Ministerial Training School—Dakkel a Ruangan a Mangiturong iti Panagaramid
1 Babaen ken ni propeta Jeremias, impadto ni Jehova: “Mangibangonakto [iti ilik] iti papastor a pudno a mangipastorto kadakuada; ket saandanton nga agbuteng, saandanto met a makabil iti aniaman a panagaligaget, ket awanto ti mapukpukaw.” (Jer. 23:4) Maar-aramid ita ti kasta a panangipastor kadagiti tattao iti amin a nasion. Ar-aramiden daytoy dagiti pinullo a ribu a panglakayen iti kongregasion. Kanayonanna, kas kaadu ti linnaaw dagiti agtutubo a lallaki a situtulok nga agserserbi ken ni Jehova. (Sal. 110:3) Anian a bendision dagitoy a napakumbaba a kakabsat kadagiti kongregasion dagiti adipen ti Dios! Bayat nga agtultuloy ti naespirituan a trabaho a panagurnong, kasapulan pay laeng dagiti kualipikado a lallaki a sisasagana nga agserbi kadagiti kakabsatda.
2 Ti Ministerial Training School ket maysa a nagsayaat nga urnos a pakasanayan dagiti agsolsolo a panglakayen ken ministerial nga adipen para kadagiti kanayonan a responsabilidad. Nasuroken a 22,000 nga estudiante a naggapu iti agarup 140 a pagilian ti naipaayan iti kastoy a pannakasanay iti 999 a klase a naangay manipud idi nairugi ti eskuelaan idi 1987. Manipud idi 1994, 40 a klase ti naangayen iti Pilipinas, ket 1,037 nga estudiante ti nakapagturposen. Nupay awan pay dagiti maang-angay a klase gapu ta madama ti Traveling Overseers School, manamnama nga aglukatto manen dagiti klase iti Pilipinas inton Enero, 2006. Para kadagiti nagturposen, pudno a ti eskuelaan ket “maysa a dakkel a ruangan a mangiturong iti panagaramid.”—1 Cor. 16:9.
3 Ti Panggep ti Eskuelaan: Panggep ti Ministerial Training School a sanayen ken isagana dagiti kualipikado a lallaki maipaay kadagiti responsabilidad kaanoman nga adda panagkasapulan iti organisasion. Pasayaaten ti eskuelaan ti abilidadda a mangidaulo iti trabaho a panagebanghelio, mangipastor iti arban, ken mangisuro iti kongregasion. Kalpasan ti panagturposda, matudingan dagiti dadduma nga estudiante kas special pioneer wenno agdaldaliasat a manangaywan iti mismo a pagilianda wenno iti ballasiw-taaw. Adda met dagidiay matudingan nga agserbi kadagiti mismo a kongregasionda wenno kadagiti lugar a dakdakkel ti panagkasapulan iti teritoria a masakupan ti sanga.
4 Iti walo a lawas a panageskuela dagiti estudiante, adalenda a naimbag ti Biblia. Usigenda a nasayaat dagiti adu a nagduduma a sursuro ti Biblia agraman dagiti rebbengenda kas papastor ken dagiti pagannurotan iti panangtaming kadagiti parikut iti Nakristianuan a panagbiag. Adalenda met ti isursuro ti Kasuratan maipapan kadagiti administratibo, hudisial, ken organisasional a banag. Umawatda iti naisangsangayan a panagsanay iti panagpalawag iti publiko ken maipaayanda iti personal a tulong a mangpapardas iti naespirituan nga irarang-ayda.
5 Dagiti Kualipikasion: Siempre, nangato dagiti kualipikasion para kadagiti maawis nga ageskuela. Dagiti agaplay ket masapul a saan a nababbaba ngem dua a tawen nga agserserbin kas panglakayen wenno ministerial nga adipen. Masapul a bin-ig nga awan pay asawada ken agtawenda iti nagbaetan ti 23 ken 50. Masapul a makabasa, makasurat, ken ammoda ti pagsasao a mausar iti klase, ken masapul a nasalun-atda, a saan nga agkasapulan iti naisangsangayan a pannakaaywan wenno taraon. Maipangpangruna a mapili dagidiay agserserbi kas regular pioneer.
6 Dagiti agboluntario masapul a situtulok ken kabaelanda ti agserbi iti sadinoman a pakasapulan kadakuada. Nasken nga adda kadakuada ti kababalin ni propeta Isaias a sigagagar ken sisasagana a mangaramid iti naisangsangayan a trabaho, a kunkunana: “Adtoyak! Ibaonnak.” (Isa. 6:8) Impakitana met ti kinapakumbaba iti unos ti panagbiagna. Ti rumbeng a manggutugot kadagidiay agngayangay nga ageskuela iti Ministerial Training School ket ti panagayat kadagiti kakabsatda ken ti panagtarigagay nga agserbi kadakuada, imbes a ti panagtarigagay a lumatak wenno maaddaan iti naisangsangayan a saad. Kalpasan ti panangawatda iti kasta a nagsayaat a panagsanay, manamnama kadagiti nagturpos nga ipakatda ti nasursuroda nga agpaay iti pagimbagan dagiti dadduma.—Luc. 12:48.
7 Dagiti Gunggona: Iti walo a lawas a nainget a panagsanayda, ‘mataraonan dagiti nagturpos iti sasao ti pammati ken iti nasayaat a sursuro.’ (1 Tim. 4:6) Daytoy ti mangisagana kadakuada a tumulong ken mangparegta kadagiti dadduma kadagiti kongregasion ken sirkito a pakaitudinganda. Iti adu a lugar a nakaibaonan dagiti nagturpos iti Ministerial Training School, rimmang-ay ti trabaho iti tay-ak; maiparparegta ti panagpayunir, nangruna kadagiti agtutubo; ken maipapaayan iti ad-adu a personal nga atension dagiti adu a kabbaro a makitimtimpuyog iti ili ti Dios.
8 Maysaka kadi nga agsolsolo a panglakayen wenno ministerial nga adipen nga agtawen iti nagbaetan ti 23 ken 50? Apay a dimo padasen ti agaplay iti Ministerial Training School? Maysaka kadi nga agkabannuag a kabsat a lalaki a mangpampanunot kadagiti masanguanan a kalatmo iti panagserbim ken ni Jehova? Apay a dimo pagbalinen a simple ti biagmo ken nawaya kadagiti pakasingaan tapno makastrekka iti daytoy “dakkel a ruangan a mangiturong iti panagaramid”? Dakkel a rag-o ken pannakapnek ti mabalin nga itden dayta kenka. Wen, makagunggona ti Ministerial Training School saan laeng a kadagiti nagturpos iti dayta nga eskuelaan no di ket kadagiti kongregasion dagiti adipen ti Dios iti intero a lubong.
[Kahon iti panid 3]
No Kasano a Nagunggonaanda iti Panagsanayda
“Ti panagsanayko pudno a pinasayaatna ti ministeriok ken ti panangipastorko buyogen ti sirib, nga us-usarek ti Kasuratan.”
“Ti panageskuelak ninayonanna ti kompiansak a mangtaming iti nadumaduma a rebbengek iti kongregasion.”
“Binaliwanna ti gistay amin nga aspeto ti biagko, agraman ti panangmatmatko iti teokrasia ken iti organisasion ti Dios.”
“Ti panagsanayko tinulongannak a mangbigbig a nasken a madadaanak nga agserbi iti sadinoman nga adda panagkasapulan.”