Panangilukat iti Pasilidad nga Addaan Panggep
“ANIA ngata ti ar-aramidenda dita?” Dayta ti saludsod ti adu a makakitkita iti naglawa a pasilidad dagiti Saksi ni Jehova idiay Mogale City (Krugersdorp) iti asideg ti Johannesburg, South Africa. Gapuna, idi Oktubre 12 ken 13, 2007, linuktan dagiti Saksi ti pasilidadda para iti publiko. Dua ti panggepna—tapno maikkat ti di umiso a pagarup ken tapno maipakita iti publiko no kasano nga itungtungpal ti sanga nga opisina ti trabaho nga imbilin ni Jesu-Kristo.—Mateo 28:19, 20.
Iti pagserkan, dagiti agserserbi iti sanga nga opisina nangikabilda kadagiti dadakkel a karatula a mangabrasa iti publiko. Nagiwarasda met kadagiti espesial nga imbitasion iti sangakaarrubaan. Naawis pay dagiti am-ammoda a negosiante agraman dagiti pamiliada. Ania ti resultana? Nasurok a 500 a saan a Saksi ti pimmasiar iti dayta a pasilidad.
Adu ti naginteres iti MAN Roland Lithoman a makayimprenta iti 90,000 a magasin iti kada oras. Makaatrakar met kadagiti bisita ti lugar a pagimpakean kadagiti nasurok a 14 a tonelada a literatura a maipatulod iti inaldaw, kasta met iti pagaramidan iti libro. Dagiti Saksi kadagiti nadumaduma a departamento nangisaganada kadagiti makaallukoy a displey a pakairamanan ti pakasaritaan ti panagimprenta, manipud iti Gutenberg agingga iti moderno a litho-offset. Intampok ti sabali pay a displey no kasano nga ikabkabilangan ti sanga nga opisina ti pannakataginayon ti nadalus nga aglawlaw. Kas pagarigan, adda naisangsangayan a makina a mangikkat kadagiti makasabidong a gas ken angot ken mangsagat kadagiti tapuk manipud kadagiti pagimprentaan.
Sigun iti artikulo ti maysa a lokal a pagiwarnak, dagiti 700 a boluntario iti dayta a pasilidad “ket ordinado a ministro a nangidedikar iti bagida ken Jehova.” Dinakamatna pay ti “kasta unay a kinadalimanek ken naintiempuan a pannakairingpas dagiti bambanag” iti pagimprentaan. Maysa a lalaki a bumusbusor kadagiti Saksi ni Jehova ti pimmasiar ket kinunana iti suratna kalpasanna: “Mapadayawankayo unay. Saan a gagangay ti kasta a kadakkel a nagsayaat a gapuanan.”
Adu a bisita ti nangapresiar iti naimatanganda kadagiti pasilidad. Nasdaawda a nakakita a ti sanga nga opisina ket addaan kadagiti naibatay-Biblia a literatura iti 151 a lenguahe ken mangyim-imprenta kadagiti publikasion nga agpaay iti 18 a pagilian iti makin-abagatan ken makintengnga nga Africa. Dagiti pasilidad ti sanga nga opisina dagiti Saksi ni Jehova iti intero a lubong ket mabalin a pasiaren kabayatan ti oras ti trabaho. Apay a diyo imtuoden iti sanga nga opisina iti lugaryo no kaano ti mabalin a panagpasiar iti dayta a pasilidad?
[Ladawan iti panid 14]
Imbitasion
[Ladawan iti panid 14]
Dagiti agsangpet nga agpasiar iti sanga nga opisina
[Dagiti Ladawan iti panid 15]
Ti sanga nga opisina idiay Mogale City, South Africa
[Ladawan iti panid 15]
Ti MAN Roland Lithoman web-offset a pagimprentaan
[Ladawan iti panid 15]
Pagaramidan iti libro
[Ladawan iti panid 15]
Pagimpakean kadagiti literatura