No Kasano a Maisalakannaka ti Ipapatay ni Jesus

IDI tawen 33 K.P. a Paskua dagiti Judio, dandani 2,000 a tawen ti napalabasen, natay ti maysa nga inosente a tao tapno agbiag dagiti sabsabali. Siasino dayta a tao? Isu ni Jesus a taga-Nazaret. Ket siasino ti mabalin a magunggonaan iti dayta a nagsayaat nga inaramidna? Ti intero a sangatauan. Kastoy ti pananggupgop ti maysa a nalatak a bersikulo ti Biblia maipapan iti dayta a mangispal-biag a sakripisio: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

Nupay pagaammo ti adu dayta a teksto, manmano ti talaga a makaawat iti kaipapananna. Pampanunotenda: ‘Apay a kasapulantayo ti sakripisio ni Kristo? Maigapu iti ipapatay ti maysa a tao, kasano a maispal ti amin a tattao manipud iti pagtungpalanda nga agnanayon nga ipapatay?’ Mangipaay ti Biblia kadagiti nalawag ken makaparagsak a sungbat kadagita a saludsod.

No Kasano a ni Patay Inturayanna ti Sangatauan

Adda dagiti mamati a naparsua ti tao tapno agbiag iti ababa laeng a tiempo ditoy daga, agpasar kadagiti suot, agragsak bassit, santo matay ken mapan iti nasaysayaat a lugar. Sigun iti dayta a kapanunotan, ti ipapatay ket paset ti panggep ti Dios para iti sangatauan. Ngem naiduma ti isursuro ti Biblia a makagapu no apay a matay ti tao. Kunana: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” (Roma 5:12) Ipakita dayta a bersikulo a ti basol ti makagapu no apay a matay ti tao. Ngem siasino ti “maysa a tao” a nangipatawid iti sangatauan kadagiti makapapatay nga epekto ti basol?

Kuna ti The World Book Encyclopedia a patien ti kaaduan a sientista nga adda maymaysa a nagtaudan ti amin a tattao, ket silalawag a tinukoy ti Biblia dayta a maymaysa a nagtaudan kas “maysa a tao.” Kastoy ti kuna ti Genesis 1:27: “Ti Dios pinarsuana ti tao iti ladawanna, iti ladawan ti Dios isu pinarsuana; pinarsuana ida a lalaki ken babai.” Gapuna, sigun iti Biblia, ti immuna nga agassawa ti kadayagan kadagiti naindagaan a pinarsua ti Mannakabalin-amin a Dios.

Ti salaysay ti Genesis ipaayannatayo iti ad-adu pay a detalye maipapan iti kabibiag ti tao kalpasan a pinarsua ni Jehova a Dios ti immuna a tao. Makapainteres ta iti dayta nga intero a salaysay, ti ipapatay ket saan a dinakamat ti Dios malaksid idi tukoyenna dayta kas resulta ti isusukir. (Genesis 2:16, 17) Kayatna a dagiti tattao ket siraragsak ken sisasalun-at nga agbiag nga agnanayon iti napintas a paraiso a daga. Saanna a kayat nga agsagabada gapu kadagiti epekto ti panaglakay wenno panagbaket sada matay inton agangay. Kasano ngarud nga inturayan ni patay ti intero a sangatauan?

Salaysayen ti Genesis kapitulo 3 no kasano a ti immuna nga agassawa ket sipapakinakem a simmukir iti Nangted-Biag kadakuada a ni Jehova a Dios. Gapu iti dayta, impatungpal ti Dios ti dusa nga impakpakaunana kadakuada. Kinunana iti lalaki: “Tapokka ket iti tapok agsublikanto.” (Genesis 3:19) Kas kaitungpalan ti sinao ti Dios, natay idi agangay ti dua a nasukir a tattao.

Ngem saan la nga isuda ti naapektaran. Gapu iti isusukirda, napukaw ti namnama a perpekto a biag a matagiragsak koma dagiti annakda. Dagiti di pay naipasngay nga annak da Adan ken Eva ket inraman ni Jehova iti panggepna idi kinunana kadakuada: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.” (Genesis 1:28) Panggep ti Dios a ti pamilia ti tao ket punnuenda ti daga, agbiagda a nakaragragsak, ken dida pulos matay. Ngem ti amada a ni Adan nga isu daydiay nadakamat a “maysa a tao” inlakona ida kas adipen ti basol, a ni patay ti di maliklikan nga epektona. Dayta ti makagapu a kastoy ti insurat ni apostol Pablo a kaputotan ti kaunaan a tao: “Nainlasaganak, a nailako iti sidong ti basol.”​—Roma 7:14.

Iti kallabes a tiempo, adda dagiti nangigagara a nangdadael kadagiti nakanginngina nga obra ti arte. Iti umasping a wagas, babaen ti panagbasol ni Adan, dinadaelna ti sangatauan​—ti nakasaysayaat a pinarsua ti Dios. Dagiti annak ni Adan ket naaddaan met kadagiti bukodda nga annak ken appoko ken nagtultuloy a kasta. Tunggal agsasaruno a kaputotan ket naipasngay, nagmataengan, naaddaan iti annak sa idi agangay, natayda. Apay a matayda amin? Agsipud ta kaputotan amin ida ni Adan. Kuna ti Biblia: ‘Babaen ti labsing ti maysa a tao, adu ti natay.’ (Roma 5:15) Ti panagsakit, panaglakay wenno panagbaket, pagannayasan nga agaramid iti dakes, ken ti mismo nga ipapatay ket nakalkaldaang nga epekto amin ti panangliput ni Adan iti bukodna a pamilia. Kamengtayo amin iti dayta a pamilia.

Iti suratna kadagiti Kristiano idiay Roma, dinakamat ni apostol Pablo ti nakapimpiman a kasasaad dagiti imperpekto a tattao, a kas kenkuana, ken ti makapaupay a pannakidangadangna kadagiti epekto ti basol. Kinunana: “Nakaay-ay-ayak a tao! Siasinonto ti mangalaw kaniak iti bagi nga agpaspasar itoy nga ipapatay?” Napateg dayta a saludsod, di ngamin? Siasino koma ti makaalaw ken Pablo​—ken iti amin a sabsabali pay​—manipud iti pannakaadipen iti basol ken ipapatay? Nangipaay a mismo ni Pablo iti sungbat: “Pagyamanan iti Dios baeten ken Jesu-Kristo nga Apotayo!” (Roma 7:14-25) Wen, nangaramiden ti Namarsua kadatayo iti pamay-an tapno maalawnatayo babaen iti Anakna a ni Jesu-Kristo.

Ti Akem ni Jesus iti Panangispal ti Dios iti Sangatauan

Dineskribir ni Jesus ti akemna iti pannakaispal ti sangatauan manipud iti makapapatay a pannakaadipenda iti basol. Kinunana: ‘Ti Anak ti tao . . . immay . . . tapno agserbi ken yawatna ti biagna a pangsubbot kadagiti adu a tattao.’ (Mateo 20:28, Ti Baro a Naimbag a Damag Biblia) Kasano a nagserbi ti biag ni Jesus kas pangsubbot? Kasanotay a magunggonaan iti ipapatayna?

Iti Biblia, nadeskribir ni Jesus kas “awanan basol” ken “naisina kadagiti managbasol.” Iti unos ti panagbiagna, naan-anay a nagtulnog ni Jesus iti Linteg ti Dios. (Hebreo 4:15; 7:26) Gapuna, ti ipapatay ni Jesus ket saan nga epekto ti basol ken isusukir a kas iti napasamak ken Adan. (Ezequiel 18:4) Imbes ketdi, situtulok ni Jesus a natay nupay di maikari iti dayta tapno maaramidna ti pagayatan ni Amana a maispal ti sangatauan manipud iti basol ken ipapatay. Kas nadakamaten, sibubulos ti nakem ni Jesus nga immay tapno “yawatna ti biagna a pangsubbot.” Gapu iti awan pay kaaspingna nga ayat ni Jesus, ‘napadasanna ti matay maipaay kadagiti amin a tattao.’​—Hebreo 2:9, Ti Baro a Naimbag a Damag Biblia.

Ti biag nga insakripisio ni Jesus ket eksakto a katupag ti biag ni Adan a napukaw idi isu ket nagbasol. Ania ti resulta ti ipapatay ni Jesus? Inawat ni Jehova dayta a sakripisio kas “katupag a subbot nga agpaay iti isuamin.” (1 Timoteo 2:6) No ar-arigen, ti Dios inusarna ti pateg ti biag ni Jesus a pangsaka, wenno pangsubbot, iti intero a sangatauan manipud iti pannakaadipenda iti basol ken ipapatay.

Masansan a dakamaten ti Biblia dayta naindaklan nga ayat nga imparangarang ti Namarsua iti tao. Impalagip ni Pablo kadagiti Kristiano a ‘nagatangda iti maysa a gatad.’ (1 Corinto 6:20; 7:23) Insurat ni Pedro nga inusar ti Dios ti dara ti Anakna, saan a ti balitok wenno pirak, tapno ispalenna dagiti Kristiano manipud iti biag nga agtungpal ken patay. (1 Pedro 1:18, 19) Babaen ti pangsubbot a sakripisio ni Jesus, inyurnos ni Jehova a maispal dagiti tattao manipud iti pagtungpalanda koma nga agnanayon nga ipapatay.

Aprobetsarem Kadi ti Subbot ni Kristo?

Maipapan iti kaadu dagiti magunggonaan iti subbot ni Kristo, insurat ni apostol Juan: “[Ni Jesu-Kristo] ket pangikappia a sakripisio maipaay kadagiti basoltayo, ngem saan a maipaay kadatayo laeng no di ket maipaay met iti intero a lubong.” (1 Juan 2:2) Wen, ti intero a sangatauan ket mabalin a magunggonaan iti subbot ni Kristo. Kayat kadi a sawen dayta nga amin ket automatiko a magunggonaan iti dayta a nakapatpateg a subbot? Saan. Lagipem ti naaramid a panangispal a nadakamat iti immuna nga artikulo. Dagidiay nangikagumaan a mangsalbar kadagiti napupok a minero ket nangipauyaoyda iti pangispal a tangkal, ngem tunggal maysa kadagita a minero ket masapul a sumrek iti dayta a tangkal. Iti umasping a wagas, dagidiay mayat a magunggonaan iti pangsubbot a sakripisio ni Kristo ket saan a mabalin nga aguray lattan iti bendision ti Dios. Masapul nga adda aramidenda.

Ania ti ikalikagum ti Dios nga aramidentayo? Kuna kadatayo ti Juan 3:36: “Ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag, ngem agtalinaed kenkuana ti pungtot ti Dios.” Ikalikagum ti Dios a maaddaantayo iti pammati iti sakripisio ni Kristo. Ngem saan la a dayta. “Babaen itoy addaantay ti pannakaammo nga isu [ni Jesus], naam-ammotayo, a dayta ket, no itultuloytay a tungpalen dagiti bilinna.” (1 Juan 2:3) Nalawag ngarud a tapno maispaltayo manipud iti basol ken ipapatay, nasken a maaddaantayo iti pammati iti subbot ni Kristo ken agtulnogtayo kadagiti bilinna.

Ti maysa a napateg a pamay-an tapno maiparangarangtayo ti pammatitayo iti subbot ni Jesus ket ti panangipakita iti panangapresiartayo iti ipapatayna babaen ti pananglaglagiptayo iti dayta kas iti imbilinna. Sakbay ti ipapatayna, inyussuat ni Jesus kadagiti apostolna ti maysa a pannangan nga addaan iti simboliko a kaipapanan sana kinuna kadakuada: “Itultuloyyo nga aramiden daytoy kas panglaglagip kaniak.” (Lucas 22:19) Tagipatgen unay dagiti Saksi ni Jehova ti pannakigayyemda iti Anak ti Dios isu nga agtultulnogda iti dayta a bilin. Ita a tawen, ti Pananglaglagip iti ipapatay ni Jesu-Kristo ket maangay inton Sabado, Marso 22, kalpasan ti ilelennek ti init. Maragsakankami a mangawis kenka a tumabuno iti dayta nga espesial a taripnong kas panagtulnog iti bilin ni Jesus. Dagiti kalugaram a Saksi ni Jehova mabalinda nga ipakaammo kenka ti oras ken pakaangayan dayta a taripnong. Iti dayta a Pananglaglagip, ad-adunto pay ti maammuam maipapan iti nasken nga aramidem tapno mawayawayaannaka ti subbot ni Kristo kadagiti makapapatay a bunga ti basol a natawidtayo ken Adan.

Manmano ita ti addaan iti naan-anay a pannakaawat ken panagyaman iti dakkel a sakripisio nga inaramid ti Namarsua ken ti Anakna tapno maispalda manipud iti pannakadadael. Dagidiay mangwatwat iti pammati iti dayta ket maaddaan iti naisangsangayan a gubuayan ti kinaragsak. Kastoy ti insurat ni apostol Pedro kadagiti padana a Kristiano: “Watwatwatenyo ti pammati [ken Jesus] ken agragrag-okayo unay buyogen ti di mayebkas ken naipadayag a rag-o, bayat nga aw-awatenyo ti pagtungpalan ti pammatiyo, ti pannakaisalakan dagiti kararuayo.” (1 Pedro 1:8, 9) No patanorem ti panagayatmo ken Jesu-Kristo ken pammati iti pangsubbot a sakripisiona, mabalinmo itan ti agbiag a siraragsak ken mainanamam a maisalakankanto manipud iti basol ken ipapatay.