Kaano nga Umay ti Pagarian ti Dios?
“APO, isublim kadi ti pagarian iti Israel iti daytoy a tiempo?” (Aramid 1:6) Magagaran dagiti apostol a mangammo no kaano nga ipasdek ni Jesus ti Pagarianna. Nupay agarup 2,000 a tawenen ti napalabas, kaskasdi a magagaran dagiti tattao a mangammo no kaano nga umay ti Pagarian ti Dios.
Yantangay ti Pagarian ti tema ti panangasaba ni Jesus, nalabit pampanunotenyo a sinungbatanna la ketdi dayta a saludsod. Ket kasta a talaga ti inaramidna! Namin-adu a dinakamatna ti maipapan iti espesipiko a tiempo nga inawaganna iti ‘kaaddana.’ (Mateo 24:37) Dayta a kaadda ket nainaig unay iti pannakaipasdek ti Mesianiko a Pagarian. Ania dayta a kaadda? Usigentayo ti uppat a kinapudno nga impalgak ti Biblia maipapan iti kaadda ni Kristo.
1. Ti kaadda ni Kristo ket mangrugi kalpasan ti naunday a tiempo manipud iti ipapatayna. Nangted ni Jesus iti pangngarig a sadiay inyaspingna ti bagina iti maysa a lalaki a “nagdaliasat iti adayo a daga tapno gumun-od iti naarian a pannakabalin.” (Lucas 19:12) Kasano a natungpal dayta a naimpadtuan a pangngarig? Bueno, natay ken napagungar ni Jesus; sa nagdaliasat iti “adayo a daga,” kayatna a sawen idiay langit. Kas impadto ni Jesus iti umasping a pangngarig, napasamak ti panagsublina iti naarian a pannakabalin “kalpasan ti nabayag a tiempo.”—Mateo 25:19.
Sumagmamano a tawen kalpasan ti iyuuli ni Jesus idiay langit, insurat ni apostol Pablo: “Daytoy a tao [a ni Jesus] indatonna iti agnanayonen ti maysa a sakripisio a maipaay kadagiti basol ket nagtugaw iti makannawan ti Dios, nanipud idin agur-uray agingga a dagiti kabusorna maikabilda a pagbatayan dagiti sakana.” (Hebreo 10:12, 13) No kasta, kalpasan ti iyuulina idiay langit, naguray pay ni Jesus iti napaut a tiempo. Ti panaguray ket nagpatingga kamaudiananna idi a ni Jehova a Dios pinagbalinna ti Anakna kas Ari iti nabayagen a naikari a Mesianiko a Pagarian. Dayta ti nangrugian ti kaadda ni Kristo. Nakita kadi dagiti tattao ditoy daga dayta a makapagagar a pasamak?
2. Ti kaaddana ket saan a makita dagiti tattao. Laglagipenyo nga insalaysay ni Jesus ti pagilasinan ti kaaddana. (Mateo 24:3) No ti kaaddana ket makita dagiti tattao, kasapulan pay la kadi ti pagilasinan? Kas panangyilustrar: Darepdepenyo nga agbibiahekayo a mapan idiay baybay. Mabalin a makitayo dagiti karatula iti dalan a mangitunda kadakayo iti direksion a turongenyo. Ngem apaman nga addakayon iti aplaya a mangbuybuya iti kasla awan pagpatinggaanna a danum iti nagtugmokan ti langit ken daga, namnamaenyo pay la kadi a makakitakayo iti karatula a “Baybay”? Siempre saan! Kasapulan pay kadi ti karatula para iti banag a kitkitaenyon?
Dineskribir ni Jesus ti pagilasinan ti kaaddana, saan a tapno ipaganetget a makita dayta dagiti tattao babaen kadagiti mismo a matada, no di ket tapno tulonganna ida a mangamiris iti mapasamakto idiay langit. Isu a kinuna ni Jesus: “Ti pagarian ti Dios saan nga umay a buyogen ti nakadkadlaw a pannakapaliiw.” (Lucas 17:20) Kasano ngarud a mailasin dagiti adda ditoy daga a nangrugin ti kaadda ni Kristo?
3. Ti kaadda ni Jesus ket mailasin babaen iti tiempo dagiti nakaro a parikut ditoy daga. Kinuna ni Jesus a ti kaaddana kas Ari idiay langit ket mailasin ditoy daga babaen kadagiti gubat, bisin, ginggined, angol, ken kinadakes. (Mateo 24:7-12; Lucas 21:10, 11) Ania ti makagapu kadagitoy a panagsagaba? Ilawlawag ti Biblia a “ti agturay iti daytoy a lubong” a ni Satanas ket makapungtot unay agsipud ta ammona a nakaab-ababan ti tiempona ita ta nangrugin ti kaadda ni Kristo kas Ari. (Juan 12:31; Apocalipsis 12:9, 12) Masaksaksiantayo itan ti nakaad-adu nga ebidensia a makapungpungtot ni Satanas ken nangrugin ti kaadda ni Kristo. Bimmatad dagita nga ebidensia iti awan pay kaaspingna a kasaknap iti intero a lubong nangruna sipud idi 1914, ti tawen nga ibagbaga dagiti historiador a nangtanda iti dakkel a panagbalbaliw ti kasasaad ti intero a sangatauan.
Kasla agparang a dakes a damag amin dayta, ngem saan a kasta. Kaipapananna laeng a ti Mesianiko a Pagarian ket agturturayen idiay langit. Iti mabiiten, dayta a gobierno iturayannanton ti intero a daga. Kasano ngarud a maammuan dagiti tattao ti maipapan iti dayta a Pagarian tapno akseptarenda ti panangiturayna ken agbalinda nga iturayanna?
4. Ti kaadda ni Jesus ket mailasin babaen ti sangalubongan a trabaho a panangasaba. Imbaga ni Jesus a ti kaaddana ket kas idi “kaaldawan ni Noe.”a (Mateo 24:37-39) Ni Noe ket saan laeng a nagaramid iti daong no di ket maysa met a “manangaskasaba iti kinalinteg.” (2 Pedro 2:5) Pinakdaaran ni Noe dagiti tattao nga asideg idin a mangukom ti Dios. Imbaga ni Jesus a dagiti pasurotna ditoy daga ket mangaramid iti umasping a panangpakdaar bayat ti kaaddana. Impadtona: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”—Mateo 24:14.
Kas nakitatayo iti immuna nga artikulo, dadaelento ti Pagarian ti Dios ti amin a gobierno ditoy lubong. Babaen ti trabaho a panangasaba, maipakpakaammo kadagiti tattao nga asidegen nga agtignay daytoy a nailangitan a gobierno, isu nga amin ket addaan iti gundaway a makalasat iti umad-adanin a pannakadadael ken agbalinda nga iturayan dayta a Pagarian. Ti ngarud napateg a saludsod ket, Ania ti aramidenyo?
Naimbag a Damag Kadi Kadakayo ti Pagarian ti Dios?
Ti mensahe nga inkasaba ni Jesus ket maysa a namnama nga awan kaaspingna. Kalpasan ti iyaalsa idiay Eden rinibu a tawenen ti napalabas, panggep ni Jehova a Dios ti mangipasdek iti maysa a gobierno a mangilinteg kadagiti bambanag, a mangisubli kadagiti matalek a tattao iti kasasaad a maitunos iti pagayatanna kadakuada sipud idi damo—ti panagbiagda nga agnanayon iti paraiso a daga. Ania pay koma ti ad-adda a makaparagsak ngem iti pannakaammo a madaman nga agturturay idiay langit daytoy nabayagen a naikari a gobierno? Saan a nalibeg ken narigat a maawatan dayta no di ket maysa a kinapudno a nabatad ken napaypayso!
Ti Ari a pinulotan ti Dios ket madaman nga agturturay iti tengnga dagiti kabusorna. (Salmo 110:2) Iti daytoy dakes a lubong a naisina iti Dios, tungtungpalenen ti Mesias ti pagayatan ni Amana a mangbirok kadagiti amin a mayat a mangammo iti pudno a Dios ken agdayaw kenkuana “buyogen ti espiritu ken kinapudno.” (Juan 4:24) Ti namnama nga agbiag nga agnanayon iti sidong ti Pagarian ti Dios ket mabalin a magun-odan dagiti tattao iti amin a puli, edad, ken kasasaad iti kagimongan. (Aramid 10:34, 35) Parparegtaendakayo nga awatenyo ti nagsayaat a gundaway a mayaw-awis kadakayo. Ammuenyo itan ti maipapan iti Pagarian ti Dios, tapno mabalinyonto a tagiragsaken ti agbiag iti sidong ti nalinteg a turayna iti agnanayon!—1 Juan 2:17.
[Footnote]
a Makatulong ti kinuna ni Jesus tapno makorehir ti palso a kapanunotan maipapan iti sao a “kaadda” gapu iti di umiso a panangipatarus ti dadduma a bersion ti Biblia. Dadduma a patarus ti nangipaulog iti dayta kas “iyaay,” “panangrugi,” wenno “panagsubli,” nga amin dagita ket mangipasimudaag iti apagbiit a pasamak. Ngem paliiwenyo ta saan nga inyasping ni Jesus ti kaaddana iti Layus idi kaaldawan ni Noe kas maysa a pasamak, no di ket inyaspingna dayta kadagiti “kaaldawan ni Noe” kas maysa a makapagagar a periodo ti tiempo. Kas iti dayta a nagkauna a periodo ti tiempo, ti kaadda ni Kristo ket maysa a tiempo a kabayatan dayta, dagiti tattao ket makumikom unay kadagiti inaldaw nga aramidda isu a dida inkankano ti pakdaar.
[Dagiti Ladawan iti panid 8, 9]
Dagiti dakes a damag nga inaldaw a mangmangngegtayo ti mangpaneknek nga asidegen a dumteng dagiti agkakaimbag a banag
[Credit Line]
Paltog maibusor kadagiti rumaut nga eroplano: Rinetrato ti U.S. Army