Ti Masursurotayo ken Jesus

Maipapan iti Namnama Para Kadagiti Natay

Di kumurang a tallo a tattao ti pinagungar ni Jesus. Dayta ti mangipakita nga adda namnama para kadagiti natay. (Lucas 7:11-17; 8:49-56; Juan 11:1-45) Tapno maawatantayo ti namnama para kadagiti natay, nasken a matarusantayo nga umuna ti makagapu ken nangrugian ti ipapatay.

Apay nga Agsakit ken Mataytayo?

Immimbag dagiti tattao idi pinakawan ni Jesus ti basbasolda. Kas pagarigan, kastoy ti kinuna ni Jesus idi adda paralisado a lalaki nga inyegda kenkuana: “‘Ania ti nalaklaka, ti panangikuna, Mapakawan dagiti basolmo, wenno ti panangikuna, Bumangonka ket magnaka? Nupay kasta, tapno maammuanyo a ti Anak ti tao addaan autoridad ditoy daga a mangpakawan kadagiti basol​—’ idin kinunana iti paralitiko: ‘Bumangonka, bagkatem ta pagiddaam, ket agawidka iti pagtaengam.’” (Mateo 9:2-6) No kasta, ti basol ti makagapu nga agsakit ken mataytayo. Ti natawidtayo a kinamanagbasol ket nangrugi iti umuna a tao a ni Adan.​—Lucas 3:38; Roma 5:12.

Apay a Natay ni Jesus?

Pulos a di nagbasol ni Jesus isu a saan a rumbeng a matay. Ngem babaen ti ipapatayna maipuon kadatayo, binayadanna ti basbasoltayo. Kinunana a ti darana “maiparukpok maigapu iti adu maipaay iti pannakapakawan dagiti basol.”​—Mateo 26:28.

Kastoy pay ti imbaga ni Jesus: “Ti Anak ti tao immay, saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” (Mateo 20:28) Ti imbayad ni Jesus ket inawaganna a “subbot” gapu ta dayta ti nangwayawaya iti sabsabali manipud ken patay. Kinuna pay ni Jesus: “Immayak tapno maaddaanda iti biag ket siwawadwad a maaddaanda iti dayta.” (Juan 10:10) Tapno naan-anay a maawatantayo ti namnama para kadagiti natay, nasken nga ammotayo met ti agdama a kasasaadda.

Ania ti Mapasamak no Matay ti Tao?

Idi natay ni Lazaro a gayyem ni Jesus, dineskribir ni Jesus no ania ti mapasamak no matay ti tao. Kinunana kadagiti adalanna: “‘Ni Lazaro a gayyemtayo napan naginana, ngem agbaniagaak [idiay Betania] tapno riingek manipud pannaturogna.’ . . . Ngem impagarupda a nagsasao maipapan ti panaginana iti pannaturog. Iti dayta a tiempo, ngarud, sipaprangka a kinuna kadakuada ni Jesus: ‘Ni Lazaro natayen.’” Gapuna, pinagminar ni Jesus a dagiti natay ket matmaturog ken awananda iti puot.​—Juan 11:1-14.

Uppat nga aldawen a natay ni Lazaro idi pinagungar ti gayyemna a ni Jesus. Nupay kasta, awan ti nailanad iti Biblia a dinakamat ni Lazaro maipapan iti kapadasanna bayat nga isu ket natay. Ngamin, awan ti puotna ken awanen a pulos ti ammona.​—Eclesiastes 9:5, 10; Juan 11:17-44.

Ania ti Namnama Para Kadagiti Natay?

Mapagungarto dagiti natay ket addaandanto iti namnama nga agbiag nga agnanayon. Kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus].”​—Juan 5:28, 29.

Daytoy a namnama ket ebkas ti ayat ti Dios. Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:16; Apocalipsis 21:4, 5.

Para iti kanayonan nga impormasion, kitaem ti kapitulo 6 ti libro nga Ania a Talaga ti Isursuro ti Biblia?a

[Footnote]