Tuladenyo ti Kangrunaan a Misionero
“Agbalinkayo a tumutulad kaniak, kas met iti panangtuladko ken Kristo.”—1 COR. 11:1.
1. Apay a nasken a tuladentayo ni Jesu-Kristo?
TINULAD ni apostol Pablo ti kangrunaan a Misionero, ni Jesu-Kristo. Indagadag met ni Pablo kadagiti padana a Kristiano: “Agbalinkayo a tumutulad kaniak, kas met iti panangtuladko ken Kristo.” (1 Cor. 11:1) Kalpasan nga insuro ni Jesus kadagiti adalanna ti maipapan iti kinapakumbaba babaen ti panangbuggona kadagiti sakada, kinunana kadakuada: “Impasdekko ti pagtuladan maipaay kadakayo, tapno, kas iti inaramidko kadakayo, rebbeng nga aramidenyo met.” (Juan 13:12-15) Kas Kristiano, obligadotayo a mangtulad ken Jesu-Kristo no maipapan iti sasao, tigtignay, ken galadtayo.—1 Ped. 2:21.
2. Uray no saannakayo a dinutokan ti Bagi a Manarawidwid kas misionero, ania a kababalin ti mabalinyo nga iparangarang?
2 Iti immun-una nga artikulo, naadaltayo a ti maysa a misionero ket daydiay naibaon kas ebanghelisador tapno idanonna ti naimbag a damag kadagiti sabsabali. Mainaig iti dayta, adda dagiti mamagpanunot a saludsod ni Pablo. (Basaenyo ti Roma 10:11-15.) Imutektekanyo ti saludsodna: “Kasano ti pannakangngegdanto no awan ti mangasaba?” Kalpasanna, inadawna ti padto ni Isaias: “Anian a nagimnas ti saksaka dagidiay mangideklara iti naimbag a damag ti naimbag a bambanag!” (Isa. 52:7) Uray no saankayo a nadutokan ken naibaon kas misionero iti sabali a pagilian, maiparangarangyo ti espiritu ti panagebanghelio, ken mabalinyo a tuladen ni Jesus kas naregta a manangikasaba iti naimbag a damag. Itay napan a tawen, 6,957,852 nga agibumbunannag iti Pagarian ti ‘nangaramid iti trabaho ti managebanghelio’ iti 236 a pagilian.—2 Tim. 4:5.
“Pinanawanmi ti Amin a Bambanag ket Sinurotdaka”
3, 4. Ania ti pinanawan ni Jesus idiay langit, ken ania ti nasken nga aramidentayo tapno agbalintayo a pasurotna?
3 Tapno maibanagna ti naituding nga annongenna ditoy daga, ni Jesus “inuksobanna ti bagina ket innalana ti langa ti maysa nga adipen,” a pinanawanna ti biag ken dayagna idiay langit. (Fil. 2:7) Saantay met ketdi a naan-anay a matulad ti inaramid ni Kristo idi immay ditoy daga. Kaskasdi, makapagtalinaedtayo a natibker kas pasurotna, a ditay tarigagayan ti aniaman a tinallikudantayo iti lubong ni Satanas.—1 Juan 5:19.
4 Naminsan, kinuna ni apostol Pedro kenni Jesus: “Adtoy! Pinanawanmi ti amin a bambanag ket sinurotdaka.” (Mat. 19:27) Dagus nga inibbatan da Pedro, Andres, Santiago, ken Juan dagiti iketda idi inawis ida ni Jesus a sumurot kenkuana. Pinanawanda ti trabahoda a panagkalap ket impamaysada ti biagda iti trabaho a panangasaba. Sigun iti salaysay ti Ebanghelio ni Lucas, kinuna ni Pedro: “Adtoy! Pinanawanmi ti mismo a bambanagmi [wenno, sanikuami] ket sinurotdaka.” (Luc. 18:28) Saan a kinasapulan ti kaaduan kadatayo ti mangpanaw kadagiti amin a sanikuatayo tapno masurottayo ni Jesus. Nupay kasta, kinasapulanna a ‘paglikudantayo ti bagitayo’ tapno agbalintayo a pasurot ni Kristo ken napasnek nga adipen ni Jehova. (Mat. 16:24) Nagresulta dayta iti nabaknang a gunggona. (Basaenyo ti Mateo 19:29.) Naragsaktayo gapu ta tinuladtayo ni Kristo kas naregta nga ebanghelisador, uray bassit laeng ti naitulongtayo iti maysa a tao tapno makaadani iti Dios ken iti dungdungnguenna nga Anak.
5. Mangisalaysay iti kapadasan a mangipakita no ania ti ar-aramiden dagiti imigrante apaman a maammuanda ti kinapudno.
5 Ni Valmir, nga agnanaed idiay Suriname, ket agtagtagikua iti maysa a pagminasan. Mangnginum iti arak ken imoral ti biagna. Naminsan nga adda iti siudad, rinugian nga inyadalan dagiti Saksi ni Jehova. Inaldaw ti panagadalna, adu ti binalbaliwanna iti biagna, ket nagpabautisar di nagbayag. Idi makitana a ti trabahona ti makalapped iti panangitunosna iti biagna iti Biblia, inlakona ti dakkel a negosiona ket nagsubli iti pagilianda idiay Brazil tapno tulonganna ti pamiliada a mangsapul kadagiti naespirituan a gameng. Adu nga imigrante ti sidadaan a nangpanaw kadagiti panggedanda kadagiti nabaknang a pagilian apaman a naammuanda ti kinapudno iti Biblia, ket nagsublida kadagiti pagilianda tapno matulonganda nga agadal iti Biblia dagiti kabagianda ken ti dadduma. Ipakpakita dagiti kasta nga agibumbunannag ti pudno nga espiritu ti panagebanghelio.
6. Ania ti mabalintayo nga aramiden no saan a posible kadatayo ti umakar kadagiti lugar nga agkasapulan iti ad-adu nga agibumbunannag?
6 Adu a Saksi ti immakar kadagiti lugar nga agkasapulan iti ad-adu nga agibumbunannag iti Pagarian. Dadduma ti nagserbi pay ketdi iti ballasiw taaw. Mabalin a saantayo a maaramid ti kasta gapu kadagiti indibidual a kasasaadtayo, ngem matuladtayo latta ni Jesus no aramidentayo ti amin a kabaelantayo iti ministerio.
Mangipaay ni Jehova iti Kasapulan a Panangsanay
7. Ania dagiti eskuelaan a mabalin a pagsanayan dagidiay agtarigagay a mangpasayaat iti abilidadda kas agibumbunannag?
7 No kasano a ni Jesus ket sinanay ni Amana, mabalintayo met nga aprobetsaren ti edukasion nga ipapaay ita ni Jehova. Mismo a ni Jesus ti nagkuna: “Adda a naisurat kadagiti Mammadto, ‘Ket sursuruanto amin ida ni Jehova.’” (Juan 6:45; Isa. 54:13) Ita, adda dagiti eskuelaan a nadisenio a mangsanay kadatayo kas manangiwaragawag iti Pagarian. Awan duadua a nakasursurotayo amin manipud iti Teokratiko nga Eskuelaan ti Panagministro kadagiti kongregasiontayo. Pribilehio dagiti payunir ti tumabuno iti Pioneer Service School. Sumagmamano nga aduan iti kapadasan a payunir ti naaddaan iti rag-o a timmabuno iti dayta nga eskuelaan iti maikadua a gundaway. Natabunuan dagiti panglakayen ken ministerial nga adipen ti Kingdom Ministry School tapno mapasayaat ti abilidadda a mangisuro ken ti panagserbida kadagiti kapammatianda. Adu a di kasado a panglakayen ken ministerial nga adipen ti nageskuela iti Ministerial Training School, a mangkabal kadakuada a tumulong kadagiti dadduma iti trabaho a panangasaba. Adu met a kakabsat a lallaki ken babbai ti nageskuela iti Watchtower Bible School of Gilead isu a naibaonda kas misionero kadagiti ganggannaet a pagilian.
8. Kasano nga impateg ti dadduma a kakabsat ti panagsanay nga ipapaay ni Jehova?
8 Adu a Saksi ni Jehova ti nangbalbaliw iti kasasaadda tapno matabunuanda dagitoy nga eskuelaan. Tapno makapageskuela iti Ministerial Training School idiay Canada, nagikkat ni Yugu manipud iti panggedanna gapu ta saan a pinatgan ti amona ti kiddawna nga agbakasion. “Diak pagbabawyan dayta,” kinuna ni Yugu. “Kinapudnona, no ibilangda a panangipakita iti dakkel a pabor no kas pagarigan ta patganda ti bakasionko, nalabit a namnamaenda a diakto panawan ti kompaniada kas panangbigbigko iti utang a naimbag a nakem. Ngem ita, nawayaakon a mangibaklay iti aniaman nga annongen nga ited ni Jehova.” Tapno maaprobetsarda ti panagsanay nga ipapaay ti Dios, adu ti sidadaan a nangisakripisio iti maysa a banag nga ibilangda idi a nakapatpateg.—Luc. 5:28.
9. Mangted iti pagarigan a mangipakita iti epekto dagiti pannursuro ti Kasuratan ken ti panagregget nga agadal.
9 Dakkel ti epekto dagiti pannursuro ti Kasuratan ken ti panagregget nga agadal. (2 Tim. 3:16, 17) Usigenyo ti kapadasan ni Saulo a taga-Guatemala. Nayanak nga addaan iti bassit a depekto iti isip. Maysa kadagiti maestrana ti nagkuna ken nanangna a dina koma piliten ti anakna nga agsursuro nga agbasa ta ad-adda a maupay ti ubing. Nagsardeng nga ageskuela ni Saulo a di man la nakasursuro nga agbasa. Nupay kasta, maysa a Saksi ti nangisuro ken Saulo nga agbasa babaen ti broshur nga Apply Yourself to Reading and Writing. Idi agangay, rimmang-ay ni Saulo agingga a makapagpaseten iti Teokratiko nga Eskuelaan ti Panagministro. Naminsan, nakasabaan ti ina ni Saulo ti maestrana. Idi naammuan ti maestra a makabasan ni Saulo, kiniddawna iti ina ni Saulo nga ikuyogna ti anakna iti sumaganad a lawas. Idi nagsublida, inimtuod ti maestra ken Saulo, “Ania ti isurom kaniak?” Binasa ni Saulo ti maysa a parapo manipud iti libro nga Ania a Talaga ti Isursuro ti Biblia? “Kasla diak mamati nga isursuronak itan,” kinuna ti maestrana. Dina nalapdan ti agsangit, ket inarakupna ni Saulo.
Panangisuro a Makatignay iti Puso
10. Ania a nagsayaat nga alikamen ti mabalintayo nga usaren a mangisuro kadagiti kinapudno iti Biblia?
10 Imbatay ni Jesus dagiti pannursurona iti mismo nga insuro ni Jehova kenkuana ken kadagiti bilin a masarakan iti Sao ti Dios. (Luc. 4:16-21; Juan 8:28) Tultuladentayo ni Jesus babaen ti panangyaplikartayo kadagiti balakadna ken kadagiti isursuro ti Kasuratan. Dayta ti makagapu nga agtutunostayo iti sao ken isip, nga ad-adda a namagkaykaysa kadatayo. (1 Cor. 1:10) Anian a yamantayo ta mangipapaay “ti matalek ken masirib nga adipen” kadagiti publikasion a naibatay iti Biblia a tumulong tapno agtutunos dagiti isursurotayo ken maitungpal ti trabahotayo kas ebanghelisador! (Mat. 24:45; 28:19, 20) Maysa kadagitoy a publikasion isu ti libro nga Isursuro ti Biblia, a magun-odan itan iti 179 a pagsasao.
11. Kasano a ti maysa a kabsat idiay Ethiopia dinaeranna ti ibubusor babaen ti libro nga Isursuro ti Biblia?
11 Ti panangadal iti Kasuratan babaen ti libro nga Isursuro ti Biblia mabalin a balbaliwanna uray ti puso dagiti bumusbusor. Ni Lula, maysa a payunir idiay Ethiopia, ket madama a mangyad-adal iti Biblia idi simmangpet ti kabagian ti iyad-adalanna. Paspasardengen dayta a kabagian ti madama a panagadalda. Sitatanang a nakirinnason ni Lula, nga inusarna ti ilustrasion maipapan iti peke a kuarta iti kapitulo 15 iti libro nga Isursuro ti Biblia. Nagkalma ti babai ket impalubosna nga ituloyda ti agadal. Kinapudnona, nakiraman iti simmaruno a panagadal ken kiniddawna a mayadalan met uray agbayad pay! Di nagbayag, agad-adalen iti mamitlo iti kada lawas ken nagsayaat ti naespirituan a panagrang-ayna.
12. Mangted iti pagarigan no kasano a dagiti agtutubo sieepektibo a maisuroda dagiti kinapudno iti Biblia.
12 Dagiti agtutubo matulonganda ti sabsabali babaen ti panangusarda iti libro nga Isursuro ti Biblia. Iti Hawaii, ni Keanu nga agtawen iti 11 basbasaenna daytoy a libro idiay eskuelaanda idi sinaludsodan ti kaklasena, “Apay a saanka a makipaspaset kadagiti piesta?” Binasa ni Keanu ti sungbat manipud iti apendise dagiti topiko a “Rumbeng Kadi a Rambakantayo Dagiti Piesta?” Inukagna ngarud ti panid a nakailistaan ti amin a linaon ti libro sana insaludsod iti kaklasena no ania kadagita ti paginteresanna unay. Nairugi ti panagadal iti Biblia. Idi napan a tawen serbisio, nangikondukta dagiti Saksi ni Jehova iti 6,561,426 a panagadal iti Biblia, ket adu kadagita ti nangusar iti libro nga Isursuro ti Biblia. Us-usarenyo kadi daytoy a libro a mangyadal iti Biblia?
13. Iti ania a pamay-an a dakkel ti epektona kadagiti tattao ti panagadal iti Biblia?
13 Ti panagadal iti Kasuratan babaen ti libro nga Isursuro ti Biblia ket dakkel ti maaramidanna kadagidiay agtarigagay a mangaramid iti pagayatan ti Dios. Maysa nga special pioneer nga agassawa idiay Norway ti nangyadal iti Biblia iti maysa a pamilia manipud Zambia. Tallo a babbai ti annak daytoy a pamilia ket dida kayat a manayonan pay dayta. Isu nga idi nagsikog manen ti babai, inkeddengda a mairegreg ti sikog. Sumagmamano nga aldaw sakbay a nagkonsultada iti maysa a doktor, inadalda ti kapitulo a napauluan iti “Nadiosan a Panangmatmat iti Biag.” Kasta unay ti pannakatukay ti rikna ti agassawa gapu iti ladawan ti maysa a sikog iti dayta a kapitulo isu nga inkeddengda a didan iparegreg ti sikog. Nagtultuloy ti nasayaat a panagrang-ayda iti naespirituan. Impanaganda iti kayanak a maladagada ti nagan ti mangyad-adal kadakuada.
14. Iyilustrar no kasano a mangyeg kadagiti agkakaimbag a resulta ti panagbiag a maitunos iti isursurotayo.
14 Ti maysa a napateg nga aspeto ti panangisuro ni Jesus ket ti panagbiagna a maitunos kadagiti pannursurona. Adu a tattao ti maay-ayo kadagiti nasayaat a kababalin dagiti Saksi ni Jehova, kas panangtuladda ken Jesus. Maysa a negosiante idiay New Zealand ti sinerrekda ti kotsena ken tinakawda ti bagna. Inreportna dayta iti polis, a nagkuna: “Ti laeng namnamam a maisubli ti bagmo ket no Saksi ni Jehova ti makasarak iti dayta.” Maysa a Saksi nga agitultulod iti diario ti nakasarak iti bagna. Idi napakaammuan ti makinkukua, napan daytoy iti pagtaengan ti kabsat. Anian a yamanna a saan a napukaw ti nagpateg a dokumentona. Kinuna ti kabsat kenkuana, “Rumbeng laeng nga isublik ti bag, nangruna ta maysaak a Saksi ni Jehova.” Masmasdaaw ti negosiante, ket malagipna ti kinuna ti polis iti daydi a bigat. Nalawag nga agbibiag dagiti pudno a Kristiano maitunos kadagiti pannursuro ti Biblia ken tultuladenda ni Jesus.—Heb. 13:18.
Tuladenyo ti Pannakilangen ni Jesus Kadagiti Tattao
15, 16. Kasano a mapagbalintayo a makaay-ayo kadagiti tattao ti mensahe nga ikaskasabatayo?
15 Makaay-ayo kadagiti tattao ti mensahe ni Jesus gapu iti wagas ti pannakilangenna kadakuada. Kas pagarigan, nalaka nga asitgan dagiti nanumo gapu iti ayat ken kinapakumbabana. Nangipakita iti asi kadagidiay immadani kenkuana ket liniwliwana ida babaen kadagiti makapagin-awa a sasao ken pinaimbagna ti adu kadakuada. (Basaenyo ti Marcos 2:1-5.) Ditay makaaramid kadagiti milagro, ngem mabalintay nga ipakita ti ayat, kinapakumbaba, ken asi—dagiti galad a mangatrakar kadagiti tattao iti kinapudno.
16 Dakkel ti maaramidan ti asi. Napaneknekan dayta ti special pioneer a ni Tariua idi nakasaritana ti maysa a lakay nga agnagan iti Beere, nga agnanaed iti maysa kadagiti naiputputong nga isla ti Kiribati iti Abagatan a Pacifico. Nupay impamatmat ti lakay a dina kayat ti dumngeg, naasian ni Tariua idi nadlawna a paralisado ti kagudua ti bagina. “Nangngegyo kadin ti kari ti Dios kadagiti masakit ken lakayen?” inyimtuodna. Kalpasanna, nangibasa iti teksto manipud iti padto ni Isaias. (Basaenyo ti Isaias 35:5, 6.) Nasdaaw ti lakay isu a kinunana, “Nabayagen a basbasaek ti Biblia ken adu a tawenen a sarsarungkarannak ti maysa a misionero a kapammatiak, ngem diak pulos nabasa dayta iti Biblia.” Nangrugi a mayadalan iti Biblia ni Beere, ket dakkel ti rimmang-ayanna. Nupay baldado, maysa itan a bautisado. Idadauluanna ti maysa a naiputputong a grupo dagiti kakabsat ken ikaskasabana ti naimbag a damag iti intero nga isla.
Itultuloyyo a Tuladen ni Kristo
17, 18. (a) Kasanokayo nga agbalin a naballigi nga ebanghelisador? (b) Ania ti mabalin a mapadasan dagidiay sireregta a mangitungtungpal iti ministerioda?
17 Kas maulit-ulit a paneknekan dagiti naragsak a kapadasan iti ministerio, agballigi ti panangasabatayo no sukayen ken ipakitatayo dagiti galad nga imparangarang ni Jesus. Anian a maitutop ngarud a tuladentayo ti naregta a panagebanghelio ni Kristo!
18 Idi nagbalin nga adalan ni Jesus ti dadduma idi umuna a siglo, inyimtuod ni Pedro: “Ania nga agpayso ti addanto a maipaay kadakami?” Kinuna kadakuada ni Jesus: “Tunggal maysa a nangpanaw iti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.” (Mat. 19:27-29) Sigurado a masagraptayo met dayta no itultuloytayo a tuladen ti kangrunaan a Misionero, ni Jesu-Kristo.
Ania ti Sungbatyo?
• Kasanonatayo a sansanayen ni Jehova nga agbalin nga ebanghelisador?
• Apay a nagsayaat a tulong iti ministeriotayo ti libro nga Isursuro ti Biblia?
• Kasano a matuladtayo ti pannakilangen ni Jesus kadagiti tattao?
[Ladawan iti panid 17]
Dagus a simmurot da Pedro, Andres, Santiago, ken Juan idi inawis ida ni Jesus
[Ladawan iti panid 19]
Dagiti publikasion a kas iti “Isursuro ti Biblia” tumulongda a mamagtutunos iti isursurotayo