Saludsod Dagiti Agbasbasa

Gapuanan Kadi ti Dios ti Amin a Namilagruan a Panangpaimbag?

Awan duadua nga addaan ni Jehova a Dios iti pannakabalin a mangpaimbag. Sigurado a maipaayna met dayta a pannakabalin kadagiti agdaydayaw kenkuana. Kas pagarigan, idi kaaldawan dagiti apostol, ti namilagruan a panangpaimbag ket maysa kadagiti naisangsangayan a sagut ti nasantuan nga espiritu ti Dios. Insurat ni apostol Pablo: “Ti panangiparangarang ti espiritu maited iti tunggal maysa maipaay iti makagunggona a panggep. Kas pagarigan, babaen ti espiritu naited iti maysa ti panagsao iti kinasirib, . . . iti sabali sagsagut kadagiti panangpaimbag babaen iti dayta maymaysa nga espiritu, . . . iti sabali panagipadto, . . . iti sabali nadumaduma a pagsasao.”​—1 Corinto 12:4-11.

Nupay kasta, imbaga pay ni Pablo iti dayta met la a suratna kadagiti taga-Corinto nga agpatingganto dagiti namilagruan a sagut ti nasantuan nga espiritu. Kinunana: “Ngem uray no adda sagsagut ti panagipadto, mapukawdanto; uray no adda dagiti pagsasao, agsardengdanto; uray no adda pannakaammo, mapukawto.”​—1 Corinto 13:8.

Idi umuna a siglo, simimilagro a nangpaimbag ni Jesu-Kristo ken dagiti apostolna. Iti dayta a tiempo a kabbuangay ti kongregasion Kristiano, dagiti sagut ti espiritu a pakairamanan ti abilidad a mangpaimbag ket agpaay a pakaidayawan ti Dios. Pagilasinan met dagita nga an-anamongan ken bembendisionan ni Jehova ti kabbaro a kongregasion Kristiano. Ngem idi bumaybayagen, wenno narang-ayen dayta, imbes a mausar dagiti naisangsangayan a sagut kas pammaneknek iti anamong ti Dios, ti pammati, namnama ken ayat ti pakakitaanen iti anamong ti Dios iti dayta. (Juan 13:35; 1 Corinto 13:13) Gapuna, idi agarup 100 K.P., nagpatinggan dagiti namilagruan a panangpaimbag kas pagilasinan iti anamong ti Dios.a

Ngem mabalin a maisaludsodmo, ‘Apay nga adda pay laeng dagiti madamdamagko a namilagruan a panangpaimbag?’ Kas pagarigan, adda pagiwarnak a nangipadamag iti maysa a lalaki nga addaan kano iti kanser. Adda tumorna iti ulo, kadagiti bato, ken uray iti uneg dagiti tulangna. Kasla awanen ti namnamana agingga a “nakisarita” kenkuana ti Dios. Sumagmamano nga aldaw kalpasanna, kuna ti padamag nga awanen ti kanserna.

No makadamagka iti kasta, apay a dimo iyimtuod iti bagim: ‘Agpayso ngata dayta? Adda kadi napasingkedan nga ebidensia iti medisina a mangpaneknek iti ibagbaga dayta a tao? Ken uray no kasla immimbag, isursuro kadi ti Biblia a ti Dios ti makinggapuanan iti amin a kasla namilagruan a panangpaimbag?’

Nagpateg ti sungbat iti dayta a maudi a saludsod. Pinakdaaran ni Jesus dagiti pasurotna: “Siputanyo dagiti ulbod a mammadto . . . Adunto ti agkuna kaniak iti dayta nga aldaw, ‘Apo, Apo, saankami aya a nagipadto iti naganmo, ken nangparuar kadagiti sairo iti naganmo, ken nagaramid iti adu a mannakabalin nga aramid iti naganmo?’ Ket kaskasdi nga iti dayta ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.”​—Mateo 7:15, 21-23.

Imbes a ti Dios, nabatad a sabali ti mabalin a makinggapuanan kadagiti makunkuna a namilagruan a panangpaimbag. Tapno didatay maallilaw dagiti agkunkuna a mangpapaimbagda babaen iti nagan ti Dios, nasken a gun-odentayo ti umiso a pannakaammo maipapan iti Dios, usarentayo ti inted-Dios nga abilidadtayo nga agrason, ken ammuentayo no siasino dagiti mangar-aramid iti pagayatanna.​—Mateo 7:16-19; Juan 17:3; Roma 12:1, 2.

[Footnote]