Tuladenyo ni Jesus​—Mangasaba a Situtured

“Nagurnongkami iti kinatured . . . tapno sawenmi kadakayo ti naimbag a damag.”​—1 TES. 2:2.

1. Apay a makaay-ayo unay ti naimbag a damag ti Pagarian?

NAGSAYAAT ketdin ti makangngeg iti naimbag a damag! Ti kasayaatan a damag ket ti naimbag a damag maipapan iti Pagarian ti Dios. Daytoy a naimbag a damag ipanamnamana kadatayo ti panagpatingga ti panagsagaba, sakit, ut-ot, ladingit, ken ipapatay. Pagbalinenna a posible ti agnanayon a biag, ipalgakna ti panggep ti Dios, ken isurona kadatayo no kasanotayo a maaddaan iti nasinged a relasion iti Dios. Nalabit pampanunotem a maragsakan la ketdi ti amin a makangngeg iti daytoy a damag nga inranud ni Jesus iti sangatauan. Ngem nakalkaldaang ta saan a kasta.

2. Ilawlawagyo ti kinuna ni Jesus: “Immayak a mangpataud iti pannakabingbingay.”

² Kinuna ni Jesus kadagiti adalanna: “Dikay pagarupen nga immayak mangikabil ti talna iti daga; immayak a mangikabil, saan a ti talna, no di ket ti maysa a kampilan. Ta immayak a mangpataud iti pannakabingbingay, ti maysa a lalaki maibusor iti amana, ken ti anak a babai maibusor iti inana, ken ti maysa nga agtutubo nga asawa a babai maibusor iti katuganganna-a-babai. Pudno unay, dagiti kabusor ti maysa a tao isudanto dagiti tattao iti bukodna a sangakabbalayan.” (Mat. 10:34-36) Imbes a maragsakanda nga umawat iti naimbag a damag, adu a tattao ti mangilaksid iti dayta. Ti dadduma busorenda dagidiay mangiwaragawag iti dayta, uray no asideg a kapamiliada.

3. Tapno maitultuloytayo ti annongentayo a mangasaba, ania ti kasapulantayo?

³ Iwarwaragawagtayo ita dagiti isu met la a kinapudno nga inwaragawag idi ni Jesus, ket apaman a dagiti tattao mangngegda dagita, ti reaksionda ket kas met la iti reaksion dagiti tattao idi. Manamnama dayta ta kinuna ni Jesus kadagiti adalanna: “Ti adipen saan a dakdakkel ngem iti apona. No indadanesdak, idadanesdakayto met.” (Juan 15:20) Iti adu a lugar, awan ti direkta a pannakaidadanes, ngem mapadasantayo ti mauy-uyaw ken saan a maikankano. Gapuna, kasapulantay ti pammati ken kinatibker tapno makapagtultuloytayo a situtured a mangikasaba iti naimbag a damag.​—Basaen ti 2 Pedro 1:5-8.

4. Apay a kasapulan ni Pablo ti ‘agurnong iti kinatured’ tapno makapangasaba?

⁴ Nalabit marigatanka no dadduma a makiraman iti ministerio, wenno maamakka iti dadduma nga aspeto dayta. No kasta ti kasasaadmo, saan la a sika ti matalek nga agibumbunannag a kasta ti marikriknana. Natured a manangaskasaba ken kabesado ni apostol Pablo ti kinapudno, ngem kaskasdi nga addada tiempo nga uray isu a mismo ket narigatan a nangasaba. Insurat ni Pablo kadagiti Kristiano idiay Tesalonica: “Kalpasan nga immuna a nagsagabakami ken sikukuspag a natrato (kas iti pagaammoyo) idiay Filipos, a nagurnongkami iti kinatured babaen iti Diostayo tapno sawenmi kadakayo ti naimbag a damag ti Dios buyogen ti kasta unay a pannakidangadang.” (1 Tes. 2:2) Idiay Filipos, dagiti autoridad pinangpang-orda ni Pablo ken ti kaduana a ni Silas, impisokda ida iti pagbaludan, ken inipitda ida kadagiti tul-ong. (Ara. 16:16-24) Iti laksid dagita, da Pablo ken Silas ket ‘nagurnong iti kinatured’ tapno maitultuloyda ti mangasaba. Kasanotay met a maaramid ti kasta? Tapno masungbatan dayta, usigentayo no ania ti nakatulong kadagiti adipen ti Dios idi panawen ti Biblia tapno maibagada a situtured ti kinapudno maipapan ken Jehova, ken ammuentayo no kasanotayo ida a matulad.

Kasapulan ti Kinatured a Mangsango iti Ibubusor

5. Apay a dagiti matalek ken Jehova kanayon a kasapulanda ti kinatured?

⁵ Ni Jesu-Kristo ti kangrunaan nga ulidan ti kinatured. Kaskasdi, sipud pay rugrugi ti pakasaritaan ti tao, amin dagiti matalek ken Jehova kanayon a kasapulanda ti kinatured. Apay? Kalpasan ti panagrebelde idiay Eden, impakpakauna ni Jehova nga agginnuranto dagiti agserserbi iti Dios ken dagiti agserserbi ken Satanas. (Gen. 3:15) Dagus a nagminar daytoy a panagginnura idi a ti nalinteg a tao a ni Abel ket pinatay ti kabsatna. Kalpasanna, naiturong ti pananggura wenno ibubusor ken Enoc, maysa a matalek a tao a nagbiag sakbay ti Layus. Impadtona a ti Dios ket umay a kaduana ti nasantuan a linaklaksana tapno ukomenna dagiti di nadiosan. (Jud. 14, 15) Sigurado a saan a nagustuan ti adu a tattao dayta a mensahe. Kinagurada ni Enoc ken nabatad a pinapatayda koman no saan nga innala ti Dios ti biagna. Anian a kinatured ti impakita ni Enoc!​—Gen. 5:21-24.

6. Apay a kasapulan ni Moises ti kinatured a makisarita ken Faraon?

⁶ Panunotenyo met ti kinatured ni Moises a nakisarita ken Faraon, ti agturay a maibilbilang, saan laeng a kas mangibagi kadagiti didiosen, no di ket kas maysa a didiosen, ti anak ti dios-init a ni Ra. Posible a kas kadagiti dadduma a Faraon, dinaydayawna ti bukodna a ladawan. Ti sao ni Faraon ket linteg; amin nga ibagana ket matungpal. Naturay, natangsit, ken natangken ti panaglenglengngesna, ken saan a nairuam nga adda mangdikdiktar kenkuana. Iti sanguanan daytoy a tao a namin-adu a dimmatag ni Moises​—maysa a naemma a pastor​—nupay isu ket saan a napaayaban ken naimbitaran. Ania ti impakpakauna ni Moises? Dagiti makadadael a saplit. Ania ti kiniddawna? Ti pammalubos ni Faraon a rummuar iti pagilianna ti minilion nga adipenna! Kasapulan kadi ni Moises ti kinatured? Sigurado!​—Num. 12:3; Heb. 11:27.

7, 8. (a) Aniada a suot ti napasaran dagiti matalek a tattao idi un-unana? (b) Ania ti nangpatured kadagiti nagbiag sakbay ti panawen Kristiano iti panangitandudoda iti pudno a panagdayaw?

⁷ Kadagiti simmaganad a siglo, dagiti mammadto ken ti dadduma pay a matalek nga adipen ti Dios intultuloyda ti natured a panangitandudoda iti nadalus a panagdayaw. Ginura ida ti lubong ni Satanas. Kinuna ni Pablo: “Nauborda, nasuotda, naragaragadida, natayda babaen ti pannakagudas iti kampilan, nagpagnapagnada a sikakawes kadagiti lalat ti karnero, kadagiti lalat ti kalding, bayat nga addada iti kinakirang, iti rigat, iti sidong ti dakes a pannakatrato.” (Heb. 11:37) Ania ti nangpatibker kadagidiay a matalek nga adipen ti Dios? Kadagiti immun-una a bersikulo, dinakamat ni Pablo no apay a nakapagibtur da Abel, Abraham, Sara, ken ti dadduma pay. Kinunana: “Saanda a nagun-odan ti kaitungpalan dagiti kari, ngem [iti pammati] nakitada ida iti adayo ket inabrasada ida.” (Heb. 11:13) Sigurado a dagiti mammadto a kas kada Elias, Jeremias, ken dadduma pay a matalek a tattao sakbay a nagbiag ni Jesus ditoy daga a situtured a nangitandudo iti pudno a panagdayaw ket nakapagibturda met babaen iti agtultuloy a panagtalekda a matungpal dagiti kari ni Jehova. ​—Tito 1:2.

⁸ Dagidiay a matalek a tattao a nagbiag sakbay ti panawen Kristiano ket nangnamnamada iti naraniag ken nagsayaat a masanguanan. Inton mapagungarda, agbalindanto a perpekto ken ‘mawayawayaandanto iti pannakaadipen iti panagrupsa’ babaen ti panagserbi ni Jesu-Kristo kas padi ken ti 144,000 a katulonganna. (Roma 8:21) Kanayonanna, ni Jeremias ken ti dadduma pay a natured nga adipen ti Dios idi un-unana saanda a nagbuteng gapu iti pammatalged ni Jehova a nabatad iti karina ken Jeremias: “Sigurado a makirupakdanto kenka, ngem saandanto nga agballigi maibusor kenka, ta ‘addaak kenka,’ kuna ni Jehova, ‘tapno ispalenka.’” (Jer. 1:19) Ita, mapabilegtayo met no utobentayo dagiti kari ti Dios para iti masanguanan ken ti pammatalgedna a salaknibannatayo iti naespirituan.​—Prov. 2:7; basaen ti 2 Corinto 4:17, 18.

Ayat ti Nangtignay ken Jesus a Mangasaba a Situtured

9, 10. Kasano nga impakita ni Jesus ti kinaturedna iti sango (a) dagiti panguluen ti relihion, (b) ti grupo dagiti soldado, (c) ti nangato a padi, (d) ni Pilato?

⁹ Ti ulidantayo a ni Jesus impakitana ti kinaturedna iti nadumaduma a pamay-an. Kas pagarigan, nupay kinagura dagidiay agtuturay ken addaan impluensia, saanna a pinalag-an ti mensahe a kayat ti Dios a maammuan dagiti tattao. Situtured nga imbutaktakna ti panaginlilinteg ken palso a sursuro dagiti panguluen ti relihion. Prangka ken nalawag ti panangkondenar ni Jesus kadakuada. Naminsan, kinunana: “Asikayo pay, eskriba ken Fariseo, a managinsisingpet! agsipud ta umarngikayo kadagiti napapuraw a tanem, nga iti ruar pudno nga agparangda a napintas ngem iti uneg napnoda iti tultulang dagiti natay a tattao ken tunggal kita ti kinarugit. Iti kasta a wagas dakayo met, pudno nga iti ruar, agparangkayo a nalinteg kadagiti tattao, ngem iti uneg napnokayo iti panaginsisingpet ken kinakillo.”​—Mat. 23:27, 28.

¹⁰ Idi arestuen ti grupo dagiti soldado idiay minuyongan ti Getsemani, situtured nga inyam-ammo ni Jesus ti bagina kadakuada. (Juan 18:3-8) Kalpasanna, isu ket impanda iti Sanhedrin tapno palutpoten ti nangato a padi. Nupay ammona a mangbirbirok ti nangato a padi iti panggapuanna a mangpapatay kenkuana, situtured nga imbagana nga isu ti Kristo ken ti Anak ti Dios. Innayonna pay nga isu ket makitadanto a “situtugaw iti makannawan ti pannakabalin ken um-umay a buyogen dagiti ulep ti langit.” (Mark 14:53, 57-65) Di nagbayag kalpasanna, sipaparaut nga impanda iti sanguanan ni Pilato, a mabalin koma a nangwayawaya kenkuana. Ngem saan a sinungbatan ni Jesus dagiti akusasion kenkuana. (Mar. 15:1-5) Kasapulan nga agtured unay kadagita a situasion.

11. Ania ti pakainaigan ti kinatured iti ayat?

¹¹ Kinuna ni Jesus ken Pilato: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Ni Jehova imbaonna ni Jesus a mangikasaba iti naimbag a damag, ket naragsakan ni Jesus a nangaramid iti dayta gapu ta ay-ayatenna ti nailangitan nga Amana. (Luc. 4:18, 19) Ay-ayaten met ni Jesus dagiti tattao. Ammona ti rigat a mapaspasaranda. Ita, ti kinaturedtayo a mangasaba ket naibatay met iti kasta unay a panagayattayo iti Dios ken kadagiti kaarrubatayo.​—Mat. 22:36-40.

Ti Nasantuan nga Espiritu Pabilgennatayo a Mangasaba a Situtured

12. Ania ti makagapu a nagrag-o dagiti nagkauna nga adalan?

¹² Kadagiti simmaganad a lawas kalpasan ti ipapatay ni Jesus, nagrag-o dagiti adalan idi makitada nga umad-adu ti baro nga adalan nga inaynayon ni Jehova kadakuada. Iti maysa la nga aldaw, agarup 3,000 ti nabautisaran! Dagita ket Judio ken proselita manipud iti nadumaduma a lugar a napan idiay Jerusalem tapno rambakanda ti Pentecostes. Nagdindinamag la ketdi iti Jerusalem dayta a pasamak! Kuna ti Biblia: “Ti buteng nangrugi nga umapay iti tunggal kararua, ket adu a tanda ken pagilasinan ti nangrugi a mapasamak babaen kadagiti apostol.”​—Ara. 2:41, 43.

13. Apay a nagkiddaw dagiti kakabsat iti kinatured, ken ania ti resultana?

¹³ Gapu ta nakapungtot unay dagiti panguluen ti relihion, inarestoda da Pedro ken Juan, impupokda ida iti nagpatnag, ken binilinda ida a dida sawen ti maipapan ken Jesus. Apaman a nawayawayaanda, ti dua impadamagda kadagiti kakabsat ti napasamak, isu a nagkararagda amin maipapan iti pakaipaspasanguanda nga ibubusor ket kiniddawda: “Jehova, . . . ipaaymo kadagiti adipenmo nga itultuloyda a sawen ti saom buyogen ti isuamin a kinatured.” Ania ti resultana? “Isuda amin napnoda iti nasantuan nga espiritu ket situtured a sasawenda idi ti sao ti Dios.”​—Ara. 4:24-31.

14. Kasanonatayo a tulongan ti nasantuan nga espiritu iti panangasabatayo?

¹⁴ Imutektekanyo ta ti nabileg a nasantuan nga espiritu ni Jehova ti timmulong kadagiti adalan tapno situtured a maipakaammoda ti sao ti Dios. Ti kinatured a mangiranud iti kinapudno kadagiti sabsabali, uray kadagiti bumusbusor iti mensahetayo, ket saan nga agpannuray kadatayo. Kabaelan ken sidadaan ni Jehova a mangipaay iti nasantuan nga espirituna no kiddawentay dayta. Babaen iti tulong ni Jehova, kabaelantay met nga ipakita ti kinatured a kasapulan tapno makapagballigitayo a mangsango iti aniaman nga ibubusor.​—Basaen ti Salmo 138:3.

Situtured a Mangasaba Dagiti Kristiano Ita

15. Kasano a ti kinapudno pagsisinaenna dagiti tattao ita?

¹⁵ Kas idi un-unana, ti kinapudno agtultuloy a pagsisinaenna dagiti tattao ita. Adda dagiti umawat, ngem adda met dagiti saan a makatarus wenno saan a mangapresiar iti wagas ti panagdayawtayo. Dadduma ti mangkritikar, manglais, wenno manggura kadatayo, kas impadto ni Jesus. (Mat. 10:22) No maminsan, datayo ti puntiria dagiti pammardaya ken dakes a propaganda babaen iti media. (Sal. 109:1-3) Ngem iti intero a daga, situtured nga ikaskasaba dagiti Saksi ni Jehova ti naimbag a damag.

16. Ania a kapadasan ti mangipakita a ti kinatured balbaliwanna ti panangmatmat dagiti makasabaantayo?

¹⁶ Ti kinaturedtayo mabalin a balbaliwanna ti panangmatmat dagiti tattao iti mensahe ti Pagarian. Insalaysay ti maysa a kabsat a babai a taga-Kyrgyzstan: “Idi addaak iti pangasabaan, kinuna ti nakasaritak a bumalay: ‘Mamatiak iti Dios ngem saan a ti Dios dagiti Kristiano. No agsublika pay ditoy, ipakamatkan iti asok!’ Nakakawar iti likudanna ti dakkel nga asona. Ngem kabayatan ti kampania a panagiwaras iti Kingdom News No. 37, nga ‘Asidegen nga Agpatingga ti Palso a Relihion!,’ nagsubliak iti isu met la a balay amangan no adda makasaritak a sabali a miembro ti pamilia daydi a lalaki. Ngem isu met la a lalaki ti rimmuar iti ridaw. Dagus a nagkararagak ken Jehova sa kinunak: ‘Naimbag nga aldawyo manong, malagipko pay ti panagsaritata idi naminsan nga aldaw, ken malagipko pay ti asoyo. Ngem dika maitured a labsan ta kas kenka, mamatiak iti maymaysa a pudno a Dios. Ti Dios dandaninan dusaen dagiti relihion a mangibabain kenkuana. Ad-adu pay ti maammuanyo maipapan iti dayta no basaenyo daytoy.’ Nasdaawak ta inawat dayta a lalaki ti Kingdom News. Napanakon iti sabali a balay. Kalpasan ti sumagmamano a minuto, nagtartaray a kimmamakam ti lalaki nga iggemna ti Kingdom News. ‘Nabasakon,’ kinunana. ‘Ania ti rumbeng nga aramidek tapno saanko a malak-am ti pungtot ti Dios?’” Mayad-adalan ken makigimgimongen dayta a lalaki.

17. Kasano a ti kinatured ti maysa a kabsat pinabilegna ti mabutbuteng a mayad-adalan iti Biblia?

¹⁷ Ti kinaturedtayo maparegtana met ti sabsabali nga agbalin a natured. Idiay Russia, adda kabsat a babai a nangitukon iti magasin iti babai a nakalugananna iti bus. Dagus nga inagaw ti maysa a lalaki ti magasin nga ig-iggaman ti kabsat sana kinumel ken imbarsak iti datar. Binugkawan ken pinagsasawan dayta a lalaki sana dinamag ti pagnanaedan ti kabsat ken binallaaganna a saan a mangasaba iti dayta a bario. Nagkararag ti kabsat tapno agpatulong ken Jehova ket nalagipna ti kinuna ni Jesus: “Dikay agbuteng kadagidiay mangpapatay iti bagi.” (Mat. 10:28) Sikakalma a timmakder ti kabsat sana imbaga iti lalaki: “Diak ibaga kenka no tagaanoak, ken itultuloyko latta ti mangasaba iti bario.” Kalpasanna, dimsaagen ti kabsat. Saan nga ammo ti kabsat a maysa kadagiti iyad-adalanna iti Biblia ket nakalugan met iti bus. Saan pay a napadasan dayta a mayad-adalan ti tumabuno kadagiti Nakristianuan a gimong gapu iti panagbutengna iti tao. Ngem kalpasan a nakitana ti kinatured ti kabsat, inkeddengnan ti makigimong.

18. Ania ti makatulong kenka a mangasaba a situtured kas ken Jesus?

¹⁸ Iti daytoy a lubong a naisina iti Dios, kasapulan ti tured a mangasaba a kas ken Jesus. Ania ti makatulong kenka a mangaramid iti dayta? Panunotem ti masanguanan. Patibkerem ti ayatmo iti Dios ken iti sabsabali. Ikararagmo a paturedennaka ni Jehova. Laglagipem a saanka nga agmaymaysa, ta dinaka baybay-an ni Jesus. (Mat. 28:20) Patibkerennaka ti nasantuan nga espiritu. Kasta met a bendisionan ken saranayennaka ni Jehova. Gapuna, sapay koma ta patibkerentayo ti pakinakemtayo ken ibagatayo: “Ni Jehova ti katulongak; saanakto nga agbuteng. Ania ti maaramidan kaniak ti tao?”​—Heb. 13:6.

Ania ti Sungbatmo?

• Apay a kasapulan dagiti adipen ni Jehova ti kinatured?

• No maipapan iti kinatured, ania ti masursurotayo manipud . . .

kadagiti matalek a tattao sakbay a nagbiag ni Jesus ditoy daga?

ken Jesu-Kristo?

kadagiti nagkauna a Kristiano?

kadagiti padatayo a Kristiano ita?

[Ladawan iti panid 21]

Situtured nga imbutaktak ni Jesus dagiti panguluen ti relihion

[Ladawan iti panid 23]

Tultulongannatayo ni Jehova tapno makapangasabatayo a situtured