“Talna Koma Kadakayo”

“Immay ni Jesus ken nagtakder iti tengnga ket kunana kadakuada: ‘Talna koma kadakayo.’”​—JUAN 20:19.

1. Apay a ti panagregget dagiti tattao a mangiyeg ti sangalubongan a talna naikeddengen ti pannakapaayna?

“TI ISUAMIN a lubong adda iti babaen ti pannakabalin ti managdakdakes.” (1 Juan 5:19) Pudno daytoy idi kaaldawan ni Juan, ket daytat’ ad-adda pay a nakalatlatak itatta, babaen iti nakaam-amak nga irarang-ay iti personal a kinaranggas, terrorismo, gubgubat, ken kinadangkes. Ti naipaltiing a sasao ni Juan ti mangikkat met iti aniaman a namnama a panangragpat iti sangalubongan a talna babaen kadagiti natauan a gannuat, agpapan pay ti panagregget ti papa, dagiti papangulo ti nasnasion ken ti NU. Apay? “‘Awan ti talna,’ kuna ti Dios, ‘kadagiti nadangkes.’”​—Isaias 57:21.

2. Ania ti ipasimudaag ti sao a “talna,” nangnangruna iti Hebreo ken Griego?

² Nupay kasta, ti sao a “talna” ti mabalin a kaipapananna ti ad-adda pay ngem basta kaawan ti gubat. Ti talna ket mabalin met a “maysa a mental wenno espiritual a kasasaad a tinandaan ti wayawaya manipud kadagiti di makapaulimek wenno makairurumen a kapampanunotan wenno rikrikna: kinakalma ti isip ken puso.” Kaskasdi, ti Hebreo a sao a maipaay ti “talna” (sha·lohmʹ) ken ti Griego a sao (ei·reʹne) ti addaan pay iti nalawlawa a kaiyuloganna. Isingasingda met ti pagimbagan, kas kadagiti pammakada a sasao, “Inka a sitatalna.” (1 Samuel 1:17; 29:7; Lucas 7:50; 8:48) Tulongannatay daytoy a mangapresiar iti naayat a pannakaseknan ni Jesus kadagiti ad-adalanna bayat ti nakalkaldaang a panawen a nanglikmut iti ipapatayna.

3. Kasano ti panangipakita ni Jesus ti nauneg a pannakaseknanna kadagiti adalanna kalpasan ti panagungarna, ket ania ti epektona?

³ Natay ni Jesus iti Biernes, Nisan 14, idi tawen 33 K.P. Iti Domingo, Nisan 16, isut’ napagungar. Gapu ta isut’ kanayon a maseknan unay iti pagimbagan dagiti adalanna, sinapsapulna ida kalpasanna. Sadinot’ nakasarakanna kadakuada? Addada iti likudan dagiti sipupunit a ruangan “gaput’ butengda kadagiti Judio.” Kaawatan, isudat’ madandanagan, mabutbuteng. Ngem kuna ni Jesus: “Talna koma kadakayo.” (Juan 20:19-21, 26) Iti kamaudiananna, pinapigsa ti nasantuan nga espiritu, simmayaatda. Situtured a sinangoda ti naituding a panangasabada, a nangtulong kadagiti adu a nakagun-od iti nadiosan a talna.

Ti Nadiosan a Talna Itatta

4. Kasano a mataginayon ti ili ni Jehova ti talna ti isip ken puso kadagitoy panawen a napeggad?

⁴ Agbibiagtayon iti panawen iti panungpalan, kadagiti “panawen a napeggad a narigat a pakibagayan.” (2 Timoteo 3:1) Dagiti sikakabayo a naipadto idiay Apocalipsis ti sisasakaydan iti intero a daga​—kas makitkitayo manipud kadagiti gubgubat, bisbisin, ken ipapatay gapu kadagiti sakit. (Apocalipsis 6:3-8) Apektado met ti ili ni Jehova babaen kadagiti kasasaad nga adda iti aglawlawda. Gapuna kasanoyo a mataginayon ti nadiosan a kinatalna ti isip ken puso? Babaen ti panagtalinaed a nasinged iti naindaklan a Gubuayan ti liwliwa ken talna. Kas impakita ti napalabas nga artikulo, kasapulan daytoy ti masansan a panagkararag ken araraw. Iti dayta a pamay-an “ti talna ti Dios a daeganna ti amin a pannakaawat aywanannanto dagiti puspusoyo ken dagiti panunotyo ken Kristo Jesus.”​—Filipos 4:6, 7.

5. Apay a makasiguro ni Pablo a “ti talna ti Dios” aywananna ti puspusotayo?

⁵ Ni apostol Pablo, a nangisurat kadagidiay a sasao, ti mismo met a nagibtur kadagiti peggad, ken rigrigat. Isu ti naibalud ken binabaot dagiti Judio ken Romano. Isut’ inuborda ken impatoda a natayen. Ti panagdaliasat kadagidiay nga al-aldaw ti nakarisrisgo; narba ni Pablo iti namitlo a daras, ket masansan nga isut’ agpegpeggad kadagiti managsaneb. Nangbusbos ti adu a rabii nga awan pannaturog ken masansan a nagsagaba manipud lammin ken bisin, ken waw. Mainayon pay kadagita amin, inaldaw-aldaw a mariknana ti panangaywan a “sidadanag kadagiti isuamin a kongregasion.” (2 Corinto 11:24-28) Gapuna ammo ni Pablo manipud iti nalawa a personal a kapadasan no kasano kapateg “ti talna ti Dios” a mangaywan iti puspusotayo.

6. Apay a nasken ti mangipasdek ken mangsalimetmet ti nabara, nasinged a singgalut iti Namarsuatayo?

⁶ “Ti talna ti Dios” ti mabalin a mailawlawag kas iti panagrikna ti kinatalinaay ken kinaulimek, a mangisarsarming iti nasayaat a pannakirelasion iti Dios. Daytoy ti nakapatpateg unay para kadagiti Kristiano, nangnangruna no maipasangoda iti pannakaidadanes wenno rigrigat. Apay? Bueno, amintayo ti imperpekto; gapuna, no maipasangotayo kadagiti parikut, dukot, ibubusor, wenno nadumaduma a kita ti pakarigatan, nalakatay ti agbalin a managbutbuteng. Daytat’ mabalin a mangiturong iti pannakapaaytay a mangsalimetmet iti kinatarnawtayo. Daytat’ mangiyeg iti pakababalawan ti nagan ti Dios, ket maikkat ti pabor ni Jehova kadatayo, ket mabalin a makaiturong iti pannakapukawtay ti biag nga agnanayon. Gapuna anian a nagpateg iti panagregget a magun-odan “ti talna ti Dios” a mangtulong kadatayo a mangsango a sibaballigi kadagita a karit. Dayta a talna ti pudno a maysa kadagiti ‘sagut a nasayaat ken isuamin a sagut a naan-anay’ nga isagsagana ti nailangitan nga Amatayo.​—Santiago 1:17.

7, 8. (a) Iti ania ti nakaibatayan “ti talna ti Dios,” ken kasano a dayta ‘daeganna amin a pampanunot’? (b) Kasano a naipamatmat dayta a talna iti kaso ti maysa kadagiti kakabsat nga Africano?

⁷ Mabalin a nakitkitayon a dadduma kadagiti tattao lumasatda iti biag a sikakalma ken sitatalek. Masansan dayta ket gapu iti natural nga abilidad, impluensia ti pamilia, kinabaknang, edukasion, wenno dadduma pay a kakasta a bambanag. “Ti talna ti Dios” ti naiduma unay. Daytat’ saan a naibatay kadagiti paborable a sirkumstansia, wenno daytat’ bunga ti natauan nga abilidad wenno panagrasrason. Daytat’ agtaud manipud iti Dios ken “daeganna ti amin a pannakaawat.” Ni J. B. Phillips impaulogna ti Filipos 4:7 a “ti talna ti Dios . . . a lab-awanna ti natauan a pannakaawat.” Masansan masdaawan dagiti nailubongan a tattao iti wagas a panangsangsango dagiti Kristiano kadagiti nainget a parparikut, pisikal a pannakadangran wenno uray pay ti patay.

⁸ Maysa a moderno a pangarigan iti daytoy isut’ maysa kadagiti Saksi ni Jehova a mangidadaulo ti maysa a Nakristianuan a panaggigimong iti maysa a daga idiay Africa a sadiay dagiti Saksi, kaaduanna babaen ti panagdurog dagiti lokal a Katoliko ti naakusarda kas terrorista. Giddato ti polis militar a sipapatuyong dagiti bayonetada nagparangda. Pinagawidda dagiti babbai ken dagiti ub-ubbing ngem rinugianda a minalmalo dagiti lallaki. Malaglagip pay ti Saksi: “Agkurangak kadagiti sasao a mangiladawan ti pamay-an a panangtratoda kadakami. Ti korporal nga enkargado ti sipapanayag a nangideklara a dakami ti malmaluenda agingga ken patay. Siak ti minalmaloda babaen ti batota a kayo a ti kamaudiananna nagsarsarwaak ti dara iti 90 nga al-aldaw. Ngem ti pakaseknak ket agpaay ti biag dagiti kakaduak. Iti kararag indawatko ken Jehova nga aywananna ti biag dagitoy, dagiti karnerona,” nga isuda amin nakalasatda. Anian a pangarigan ti panangsalimetmet ti kinakalma iti nakaal-alinggek a pakarigatan ken naayat a panangpampanunot kadagiti dadduma! Wen, ti naayat a nailangitan nga Amatayo sungbatanna ti kalikagum dagiti matalek nga ad-adipenna, nga ipaayanna ida ti talnana. Maysa kadagiti masdaawan a soldado iti dayta a kaso ti nagkuna a ti Dios dagiti Saksi ket “rebbeng nga isu ti pudno.”

9. Ania ti mabalin nga epekto ti panagbasbasa ti Biblia ken ti panagmennamenna iti dayta?

⁹ Kadagitoy narigat a panawen, adu kadagiti Kristiano ti addaan parparikut nga isu ti pakaupayan ken pagkapuyanda. Ti nagsayaat a pamay-an a panangsalimetmet ti talna ti isip isu ti panagbasbasa ti Biblia ken panagmennamenna iti dayta. Daytat’ mabalin a mangted iti maysa iti pigsa ken determinasion nga agtultuloy ken agtalinaed a sititibker. “Ti sao ti Dios ti nabiag ken napigsa.”​—Hebreo 4:12.

10. Kasano a ti pannakalagip kadagiti kasuratan maysa a bendision?

¹⁰ Kaskasdi, kasanon no ti rigat ket datngannatayo a ti Biblia ket saan a magun-odan? Kas pangarigan, mabalin a ti maysa a Kristiano maaresto nga insigida ket maipupok iti pagbaludan nga awanan ti Biblia. Iti dayta a kaso agbalin a pudpudno a bendision iti pannakalagip kadagiti teksto a kas iti Filipos 4:6, 7; Proverbio 3:5, 6; 1 Pedro 5: 6, 7; ken Salmo 23. Diyonto aya apresiaren a pudpudno ti pannakalagip ken panagpampanunot a kankanayon kadagita a teksto? Idiay nakabutbuteng a kasasaad ti maysa a pagbaludan, daytat’ kasla ni Jehova a mismo ti makisasao kadakayo. Ti Sao ti Dios maagasanna dagiti nasaktan nga is-isip, patibkerenna dagiti agkullayaw a puspuso, ken sukatanna dagiti panagdandanag ti pampanunot iti kinatalna. (Kitaenyo ti Salmo 119:165.) Wen, nagpateg unay ti panangimula kadagiti kasuratan kadagiti is-isiptayo itan bayat nga addaantay pay ti gundaway a mangaramid iti kasta.

11. Kasano nga imparangarang ti maysa a kabsat idiay Netherlands ti pannakasapul ti naespirituan a taraon?

¹¹ Ni Arthur Winkler ti maysa kadagidiay nangipateg unay ti Biblia, nangnangruna kabayatan ti panangituray dagiti Nazi iti Netherlands, idi dagiti Saksi kasapulan nga itultuloyda nga aramiden a sililimed dagiti Nakristianuan nga ar-aramidda. Dagiti Gestapo ti mangsapsapul idi ken ni Kabsat Winkler. Idi isut’ natiliwda iti kamaudiananna pinadpadasda ti pannakikompromisona ngem napaayda. Ngarud isu ti minalmaloda agingga a naawanan ti puotna. Idi natuptuppolen dagiti ngipenna, a nabullo pay ti makimbaba a pangana, ken limmitem ti bagbagina gaput’ pannakamalmalona, isu ti inkabilda iti nagsipnget a karsel. Ngem ti guardiana ti manangngaasi ken nainggayyeman. Sinapsapul ni Kabsat Winkler ti panangiwanwan ni Jehova iti kararag. Nariknana met unay ti pannakasapul ti naespirituan a taraon ket dimmawat ti tulong manipud iti guardia. Kamaudiananna, naglukat ti ruangan ti pagbaludanna, ket maysa a Biblia ti naipalladaw iti uneg. “Anian a rag-o dayta,” malaglagip pay ni Kabsat Winkler, “ti panangtagiragsak nga inaldaw kadagiti makaay-ayo a sasao ti kinapudno . . . mariknak ti bagbagik a pumigpigsa iti naespirituan.”a

Ti Nadiosan a Talna Aywanannakayo

12. Apay nga adda ti espesial a pannakasapul ti intay panangaywan ti puspuso ken pampanunottayo?

¹² Inkari ni Jehova a ti talnana “aywanannanto dagiti puspusoyo ken dagiti panunotyo.” (Filipos 4:7) Nasken unay daytoy! Ti puso ket isu ti pagsaadan ti pakatignayan ken dagiti rikrikna. Kadagitoy maudi nga al-aldaw, dagiti puspusotayo ti naglaka a mapakapsutan gaput’ buteng wenno panagdanag, wenno allukoyennatayo nga agaramid iti di umiso. Ti pangkaaduan a padron ti panagbiag ti sipapardas a dumakdakes. Masapul ti intay panagannad a kankanayon. Mainayon iti pannakasapultayo kadagiti napigsa a puspuso, masapul met a “dagiti pampanunottayo” ti mapapigsa ken iturong ti Dios babaen iti Saona ken ti kongregasionna.

13. Ania dagiti gunggona nga umay manipud panangaywantayo kadagiti pampanunottayo?

¹³ Sigun ken ni W. E. Vine, ti Griego a sao a noʹe·ma (a naipaulog kas “pampanunot”) ti addaan ti kapanunotan a “panggep” wenno “gannuat.” (An Expository Dictionary of New Testament Words) Gapuna, ti talna ti Dios ti mapapigsa iti Nakristianuan a panggeptayo ket aywanannatayo a maibusor iti aniaman a pagannayasan a kumapuy wenno mangbalbaliw iti is-isiptayo nga awanan naimbag a rason. Iti kasta dagiti pannakaupay wenno dagiti parikut saandatayo a silalaka nga isiasi. Kas pangarigan, no pinanggeptayo ti agserbi ken ni Jehova iti maysa a naisangsangayan a kapasidad, kas ti panagbalin nga amin-tiempo a payunir a ministro wenno umakar nga agserbi idiay dakdakkel pakasapulanna kadagiti ministro, “ti talna ti Dios” ti dakkel a tulong kadatayo iti dayta a kalat. (Idiligyo iti Lucas 1:3; Aramid 15:36; 19:21; Roma 15:22-24, 28; 1 Tesalonica 2:1, 18.) Tapno mapapigsa pay nga ad-adda ti kapampanunotanyo, mangbusbos ti nawadwad a tiempo nga agad-adal iti Sao ti Dios ken iti Nakristianuan a pannakilangenlangen. Iti kasta tartaraonanyo ti isip ken pusoyo kadagiti nadalus, makapabileg a kapampanunotan. Kabaelanyo aya ti mangipaay iti supisiente a tiempo a mangiraman iti bagiyo kadagiti naipaltiing a “sasao” ti Dios? Mabalin aya a mangipaaykayo iti ad-adu pay nga atension?

14. Iti ania a naipaltiing a balakad ti rebbeng a pangipaayantay ti naannad a panangipangag, ken apay?

¹⁴ Makitayo nga agpadpada ti puso ken ti isip, wenno kapampanunotan, nairamanda iti pananggun-od ken pannakagunggona manipud “ti talna ti Dios.” Mapaneknekan daytoy iti nadiosan a pammagbaga: “Anakko, imdengam dagiti saok. Iyallingagmo ta lapayagmo kadagiti panagsaok. Dika palusposan ida a pumanaw kadagita matam. Salimetmetam ida iti tengnga ta pusom. Ta isuda ti biag kadagiti makasarak kadakuada ken salun-at iti amin a lasagda. Igagam ta pusom iti amin a regtam, ta aggapu kenkuana dagiti pagbanagan ti biag.”​—Proverbio 4:20-23.

15. Aniat’ paset ni Jesus iti pannakaadda kadatayo “ti talna ti Dios”?

¹⁵ “Ti talna ti Dios” nga ibunga ti nabara, nasinged a singgalut ken Jehova aywananna dagiti puspuso ken kapampanunotantayo “babaen ken Kristo Jesus.” (Filipos 4:7) Aniat’ paset ni Jesus iti daytoy? Ilawlawag ni Pablo: “Ti di kaikarian a kinamanangngaasi ken talna ti Dios Ama ken ni Apotayo a Jesu-Kristo adda koma kadakayo. Isu nga intedna ti bagina gapu kadagiti basbasoltayo tapno isalakannatayo itoy agdama a sistema dagiti bambanag a dakes kas maiyannurot iti nakem ti Dios ken Amatayo.” (Galacia 1:3, 4) Wen, siayat nga inted ni Jesus ti biagna tapno masubbottayo. (Mateo 20:28) Gapuna “babaen ken Kristo Jesus” agbalintay a makaay-ayo ken ni Jehova kas dagiti dedikado nga ad-adipenna ken maikabil iti posision a mangtagiragsak iti dayta nadiosan a talna nga isut’ mangaywan kadatayo.

Dagiti Peggad a Mamagpeligro iti Nadiosan a Talna

16. Ania a balakad ti inted ni Pablo a makatulong kadatayo a mangsalimetmet “ti talna ti Dios”?

¹⁶ Apaman a naawattayon ken tagtagiragsakentayon ti talna a naggapu iti Dios, masapul nga agannadtayo tapno mataginayontayo dayta. Adu dagiti bambanag a mabalin a mangtakaw iti talna kadagiti Kristiano. Maysa kadagiti gagangay unay, ken pudpudno nga isu ti kapeggadan, isu dagiti tarigagay ti kinaagtutubo. Iti maikadua a surat ni Pablo ken ni Timoteo nga idi ket mabalin nga addan kadagiti nasapa nga edad a 30’s, inramanna daytoy a balakad: “Ngem adaywam dagiti tarigagay nga inuubingan, ket sumurotka iti kinalinteg, iti pammati, iti ayat, iti talna, a makikadkaduaka kadagiti umawag iti Apo a sidadalus ti pusoda.”​—2 Timoteo 2:22.

17. Aniat’ masansan a mapaspasamak maipapan ti sagana ni Jehova maipapan iti sekso?

¹⁷ Dagidiay a tartarigagay ramanenna ti seksual a rikrikna, nga addaan nadayaw a lugar iti uneg ti panagasawa. Ngem iti intero a historia, daytoy a rikna ti di umiso ti pannakaiyebkasna kadagiti panagdenna sakbay ti kasar wenno ekstra a panagdenna iti sekso, agpadpada a dagita ti saan nga anamongan ti nasirib a Manamarsuatayo. (Hebreo 13:4; Genesis 34:1-3) Ti peggad ti pannakatnag kadagiti seksual nga imoralidad ti mamagpegpeggad kadagiti Kristiano itatta, agpadpada kadagiti agtutubo ken natataenganen. Kadagiti maudi nga al-aldaw ti nalulok a lubong, ti sekso ti nagbalin kadagiti adu a maysa a nailasagan laeng a kinaderrep, masansan addaan ar-aramid a gagangayen kadagiti homoseksual, lalaki man wenno babai.​—Roma 1:24-27.

18. Apay a ti puspuso dagiti dadduma saanda a natibker, ket aniat’ mabalin a pagturongan daytoy?

¹⁸ Ti kinapudnona nga agbibiagtayo iti kasta a kasasaad ipaganetgetna no kasano kapateg ti kaadda koma kadatayo ti napigsa, natibker a puso a naipamaysa ken ni Jehova. Dadduma a nangakseptar ti mensahe ti Pagarian, patienda a dagiti kangrunaan a kinapudno ti Biblia, ken regular a makitimtimpuyogda iti ili ni Jehova saanda a masukayan ti nauneg a panangapresiar ken ni Jehova, ti Saona, ken ti sangalubongan a kongregasionna. Dagiti puspusoda ket saanda a natibker. Isudat’ silalaka a maisiasi babaen kadagiti “tarigagay nga inuubingan.” Dadduma kadakuada ti mabalin a malabananda dagiti sulisog a makiabig wenno makikamalala, ngem agbalinda, kas impakdaar ni Pablo a, “managayat iti ragragsak imbes a managayat iti Dios.” (2 Timoteo 3:4) Mangbusbusbosda ti ad-adu a tiempo nga agbuybuya ti TV, agbasbasa kadagiti nobela, wenno agdengdengngeg kadagiti nadawel a toktokar ngem iti personal a panagad-adal, Nakristianuan a panaggigimong, wenno panagserbi iti Pagarian. Daytoy ti naglaka a mangiturong iti naespirituan a panagkapuy ken, iti agangay, pannakatnagda iti nainget unay a panagbasol.

19. Aniat’ masapul nga aramidentayo tapno maliklikan ti intay pannakaiyayus?

¹⁹ Dagiti kakasta, kas maysa a bilog nga awanan ti sinepete, ti maiyan-anudda iti agus nga agturong iti pakadadaelan. Aniat’ masapul nga aramidenda? Impatigmaan ni Pablo: “Gapuna rebbengtayo a regtaan nga imatangan dagiti bambanag a nangngegantayo, di la ket ta maiyayustayo a maiyadayo kadakuada.” (Hebreo 2:1) Gapuna dagidiay agpegpeggad rebbeng nga “regtaanda nga ipaayan ngem ti gagangay nga atension” ti panagad-adal ti Sao ti Dios, agsagana a maipaay kadagiti Nakristianuan a panaggigimong, ken panangiraman kadagiti kinapudno ti Pagarian kadagiti sabsabali. Siempre, naglaka ti agpanunot nga, ‘Naimbag a pammagbaga dayta, ngem awanak iti kasta a kasasaad, gapuna daytat’ di agaplikar kaniak.’ Anian nga ad-adda a nainsiriban para iti tunggal maysa kadatayo a mangusig a siinget no kasano ti mabalin a panangdalustay ti puspusotayo, dagiti kaunggan a pampanunottayo, ken tartarigagay ket “sumurot iti kinalinteg, iti pammati, iti ayat, iti talna, a makikadkaduaka kadagiti umawag iti Apo a sidadalus ti pusoda.” (2 Timoteo 2:22) Kangrunaan ti isuamin, rebbengna nga idawattayo iti Dios iti panangiwanwanna ken ti makapabileg a tulong ti espirituna.

20. Aniat’ rebbeng nga aramiden ti asinoman a nakaaramid ti nakaro a kinadakes?

²⁰ No addanto asinoman nga agbasol iti nakaro a kinadakes ngem abbonganna dayta, nalawag a mapukawdanto ti anamong ni Jehova ken “ti talna ti Dios” nga adda kadakuada. Mapukawdanto met ti mismo a talna ti panunotda. (Idiligyo ti 2 Samuel 24:10; Mateo 6:22, 23.) Ngarud, makitayo, no apay nga inkapilitan nga asinoman a Kristiano a natnag iti serioso a basol ipudnona koma dayta ken Jehova ken kadagiti naayat a panglakayen, a makaipaay iti naespirituan a pannakaagasna. (Isaias 1:18, 19; 32:1, 2; Santiago 5:14, 15) No ti maysa a tao napukawna ti naespirituan a kinatimbengna iti nagalis a dalan ti basol ket sapulenna ti tulong manipud kadagiti nataengan a kakabsatna, isunto ti saan nga agtultuloy a maaddaan ti mariribukan a konsiensia wenno agbalin nga awanan nadiosan a talna.

21. Ania a gapuanan ti nauneg a panagyaman ken Jehova ti adda kadatay itatta, ket aniat’ rebbeng a determinasiontayo?

²¹ Anian a pribilehio ti panagbalin kas maysa kadagiti dedikado a Saksi ni Jehova itatta! Iti aglawlawtay amin, daytoy sataniko a lubong ti marakraken ken mawarawaran. Daytan ti dandanin aglabas. Adu kadagiti tattao “agkapuydanto gapu iti buteng ken danagda kadagiti maar-aramid nga umayto kadagiti amin a mapagnaedan a daga.” Ngem mabalintay nga itangad dagiti ul-ulotayo agsipud ta ammotayo a ti “pannakaispaltayo ket asidegen.” (Lucas 21:25-28) Tapno maipakita no kasanot’ panagyamantayo ken ni Jehova gapu iti “talna[na] . . . a daeganna amin a pampanunot,” aramidentay ti amin a kabaelantayo nga agserbi a simamatalek “iti Dios a mangted ti talna.”​—Roma 15:33; 1 Corinto 15:58.

[Dagiti Footnote]

Dagiti Punto a Marepaso

◻ Kasano a “ti talna ti Dios” tulongannatayo itatta, ken kasano a ‘daeganna amin a pampanunot’?

◻ Ania a bambanag ti makatulong kadatayo a mangsalimetmet ti talna ti isip?

◻ Ania a nasikap a peggad ti mamagpeligro kadagiti adu a Kristiano itatta, ket iti ania ti mabalin a pagturongan dayta?

◻ No ti maysa a Kristiano makaaramid ti nainget a panagbasol, aniat’ rebbengna nga aramidenna

[Kahon/Ladawan iti panid 18]

Naadalna a Dayta ti Pudno

Bayat ti Gubat Sangalubongan II impan dagiti Nazi ti asawa ni Elsa Abt’s idiay kampo konsentrasion ti Sachsenhausen gapu iti Nakristianuan a panangaskasabana. Kalpasanna idi Mayo 1942, dagiti Gestapo immayda manen iti pagtaenganna, impanawda dagiti babassit nga annakna a babbai, ket impanda ni Elsa nga agtrabaho ken agsagaba kadagiti nadumaduma a kampo. Intedna daytoy personal a pammaneknekna:

“Dagiti tawtawenko kadagiti kampo konsentrasion nga Aleman ti nangisuro kaniak iti maysa a naisalsalumina a leksion. Dayta ti, no kasano a ti espiritu ni Jehova pabilgennakayo iti dakkel unay no addakayo kadagiti nasaem a pakasuotan! Sakbay a naarestoak, nabasak ti surat ti maysa a kabsat a babai a nagkuna nga iti sidong dagiti nasaem a pannakasuot ti espiritu ni Jehova ti mangpataud ti mangpakalma nga umapay kadakayo. Impatok no lablabsenna laeng bassit ti agsasao. Ngem idi a limmasatak a mismo kadagiti pakasuotan, ammokon a ti imbagana ket pudno. Pudno a kasta ti napasamak. Nagrigat a panunoten dayta, no diyo mapasaran dayta. Kaskasdi pudno a napasamak kaniak dayta. Tumulong ni Jehova.”

[Ladawan iti panid 16]

Ammo ni Pablo manipud kapadasan a ti talna ti Dios maaywananna ti puspusotayo

[Ladawan iti panid 19]

Agpegpeggadkayo aya a maiyan-anud iti naespirituan?