Masarakam Kadi ti Talna iti Daytoy Nariribuk a Lubong?
NATALNA kadi ti biagmo? Para iti adu, nalawag a ti sungbat ket saan. Agnanaedda kadagiti lugar a maap-apektaran iti gubat, napolitikaan a riribuk, panagririnnanggas dagiti di agkakatribu, wenno terorismo. Uray no dimo mapaspasaran dagita a kasasaad, nalabit saan latta a natalna ti riknam gapu iti krimen, panangriribuk, ken diyo pagkikinnaawatan kadagiti kasosiom iti negosio wenno kadagiti kaarrubam. Masansan met nga agaapa ti adu nga agkakapamilia imbes nga agkikinnappiada.
Tarigagayan ti adu a tattao ti natalna a rikna. Mabalin a birbirokenda dayta babaen iti pannakimiembro iti relihion, panag-yoga, wenno itatabuno kadagiti seminar a mangisuro iti meditasion. In-inanamaen ti dadduma a masarakanda dayta babaen ti panagbakasion, iyuuli iti kabambantayan ken panagpasiar kadagiti nasulinek a lugar, wenno kadagiti disso nga ayan dagiti natural a napudot nga ubbog. Uray no kasla naaddaanda iti natalna a rikna, mabalin nga inton agangay, maamirisda a saan gayam a pudpudno a makapnek ken saan nga agpaut dayta.
Pakasarakam ngarud iti pudpudno a talna? Ti gubuayan ti talna ket ti Namarsua kadatayo a ni Jehova a Dios. Apay? Isu “ti Dios a mangipaay iti talna.” (Roma 15:33) Babaen ti asidegen a panagturay ti Pagarianna, addanto “kinaruay ti talna.” (Salmo 72:7; Mateo 6:9, 10) Adayo nga amang a nasaysayaat daytoy ngem iti aniaman a tulagan ti kappia dagiti tattao. Dagita a tulagan ket masansan nga agresulta iti apagbiit laeng a pannakaisardeng dagiti rinnupak. Ngem ti talna ti Dios ikkatenna ti amin a pakaigapuan ti gubat ken binnusor. Kinapudnona, awanton ti agsursuro a makigubat. (Salmo 46:8, 9) Masagrapton ti amin ti pudpudno a talna!
Nupay nagsayaat dayta a namnama, kaskasdi a kayatmo ti maaddaan itan iti talna. Adda kadi pamay-an tapno maaddaanka iti natalna a rikna bayat nga agbibiagka iti daytoy nariribuk a tiempo? Makaparagsak ta isursuro ti Biblia no kasano ti maaddaan iti kasta a talna. Usigem ti sumagmamano a pagannurotan iti maikapat a kapitulo ti surat ni apostol Pablo kadagiti taga-Filipos. Awisendaka a mangbasa iti bersikulo 4 agingga iti 13 iti mismo a Bibliam.
“Ti Talna ti Dios”
Kastoy ti mabasatayo iti bersikulo 7: “Ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” Dayta a talna ket saan a magun-odan babaen iti basta meditasion wenno panangpasayaat iti personalidadtayo. Imbes ketdi, aggapu dayta iti Dios. Nakabilbileg dayta a talna ta “mangringbaw iti isuamin a panunot.” Talaga a parmekenna ti amin a pakaringgorantayo, ken artapanna ti pannakaammo ken panagrasrasontayo. Mabalin a ditay marisut dagiti parikuttayo, ngem ti talna ti Dios ikkannatayo iti sigurado a namnama nga addanto aldaw a mapukaw amin dagita.
Imposible kadi? No iti tao, wen; ngem “amin a bambanag mabalin iti Dios.” (Marcos 10:27) Ti pammati ken panagtalek iti Dios tulongannatayo a di unay masikoran kadagiti pakaringgorantayo. Panunotem ti maysa nga ubing a nayaw-awan iti nalawa a tiendaan. Sigurado nga ammona a ti laeng nasken nga aramidenna ket birokenna ni nanangna tapno mapukaw ti danagna. Inton masarakan, arakupen la ketdi ni nanangna. Kas iti dayta nga ubing, makapagtalektayo met a saranayennatayo ti Dios. Liwliwaen ken tulongannatayo a mangiwaksi iti amin a pakaringgorantayo.
Adu nga agdaydayaw ken Jehova ti naaddaanen iti talna ti Dios kabayatan dagiti karirigatan a pakasuotan. Kas pagarigan, usigem ni Nadine a naalisan. Kinunana: “Marigatanak a mangibaga iti pudno a marikriknak, ken kanayon nga agpammarangak a diak mariribukan. Ngem kinaagpaysuanna, masmasnaayanak. Dandani inaldaw nga umar-ararawak ken Jehova ken ipakpakaasik a tulongannak. Nariknak ti bileg ti kararag ta no malmaldaangak unay ken ipagarupko a diak kabaelanen, agkalma ti riknak ken agtalna ti panunotko isu a diakon mariribukan pay.”
Mangsaluad iti Puso ken Isip
Subliantayo ti Filipos 4:7. Kunana a ti talna ti Dios saluadanna dagiti pusotayo ken dagiti pannakabalin ti isiptayo. Kas iti guardia a mangsaluad iti lugar a bambantayanna, ti talna ti Dios saluadanna ti pusotayo tapno saan a makastrek dagiti materialistiko a kapanunotan, di nainkalintegan a panagdanag, ken dakes a prinsipio. Usigem ti maysa a pagarigan.
Patien ti adu a tattao iti daytoy nariribuk a lubong a tapno agbalinda a naragsak ken natalged, nasken nga aduanda iti kuarta wenno sanikua. Gapu iti balakad dagiti eksperto, mabalin nga iserrekda ti dadduma kadagiti urnongda iti stock market. Talaga kadi a natalged ti riknada no naaramiddan dayta? Saan. Mabalin nga inaldaw a kitaenda ti presio ti stock-da, a pampanunotenda no ilakodan dayta, gumatang pay, wenno agurayda. Inton agsuek ti stock market, aglagawdan. Saan met ketdi a kondenaren ti Biblia ti panagpuonan wenno panagnegosio, ngem daytoy ti nainsiriban a kapaliiwanna: “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul. Daytoy met ket kinaubbaw. Nasam-it ti turog daydiay agserserbi, uray pay no bassit wenno adu ti kanenna; ngem ti aglaplapusanan a kukua daydiay nabaknang saan a mangipalubos kenkuana a maturog.”—Eclesiastes 5:10, 12.
Agngudo ti Filipos 4:7 babaen iti panangibagana a ti talna ti Dios saluadanna dagiti pusotayo ken dagiti pannakabalin ti isiptayo “babaen ken Kristo Jesus.” Ania ti pakainaigan ni Kristo Jesus iti talna ti Dios? Ni Jesus ket addaan iti kangrunaan nga akem iti pannakatungpal ti panggep ti Dios. Inted ni Jesus ti biagna tapno maispalnatayo manipud iti basol ken ipapatay. (Juan 3:16) Isu met ti naitronon nga Ari iti Pagarian ti Dios. Dakkel ti maitulong ti pannakaammotayo iti akem ni Jesus tapno maaddaantayo iti talna iti isip ken puso. Kasano?
No sipapasnek a pagbabawyantayo dagiti basoltayo ken agkiddawtayo iti pammakawan maibatay iti daton ni Jesus, pakawanennatayo ti Dios ket dayta ti makatulong tapno maaddaantayo iti talna iti isip ken puso. (Aramid 3:19) No maamiristayo a satayto la naan-anay a matagiragsak ti biag inton dumteng ti Pagarian nga iturayan ni Kristo, maliklikantayo ti agbiag a kas man la awanen ti nagsayaat a masakbayantayo. (1 Timoteo 6:19) Siempre, makapasartay met latta kadagiti parikut, ngem maliwliwatayo iti sigurado a namnamatayo nga asidegen a dumteng ti kasayaatan a biag.
No Kasanom a Masarakan ti Talna ti Dios
Kasanom ngarud a masarakan ti talna ti Dios? Mangted iti sumagmamano a pamalatpatan ti Filipos 4:4, 5, a pakabasaan iti: “Kankanayon nga agrag-okayo iti Apo. Maminsan pay a kunaek, Agrag-okayo! Ti kinanainkalinteganyo maammuan koma dagiti amin a tattao. Ti Apo asidegen.” Idi insurat ni Pablo dagita a sasao, isu ket di nainkalintegan a naibalud idiay Roma. (Filipos 1:13) Imbes a masnaayan iti linak-amna a di nasayaat a pannakatrato, pinaregtana dagiti kapammatianna a kanayonda nga agrag-o iti Apo. Ti rag-ona ket nalawag a nagpannuray, saan nga iti kasasaadna, no di ket iti relasionna iti Dios. Masapul met a sursuruentayo a tagiragsaken ti panagserbitayo iti Dios aniaman ti kasasaadtayo. No ad-adda nga am-ammotayo ni Jehova ken ad-adda nga aramidentayo ti pagayatanna, ad-adda met a matagiragsaktayo ti agserbi kenkuana. Iti kasta, maaddaantayo iti pannakapnek ken natalna a rikna.
Kanayonanna, maiparparegta kadatayo nga agbalintayo a nainkalintegan. No nainkalintegantayo, saan a nalabes ti namnamaentayo iti bagitayo. Ammotayo nga imperpektotayo; ditay kabaelan ti agbalin a kalaingan iti amin a banag. Isu nga apay koma nga ikagumaantayo ti agbalin a perpekto, wenno uray man la nalalaing ngem iti amin? Ditay met ekspektaren a perpekto ti sabsabali. No kasta, agtalinaedtayo a kalmado uray no adda aramidenda a ditay magustuan. Ti sabali pay a kaipapanan ti orihinal a Griego a sao a naipatarus a “kinanainkalintegan” ket “kinamanagpabus-oy.” No managpabus-oytayo kadagiti personal a banag, maliklikantayo ti apa, a masansan nga awan met ti pagimbaganna no di ket temporario a mangikkat laeng iti talna iti nagbabaetantayo ken iti mismo a panunottayo.
Ti sumaganad a nadakamat iti Filipos 4:5 a “ti Apo asidegen,” ket kasla saan a maitunos iti konteksto. Daytoy daan a sistema ti bambanag ket dandanin pabaruen ti Dios babaen iti Pagarianna. Ngem uray itan, isu ket asideg iti siasinoman nga umadani kenkuana. (Aramid 17:27; Santiago 4:8) No sipapanunottayo nga isu ket asideg, makapagrag-otayo, agbalintayo a nainkalintegan, ken ditay maringgoran kadagiti parikut ita wenno iti masanguanan, kas iti ilawlawag ti bersikulo 6.
No basaentayo ti bersikulo 6 ken 7, maawatantayo a ti talna ti Dios ket direkta a resulta ti kararag. Ipapan ti dadduma a ti kararag ket maysa la a kita ti meditasion, a pampanunotenda a ti aniaman a kita ti panagkararag ad-adda a pagtalnaenna ti riknada. Ngem dakamaten ti Biblia ti napasnek a pannakisarita ken Jehova, a kas iti nasinged a pannakisarita ti maysa nga ubing iti naayat nga ama wenno inana maipapan kadagiti pakaragsakan ken pakadanaganna. Anian a makapabang-ar a maammuan a mabalintay nga iyadani “amin a banag” iti Dios. Mabalintay nga ipeksa iti nailangitan nga Amatayo ti aniaman nga adda iti panunottayo wenno iti kaunggan ti pusotayo.
Paregtaennatayo ti bersikulo 8 nga itultuloytayo nga utoben dagiti positibo a kapanunotan. Ngem saan nga umdas dayta. Kas ilawlawag ti bersikulo 9, masapul nga iyaplikartayo met ti nasayaat a balakad ti Biblia. No aramidentayo dayta, maaddaantayo iti nadalus a konsiensia. Talaga nga agpayso ti pagsasao a: Nargaan ti turogtayo no nadalus ti konsiensiatayo!
Wen, mabalinmo ti maaddaan iti natalna a rikna. Agtaud dayta ken Jehova a Dios, a mangipaay kadagidiay umadani ken mayat nga agpaiwanwan kenkuana. Babaen ti panangsukimatmo iti Biblia a Saona, agbalinka a pamiliar kadagiti kapanunotanna. Saan a kanayon a nalaka ti mangyaplikar kadagiti bilinna, ngem saan a masayang ti panagreggetmo ta “ti Dios ti talna addanto” kenka.—Filipos 4:9.
[Blurb iti panid 10]
“Ti talna ti Dios . . . saluadannanto dagiti pusoyo.”—FILIPOS 4:7
[Blurb iti panid 12]
Anian a makapabang-ar a maammuan a mabalintay nga iyadani “amin a banag” iti Dios