannusana kenkuana, ngem dina sinalakniban ni David manipud kadagiti dakes nga imbunga ti inaramidna. Natay ti anak ni David, ken nangrugi nga immapay ti saem ken trahedia iti pamiliana. Anian a nagdakkel a bayad gapu iti saan a panangipakita iti panagbuteng iti Dios!―2 Samuel 12:10-14; 13:10-14; 15:14.

17. Iyilustrar ti saem nga iyeg ti di panangikabilangan kadagiti moral a pagalagadan ti Dios.

¹⁷ Uray ita, mabalin a mapasarantayo met dagiti umasping a serioso ken agpaut a dakes a resulta no ditay ikabilangan dagiti moral a pagalagadan ti Dios gapu iti saan a panagbuteng kenkuana. Panunotenyo ti saem a narikna ti maysa nga agkabannuag a babai idi maammuanna a nakikamalala ti Kristiano a lakayna bayat nga agtartrabaho iti ballasiw taaw. Gapu iti pannakaklaat ken ladingit, inapputna ti rupana ket naganug-og. Kasano kabayag sakbay a maisublina ti panagtalek ken panagraemna iti lakayna? Mabalin a maliklikan dagiti kasta a nakalkaldaang a resulta no adda panagbuteng iti Dios.―1 Corinto 6:18.

Maliklikantayo ti Agbasol no Adda Panagbuteng iti Dios

18. Ania ti kalat ken pamay-an nga us-usaren ni Satanas?

¹⁸ Nagpartak ti panangrebba ni Satanas iti moralidad ti lubong, ngem nangnangruna a kayatna a dadaelen ti moralidad dagiti pudno a Kristiano. Tapno maibanagna dayta, gundawayanna ti mismo a dalan agturong iti puso ken isiptayo―babaen dagiti sentidotayo, nangnangruna dagiti mata ken lapayagtayo. (Efeso 4:17-19) Ania ti aramidenyo no di ninamnama a naipasangokayo iti imoral a ladawan, sasao, wenno tattao?

19. Kasano a ti panagbuteng iti Dios natulonganna ti maysa a Kristiano tapno madaeranna ti sulisog?

¹⁹ Usigenyo ti napasamak ken ni André,b maysa a Kristiano a panglakayen, ama, ken doktor idiay Europa. Idi pangrabii ti trabahona iti ospital, dagiti katrabahuanna a babbai maulit-ulit a nangikabilda kadagiti ababa a surat iti punganna―nga al-allukoyenda a makikaidda kadakuada. Sititibker a pinagkedkedan ni André dagiti tukonda. Kanayonanna, tapno mayadayona ti bagina iti kasta a nalulok a kasasaad, nagbirok iti sabali a pagtrabahuan. Napaneknekan a nainsiriban ken mangyeg kadagiti gunggona ti panagbuteng iti Dios yantangay iti agdama, paset-tiempo nga agserserbi ni André iti sanga nga opisina dagiti Saksi ni Jehova iti pagilianda.

20, 21. (a) Kasano a maliklikantayo ti agbasol no adda panagbutengtayo iti Dios? (b) Ania ti mausig iti sumaruno nga artikulo?

²⁰ No kanayon a pampanunoten ti maysa dagiti bambanag a di umiso, mabalin a maituredna a tallikudan ti nagpateg a relasionna ken ni Jehova basta magun-odna la ketdi ti maysa a banag a dina met kukua. (Santiago 1:14, 15) Iti sabali a bangir, no adda panagbutengtayo ken ni Jehova, liklikan wenno adaywantayo pay ketdi dagiti tattao, lugar, aktibidad, ken paglinglingayan a mangpakapuy iti kinaridamtayo iti moral. (Proverbio 22:3) Mabalin nga agkalikagum dayta iti pannakaibabain wenno panagsakripisiotayo, ngem nasaysayaat nga amang dayta ngem ti mapukawtayo ti anamong ti Dios. (Mateo 5:29, 30) Ti panagbuteng iti Dios sigurado nga iramanna ti saan a pulos a panangigagara a panangisarang iti bagitayo iti aniaman a kita ti imoralidad, agraman iti aniaman a kita ti pornograpia, no di ket ‘ilikliktayo dagiti matatayo manipud iti panangkita iti awan pategna.’ No aramidentayo dayta, makapagtalektayo ken ni Jehova a ‘taginayonennatayo a sibibiag’ ken ipaayna ti amin a kasapulantayo.―Salmo 84:11; 119:37.

²¹ Wen, kanayon a nainsiriban ti panagtignay buyogen ti panagbuteng iti Dios. Gubuayan met dayta ti pudno a kinaragsak. (Salmo 34:9) Malawlawagan dayta iti sumaruno nga artikulo.

[Footnotes]

Mailawlawagyo Kadi?

• Aniada a Nakristianuan a galad ti karaman iti panagbuteng iti Dios?

• Kasano a ti panagbuteng iti Dios ringbawanna ti panagbuteng iti tao?

• Kasanotayo a maipakita nga umiso ti panangmatmattayo iti kararag?

• Kasano a maliklikantayo ti agbasol no addaantayo iti panagbuteng iti Dios?

[Ladawan iti panid 23]

Nasursuro ni David ti agbuteng iti Dios babaen ti panangpaliiwna kadagiti pinarsua ni Jehova

[Dagiti Ladawan iti panid 24]

Ania ti aramidenyo no di ninamnama a maipasangokayo iti maysa a makasulisog a kasasaad?