Itultuloyyo a Sawen ti Sao ti Dios Buyogen ti Kinatured
1 Kas Kristiano a ministro, ammotayo a saan nga amin ket umimdeng no mangasabatayo. (Mat. 10:14) Nupay di mangipangag ti dadduma, ditay ipalubos a daytoy ti mangpasardeng kadatayo a mangiwaragawag iti naimbag a damag. (Prov. 29:25) Ania ti makatulong kadatayo tapno maitultuloytayo a sawen ti sao ti Dios buyogen ti kinatured?
2 Inapresiar ni apostol Pablo ti “naringbaw a pateg ti pannakaammo ken Kristo Jesus.” Daytoy ti nangtignay kenkuana nga agsao buyogen ti “nabileg a panamati.” (Fil. 3:8; 1 Tes. 1:5) Nupay imbilang ti dadduma a nakapuy ken minamaag ti mensahe nga inkasabana, ammo ni Pablo a dayta ket “pannakabalin ti Dios a pakaisalakanan ti tunggal maysa nga addaan pammati.” (Roma 1:16) Ngarud, uray idi maipasango iti ibubusor, intultuloyna ti ‘nagsao a situtured babaen ti autoridad ni Jehova.’—Ara. 14:1-7; 20:18-21, 24.
3 Ti Gubuayan ti Bilegtayo: Saan a babaen ti bukodna a bileg a nabaelan ni Pablo ti nangasaba a situtured. No maipapan kadakuada ken ni Silas, insurat ni Pablo: “Kalpasan nga immuna a nagsagabakami ken sikukuspag a natrato . . . idiay Filipos, a nagurnongkami iti kinatured babaen iti Diostayo tapno sawenmi kadakayo ti naimbag a damag ti Dios buyogen ti kasta unay a pannakidangadang.” (1 Tes. 2:2; Ara. 16:12, 37) Kanayonanna, bayat a nakabalud idiay Roma, kiniddaw ni Pablo kadagiti dadduma nga ikararaganda tapno maitultuloyna nga ipakaammo ti naimbag a damag ‘buyogen ti kinatured kas iti rebbeng a panagsaona.’ (Efe. 6:18-20) Babaen ti panagtalekna ken ni Jehova imbes nga iti bagina, naitultuloy ni Pablo nga inkasaba ti sao ti Dios buyogen ti kinatured.—2 Cor. 4:7; Fil. 4:13.
4 Kasta met laeng ita. Maysa a kabsat a lalaki, a marigatan a mangyam-ammo iti bagina kas maysa a Saksi ni Jehova ken marigatan a mangasaba iti impormal a pamay-an, ti nangikararag iti dayta ket nairugina ti mangasaba. Idi damo saan nga inkankano dayta ti katrabahuanna, ngem idi nangngegna ti maipapan iti namnama a panagungar, nagresulta dayta iti panagadal iti Biblia. Sipud idin gunggundawayan ti kabsat ti tunggal oportunidad a mangasaba. Iti simmaruno a nagtrabahuanna, 34 a tattao ti natulonganna a nagpabautisar iti uneg ti 14 a tawen. Makapagtalektayo a pabilgennatay met ni Jehova tapno ‘maitultuloytayo a sawen ti saona buyogen ti isuamin a kinatured.’—Ara. 4:29.