Agbutengkayo ken ni Jehova ket Tagiragsakenyo ti Biag
“Agbutengkayo ken Jehova, dakayo a sasantona, ta awan ti pagkurangan kadagidiay agbuteng kenkuana.”—SALMO 34:9.
1, 2. (a) Ania ti nagduduma a panangmatmat ti Kakristianuan maipapan iti panagbuteng iti Dios? (b) Ania dagiti saludsod nga usigentayo ita?
DAGITI ministro ti Kakristianuan masansan nga isuroda ti panagbuteng iti Dios maibatay iti saan a nainkasuratan a sursuro nga agnanayon kano a dusaen ti Dios dagidiay managbasol iti maysa nga umap-apuy nga impierno. Ti kasta a doktrina ket maisupadi iti isursuro ti Biblia maipapan ken ni Jehova kas maysa a Dios ti ayat ken kinahustisia. (Genesis 3:19; Deuteronomio 32:4; Roma 6:23; 1 Juan 4:8) Sabali met ti pamay-an ti dadduma a ministro ti Kakristianuan. Dida pulos dakamaten ti maipapan iti panagbuteng iti Dios. Imbes ketdi, isuroda a manangpanuynoy ti Dios ken awatenna ti asinoman uray ania ti aramidenda iti biagda. Saan met a kasta ti isursuro ti Biblia.―Galacia 5:19-21.
2 Kinapudnona, iparparegta ti Biblia nga agbutengtayo iti Dios. (Apocalipsis 14:7) Ngem mangpataud dayta kadagiti saludsod. Apay a ti naayat a Dios kayatna nga agbutengtayo kenkuana? Ania a kita ti panagbuteng ti kalkalikaguman kadatayo ti Dios? Kasano a makagunggona kadatayo ti panagbuteng iti Dios? Usigentayo dagita a saludsod bayat nga itultuloytayo a sukimaten ti maika-34 a Salmo.
No Apay nga Agbuteng iti Dios
3. (a) Ania ti panangmatmatyo iti bilin nga agbutengkayo iti Dios? (b) Apay a naragsak dagidiay agbuteng iti Dios?
3 Kas ti Namarsua ken ti Soberano nga Agturay iti uniberso, maikari ni Jehova a pagbutngan. (1 Pedro 2:17) Nupay kasta, dayta a panagbuteng ket saan a nakaro a panagalinggaget iti maysa a nauyong a dios. Imbes ketdi, nadayaw dayta a panagamanga iti kinasiasino ni Jehova. Panagamak met dayta a mangsair kenkuana. Umiso ken mangparang-ay ti nadiosan a panagbuteng, saan a mamagleddaang wenno mamagsidduker. Ni Jehova, “ti naragsak a Dios,” kayatna a dagiti pinarsuana a tattao tagiragsakenda ti biag. (1 Timoteo 1:11) Ngem tapno matungpal dayta, masapul nga agbiagtayo maitunos kadagiti pagannurotan ti Dios. Para iti adu a tattao, kaipapananna a masapul a balbaliwanda ti wagas ti panagbiagda. Dagidiay mangaramid kadagiti kasapulan a panagbalbaliw mapasaranda ti kinapudno ti kinuna ni salmista a David: “O nanamenyo ken kitaenyo a ni Jehova naimbag; naragsak ti nabaneg a lalaki nga agkamang kenkuana. Agbutengkayo ken Jehova, dakayo a sasantona, ta awan ti pagkurangan kadagidiay agbuteng kenkuana.” (Salmo 34:8, 9) Amin nga agbuteng ken ni Jehova matagiragsakda dagiti agpaut a bambanag gapu ta nasayaat ti relasionda iti Dios.
4. Ania ti impanamnama da David ken Jesus?
4 Idi kaaldawanna, pinadayawan ni David dagiti buyotna babaen ti panangawagna kadakuada kas ‘sasanto.’ Kameng ida ti nasantuan nga ili ti Dios. Inrisgoda met ti biagda idi simmurotda ken ni David. Nupay itartarayanda ni Ari Saul, agtalek ni David nga agtultuloy nga ipaay ni Jehova dagiti kangrunaan a kasapulanda. Insurat ni David: “Dagiti burboran a bumaro a leon sangkabassit laengen ti adda kadakuada ket nagbisinda; ngem no maipapan kadagidiay mangsapul ken Jehova, saandanto nga agkurang iti aniaman a naimbag.” (Salmo 34:10) Kasta met laeng ti impanamnama ni Jesus kadagiti pasurotna.―Mateo 6:33.
5. (a) Ania ti kasasaad ti biag ti adu a pasurot ni Jesus? (b) Ania ti imbalakad ni Jesus maipapan iti panagbuteng?
5 Daksanggasat ken napanglaw ti adu a Judio nga agdengdengngeg idi ken ni Jesus. Gapuna, ni Jesus “simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” (Mateo 9:36) Dagiti ngata kasta a nanumo a tattao adda turedda a sumurot ken ni Jesus? Maaramidda dayta no patanorenda ti panagbuteng ken ni Jehova, saan nga iti tao. Kinuna ni Jesus: “Dikay pagbutngan dagidiay mangpapatay iti bagi ket kalpasan daytoy saanda a kabaelan nga aramiden ti aniaman pay a banag. Ngem ipasimudaagko kadakayo no asino ti pagbutnganyo: Pagbutnganyo daydiay a kalpasan a mangpapatay addaan autoridad a mangitapuak idiay Gehenna. Wen, ibagak kadakayo, pagbutnganyo Daytoy. Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. Ngem uray dagiti buok ti ul-uloyo nabilang aminen. Dikay agbuteng; napatpategkayo ngem iti adu a billit-tuleng.”—Lucas 12:4-7.
6. (a) Ania a sasao ni Jesus ti nakapabileg kadagiti Kristiano? (b) Apay a ni Jesus ti kasayaatan nga ulidan ti panangipakita iti nadiosan a panagbuteng?
6 No dagidiay agbuteng ken ni Jehova ket piliten dagiti kabusorda nga isardengda ti agserbi iti Dios, nasayaat a laglagipenda ti balakad ni Jesus: “Tunggal maysa a mangipudno iti pannakikaykaysa kaniak iti sanguanan dagiti tattao, ti Anak ti tao ipudnonanto met ti pannakikaykaysa kenkuana iti sanguanan dagiti anghel ti Dios. Ngem ti mangtallikud kaniak iti sanguanan dagiti tattao mapaglikudanto iti sanguanan dagiti anghel ti Dios.” (Lucas 12:8, 9) Napabileg dagiti Kristiano kadagita a sasao, nangnangruna kadagiti lugar a maiparit ti pudno a panagdayaw. Agtultuloy ti naannad a panangidaydayawda ken ni Jehova kadagiti Nakristianuan a gimong ken iti trabahoda a panangasaba. (Aramid 5:29) Impasdek ni Jesus ti kasayaatan nga ulidan no maipapan iti panangipakita iti ‘nadiosan a panagbuteng.’ (Hebreo 5:7) No maipapan kenkuana, impadto ti Sao ti Dios: “Agtaengto kenkuana ti espiritu ni Jehova, ti espiritu . . . ti panagbuteng ken Jehova; ket addaanto iti ragsak iti panagbuteng ken Jehova.” (Isaias 11:2, 3) Gapuna, ni Jesus ti kasayaatan a makaisuro kadatayo kadagiti pagimbagan ti nadiosan a panagbuteng.
7. (a) Ania koma ti reaksion dagiti Kristiano iti imbitasion nga umasping iti iyaw-awis ni David? (b) Kasano a matulad dagiti nagannak ti nasayaat nga ulidan ni David?
7 Amin a sumursurot iti ulidan ni Jesus ken mangan-annurot kadagiti sursurona ket, kinapudnona, mangipangpangag iti awis nga umasping iti iyaw-awis ni David: “Umaykayo, dakayo nga annak, umimdengkayo kaniak; ti panagbuteng ken Jehova isunto ti isurok kadakayo.” (Salmo 34:11) Natural laeng nga awagan ni David dagiti buyotna kas “annak” gapu ta isu ti matmatanda a liderda. Impaayanna iti naespirituan a tulong dagiti pasurotna tapno agkaykaysada ken matagiragsakda ti anamong ti Dios. Anian a nagsayaat nga ulidan kadagiti nagannak! Inikkan ida ni Jehova iti autoridad a mangisuro kadagiti annakda tapno ‘itultuloyda a padakkelen dagitoy iti disiplina ken panangiturong-panunot ni Jehova.’ (Efeso 6:4) No regular nga iyadalanda iti Biblia dagiti annakda ken inaldaw a kasaritada ida maipapan kadagiti naespirituan a bambanag, matulonganda dagiti annakda a maaddaan iti naragsak a biag gapu ta adda panagbutengda ken ni Jehova.―Deuteronomio 6:6, 7.
No Kasano a Maipakita ti Nadiosan a Panagbuteng
8, 9. (a) Apay a makaay-ayo ti panagbiag a nabuyogan iti panagbuteng iti Dios? (b) Kasano a masaluadantayo ti dilatayo?
8 Kas nadakamat itay, saan a mangikkat iti rag-otayo ti panagbuteng ken ni Jehova. Inyimtuod ni David: “Siasino ti tao a maragragsakan iti biag, a mangay-ayat iti umdas nga al-aldaw tapno kitaenna ti naimbag?” (Salmo 34:12) Nalawag, masapul ti panagbuteng ken ni Jehova tapno masagrap ti napaut ken naragsak a panagbiag. Nupay kasta, nalaka laeng nga ibaga, “Agbutengak iti Dios.” Masapul a paneknekantayo dayta babaen ti konduktatayo. Gapuna, ituloy nga ilawlawag ni David no kasano a maipakitatayo ti nadiosan a panagbuteng.
9 “Saluadam ta dilam maibusor iti dakes, ken dagiti bibigmo maibusor iti panagsao iti allilaw.” (Salmo 34:13) Napaltiingan ni apostol Pedro a mangadaw iti dayta a paset ti Salmo 34 kalpasan a binalakadanna dagiti Kristiano nga ayatenda ti maysa ken maysa a kas kabsatda. (1 Pedro 3:8-12) Tapno masaluadantayo ti dilatayo maibusor iti dakes, masapul a liklikantayo ti makadangran a panangidanondanon. Imbes ketdi, kanayon nga ikagumaantayo ti agbalin a makapabileg no makisarsaritatayo. Malaksid iti dayta, situtured nga ibagatayo no ania ti pudno.―Efeso 4:25, 29, 31; Santiago 5:16.
10. (a) Ilawlawagyo no ania ti kayat a sawen ti iyaadayo iti dakes. (b) Ania ti ramanen ti panagaramid iti naimbag?
10 “Umadayoka iti dakes, ket aramidem ti naimbag; ikagumaam a saraken ti talna, ket surotem [wenno, itandudom] dayta.” (Salmo 34:14) Liklikantayo dagiti bambanag a kondenaren ti Dios, kas iti seksual nga imoralidad, pornograpia, panagtakaw, espiritismo, kinaranggas, panagbartek, ken panangabuso iti droga. Ditay met kayat dagiti paglinglingayan a mangitampok kadagita a makarimon a bambanag. (Efeso 5:10-12) Imbes ketdi, usarentayo ti tiempotayo nga agaramid iti naimbag. Ti kasayaatan a maaramidtayo isu ti regular a panangikasaba iti Pagarian ken panagaramid kadagiti adalan, a tulongantayo dagiti sabsabali tapno magun-odda ti pannakaisalakan. (Mateo 24:14; 28:19, 20) Ti panagaramid iti naimbag iramanna met ti panagsagana ken itatabuno kadagiti Nakristianuan a gimong, panangted iti pinansial a tulong iti sangalubongan a trabaho, panangaywan iti Kingdom Hall, ken panangikabilangan kadagiti kasapulan dagiti napanglaw a Kristiano.
11. (a) Kasano nga inyaplikar ni David ti insurona maipapan iti talna? (b) Ania ti mabalinyo nga aramiden tapno ‘maitandudoyo ti talna’ iti kongregasion?
11 Nagsayaat ti ulidan ni David no maipapan iti panangitandudo iti talna. Dua a gundaway a mabalinna koma a pinatay ni Saul. Ngem dina kayat ti kinaranggas ken siraraem pay ketdi a nakisarita ken ni Saul, a mangnamnama a maisubli ti natalna a relasionda. (1 Samuel 24:8-11; 26:17-20) Ania ti aramidentayo no tumaud ti kasasaad a mabalin a mangkibur iti talna ti kongregasion? Masapul nga ‘ikagumaantayo a saraken ti talna, ket itandudotayo dayta.’ Isu a no mariknatayo a saan a nasayaat ti relasiontayo iti maysa a kapammatiantayo, surotentayo ti balakad ni Jesus: “Umuna a makikappiaka ken kabsatmo.” Kalpasanna, ituloytayo nga aramiden ti dadduma pay nga aspeto ti pudno a panagdayaw.—Mateo 5:23, 24; Efeso 4:26.
Mangyeg iti Adu a Gunggona ti Panagbuteng iti Dios
12, 13. (a) Ania dagiti gunggona a tagtagiragsaken dagidiay agbuteng iti Dios? (b) Ania a naindaklan a gunggona ti asidegen a magun-odan dagiti matalek a managdaydayaw?
12 “Dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.” (Salmo 34:15) Ti rekord maipapan iti pannakilangen ti Dios ken ni David paneknekanna a pudno dagita a sasao. Iti kaaldawantayo, tagtagiragsakentayo ti dakkel a rag-o ken talna ti panunot gapu ta ammotayo a bambantayannatayo ni Jehova. Agtalektayo a kanayon nga ipaayna dagiti kasapulantayo, uray iti sidong ti narigat a kasasaad. Ammotayo nga iti din agbayag, dagiti amin a pudno nga agdaydayaw ket maipasango iti naipadto a panangraut ni Gog iti Magog ken ti “nakaam-amak nga aldaw ni Jehova.” (Joel 2:11, 31; Ezequiel 38:14-18, 21-23) No kasta, aniaman ti kasasaad a pakaipasanguantayo, pumudno kadatayo ti kinuna ni David: “Imkisda, ket nangngeg ni Jehova a mismo, ket kadagiti amin a rigatda inispalna ida.”―Salmo 34:17.
13 Anian a makaparagsakto a makita ti pannakaitan-ok ti naindaklan a nagan ni Jehova! Mapnonto ti pusotayo iti kasta unay a panagamanga, ket ti amin a kabusor mapasarandanto ti nakababain a pannakadadael. “Ti rupa ni Jehova bumusor kadagidiay agar-aramid iti dakes, tapno gessatenna ti pannakadakamat kadakuada manipud iti mismo a daga.” (Salmo 34:16) Anian a nagsayaat a gunggona a magun-od dayta a naindaklan a pannakaispal nga agturong iti nalinteg a baro a lubong ti Dios!
Dagiti Kari a Tumulong Kadatayo nga Agibtur
14. Ania ti tumulong kadatayo a makapagibtur iti laksid dagiti didigra?
14 Kabayatanna, masapul nga agibturtayo tapno agtultuloy a makapagtulnogtayo ken ni Jehova iti tengnga ti dakes ken naulpit a lubong. Dakkel ti maitulong ti panagbuteng iti Dios tapno makapagibturtayo. Gapu ta narigat ti tiempo a pagbibiagantayo, dadduma nga adipen ni Jehova ti agpaspasar kadagiti nakaro a rigat a mamagliday ken mamagleppay kadakuada. Nupay kasta, naan-anay a makapagtalekda a no agpannurayda ken ni Jehova, tulonganna ida nga agibtur. Pudno a makaliwliwa ti sasao ni David: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” (Salmo 34:18) Makapabileg ti simmaruno a kinuna ni David: “Adu ti didigra daydiay nalinteg, ngem manipud kadakuada amin isu ispalen ni Jehova.” (Salmo 34:19) Kasano man kaadu ti didigra a sumangbay kadatayo, nakabilbileg ni Jehova tapno ispalennatayo.
15, 16. (a) Ania a didigra ti nangngeg ni David kalpasan unay a pinutarna ti Salmo 34? (b) Ania ti tumulong kadatayo a mangibtur kadagiti pakasuotan?
15 Kalpasan unay ti panangputarna iti Salmo 34, nangngeg ni David ti maipapan iti panangtalipupos ni Saul kadagiti umili ti Nob ken iti kaaduan a papadi. Anian a pannakariribukna ta ammona a ti panagtalinaedna idiay Nob ti nakaigapuan ti pungtot ni Saul! (1 Samuel 22:13, 18-21) Awan duadua a nagpatulong ni David ken ni Jehova, ket sigurado a naliwliwa iti namnama nga agungarto “dagiti nalinteg.”―Aramid 24:15.
16 Pabilgennatayo met ita ti namnama a panagungar. Ammotayo nga awan ti mabalin nga aramiden dagiti kabusor a mangyeg kadatayo iti agnanayon a pannakadangran. (Mateo 10:28) Kasta met la ti kinuna ni David: “Saluadanna dagiti amin a tulang [dagiti nalinteg]; awan maysa kadakuada ti natukkol.” (Salmo 34:20) Adda literal a kaitungpalan dayta a bersikulo no maipapan ken ni Jesus. Nupay siuulpit a napapatay, awan ti uray maysa kadagiti tulangna ti ‘narumek.’ (Juan 19:36) Iti kanayonan nga aplikasionna, ipanamnama kadatayo ti Salmo 34:20 nga aniaman a pakasuotan a pakaipasanguan dagiti napulotan a Kristiano ken ti kakaduada a “sabsabali a karnero,” saanda a pulos a permanente a madangran. Iti piguratibo a pamay-an, saan a pulos a narumek dagiti tulangda.―Juan 10:16.
17. Ania a didigra ti agur-uray kadagidiay di agbabawi a bumusbusor iti ili ni Jehova?
17 Ngem sabali ti agur-uray kadagiti nadangkes. Iti din agbayag, apitenda ti dakes a bunga ti immulada. “Ti didigra papatayennanto daydiay nadangkes a mismo; ket dagidiay met laeng manggurgura iti daydiay nalinteg maibilangdanto a nakabasol.” (Salmo 34:21) Dumtengto ti kadaksan a didigra kadagiti amin nga agtultuloy a bumusbusor iti ili ti Dios. Iti pannakaipalgak ni Jesu-Kristo, “agpasardanto iti pannakaukom a dusa nga agnanayon a pannakadadael.”—2 Tesalonica 1:9.
18. Iti ania nga anag a naispalen ti “dakkel a bunggoy,” ken anianto ti mapasaranda iti masanguanan?
18 Agngudo ti salmo ni David babaen kadagitoy a sasao: “Ni Jehova subbotenna ti kararua dagiti adipenna; ket awan kadagidiay agkamang kenkuana ti maibilangto a nakabasol.” (Salmo 34:22) Idi dandani agturpos ti 40 a tawen a panagturayna, kinuna ni Ari David: ‘Ti Dios sinubbotna ti kararuak iti isuamin a rigat.’ (1 Ar-ari 1:29) Kas ken David, dagidiay agbuteng ken ni Jehova maragsakandanto a manglagip iti napalabas gapu ta naispalda manipud iti basol ken iti amin a pakarigatanda. Kaaduan kadagiti napulotan a Kristiano ti immawaten iti nailangitan a gunggonada. “Maysa a dakkel a bunggoy” manipud iti amin a nasion ti nakidanggay ita kadagiti nabatbati a kakabsat ni Jesus tapno sangsangkamaysa nga agserbida iti Dios ken maaddaanda iti nadalus a takder iti imatang ni Jehova. Ipakpakitada ngamin ti pammatida iti mangispal a dara nga imparukpok ni Jesus. Bayat ti umad-adani a Sangaribu a Tawen a Panagturay ni Kristo, naan-anayto a maiburay kadakuada dagiti gunggona nga itden ti pangsubbot a daton, a mangisubli kadakuada iti kinaperpekto.―Apocalipsis 7:9, 14, 17; 21:3-5.
19. Ania ti determinado nga aramiden dagiti kameng ti “dakkel a bunggoy”?
19 Apay a ti “dakkel a bunggoy” nga agdaydayaw iti Dios masagrapdanto amin dagita a bendision? Gapu ta determinadoda nga agtultuloy nga agbuteng ken ni Jehova, nga agserbida kenkuana buyogen ti panagamanga ken nadayaw a panagtulnog. Wen, ti panagbuteng ken ni Jehova pagbalinenna a naragsak ti biag ita ken tulongannatayo a ‘mangpetpet a sititibker iti pudpudno a biag’—ti biag nga agnanayon iti baro a lubong ti Dios.―1 Timoteo 6:12, 18, 19; Apocalipsis 15:3, 4.
Malagipyo Kadi?
• Apay a masapul nga agbutengtayo iti Dios, ken ania ti kaipapanan ti panagbuteng kenkuana?
• Ania koma ti epekto ti nadiosan a panagbuteng no iti konduktatayo?
• Ania dagiti gunggona nga itden ti panagbuteng iti Dios?
• Ania dagiti kari a tumulong kadatayo nga agibtur?
[Ladawan iti panid 26]
Naannad dagiti agbuteng ken ni Jehova no addada iti sidong ti pannakaiparit
[Ladawan iti panid 28]
Ti kasayaatan a maaramidtayo kadagiti kaarrubatayo isu ti panangiranudtayo kadakuada iti naimbag a damag ti Pagarian