Ipangag ni Jehova Dagiti Ararawtayo
“Dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.”—SAL. 34:15.
1, 2. (a) Ania ti mapaspasaran ita ti adu a tattao? (b) Apay a saantayo a masdaaw iti dayta?
ADDA kadi pakidangdangadanganyo a pakarigatan? No adda, saankay nga agmaymaysa. Kasta met laeng ti inaldaw a mapaspasaran ti minilion a tattao iti daytoy dakes a sistema ti bambanag. Kasla saan pay ketdin a makapagibtur ti dadduma. Mapaspasaranda ti narikna ti salmista a ni David, a nagkuna: “Nabibinegak ken nailupitlupitak iti napalalo; nagungorak gapu iti panagasug ti pusok. Ti bukodko a puso naggutok iti nakaro, ti bilegko pinanawannak, ket ti met lawag dagiti bukodko a mata awan kaniak.”—Sal. 38:8, 10.
2 Kas Kristiano, saantay a masdaaw kadagiti pakarigatan iti biag. Ammotayo a “dagiti ut-ot ti panagrigat” ket paset ti naipadto a pagilasinan ti kaadda ni Jesus. (Mar. 13:8; Mat. 24:3) Ti Griego a sao a nagtaudan ti ebkas a “dagiti ut-ot ti panagrigat” ket tumukoy iti nakaro nga ut-ot ti panaganak. Anian a maitutop dayta a mangdeskribir iti nakaro a panagsagaba dagiti tattao bayat dagitoy “napeggad” a tiempo a “narigat a pakilangenan”!—2 Tim. 3:1.
Maawatan ni Jehova Dagiti Pakarigatantayo
3. Ania ti pagaammo dagiti adipen ti Dios?
3 Pagaammo dagiti adipen ni Jehova a mapasaranda dagiti pakarigatan ken dumakes pay dagiti kasasaad. Malaksid iti mapaspasaran ti kaaduan a tattao, sarsarangten met dagiti adipen ti Dios ti maysa a ‘kabusor, ti Diablo,’ a determinado a mangpakapuy iti pammatitayo. (1 Ped. 5:8) Naglaka la ketdi a mapasaran ti pannakaupay a kas iti narikna ni David: “Ti met laeng umsi binurakna ti pusok, ket ti sugat di maagasan. Ket nangin-inanamaak iti asinoman a makipagrikna, ngem awan; ken kadagiti manangliwliwa, ngem awan nasarakak”!—Sal. 69:20.
4. Ania ti makaliwliwa kadatayo no agpasartayo kadagiti pakarigatan?
4 Kayatna kadi a sawen a naawananen iti namnama ni David? Saan. Imutektekanyo ta intuloyna a kinuna: “Ni Jehova umim-imdeng kadagidiay napanglaw, ket pudno a saannanto nga umsien dagiti mismo a baludna [kayatna a sawen, dagiti adipenna a naibalud].” (Sal. 69:33) Adda dagiti panawen a mariknatayo a kaslatay naibalud kadagiti pakarigatan. Agparang a didatay maawatan dagiti dadduma—wenno talaga ketdi a didatay maawatan. Ngem kas ken David, makaliwliwa kadatayo ti pannakaammo a naan-anay a maawatan ni Jehova dagiti pakarigatantayo.—Sal. 34:15.
5. Iti ania a nagtalek ni Ari Solomon?
5 Impaganetget dayta ni Solomon nga anak ni David idi naidedikar ti templo idiay Jerusalem. (Basaenyo ti 2 Cronicas 6:29-31.) Impakaasina ken Jehova nga ipangagna koma ti kararag ti tunggal nasingpet a tao nga umararaw Kenkuana mainaig kadagiti ‘bukodda a saplit ken rigat.’ Ipangag ngata ti Dios ti kararag dagitoy nga agpaspasar iti rigat? Sikokompiansa a kinuna ni Solomon a saan laeng nga ipangag ti Dios ti kararagda no di ket talaga a tulonganna ida. Apay? Gapu ta ammona ti linaon ti “puso ti annak ti sangatauan.”
6. Kasano a madaerantayo ti pakaringgoran, ken apay?
6 Mabalintayo met nga ikararag ken Jehova ‘ti bukodtayo a saplit ken rigat.’ Maliwliwatayo gapu ta ammotayo a maseknan ken maawatanna dagiti pakarigatantayo. Pinasingkedan dayta ni apostol Pedro idi kinunana: “Iyallatiwyo kenkuana ti isuamin a pakaringgoranyo, agsipud ta isu maseknan kadakayo.” (1 Ped. 5:7) Impaganetget ni Jesus ti naayat a pannakaseknan ni Jehova idi kinunana: “Saan aya a ti dua a billit-tuleng mailako iti sensilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.”—Mat. 10:29-31.
Agpannuray iti Tulong ni Jehova
7. Ania a tulong ti manamnamatayo?
7 Makapagtalektayo a sidadaan ken kabaelan ni Jehova ti tumulong kadagiti pakarigatantayo. “Ti Dios maysa a kamang ken pigsa maipaay kadatayo, maysa a saranay a sisasagana a masarakan bayat dagiti riribuk.” (Sal. 34:15-18; 46:1) Kasano nga ipaay ti Dios dayta a tulong? Usigenyo ti kuna ti 1 Corinto 10:13: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” Mabalin nga imaniobra ni Jehova dagiti bambanag tapno maikkat dagiti pakarigatantayo, wenno ipaayna ti bileg a kasapulan tapno maibturantayo dayta. Aniaman kadagita, ti punto ket tulongannatayo ni Jehova.
8. Kasanotayo a magun-odan ti tulong ti Dios?
8 Kasanotayo a magun-odan dayta a tulong? Imutektekanyo ti naibalakad kadatayo: “Iyallatiwyo kenkuana ti isuamin a pakaringgoranyo.” Wen, iparparegta ti teksto nga italektayo ken Jehova ti amin a pakaseknantayo. Masapul nga isardengtayo ti agdanag ken itultuloytayo ti agtalek nga ipaay ti Dios dagiti kasapulantayo. (Mat. 6:25-32) Ti kasta a panagtalek kalikagumanna ti kinapakumbaba, a ditay agpannuray iti bukodtayo a pigsa wenno sirib. No agpakumbabatayo “iti sidong ti mannakabalin nga ima ti Dios,” bigbigbigentayo a nanumotayo. (Basaenyo ti 1 Pedro 5:6.) Iti kasta, makatulong daytoy tapno madaerantayo ti aniaman a pakarigatan nga ipalubos ti Dios. Nalabit nga il-iliwentayo ti dagus a pannakabang-ar, ngem agtalektayo a siuumiso nga ammo ni Jehova no kaano ken kasano a tulongannatayo.—Sal. 54:7; Isa. 41:10.
9. Ania a kita ti dadagsen ti inyallatiw ni David kenni Jehova?
9 Lagipenyo ti sasao ni David iti Salmo 55:22: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.” Nakaro ti rigat a mapaspasaran ni David idi insuratna dayta. (Sal. 55:4) Mabalin nga insuratna dayta a salmo idi panawen nga insikat nga agawen ni Absalom ti kinaari ni David. Nakikomplot iti dayta a gakat uray ni Ahitofel, ti mammagbaga a pagtaltalkan unay ni David. Gapu ta agpegpeggad ti biagna, nagtalaw ni David manipud Jerusalem. (2 Sam. 15:12-14) Iti laksid dagidi a narigat a kasasaad, nagtultuloy a nagtalek ni David iti Dios, ket saan a napaay.
10. Ania ti masapul nga aramidentayo no agpaspasartayo kadagiti pakarigatan?
10 Kas ken David, masapul nga iyararawtayo ken Jehova ti aniaman a pakarigatantayo. Usigentayo ti indagadag ni apostol Pablo nga aramidentayo mainaig iti daytoy a banag. (Basaenyo ti Filipos 4:6, 7.) Ania ti maaramidan ti kasta a napasnek a kararag? ‘Ti talna ti Dios a mangringbaw iti isuamin a panunot saluadannanto dagiti pusotayo ken dagiti pannakabalin ti isiptayo babaen ken Kristo Jesus.’
11. Kasano a “ti talna ti Dios” salaknibanna ti puso ken isiptayo?
11 Makatulong kadi ti kararag a mangbalbaliw iti kasasaadyo? Mabalin. Ngem masapul a bigbigentayo a saan a kanayon a sungbatan ni Jehova dagiti kararagtayo iti pamay-an a namnamaentayo. Kaskasdi, makatulong ti kararag tapno mataginayontayo ti kinatimbengtayo ken saantay a sumuko iti sidong dagiti pakarigatan. “Ti talna ti Dios” pakalmaenna ti isiptayo no maringringgorantayo kadagiti pakarigatan. Kas iti maysa a buyot dagiti soldado a naisaad a mangsalaknib iti siudad manipud kadagiti rumaut a kabusor, “ti talna ti Dios” salaknibanna ti puso ken isiptayo. Ikkatenna met ti panagduadua, panagbuteng, ken negatibo a panagpampanunot, ken tulongannatayo a saan nga agtignay a sidadarasudos ken di nainsiriban.—Sal. 145:18.
12. Iyilustraryo no kasano a maaddaan ti tao iti talna ti panunot.
12 Kasano a maaddaantayo iti talna ti panunot uray agpaspasartayo kadagiti pakarigatan? Usigenyo ti maysa nga ilustrasion nga umarngi iti kasasaadtayo. Nalabit a ti maysa nga empleado adda nauyong a manedyerna. Nupay kasta, ti empleado nakasarak iti gundaway a mangyebkas iti riknana iti maysa a naasi ken mannakaawat a makinkukua iti kompania. Impanamnama ti makinkukua a maawatanna ti kasasaad ti empleado ken imbagana a mabiiten a maikkat ti manedyer. Ania ngata ti marikna ti empleado? Gapu ta patienna ti naipanamnama kenkuana ken ammona no ania ti mabiiten a mapasamak, mapabileg ti determinasionna nga agtultuloy uray maipasango iti sumagmamano pay nga agdama a pakarigatan. Umasping iti dayta, ammotayo a maawatan ni Jehova ti kasasaadtayo, ket ipanamnamana kadatayo nga asidegen a ‘maparuar ti agturay iti daytoy a lubong.’ (Juan 12:31) Anian a makaliwliwa dayta!
13. Malaksid iti panagkararag, ania pay ti nasken nga aramidentayo?
13 No kasta, umdas kadin a basta ikararagtayo ken Jehova dagiti parikuttayo? Saan. Adda pay kasapulan nga aramidentayo. Masapul nga agtignaytayo a maitunos kadagiti kararagtayo. Idi nangibaon ni Ari Saul kadagiti lallaki a mangpapatay ken David, inkararag ni David: “Ispalennak kadagiti kabusorko, O Diosko; kadagidiay tumakder a bumusor kaniak salaknibannak koma. Ispalennak kadagiti managaramid iti makapasakit, ket kadagiti tattao a nakabasol iti dara isalakannak.” (Sal. 59:1, 2) Malaksid iti panagkararag ni David, impangagna ti imbaga ni baketna ket naglibas. (1 Sam. 19:11, 12) Umasping iti dayta, mabalintayo nga ikararag ti praktikal a sirib a makatulong kadatayo a mangdaer ken nalabit mangpalag-an iti narigat a kasasaadtayo.—Sant. 1:5.
No Kasano a Maaddaantayo iti Bileg nga Agibtur
14. Ania ti makatulong kadatayo nga agibtur iti sidong ti pakarigatan?
14 Mabalin a saan a maikkat a dagus dagiti pakarigatantayo. Mabalin nga agtultuloyda iti sumagmamano pay a tiempo. Ngarud, ania ti makatulong kadatayo nga agibtur? Umuna, laglagipentayo a no agtultuloytayo nga agserbi ken Jehova iti laksid dagiti pakarigatan, pampaneknekantayo nga ay-ayatentayo ti Dios. (Ara. 14:22) Laglagipentayo ti akusasion ni Satanas mainaig ken Job: “Agpaay aya iti awan kapapay-anna a ni Job nagbuteng iti Dios? Saan aya a sika nangikabilka iti alad iti aglikmutna ken iti aglikmut ti balayna ken iti aglikmut ti tunggal banag nga adda kenkuana iti intero nga aglawlaw? Ti aramid dagiti imana binendisionam, ket dagiti met laeng dinguenna nagwaras a sisasaknap iti daga. Ngem, kas pamaliwan, iyunnatmo ta imam, pangngaasim, ket sagidem ti isuamin nga adda kenkuana ket kitaem no saannakanto nga ilunod ita mismo a rupam.” (Job 1:9-11) Babaen ti panagtalinaed ni Job a natarnaw, pinaneknekanna nga ulbod dayta nga akusasion. No agibturtayo iti sidong dagiti narigat a kasasaad, adda met gundawaytayo a mangpaneknek nga ulbod ni Satanas. Malaksid iti dayta, ad-adda a patibkerenna ti panagtalek ken namnamatayo.—Sant. 1:4.
15. Ania dagiti kapadasan a mabalin a mangpabileg kadatayo?
15 Maikadua, laglagipenyo a “ti isu met laeng a bambanag a sagsagabaen maitungtungpalda iti intero a timpuyog ti kakabsatyo ditoy lubong.” (1 Ped. 5:9) Wen, “awan ti sulisog a nangkemmeg kadakayo malaksid iti kadawyan kadagiti tattao.” (1 Cor. 10:13) Ad-adda a mapabileg ken tumuredkayo no utobenyo ti kapadasan dagiti dadduma nga adipen ti Dios imbes a dagiti pakarigatanyo laeng ti pampanunotenyo. (1 Tes. 1:5-7; Heb. 12:1) Iwayaanyo nga utoben ti kapadasan dagiti am-ammoyo a nagtalinaed a matalek iti laksid dagiti nakaro a rigat. Nagsukimatkayo kadin kadagiti naipablaak a kapadasan nga umasping iti mapaspasaranyo? Talaga a makapabileg dagita no basaenyo.
16. Kasano a mapabilegnatayo ti Dios no maipasangotayo kadagiti nagduduma a pakasuotan?
16 Maikatlo, laglagipenyo a ni Jehova ‘ti Ama dagiti nadungngo nga asi ken ti Dios ti amin a liwliwa, a mangliwliwa kadatayo iti amin a rigattayo, tapno mabalinantayo a liwliwaen dagidiay adda iti aniaman a kita ti rigat babaen ti liwliwa a pinangliwliwa kadatayo ti Dios.’ (2 Cor. 1:3, 4) Arigna a sitatakder ti Dios iti sibaytayo tapno paregtaen ken pabilgennatayo, saan laeng a kadagiti agdama a pakarigatantayo no di ket ‘iti amin a rigattayo.’ Daytoy ti tumulong kadatayo a mangliwliwa kadagiti dadduma “iti aniaman a kita ti rigat.” Napaneknekan a mismo ni Pablo a pudno dagitoy a sasao.—2 Cor. 4:8, 9; 11:23-27.
17. Kasano a matulongannatayo ti Biblia a mangsaranget kadagiti pakarigatan iti biag?
17 Maikapat, magun-odantayo ti Sao ti Dios, ti Biblia, a “makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” (2 Tim. 3:16, 17) Saannatay laeng a pagbalinen a “makabael” ken “nakabalan maipaay iti tunggal naimbag nga aramid.” Tulongannatayo pay a mangsaranget kadagiti pakarigatan iti biag. Pagbalinennatayo a ‘naan-anay a makabael’ ken “naan-anay a nakabalan.” Ti orihinal a lenguahe a naipatarus a “naan-anay a nakabalan” literal a kaipapananna “kompleto kadagiti kagawaan.” Nalabit a nausar daytoy a termino idi nagkauna a tiempo mainaig iti bangka a kompleto kadagiti amin a kasapulan para iti panaglayag wenno mainaig iti maysa a makina nga epektibo iti aniaman a pakausaranna. Umasping iti dayta, ipapaay ni Jehova babaen ti Saona ti amin a kasapulantayo tapno matamingtayo ti aniaman a maipasango kadatayo. No kasta, maikunatayo, “Babaen ti tulong ti Dios, kabaelak ti aniaman a rigat nga ipalubosna.”
Pannakaispal Manipud iti Amin a Pakarigatantayo
18. Ania pay ti makatulong kadatayo nga agtalinaed a matalek?
18 Maikalima, kanayon a laglagipenyo ti makaay-ayo a kinapudno nga asidegen a bang-aran ni Jehova ti sangatauan manipud iti amin a pakarigatan. (Sal. 34:19; 37:9-11; 2 Ped. 2:9) Kamaudiananna, saannatay laeng nga ispalen ti Dios manipud kadagiti agdama a pakarigatan no di ket ikkannatay pay iti namnama nga agbiag nga agnanayon, idiay langit man a kadua ni Jesus wenno iti paraiso a daga.
19. Kasano a makapagtultuloytayo a matalek?
19 Ngem iti agdama, masapul nga itultuloytayo nga ibturan dagiti narigat a kasasaad iti daytoy dakes a lubong. Anian a panangseggatayo iti tiempo inton mapukawen dagitoy a pakarigatan! (Sal. 55:6-8) Ditay liplipatan a ti panagtalinaedtayo a matalek paneknekanna nga ulbod ti Diablo. Makapabileg kadatayo dagiti kararagtayo ken dagiti Kristiano a kakabsat, bayat a silalagiptayo a mapaspasaranda met dagiti pakasuotan nga umasping kadagiti pakarigatantayo. Itultuloyyo ti agbalin a naan-anay a makabael ken nakabalan babaen ti umiso a panangusar iti Sao ti Dios. Diyo ipalubos a kumapuy ti panagtalekyo iti naayat a panangaywan nga ipapaay “ti Dios ti amin a liwliwa.” Laglagipenyo a “dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.”—Sal. 34:15.
Ania ti Sungbatyo?
• Ania ti narikna ni David maipapan kadagiti pakarigatanna?
• Iti ania a sikokompiansa a nagtalek ni Ari Solomon?
• Ania ti makatulong kadatayo a mangdaer iti aniaman a pakarigatan nga ipalubos ni Jehova?
[Ladawan iti panid 13]
Agtalek ni Solomon a tulongan ni Jehova dagiti marigrigatan nga adipenna
[Ladawan iti panid 15]
Ni David inkararagna ken Jehova dagiti pakaringgoranna sa nagtignay a maitunos iti kararagna