Eskuelaan a Dagiti Nagraduar Magunggonaanda ti Tattao iti Intero a Lubong
ITI nasurok a 98,000 a kongregasion dagiti Saksi ni Jehova kadagiti nasurok a 200 a pagilian, ti Dios isursurona dagiti tattao a naggapu iti amin a kita ti panagbiag. Ti Biblia ti kangrunaan a libroda. Nairanta daytoy a panagadal tapno matulongan dagiti indibidual a rumang-ay iti naespirituan babaen ti panangadalda no ania ti pagayatan ti Dios ken no kasano a mayaplikarda dayta iti panagbiagda. Dakkel ti magunggona dagidiay umawat iti kasta a panagadal, ket iranudda met ti naadalda iti sabsabali. Maitunos dayta iti bilin ni Jesu-Kristo a mangaramid iti adalan.—Mateo 28:19, 20.
Malaksid pay iti agtultuloy a programa a panangisuro kadagiti kongregasionda, nangipasdek dagiti Saksi ni Jehova iti adu a naisangsangayan nga eskuelaan. Maysa kadagitoy ti Ministerial Training School. Nangrugi dayta idiay Pittsburgh, Pennsylvania, E.U.A., idi Oktubre 1987. Ti umuna a klase ket buklen ti 24 nga estudiante nga Ingles ti pagsasaoda. Sipud idin, maang-angay dagiti klase iti 21 a pagsasao iti 43 a pagilian. Nakapagpasalistan iti dayta nga eskuelaan dagiti saan a kasado a panglakayen ken ministerial nga adipen manipud iti nasurok a 90 a pagilian. Apaman a maturposda ti walo a lawas a kurso, maibaon dagiti nagraduar tapno agserbida kadagiti lugar nga agkasapulan, iti mismo a pagilianda wenno iti sabali a pagilian. Iti ngudo ti 2005, nakaturposen ti nasurok a 22,000 a Kristiano a ministro. Sibabaknang a nabendisionan ti kinagagetda a tumulong iti sabsabali ken mangyadelantar kadagiti interes ti Pagarian.—Proverbio 10:22; 1 Pedro 5:5.
Panangyurnos iti Panageskuela
Tapno makapageskuelada iti Ministerial Training School, kaaduan kadagiti estudiante ti agkiddaw iti bakasion iti paset-tiempo wenno amin-tiempo a trabahoda. No maminsan adda parikut iti daytoy. Idiay Hawaii, dua a mannursuro a Kristiano a lallaki a naawis nga ageskuela ti nagkiddaw nga agbakasionda iti trabahoda. Buyogen ti panagtalek ken ni Jehova, intedda dagiti kiddawda. Inlawlawagda no apay a kayatda ti ageskuela ken no apay nga adda magunggonada. Napalubosanda nga agbakasion.
Iti adu a kaso, dadduma a Saksi a nagkiddaw iti bakasion ti nabagaan a masesantedan. Kaskasdi, kinaykayatda ti agsanay manipud iti organisasion ni Jehova, uray pay no maikkatda iti trabahoda. Dadduma kadagitoy ti pinagsubli dagiti amoda apaman a naturposda ti panageskuelada. Kastoy ti panangiladawan iti kasta a determinasion nga ageskuela: Itedmo ti kiddawmo nga agbakasion, ikararagmo ti tulong ni Jehova, ket isunton ti makaammo kadagiti bambanag.—Salmo 37:5.
“Sinursuruan ni Jehova”
Mausig a naimbag ti Biblia kabayatan ti walo a lawas a kurso iti eskuelaan. Masursuro dagiti estudiante no kasano ti pannakaorganisar ti ili ni Jehova a mangaramid iti pagayatan ti Dios ken no kasano a mas epektibo nga usarenda ti Biblia iti ministerioda, kadagiti gimong ti kongregasion, ken kadagiti asamblea.
Maysa nga agyamyaman a nagraduar ti nagsurat iti maysa a di pay nageskuela: “Mamatika kaniak, dayta ti kasayaatan nga adal a magun-odam. Talaga nga ad-adda pay a maawatam ti kaipapanan ti teksto maipapan iti panagbalin a ‘sinursuruan ni Jehova.’ Masukog ken magugoran ti puso ken personalidad tapno ad-adda a maitunos dagita iti pagwadan ni Kristo Jesus. No ageskuelaka, daytanto ti kasayaatan a kapadasam.”—Isaias 54:13.
Dagiti Ebanghelisador, Pastor, ken Mannursuro
Dagiti nagturpos iti Ministerial Training School agserserbida ita iti 117 a pagilian. Mairaman kadagitoy dagiti isla iti Atlantico, Caribe, ken iti Pacifico ken iti kaaduan a pagilian nga addaan kadagiti sanga nga opisina dagiti Saksi ni Jehova. Ipadamag dagiti sanga nga opisina nga agminar ti nagsayaat a pannakasanay dagiti estudiante iti pamay-an ti panagebanghelio, panagipastor, ken panangisuroda. Nalalaingda itan a mangusar iti Biblia iti ministerioda gapu iti pannakasanayda. (2 Timoteo 2:15) Masansan met nga usarenda ti libro a Pannakirinnason Manipud Kadagiti Kasuratana no sungbatanda dagiti saludsod ti bumalay ken sanayenda met ti dadduma nga agibumbunannag a mangaramid iti kasta. Makaakar ti kinaregta dagiti nagraduar, ken makapabileg iti kongregasion dagiti aramidda.
Dagiti panglakayen iti kongregasion pribilehioda nga ‘ipastoran ti arban,’ a tumulongda a mangaywan iti naespirituan a kasapulan ti sabsabali. (1 Pedro 5:2, 3) Kastoy ti kinuna ti maysa a panglakayen maipapan iti urnos: “Apresiarenmi ti panangibaon ti sanga nga opisina kadagiti nagsayaat ti pannakasanayda a kakabsat a lallaki a tumulong kadakami a mangitungpal iti panangipastor iti arban ti Dios.” Kastoy met ti kinuna ti maysa a sanga nga opisina iti Adayo a Daya: “Pudno a mannakipagrikna dagiti nagraduar. Nagaget ken mararaemda iti kongregasion. Maipatpateg ken maapresiar unay ti kinapakumbaba, kinasinged, ken reggetda. Situtulokda nga agsakripisio ken maragsakanda nga umakar kadagiti kongregasion nga agkasapulan kadagiti pastor.” (Filipos 2:4) Makapagin-awa dagita a lallaki kadagiti kapamatianda ket rumbeng a makomendaranda.—1 Corinto 16:18.
Maysa pay, dagiti mannursuro iti Ministerial Training School tulonganda dagiti estudiante a mangparang-ay iti abilidadda nga agpalawag. No iyaplikarda dagiti naibalakad kadakuada, adu a nagraduar ti mabalin nga usaren kadagiti programa ti asamblea sirkito ken kombension distrito. Kinuna ti maysa a manangaywan iti sirkito a dagiti nagraduar mangtedda kadagiti “nagsayaat a palawag ken babaen iti nalaing a panagrason iyaplikarda ti material.”—1 Timoteo 4:13.
Dakkel ti rinang-ayan ti panangisuro kadagiti gimong ti kongregasion iti maysa a pagilian iti Africa idi naaramid ti Ministerial Training School sadiay ken nadutokan dagiti nagraduar tapno agserbida iti tay-ak. Dagiti naibaon a panglakayen a nagturpos iti eskuelaan tumulongda iti panagebanghelio, panagipastor, ken panangisuro, isu a dagiti kongregasion mapabilegda iti naespirituan.—Efeso 4:8, 11, 12.
Simmayaat a Panangiwanwan iti Kongregasion
Iti adu lugar, kasapulan ti kanayonan a panglakayen ken ministerial nga adipen. Awan koma ti panglakayen iti sumagmamano a kongregasion no awan ti naibaon a nagturpos iti Ministerial Training School. Isu nga adu a nagraduar ti naibaon nga agserbi kadagiti lugar nga addaan iti kasta a panagkasapulan.
Impadamag ti adu a sanga nga opisina a dagitoy a lallaki “kabesadoda dagiti urnos ti organisasion,” “seriosoda kadagiti rebbengenda,” “tulonganda ti dadduma a mangapresiar ken mangraem iti organisasion ni Jehova,” ken “tumulongda a mangparayray iti kinabara ken espiritualidad ti kongregasionda.” Ti makagapu ket dagiti nagraduar iti dayta nga eskuelaan an-annurotenda dagiti linaon ti Sao ti Dios ken saanda nga agpannuray iti bukodda a pannakaawat wenno agpakpakalaing laeng. (Proverbio 3:5-7) Dagita a lallaki agbalinda a naespirituan a sagut kadagiti kongregasion a nakaitudinganda.
Panagserbi Kadagiti Naiputputong a Teritoria
Dagiti nagraduar a natudingan kas special pioneer tumultulongda kadagiti naiputputong a grupo tapno agbalin dagitoy a kongregasion. Kastoy ti kinuna ti maysa a panglakayen iti nasulinek a lugar iti Guatemala idi inyebkasna ti panangapresiar iti tulongda: “Iti 20 a tawen madanaganak no kasano a mawanas ken maaywanan daytoy naglawaan a teritoria. Masansan nga ikarkararagko dayta. Dagiti kakabsat a lallaki a nagturpos iti Ministerial Training School nagsayaat ti pannakasanayda nga agpalawag ken mangtaming kadagiti bambanag mainaig iti organisasion, ket agyamanak ta ti lugarmi maipapaayanen iti naayat a pannakaasikaso.”
Nasursuro met dagiti nagraduar no kasano ti agbalin nga epektibo kadagiti nakaad-adayo a nagduduma a bario, a madanonda babaen ti panagdaliasat kadagiti kabambantayan. Sadiay, dagus a mangbuangay ken mangorganisarda kadagiti naiputputong a grupo, banag a di maaramidan ti dadduma. Kas pagarigan, maysa a panglakayen iti Niger ti nagkiddaw iti tulong dagiti nagraduar ta ammona a dakkel ti maitulongda iti teritoria a pagnanaedanna. Dagiti di naasawaan nga special pioneer ken manangaywan iti sirkito mabalin a saanda unay a marigatan nga agserbi nangnangruna kadagiti nasulinek a lugar. Kas ken apostol Pablo, sarangtenda ‘dagiti peggad iti karkarayan ken kadagiti tulisan, peggad idiay let-ang,’ personal a pakarigatan, agraman ti panangidandanag kadagiti kongregasion a pagserserbianda.—2 Corinto 11:26-28.
Magunggonaan Dagiti Agtutubo
Iparparegta ti Kasuratan kadagiti agtutubo a lagipenda ti Namarsua kadakuada. (Eclesiastes 12:1) Dagiti naregta a nagturpos iti Ministerial Training School nagsayaatda nga ulidan kadagiti Kristiano nga agtutubo. Idi simmangpet ti dua a nagraduar iti maysa a kongregasion idiay Estados Unidos, nagdoble ti kaadu ti oras a busbosen dagiti kakabsat iti ministerio. Kasta met, immadu ti bilang dagiti regular payunir, wenno amin tiempo a manangiwaragawag iti Pagarian, manipud 2 agingga iti 11. Kasta ti mapaspasamak iti adu a kongregasion.
Dagiti nagraduar parparegtaenda met dagiti ub-ubing a lallaki nga aramidenda a kalat ti ageskuela iti Ministerial Training School. Daytoy ti nanggutugot iti dadduma nga ikagumaanda a gun-oden dayta a pribilehio no saanda pay nga agserserbi a ministerial nga adipen. Ti sanga nga opisina iti Netherlands ibilangna dagiti nagturpos iti Ministerial Training School kas “pagwadan kadagiti agtutubo a lallaki a mangpampanunot no ania ti aramidenda iti biagda.”
Panagserbi Kadagiti Kongregasion nga Agus-usar iti Ganggannaet a Pagsasao
Rumangrang-ay ti panangikagumaan a mangikasaba iti naimbag a damag iti bukodda a pagsasao iti adu a pagilian. Masansan a dagiti nagturpos iti Ministerial Training School agsursuroda iti dadduma a pagsasao ken agserbida kadagiti teritoria nga aduan kadagiti imigrante. Kas pagarigan, idiay Belgium, masapul dagiti mangaskasaba iti Pagarian iti pagsasao dagiti taga-Albania, Persia, ken Russia.
Dagiti kongregasion ken grupo idiay Britania, Alemania, Italia, Mexico, ti Estados Unidos ken dadduma pay a pagilian nga agus-usar iti ganggannaet a pagsasao nagunggonaandan kadagiti agdaldaliasat a manangaywan, panglakayen, ken ministerial nga adipen a nagturpos iti Ministerial Training School. Sigun iti sanga nga opisina iti Korea, “dagiti nasurok a 200 a nagraduar dakkel ti maitultulongda kadagiti kongregasion ken grupo nga agus-usar iti ganggannaet a pagsasao.”
Sipapakumbaba a Panagserbi iti Dadduma a Rebbengen
Malaksid iti panagserbida kadagiti grupo ken kongregasion nga agus-usar iti ganggannaet a pagsasao, dagiti nagturpos iti Ministerial Training School agserserbida met a panglakayen, ministerial nga adipen, ken agdaldaliasat a manangaywan. Dadduma ti naidestino kadagiti sabsabali a pagilian, a nalabit tumulong iti pakasapulan ti Service Department iti sanga nga opisina. Dagidiay nalaing iti konstruksion tumulongda met nga agibangon kadagiti Kingdom Hall.
Gapu iti iyaadu dagiti kongregasion ken sirkito iti intero a lubong, kanayon a kasapulan ti ad-adu nga agdaldaliasat a manangaywan. Tapno maipaay daytoy a pakasapulan, adda dagiti mapili kadagiti nagturpos iti Ministerial Training School tapno masanay iti sangapulo a lawas iti trabaho a panagdaliasat ken agserbida kas kasuno wenno regular a manangaywan iti sirkito. Agarup 1,300 a nagraduar ti agserserbi itan kas agdaldaliasat a manangaywan iti 97 a pagilian. Iti maysa a pagilian ti Africa, 55 porsiento kadagiti agdaldaliasat a manangaywan ti nagturpos iti Ministerial Training School. Iti sabali pay a pagilian ti Africa, 70 porsiento ti agserserbi kas agdaldaliasat a manangaywan.
Idiay Australia, Canada, Europa, ti Adayo a Daya, ken ti Estados Unidos, adu a nagturpos iti eskuelaan ti naibaon a mangtaming iti partikular a pakasapulan iti dadduma a pagilian. Gapu iti daytoy, sagsagrapen ti intero a lubong dagiti gunggona manipud iti eskuelaan.
Babaen ti Anakna a ni Jesu-Kristo, nangpataud ni Jehova kadagiti ebanghelisador, mangipastor, mannursuro, ken dadduma pay a tumulong a mangparang-ay kadagiti interes ti Pagarian kadagiti maudi nga al-aldaw. Manamnama pay kadi nga umadu ti bilang ti ili ti Dios? Sigurado! Isu a kanayon a masapul nga ikagumaan dagiti dedikado a lallaki a gun-oden ti ad-adu pay a rebbengen. (Isaias 60:22; 1 Timoteo 3:1, 13) Babaen ti Ministerial Training School, ad-adda a makabalan dagiti panglakayen ken ministerial nga adipen tapno mapalawada ti ministerioda, ket magunggonaanda a mismo ken ti sabsabali iti intero a lubong.
[Footnote]
a Impablaak dagiti Saksi ni Jehova.
[Dagiti Ladawan iti panid 10]
Itantandudo ti Ministerial Training School dagiti interes ti Pagarian iti intero a lubong
[Dagiti Ladawan iti panid 13]
Tarigagayam kadi ti ageskuela iti Ministerial Training School ken tumulong iti sabsabali kalpasanna?