Apay a Masapul a Mailasintayo ti Antikristo?

Nabayagen nga insurat ti napaltiingan nga apostol: “Nangngegyo nga umay ti antikristo.” (1 Juan 2:18) Talaga a mamagpanunot dagita a sasao! Adun a siglo a pampanunoten dagiti tattao ti kaipapanan dagitoy. Siasino ti antikristo? Kaano nga umay? Ania ti aramidenna inton umay?

ADU idi dagiti naibilang nga antikristo. Iti napalabas, naibilang nga “antikristo” dagiti Judio, dagiti papa ti Katoliko, ken dagiti emperador ti Roma. Kas pagarigan, idi inkeddeng ni Emperador Frederick II (1194-1250) ti saan a sumurot iti maysa a Krusada ti simbaan, isu ket inlaksid ken inawagan ni Papa Gregory IX kas ti antikristo. Ti simmuno ken ni Gregory a ni Innocent IV inlaksidna met ni Frederick. Sinungbatan dayta ni Frederick babaen ti panangibagana a ni Innocent ti antikristo.

Ni laeng apostol Juan ti mannurat iti Biblia a nangusar iti sao nga “antikristo.” Iti dua a surat a naipanagan kenkuana, naminlima a nagparang dayta a sao. Agpadpada a nausar ti termino a mangtukoy iti maysa a tao (singular) ken iti adu a tattao (plural). Iti sumaganad a panid, nakalista iti kahon dagiti bersikulo a nagparangan ti sao. Kadagitoy a bersikulo, makitatayo a naulbod ken manangallilaw ti antikristo, gandatna a dadaelen ti relasion ti maysa a tao ken ni Kristo ken iti Dios. Gapuna, indagadag ti apostol kadagiti padana a Kristiano: “Dungdungnguen, saanyo a patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios, agsipud ta adu nga ulbod a mammadto ti nakastrek ditoy lubong.”​—1 Juan 4:1.

Namakdaar met ni Jesus maibusor kadagiti manangallilaw, wenno ulbod a mammadto, a kunkunana: ‘Dagitoy umayda kadakayo iti kawes ti karnero, ngem iti uneg loboda a narawet. Babaen kadagiti bunga wenno aramidda mailasinyonto ida.’ (Mateo 7:15, 16) Pakpakdaaran met kadi ni Jesus dagiti pasurotna maibusor iti piguratibo nga antikristo? Kitaentayo no kasano a mailasintayo daytoy nadamsak a manangallilaw.