Ni Kadi Jesus ti Mannakabalin-amin a Dios?
Dagiti gagangay a sungbat:
▪ “Wen, ni Jesus ti Mannakabalin-amin a Dios.”
▪ “Ni Jesus ti naglasag a Dios.”
Ania ti insuro ni Jesus?
▪ “No inayatdak, agrag-okayo ta mapanak iti Ama, agsipud ta ti Ama dakdakkel ngem siak.” (Juan 14:28) Bigbigen ni Jesus a saanda nga agpada ken Amana.
▪ “Umuliak ken Amak ken Amayo ken iti Diosko ken Diosyo.” (Juan 20:17) Saan a tinukoy ni Jesus ti bagina kas ti Dios no di ket tinukoyna ti Dios kas naiduma a Persona.
▪ “Saanak a nagsao iti bukodko a pannakatignay, no di ket ti met laeng Ama a nangibaon kaniak inikkannak iti bilin maipapan iti ibagak ken iti sawek.” (Juan 12:49) Saan a naggapu ken Jesus dagiti pannursurona no di ket naggapu ken Amana.
KINUNA ni Jesus nga isu ti Anak ti Dios, imbes a ti Mannakabalin-amin a Dios. No ni Jesus ti Dios, asino koma daydiay nagkararaganna idi adda ditoy daga? (Mateo 14:23; 26:26-29) Imposible nga aginkukuna laeng ni Jesus nga adda kasarsaritana!
Idi kiniddaw ti dua nga adalan ni Jesus a maikkanda iti naisangsangayan a posision iti Pagarianna, insungbatna: “Daytoy panagtugaw iti makannawanko ken iti makannigidko saanko a biang ti mangipaay, no di ket kukua dayta dagidiay nangisaganaan ni Amak.” (Mateo 20:23) Agul-ulbod kadi ni Jesus idi kinunana nga awan ti autoridadna tapno patganna ti kiddawda? Saan! Imbes ketdi, sipapakumbaba a binigbigna a ti laeng Dios ti addaan iti autoridad a mangaramid kadagiti kasta a desision. Inlawlawag pay ni Jesus nga adda dagiti bambanag a dina ammo ken di ammo dagiti anghel no di laeng ni Amana.—Marcos 13:32.
Idi laeng kadi nagbalin a tao ni Jesus nga isu ket nababbaba ngem iti Dios? Saan. Uray kalpasan ti ipapatay ken panagungarna, ibaga ti Biblia a nababbaba ni Jesus ngem iti Dios. Ipalagip kadatayo ni apostol Pablo a ti “Dios ket nangatngato ngem ni Kristo.” (1 Corinto 11:3, Today’s English Version) Ibaga ti Biblia nga iti masanguanan “inton maikabil ti amin a banag iti babaen ti turay ni Cristo, paiturayanto ti Anak iti Dios a nangikabil iti amin iti babaenna. Ket naan-anayto ti panangituray ti Dios iti amin.”—1 Corinto 15:28, Ti Baro a Naimbag a Damag Biblia.
Nalawag a saan a ni Jesus ti mannakabalin-amin a Dios. Dayta ti makagapu a tinukoyna ti Amana kas “Diosko.”—Apocalipsis 3:2, 12; 2 Corinto 1:3, 4.a
[Footnote]
a Para iti kanayonan nga impormasion iti daytoy a suheto, kitaenyo ti panid 201-204 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.
[Blurb iti panid 7]
Kinuna ni Jesus nga adda dagiti bambanag a dina ammo ken di ammo dagiti anghel no di laeng ni Amana