Mapaspasungadanen ti Paraiso a Daga!

“Amami sadi langit: madaydayaw koma ti nasantuan a naganmo; umay koma ti Pagariam. Matungpal koma ti pagayatam ditoy daga a kas sadi langit.”​—Mateo 6:9, 10, Ti Baro a Naimbag a Damag Biblia.

DAYTA a nalatak a kararag a pagaammo ti kaaduan kas ti Amami wenno Kararag ti Apo ket mangipapaay iti namnama iti sangatauan. Kasano?

Kas ipalgak ti Kararag ti Apo, ti Pagarian ti Dios ti mangitungpal iti pagayatan ti Dios ditoy daga no kasano a sigurado a maar-aramiden dayta idiay langit. Pagayatan ti Dios a pagbalinenna manen a Paraiso daytoy dagatayo. (Apocalipsis 21:1-5) Ania a talaga ti Pagarian ti Dios, ken kasano a pagbalinennanto manen a Paraiso ti daga?

Pudpudno a Gobierno

Ti Pagarian ti Dios ket pudpudno a gobierno. Tapno agkurri ti maysa a gobierno, masapul nga addaan dayta kadagiti agturay, linlinteg, ken iturayan. Ti aya Pagarian ti Dios ket addaan kadagita? Imutektekam ti sungbat ti Biblia kadagiti sumaganad a tallo a saludsod:

Siasino dagiti agturay iti Pagarian ti Dios? (Isaias 33:22) Dinutokan ni Jehova a Dios ti Anakna a ni Jesu-Kristo a mangituray iti Pagarian. (Mateo 28:18) Babaen ti panangiwanwan ni Jehova, nangpili ni Jesus iti limitado a bilang dagiti tattao manipud iti “tunggal tribu ken pagsasao ken ili ken nasion” a makipagturayto kenkuana “kas ar-ari iti daga.”​—Apocalipsis 5:9, 10.

Aniada a linteg ti inaramid ti Pagarian ti Dios nga annuroten dagiti iturayanna? Ti dadduma kadagiti linteg wenno bilin ket ipakalikagumda nga adda dagiti masapul nga aramiden dagiti iturayan ti Pagarian ti Dios. Dinakamat ni Jesus ti kangrunaan kadagita a linteg idi a kinunana: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’”​—Mateo 22:37-39.

Ti dadduma pay a linteg ket ipakalikagumda nga adda dagiti masapul a di aramiden dagiti iturayan ti Pagarian ti Dios. Kas pagarigan, nalawag a kunaen ti Biblia: “Dikay payaw-awan. Uray dagiti mannakiabig, wenno dagiti managrukbab iti idolo, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki, wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.”​—1 Corinto 6:9, 10.

Siasino dagiti iturayan ti Pagarian ti Dios? Inyarig ni Jesus dagiti iturayan ti Pagarian ti Dios kas karnero. Kinunana: “Imdengandanto ti timekko, ket agbalindanto a maymaysa nga arban, maymaysa a pastor.” (Juan 10:16) Tapno ti maysa ket maibilang nga iturayan ti Pagarian, saanna laeng a basta kunaen a sursurotenna ti Nasayaat a Pastor, no di ket ar-aramidenna pay dagiti bilin ti pastor. Kinuna ni Jesus: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.”​—Mateo 7:21.

Gapuna, dagidiay iturayan ti Pagarian ti Dios us-usaren ken idaydayawda ti nagan ni Jehova, kas iti inaramid ni Jesus. (Juan 17:26) Tungtungpalenda met ti bilin ni Jesus nga isuroda kadagiti dadduma ti maipapan iti “daytoy naimbag a damag ti pagarian.” (Mateo 24:14; 28:19, 20) Ken ipakpakitada ti napaypayso nga ayat iti maysa ken maysa.​—Juan 13:35.

‘Pannakadadael Dagidiay Mangdaddadael iti Daga’

Ipampamatmat dagiti agdama a kasasaad iti lubong nga asidegen nga agtignay ti Pagarian ti Dios tapno iyegna dagiti dadakkel a panagbalbaliw ditoy daga. Kasanotay nga ammo dayta? Dua ribu a tawenen ti napalabas, dineskribir ni Jesus ti aduan-paset a pagilasinan a mangipasimudaag a “ti pagarian ti Dios asidegen.” (Lucas 21:31) Kas nadakamat iti immun-una nga artikulo, nalawag a makitkitan iti intero a lubong ti kaitungpalan dagiti paset dayta a pagilasinan.

Ania ti sumaruno? Kinuna ni Jesus: “Iti kasta addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen.” (Mateo 24:21) Dayta a rigat ket saan a gapuanan ti tao. Imbes ketdi, aramidento dayta ti Dios ‘tapno dadaelenna dagidiay mangdaddadael iti daga.’ (Apocalipsis 11:18) ‘Magessatto iti mismo a daga’ dagidiay nadangkes a tattao a gapu kadagiti inaagum nga aramidda, agpegpeggad a madadael ti planetatayo. Ngem “mateddanto iti dayta” dagidiay awanan pakababalawan ken dagidiay agserserbi iti Dios iti wagas nga anamonganna.​—Proverbio 2:21, 22.

Nainkalintegan laeng nga aramiden ni Jehova a Dios dagita a dadakkel a panagbalbaliw. Apay? Usigem daytoy nga ilustrasion: Ipapantayon nga adda ipapaabangmo a bassit nga apartment. Nasingpet ken nakonsiderar ti sumagmamano nga agab-abang iti dayta; agbaybayadda ken ay-aywananda a naimbag ti pagnanaedanda. Nupay kasta, manangriribuk ken naagum ti dadduma; saanda nga agbaybayad ken daddadaelenda ti apartmentmo. Uray no namin-adun a pinakdaaram ida, itultuloyda latta dagiti di umiso nga ar-aramidenda. Ania ngay ti aramidem? Kas makinkukua iti apartment, sigurado la ketdi a papanawem dagiti agab-abang a di nasayaat ti kababalinda.

Umasping iti dayta, adda kalintegan ni Jehova a Dios a mangikeddeng no siasino dagiti ipalubosna nga agnaed iti planetatayo agsipud ta isu ti Namarsua iti daga ken iti isuamin nga adda iti dayta. (Apocalipsis 4:11) Kinuna ni Jehova a panggepna nga ikisap ditoy daga dagiti nadangkes a tattao a mangilaklaksid iti pagayatanna ken di mangikabkabilangan kadagiti kalintegan dagiti sabsabali.​—Salmo 37:9-11.

Panagbalin Manen ti Daga a Paraiso

Ti daga ket asidegen nga iturayan ti Pagarian ti Dios babaen ken Jesu-Kristo. Inawagan ni Jesus daytoy baro a pangrugian kas “ti pannakapabaro ti amin a banag.” (Mateo 19:28, New International Version) Anianto dagiti kasasaad iti paraiso a daga? Imutektekam dagiti sumaganad a kari a nailanad iti Biblia:

Salmo 46:9. “Pagsardengenna dagiti gubat agingga iti ungto ti daga.”

Isaias 35:1. “Ti let-ang ken ti awanan danum a rehion agragsakdanto, ket ti desierto a tanap agrag-onto ken agsabong a kas iti safron.”

Isaias 65:21-23. “Ti aramid dagiti bukodda nga ima usarento a naan-anay dagidiay pinilik. Saandanto nga agbannog iti awan kapapay-anna, saandanto met a mangyanak maipaay iti riribuk.”

Juan 5:28, 29. “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.”

Apocalipsis 21:4. “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”

Dagiti Panggapuantayo a Mamati

Mamatika kadi kadagiti kari ti Dios a nailanad iti Biblia? Impakpakauna ti Biblia nga adu ti saan a mamati kadagita. Kinunana: “Kadagiti maudi nga aldaw umayto dagiti managuy-uyaw . . . nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.’” (2 Pedro 3:3, 4) Ngem agbiddut unay dagita a managuy-uyaw. Usigem ti uray uppat laeng a makagapu no apay a mabalinmo a patien ti ibagbaga ti Biblia:

(1) Bimmallaet ti Dios maibusor kadagiti aramid dagiti managdakdakes ditoy daga idi un-unana. Ti Layus idi kaaldawan ni Noe ti maitutop unay a pagarigan.​—2 Pedro 3:5-7.

(2) Siuumiso nga impadto ti Sao ti Dios a mapasamak dagiti agdama a kasasaad iti lubong.

(3) Amin a bambanag ket saan a “nagtultuloy nga isu latta nanipud idi panangrugi ti sangaparsuaan.” Ita pay la a mapaspasamak iti sangatauan ti awan kaaspingna a nakirokiro a kasasaad iti kagimongan, iyaadu dagiti agar-aramid iti imoralidad, ken pannakadadael ti aglawlaw.

(4) Ti “naimbag a damag ti pagarian” ket maikaskasaban iti intero a daga, a mangipasimudaag nga asidegen nga ‘umay ti panungpalan.’​—Mateo 24:14.

Awisendaka dagiti Saksi ni Jehova a makipagadal kadakuada iti Biblia a Sao ti Dios tapno ad-adu pay ti maammuam maipapan iti namnama a biag nga agnanayon iti sidong ti panagturay ti Pagarian ti Dios. (Juan 17:3) Wen, nagsayaat a masanguanan ti agur-uray kadatayo. Asidegen ti kasayaatan pay laeng a tiempo! Maysakanto kadi kadagiti mangtagiragsak iti daytoy a masanguanan?

[Blurb iti panid 7]

Agbiddut unay dagiti agkunkuna nga awan namalbaliwan dagiti bambanag

[Ladawan iti panid 8]

Maysakanto kadi kadagiti mangtagiragsak iti daytoy a masanguanan?