Jesu-Kristo​—Ti Kangrunaan a Misionero

“Maysaak a pannakabagi manipud kenkuana, ket Daydiay imbaonnak.”​—JUAN 7:29.

1, 2. Ania ti misionero, ken asino ti kangrunaan a Misionero?

ANIA ti malagipyo no mangngegyo ti sao a “misionero”? Ti dadduma malagipda dagiti misionero iti Kakristianuan, nga adu kadagitoy ti makibibiang iti politika ken ekonomia kadagiti pagilian a nakaibaonanda. Ngem kas maysa kadagiti Saksi ni Jehova, mabalin a mapanunotyo dagiti misionero nga imbaon ti Bagi a Manarawidwid a mangikasaba iti naimbag a damag iti nadumaduma a pagilian iti intero a lubong. (Mat. 24:14) Situtulok nga us-usaren dagitoy a misionero ti tiempo ken pigsada iti nadayaw a trabaho a panangtulong kadagiti tattao nga umadani ken Jehova a Dios ken maaddaan iti naisangsangayan a relasion kenkuana.​—Sant. 4:8.

² Saan nga agparang ti sao a “misionero” kadagiti teksto ti Baro a Lubong a Patarus ti Nasantuan a Kasuratan. Nupay kasta, ti Griego a termino a nagtaudan ti sao a “managebanghelio” a nausar iti Efeso 4:11 ket mabalin met a maipatarus kas “misionero.” Ni Jehova ti kangrunaan a Managebanghelio, ngem saan a maawagan a kangrunaan a Misionero gapu ta awan ti nangibaon kenkuana. Kinuna ni Jesu-Kristo maipapan iti nailangitan nga Amana: “Maysaak a pannakabagi manipud kenkuana, ket Daydiay imbaonnak.” (Juan 7:29) Gapu iti kasta unay a panagayatna iti sangatauan, imbaon ni Jehova ti bugbugtong nga Anakna ditoy daga. (Juan 3:16) Maawagan ni Jesus a kangrunaan a Misionero, ti kasayaatan a Misionero, agsipud ta ti maysa kadagiti rason a naibaon ditoy daga ket tapno ‘saksianna ti kinapudno.’ (Juan 18:37) Naan-anay a naballigi ti panangiwaragawagna iti naimbag a damag ti Pagarian, ken agingga ita, makagunggona kadatayo ti ministeriona. Kas pagarigan, mabalintayo a tuladen ti pamay-an ti panangisurona no mangaskasabatayo, misionerotayo man wenno saan.

3. Ania dagiti saludsod nga usigentayo?

³ Mainaig iti akem ni Jesus kas manangiwaragawag iti Pagarian, mabalin a maisaludsodtayo: Ania ti napasaran ni Jesus bayat ti ministeriona ditoy daga? Apay nga epektibo ti panangisurona? Apay a naballigi ti ministeriona?

Sidadaan a Makibagay iti Baro nga Aglawlaw

4-6. Ania dagiti panagbalbaliw nga inaramid ni Jesus idi naibaon ditoy daga?

⁴ Dagiti misionero iti kaaldawantayo ken ti dadduma a Kristiano nga immakar kadagiti lugar a dakdakkel ti panagkasapulan kadagiti agibumbunannag iti Pagarian masapul a makibagayda iti panagbiag a narigrigat ngem iti nakairuamanda. Ngem no maipapan ken Jesus, narigrigat nga amang ti napasaranna. Sakbay a nagbalin a tao, isu ket nakipagtaeng ken Amana idiay langit iti tengnga dagiti anghel a napudno nga agserserbi ken Jehova. (Job 38:7) Ngem idi immay ditoy daga, masapul nga agbiag ni Jesus iti tengnga dagiti managbasol a tattao! (Mar. 7:20-23) Ken masapul nga an-anusanna dagiti nasinged nga adalanna no agsasalisalda. (Luc. 20:46; 22:24) Nupay kasta, nagsayaat ti panangtamingna kadagiti amin a bambanag a napasaranna ditoy daga.

⁵ Saan a milagro lattan a nakapagsao ni Jesus iti lenguahe ti tao; nasursurona dayta manipud iti kinamaladagana. Nagdakkel a panagbalbaliw dayta no idilig iti posisionna kas panguluen dagiti anghel idiay langit! Ditoy daga, sigurado a lenguahe ti tao ti inusar ni Jesus. Naiduma unay dayta iti lenguahe wenno ‘pagsasao dagiti anghel.’ (1 Cor. 13:1) Ngem awan a pulos ti tao a nakatulad iti makaay-ayo a panagsasao ni Jesus.​—Luc. 4:22.

⁶ Usigenyo ti dadduma pay a dakkel a panagbalbaliw nga inaramid ti Anak ti Dios idi immay ditoy daga. Nupay saan a natawid ni Jesus ti basol manipud ken Adan, napadasanna ti agbiag a kas tao, kas kadagidiay agbalinto a “kakabsatna,” wenno napulotan a pasurotna. (Basaenyo ti Hebreo 2:17, 18.) Iti maudi a rabiina ditoy daga kas tao, saan a kiniddaw ni Jesus iti nailangitan nga Amana a mangibaon iti “nasurok a sangapulo ket dua a lehion dagiti anghel.” Ngem panunotenyo laengen dagiti anghel nga iturturayanna kas Miguel nga Arkanghel! (Mat. 26:53; Jud. 9) Pudno, nagaramid ni Jesus kadagiti milagro; ngem limitado laeng dagiti inaramidna ditoy daga no idilig kadagiti mabalin a maaramidanna koma idiay langit.

7. Kasano a nagtignay dagiti Judio mainaig iti Linteg?

⁷ Bayat ti panagbiagna kas “ti Sao” sakbay a nagbalin a tao, mabalin a ni Jesus daydiay Pannakangiwat ti Dios a nangiwanwan kadagiti Israelita iti let-ang. (Juan 1:1; Ex. 23:20-23) ‘Inawatda ti Linteg kas inyallatiw dagiti anghel ngem saanda a sinalimetmetan dayta.’ (Ara. 7:53; Heb. 2:2, 3) Kinapudnona, dagiti Judio a pangulo ti relihion idi umuna a siglo saanda a naawatan ti pudno a panggep ti Linteg. Kas pagarigan, usigenyo ti linteg ti Sabbath. (Basaenyo ti Marcos 3:4-6.) Dagiti eskriba ken Fariseo ‘saanda nga inkankano ti nadagdagsen a bambanag iti Linteg, nga awan sabali, ti kinahustisia ken asi ken kinamatalek.’ (Mat. 23:23) Nupay kasta, saan a simmuko ken simmardeng ni Jesus a nangiwaragawag iti kinapudno.

8. Apay a kabaelannatayo a tulongan ni Jesus?

⁸ Gapu iti panagayat ni Jesus kadagiti tattao, natignay ken sidadaan a tinulonganna ida. Saan a bimmaaw ti regtana kas ebanghelisador. Ken gapu ta matalek kenni Jehova idi adda ditoy daga, ni Jesus ti pakaigapuan ti “agnanayon a pannakaisalakan dagidiay amin nga agtultulnog kenkuana.” Kasta met, “gapu ta isu nagsagaba idi masubsubok, kabaelanna ti bumadang kadagidiay [kas kadatayo a] masubsubok.”​—Heb. 2:18; 5:8, 9.

Nasayaat ti Pannakasanayna Kas Mannursuro

9, 10. Ania a pannakasanay ti nagun-odan ni Jesus sakbay a naibaon ditoy daga?

⁹ Sakbay a maibaon kas misionero dagiti Kristiano iti kaaldawantayo, iyurnos ti Bagi a Manarawidwid ti pannakasanayda. Nagsanay met kadi ni Jesu-Kristo? Wen, ngem saan a nagadal kadagiti eskuelaan dagiti narelihiosuan a panguluen dagiti Judio sakbay a napulotan kas Mesias; saan met nga insuro dagiti nalatak a lider ti relihion. (Juan 7:15; idiligyo ti Aramid 22:3.) Apay ngarud a kualipikado unay ni Jesus a mangisuro?

¹⁰ Aniaman ti nasursuro ni Jesus iti inana a ni Maria ken iti pannakaamana a ni Jose, nagun-odanna ti kapatgan a pannakasanayna iti ministerio manipud iti katan-okan a Mannursuro. Kinuna ni Jesus maipapan iti daytoy: “Saanak a nagsao iti bukodko a pannakatignay, no di ket ti met laeng Ama a nangibaon kaniak inikkannak iti bilin maipapan iti ibagak ken iti sawek.” (Juan 12:49) Imutektekanyo ta naikkan ni Jesus iti espesipiko a bilin no ania ti isurona. Sakbay nga immay ditoy daga, awan duadua nga adu a tiempo ti binusbos ni Jesus a nagimdeng kadagiti instruksion ni Amana. Nagun-odna la ketdi ti kasayaatan a pannakasanay!

11. Kasano nga imparangarang ni Jesus ti wagas ti pannakilangen ni Amana iti sangatauan?

¹¹ Sipud idi naparsua, nakasingsinged ni Jesus iti Amana. Sakbay a nagbalin a tao, naawatanna no ania ti panangmatmat ti Dios kadagiti tattao babaen ti panangpaliiwna iti pannakilangen ni Jehova kadakuada. Inayatna dagiti tattao a kas iti panangayat kadakuada ni Amana. Gapuna, kas personipikasion ti sirib, maikunana: “Ti bambanag a pakaay-ayatak [ket] mainaig iti annak ti tattao.”​—Prov. 8:22, 31.

12, 13. (a) Ania ti nasursuro ni Jesus iti panangpaliiwna iti pannakilangen ni Amana kadagiti Israelita? (b) Kasano nga inusar ni Jesus ti nagun-odanna a pannakasanay?

¹² Ti pannakasanay ni Jesus ramanenna met ti panangpaliiwna no kasano a tinaming ni Amana dagiti narigat a kasasaad. Kas pagarigan, usigenyo ti pannakilangen ni Jehova kadagiti nasukir nga Israelita. Kuna ti Nehemias 9:28: “Apaman nga agin-inanadan, aramidenda manen no ania ti dakes iti sanguanam [Jehova], ket baybay-am ida iti ima dagiti kabusorda, a mangibaddebaddek kadakuada. Kalpasanna agsublida ken umasugda kenka maipaay iti tulong, ket sika met laeng dumngegka manipud iti mismo a langlangit ket ispalem ida maitunos iti naruay nga asim, a maulit-ulit.” Babaen iti pannakipagtrabaho ken panangpaliiwna ken Jehova, naaddaan met ni Jesus iti kasta a pannakipagrikna kadagiti tattao iti teritoriana.​—Juan 5:19.

¹³ Inyaplikar ni Jesus daytoy a pannakasanay babaen ti naasi a pannakilangenna kadagiti adalanna. Iti rabii sakbay ti ipapatayna, isu ket ‘binaybay-an ken pinanawan dagiti amin nga apostol’ nga inay-ayatna unay. (Mat. 26:56; Juan 13:1) Namitlo pay ketdi nga inlibak ni apostol Pedro! Nupay kasta, saan a naawanan iti namnama nga agsubli kenkuana dagiti apostolna. Imbagana ken Pedro: “Immararawakon maipaay kenka tapno saan nga agkapuy ti pammatim; ket sika, apaman a nakasublikan, pabilgem ti kakabsatmo.” (Luc. 22:32) Sititibker a naipasdek ti naespirituan nga Israel ‘kadagiti apostol ken mammadto,’ ket kadagiti pamuon ti pader iti Baro a Jerusalem, naisurat ti nagan dagiti 12 a matalek nga apostol ti Kordero a ni Jesu-Kristo. Iti kaaldawantayo, dagiti napulotan a Kristiano agraman dagiti dedikado a kakaduada, ti “sabsabali a karnero,” rumangrang-ayda kas maysa nga organisasion a mangikaskasaba iti Pagarian iti sidong ti nabileg a panangiwanwan ti Dios ken iti panangidaulo ti dungdungnguenna nga Anak.​—Efe. 2:20; Juan 10:16; Apoc. 21:14.

No Kasano a Nangisuro ni Jesus

14, 15. Ania dagiti pamay-an a mangipakita a naiduma ti panangisuro ni Jesus no idilig kadagiti eskriba ken Fariseo?

¹⁴ Kasano nga impakat ni Jesus ti pannakasanayna bayat nga insurona dagiti pasurotna? No idiligtayo kadagiti Judio a lider ti relihion, nalawag a makitatayo a nasaysayaat nga amang ti panangisuro ni Jesus. Dagiti eskriba ken Fariseo ‘pinagbalinda nga awan kapapay-an ti Sao ti Dios gapu iti tradisionda.’ Ngem ni Jesus insurona ti sao wenno mensahe ti Dios, saan a ti bukodna a kapanunotan. (Mat. 15:6; Juan 14:10) Kasta met koma ti aramidentayo.

¹⁵ Adda sabali pay a nakaidumaan ni Jesus kadagiti lider ti relihion. Kinunana maipapan kadagiti eskriba ken Fariseo: “Amin a bambanag nga ibagada kadakayo, aramiden ken tungpalenyo, ngem dikay aramiden maitunos iti ar-aramidda, ta sawenda ngem saanda nga aramiden.” (Mat. 23:3) Inaramid ni Jesus no ania ti insurona. Usigentayo ti maysa a pagarigan a mangpaneknek iti dayta.

16. Apay a maibagayo a nagbiag ni Jesus maitunos kadagiti sasaona a nailanad iti Mateo 6:19-21?

¹⁶ Indagadag ni Jesus kadagiti adalanna nga ‘agurnongda kadagiti gameng idiay langit.’ (Basaenyo ti Mateo 6:19-21.) Nagbiag kadi ni Jesus maitunos iti dayta a balakad? Wen, ta sikokompiansa a naikunana maipapan iti bagina: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.” (Luc. 9:58) Simple ti panagbiag ni Jesus. Impamaysana ti biagna iti panangiwaragawag iti naimbag a damag ti Pagarian, ken impakitana no kasano ti agbiag a nawaya manipud kadagiti pakaringgoran a resulta ti panagurnong kadagiti kinabaknang ditoy daga. Impatuldo ni Jesus a nasaysayaat ti agurnong kadagiti kinabaknang idiay langit, a ‘sadiay saan nga ibusen ti sanga ken lati, ken saan a serken ken takawen dagiti mannanakaw.’ An-annurotenyo kadi ti balakad ni Jesus nga agurnong kadagiti gameng idiay langit?

Dagiti Galad ni Jesus a Makaallukoy Kadagiti Tattao

17. Ania dagiti galad a namagbalin ken Jesus a naisangsangayan nga ebanghelisador?

¹⁷ Ania ti namagbalin ken Jesus a naisangsangayan nga ebanghelisador? Ti maysa ket ti kababalin nga impakitana kadagiti tattao a tinulonganna. Karaman kadagiti agkakaimbag a kababalin ni Jehova a natulad ni Jesus ket ti kinapakumbaba, ayat, ken kinamanangngaasi. Kitaentayo no kasano a dagitoy a galad ti nakaallukoy iti adu a tattao nga umadani ken Jesus.

18. Ania ti pammaneknek a napakumbaba ni Jesus?

¹⁸ Idi inawat ni Jesus ti annongen nga umay ditoy daga, “inuksobanna ti bagina ket innalana ti langa ti maysa nga adipen ket nagbalin a kaas-asping ti tattao.” (Fil. 2:7) Maysa dayta a pammaneknek ti kinapakumbaba. Malaksid iti dayta, saan a minatmatan ni Jesus a nakababbaba dagiti tattao. Saanna nga imbaga, ‘Naggapuak idiay langit, isu a dumngegkayo kaniak.’ Ken saan a kas kadagidiay ulbod a mangibagbaga nga isuda ti mesias, saan nga impalangguad ni Jesus ti akemna kas ti pudno a Mesias. Adda dagiti gundaway a binilinna dagiti tattao a saanda nga ibagbaga ti kinasiasinona wenno ti nagapuananna. (Mat. 12:15-21) Kayat ni Jesus a sumurot kenkuana dagiti tattao maibatay iti naimatanganda a mismo. Anian a liwliwa kadagiti adalanna ta saan a namnamaen ti Apoda nga agbalinda a kas kadagiti perpekto nga anghel a nakalangenna idiay langit!

19, 20. Apay a ti ayat ken asi ti nangtignay ken Jesus a tumulong kadagiti tattao?

¹⁹ Impakita met ni Jesu-Kristo ti ayat​—ti kangrunaan a galad ti nailangitan nga Amana. (1 Juan 4:8) Ti ayat ti makagapu a sinursuruan ni Jesus dagiti agdengdengngeg kenkuana. Kas pagarigan, usigenyo ti nariknana iti maysa nga agtutubo nga agturay. (Basaenyo ti Marcos 10:17-22.) Ni Jesus “nariknana ti panagayat” iti dayta nga agtutubo ken kayatna a tulongan, ngem saan a tinallikudan ti agtutubo ti adu a sanikuana tapno agbalin koma a pasurot ni Kristo.

²⁰ Karaman kadagiti makaallukoy a galad ni Jesus ti kinamanangngaasina. Kas kadagiti amin nga imperpekto a tattao, addaan met kadagiti parikut dagidiay agdengdengngeg idi kenkuana. Ammo dayta ni Jesus isu nga insurona ida buyogen ti kinaasi. Iladawanyo: Naminsan, ni Jesus ken dagiti apostolna okupadoda unay ta awanen ti panawenda a mangan. Nupay kasta, ania ti narikna ni Jesus idi nakitana ti naummong a bunggoy? “Simnek ti asina kadakuada, agsipud ta kaslada karkarnero nga awanan pastor. Ket rinugianna nga isuro ida iti adu a banag.” (Mar. 6:34) Nakita ni Jesus ti nakakaasi a kasasaad dagiti tattao iti teritoriana isu nga insurona ida ken nagaramid kadagiti milagro a pakagunggonaanda. Dadduma ti naallukoy kadagiti nasayaat a galadna, natignayda kadagiti sasaona, ket nagbalinda nga adalanna.

21. Ania ti usigentayo iti sumaganad nga artikulo?

²¹ Adu pay ti masursurotayo maipapan iti ministerio ni Jesus ditoy daga, kas ipakita ti sumaganad nga artikulo. Kadagiti ania pay a pamay-an a matuladtayo ni Jesu-Kristo, ti kangrunaan a Misionero?

Ania ti Sungbatyo?

• Ania a pannakasanay ti inawat ni Jesus sakbay nga immay ditoy daga?

• Apay a nasaysayaat ti pamay-an ti panangisuro ni Jesus ngem ti panangisuro dagiti eskriba ken Fariseo?

• Ania dagiti galad a nakaallukoy kadagiti tattao nga umadani ken Jesus?

[Ladawan iti panid 15]

Kasano nga insuro ni Jesus dagiti tattao?