Ipatpategyo Kadi ti Inaramid ni Jehova Tapno Maisalakankayo?

“Bendito ni Jehova a Dios ti Israel, agsipud ta inturongna ti asikasona ket inaramidna ti panangispal iti ilina.”​—LUC. 1:68.

1, 2. Kasano a mayilustrar ti kinakaro ti agdama a kasasaadtayo, ken ania dagiti saludsod nga usigentayo?

IPAPANYO a nayospitalkayo. Kaduayo dagiti pasiente nga agsagsagaba iti isu met laeng a makapapatay a sakit ken awan pay ti natakuatan nga agasna. Idi naammuanyo nga adda doktor a mangikagkagumaan a mangbirok iti agas, naaddaankayo iti namnama. Magagarankayo iti aniaman a damag iti panagsirarakna. Adu a panagsakripisio ti inaramid ti doktor agingga nga iti maysa nga aldaw, natakuatannan ti agas! Ania ti reaksionyo? Sigurado la ketdi a dumakkel ti panagraem ken panangipategyo iti dayta a doktor a namagbalin a posible iti pannakaispalyo ken dagiti dadduma manipud ken patay.

² Mabalin a manmano ti kasta a pasamak ngem umasping dayta iti realidad a pakaipaspasanguan ti tunggal maysa kadatayo ken nakarkaro pay. Agkasapulantayo unay iti maysa a mangispal. (Basaen ti Roma 7:24.) Nagadu ti inaramid ni Jehova tapno maispaltayo. Dakkel met ti insakripisio ti Anakna. Usigentayo ngarud dagiti uppat a kangrunaan a saludsod. Apay a kasapulantayo ti pannakaisalakan? Ania ti insakripisio ni Jesus tapno maisalakantayo? Ania ti insakripisio ni Jehova? Ken kasano a maipakitatayo nga ipatpategtayo ti panangisalakan ti Dios?

No Apay a Kasapulantayo ti Pannakaisalakan

3. Kasano a nayarig ti basol iti makapapatay a sakit?

³ Sigun iti nabiit pay a pattapatta, ti maysa kadagiti kakaruan a makapapatay a sakit iti historia ti tao ket ti trangkaso Espaniol idi 1918, a nakatayan ti pinullo a milion a tattao. Ad-adda a makapapatay ti dadduma a sakit. Mabalin a manmano ti makaptanda ngem ad-adu ti matay kadagidiay a makaptanda.a Ngem kasano no pagdiligentayo ti basol ken dayta a makapapatay a sakit? Lagipentayo dagiti sasao iti Roma 5:12: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.” Siento porsiento ti makaptan iti basol, yantangay agbasol ti amin nga imperpekto a tao. (Basaen ti Roma 3:23.) Ken kasano kaadu ti matay? Insurat ni Pablo a matay ti “amin a tattao” gapu iti basol.

4. Kasano kapaut ti biagtayo a pinanggep ni Jehova, ken kasano a naiduma dayta iti panangmatmat ti adu a tattao ita?

⁴ Ibilang ti adu ita a gagangay laeng ti basol ken ipapatay. Nupay madanaganda met iti nasapa nga ipapatay, matmatanda a “natural” ti ipapatay gapu iti panaglakay. Gapuna, naglaka laeng a malipatan ti tao ti orihinal a panggep ti Namarsua. Adayo nga ab-ababa ti biagtayo ita ngem iti pinanggepna. Kinapudnona, awan ti tao a nagbiag iti uray “maysa nga aldaw” laeng iti panangmatmat ni Jehova. (2 Ped. 3:8) Kuna ti Sao ti Dios nga ababa ti biagtayo a kas iti sang-aw wenno apagbiit a biag ti ruot. (Sal. 39:5; 1 Ped. 1:24) Masapul a laglagipentayo dayta a kinapudno. Apay? No kitaentayo ti kinakaro ti “sakit” a mangparparigat kadatayo, ad-adda a maapresiartayo ti kinapateg ti “agas”​—ti pannakaispaltayo.

5. Ania ti napukaw ti tunggal maysa kadatayo gapu iti basol?

⁵ Tapno maawatantayo ti kinakaro ti basol ken dagiti epektona, nasken a matarusantayo no ania ti napukawtayo. Mabalin a narigat dayta no damo gapu ta saantayo a natagiragsak ti maysa a banag a napukawtayo maigapu iti basol. Perpekto idi da Adan ken Eva. Gapu ta perpekto ti isip ken bagida, kabaelanda a kontrolen ti panunot, rikna, ken tignayda. Iti kasta, mabalinda nga itultuloy a patanoren dagiti agkakaimbag a galad kas adipen ni Jehova a Dios. Ngem inlaksidda dayta a nagpateg a sagut. Gapu ta pinilida ti agbasol ken Jehova, napukawda ti kita ti biag a pinanggep ni Jehova agpaay kadakuada ken kadagiti kaputotanda. (Gen. 3:16-19) Dayta met ti makagapu a nakaptanda agraman kadatayo iti nakaro a “sakit” a pagsasaritaantayo. Maiparbeng laeng a kinondenar ida ni Jehova. Nupay kasta, ituktukonna kadatayo ti namnama a pannakaisalakan.​—Sal. 103:10.

No Ania ti Insakripisio ni Jesus Tapno Maisalakantayo

6, 7. (a) Kasano a damo nga impakita ni Jehova nga agkalikagum iti dakkel a sakripisio ti pannakaisalakantayo? (b) Ania ti masursurotayo kadagiti indaton ni Abel ken dagiti patriarka a nagbiag sakbay a naipaulog ti Linteg?

⁶ Ammo ni Jehova nga agkalikagum iti dakkel a panagsakripisio tapno maisalakan dagiti kaputotan da Adan ken Eva. Iti padto a nailanad iti Genesis 3:15, maammuantayo no ania ti kasapulan tapno maisalakan. Nangipaay ni Jehova iti ‘bin-i’ a mangispal kadatayo ken mangdadaelto ken Satanas. Ngem adda panawen nga agsagaba dayta a manangispal, nga arigna a madunor ti mukodna. Nasaem ken temporario a mangparigat dayta, ngem ania ti kayatna a sawen? Ania ti masapul nga ibturan Daydiay Pinili ni Jehova?

⁷ Tapno maisalakanna ti sangatauan manipud iti basol, masapul a mangipaay iti daton dayta a manangispal, maysa a pamay-an a dagiti tattao maikappiada iti Dios babaen ti panangikkatna kadagiti epekto ti basol. Ania ti kalikaguman dayta? Adda nagkauna a pamalatpatan nga agkalikagum dayta iti daton. Idi a ti umuna a matalek a tao a ni Abel ket nangidaton iti animal ken Jehova, nagun-odna ti anamong ti Dios. Idi agangay, nangipaay iti kasta met laeng a daton dagiti matalek a patriarka a da Noe, Abraham, Jacob, ken Job, banag a nakaay-ayo iti Dios. (Gen. 4:4; 8:20, 21; 22:13; 31:54; Job 1:5) Sinigsiglo kalpasanna, ti Mosaiko a Linteg ad-adda a pinagminarna ti kinapateg ti panagdaton.

8. Ania ti aramiden ti nangato a padi iti tinawen nga Aldaw ti Panangabbong?

⁸ Maysa kadagiti kapatgan a daton nga inkalikagum ti Linteg ket dagidiay maidaton bayat ti tinawen nga Aldaw ti Panangabbong. Iti dayta nga aldaw, mangaramid ti nangato a padi kadagiti nagduduma a simboliko a tignay. Isu ket agidaton ken Jehova iti pangabbong kadagiti basol​—umuna agpaay kadagiti klase papadi, kalpasanna kadagiti dadduma pay a tribu. Sumrek ti nangato a padi iti Kasasantuan a siled ti tabernakulo wenno templo, nga isu laeng ti makastrek ken iti dayta laeng nga aldaw ti tawen. Iwarsina sadiay ti dara ti daton iti sanguanan ti lakasa ti tulag. Iti rabaw dayta a sagrado a lakasa, pasaray agparang ti naraniag nga ulep a mangiladawan iti presensia ni Jehova a Dios.​—Ex. 25:22; Lev. 16:1-30.

9. (a) Iti Aldaw ti Panangabbong, asino ti iladawan ti nangato a padi, ken ania ti isimbolo dagiti datonna? (b) Ania ti iladawan ti iseserrek ti nangato a padi iti Kasasantuan?

⁹ Napaltiingan ni apostol Pablo a mangipalgak iti kaipapanan dagita a simboliko a tignay. Inlawlawagna a ti nangato a padi iladawanna ti Mesias, ni Jesu-Kristo, ken ti pannakaidaton dagiti sakripisio isimboloda ti ipapatay ni Kristo kas daton. (Heb. 9:11-14) Dayta a perpekto a daton ket agserbi a pudno a pangabbong agpaay iti dua a grupo dagiti tattao​—ti klase papadi a 144,000 a napulotan iti espiritu a kakabsat ni Kristo ken ti “sabsabali a karnero.” (Juan 10:16) Ti iseserrek ti nangato a padi iti Kasasantuan iladawanna ti iseserrek ni Jesus idiay langit tapno idatagna ken Jehova a Dios ti pateg ti pangsubbot a daton.​—Heb. 9:24, 25.

10. Ania ti impadto ti Biblia a mapasaran ti Mesias?

¹⁰ Nalawag a dakkel ti sakripisio a kalikaguman ti pannakaisalakan dagiti kaputotan da Adan ken Eva. Masapul nga isakripisio ti Mesias ti mismo a biagna! Nangted dagiti mammadto iti kanayonan a detalye iti Hebreo a Kasuratan. Kas pagarigan, kinuna ni propeta Daniel a “magessatto” wenno mapapatay ti “Mesias a Panguluen” tapno ‘maabbonganna ti biddut.’ (Dan. 9:24-26) Impadto ni Isaias a ti Mesias ket mailaksid, maidadanes, ken mapapatay, wenno maduyok, tapno awitenna ti basol dagiti imperpekto a tattao.​—Isa. 53:4, 5, 7.

11. Kadagiti ania a pamay-an nga impakita ti Anak ni Jehova nga isu ket situtulok a mangidaton iti biagna tapno maisalakantayo?

¹¹ Sakbay nga immay ditoy daga, ammo ti bugbugtong nga Anak ti Dios no ania ti masapul nga isakripisiona tapno maispaltayo. Masapul nga agsagaba iti nakaro ken mapapatay. Idi imbaga ni Amana dagita a mapasaranna, nagkedked wenno nagrebelde kadi? Saan, no di ket situtulok a nagtungpal iti bilin ni Amana. (Isa. 50:4-6) Uray idi adda ditoy daga, situtulnog nga intungpalna ti pagayatan ni Amana. Apay? Kinunana a mismo: “Ay-ayatek ti Ama.” Kinunana pay: “Awan asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.” (Juan 14:31; 15:13) No kasta, ti dakkel a makagapu a maisalakantayo ket ti panagayat ti Anak ni Jehova. Nupay insakripisiona ti perpekto a biagna kas tao, siraragsak a nangaramid iti dayta tapno maisalakantayo.

No Ania ti Insakripisio ni Jehova Tapno Maisalakantayo

12. Makinpagayatan ti nayebkas babaen ti daton, ken apay nga impaayna?

¹² Saan a ni Jesus ti Namunganay wenno Nangyurnos iti pangsubbot a daton. Imbes ketdi, maysa daytoy a napateg nga aspeto ti pagayatan ni Jehova. Kinuna ni apostol Pablo a ti altar iti templo a pagidatdatonan iladawanna ti pagayatan ni Jehova. (Heb. 10:10) Gapuna, ti pannakaisalakantayo babaen ti daton ni Kristo ket utangtayo kangrunaanna ken Jehova. (Luc. 1:68) Ebkas dayta ti perpekto a pagayatanna ken ti dakkel a panagayatna kadagiti tattao.​—Basaen ti Juan 3:16.

13, 14. Kasano a ti ulidan ni Abraham tulongannatayo a mangapresiar iti inaramid ni Jehova agpaay kadatayo?

¹³ Ania ti insakripisio ni Jehova kas ebkas ti panagayatna kadatayo? Nupay narigat a maawatan, adda salaysay ti Biblia a makatulong kadatayo nga ad-adda a mangtarus iti dayta. Ni Jehova kiniddawna iti matalek a ni Abraham a mangaramid iti maysa a narigat a banag​—ti panangidatonna iti anakna a ni Isaac. Naayat nga ama ni Abraham. Kinuna kenkuana ni Jehova maipapan ken Isaac: “Ti kakaisuna nga anakmo nga ay-ayatem unay.” (Gen. 22:2) Kaskasdi, nabigbig ni Abraham a napatpateg pay ti panangaramid iti pagayatan ni Jehova ngem iti panagayatna ken Isaac. Gapuna, nagtulnog ni Abraham. Ngem saan nga impalubos ni Jehova nga aramiden ni Abraham ti banag nga aramidennanto. Nangibaon ti Dios iti maysa nga anghel a mangatipa ken Abraham sakbay pay a maidatonna ti anakna. Determinado ni Abraham nga agtulnog iti Dios iti laksid ti narigat a pannubok uray no ti laeng namnamaenna a pannakakitananto manen iti anakna ket inton panagungar. Naan-anay nga agtalek nga aramiden dayta ti Dios. Kinapudnona, kinuna ni Pablo nga inawat manen ni Abraham ti anakna a ni Isaac babaen ti panagungar “iti mangiladawan a pamay-an.”​—Heb. 11:19.

¹⁴ Mailadawanyo kadi ti saem a narikna ni Abraham bayat nga isagsaganana nga idaton ti anakna? Makatulong ti napasaran ni Abraham tapno mayilustrar ti narikna ni Jehova idi indatonna daydiay inawaganna kas “ti Anakko, ti dungdungnguen.” (Mat. 3:17) Ngem laglagipenyo a nakarkaro pay ti saem a narikna ni Jehova. Minilion wenno nalabit binilion pay ketdi a tawen a nagkaduada. Ti Anak ket siraragsak a nakipagtrabaho iti Ama kas ti ay-ayatenna a “nasigo a managobra” ken kas Pannakangiwatna, “ti Sao.” (Prov. 8:22, 30, 31; Juan 1:1) Ditay naan-anay a maawatan ti saem nga inibturan ni Jehova bayat a naparigat, naumsi, ken napapatay ti Anakna kas maysa a kriminal. Nagdakkel la ketdi ti insakripisio ni Jehova tapno maisalakantayo! Kasano ngarud a maipakitatayo nga ipatpategtayo dayta a pannakaisalakantayo?

Kasano a Maipakitayo nga Ipatpategyo ti Pannakaisalakanyo?

15. Kasano a naan-anay nga imbanag ni Jesus ti panangabbong, ken ania dagiti pinagbalinna a posible?

¹⁵ Naan-anay a naibanag ni Jesus ti panangabbong kalpasan a napagungar idiay langit. Indatagna iti saklang ti dungdunguenna nga Ama ti pateg ti datonna. Nangyeg dayta iti adu a bendision. Nagbalinen a posible ti naan-anay a pannakapakawan, umuna agpaay iti basol dagiti napulotan a kakabsat ni Kristo, kalpasanna iti basol ti “intero a lubong.” Gapu iti dayta a daton, amin a naimpusuan nga agbabbabawi ken agbalin a pudno a pasurot ni Kristo matagiragsakda itan ti nadalus a takder iti imatang ni Jehova a Dios. (1 Juan 2:2) Kasano nga agaplikar dayta kenka?

16. Babaen ti ilustrasion, ilawlawagyo no apay a rumbeng nga apresiarentayo ti pannakaisalakan a pinagbalin ni Jehova a posible para kadatayo?

¹⁶ Subliantayo ti ilustrasion a nadakamat iti rugi. Kasano no ti doktor a nakatakuat iti agas ti sakitmo ibagana kadagiti kakaduam a pasiente: Asinoman nga umawat iti daytoy a panangagas ken mangsurot iti nairekomenda nga annuroten ket sigurado nga umimbag. Kasano no kaaduan kadagiti padam a pasiente ti agkedked a mangtungpal iti bilin ti doktor, nga irasonda a narigat ti agtomar wenno mangsurot iti nairekomenda nga annuroten? Tuladem kadi ida uray adda dagiti makakombinsir a pammaneknek a nasamay dayta nga agas? Siempre saan! Awan duadua nga agyamanka gapu iti pannakatakuat dayta nga agas ken surotem a naimbag ti bilin ti doktor, nalabit ibagam pay iti dadduma dayta a pinilim nga aramiden. Iti dakdakkel nga aplikasionna, tunggal maysa kadatayo ti rumbeng a magagaran a mangipakita ken Jehova no kasano kauneg ti apresasiontayo iti pannakaisalakan a pinagbalinna a posible babaen ti pangsubbot a daton ti Anakna.​—Basaen ti Roma 6:17, 18.

17. Kadagiti ania a pamay-an a maipakitayo ti panangipategyo iti inaramid ni Jehova a panangisalakan kadakayo?

¹⁷ No apresiarentayo ti inaramid ni Jehova ken ti Anakna tapno maispaltayo manipud iti basol ken ipapatay, masapul a paneknekantayo dayta. (1 Juan 5:3) Makidangadangtayo iti pagannayasantayo nga agbasol. Ditay koma pulos iyugali ti sipapakinakem a panagbasol ken ti masansan a kakuyogna a doble kara a panagbiag. No kasta ti panagbiagtayo, arigna nga ibagbagatayo nga awan ti pateg wenno ditay pulos apresiaren ti subbot. Imbes ketdi, ipakitatayo ti apresiasiontayo babaen ti panangikagumaantayo nga agtalinaed a nadalus iti imatang ti Dios. (2 Ped. 3:14) Maipakitatayo dayta babaen ti panangiranudtayo kadagiti sabsabali maipapan iti nagsayaat a namnama a pannakaispal tapno maaddaanda met iti nadalus a takder iti imatang ni Jehova ken iti namnama a biag nga agnanayon. (1 Tim. 4:16) Sigurado a maikari ni Jehova ken ti Anakna iti amin a tiempo ken pigsatayo a mangidayaw kadakuada! (Mar. 12:28-30) Panunotenyo daytoy! Manamnamatayo ti tiempo inton naan-anay a mawayawayaantayo manipud iti basol. Agbiagtayto a perpekto ken agnanayon kas pinanggep ti Dios​—maigapu amin dayta iti inaramid ni Jehova tapno maisalakantayo!​—Roma 8:21.

[Footnote]

Ania ti Sungbatyo?

• Apay a kasapulanyo unay ti pannakaisalakan?

• Ania ti epektona kenka ti panagsakripisio ni Jesus?

• Ania ti makunam maipapan iti subbot nga insagut ni Jehova?

• Ania ti aramidem kas panangapresiar iti panangisalakan nga inaramid ni Jehova?

[Ladawan iti panid 27]

Iti Aldaw ti Panangabbong, ti nangato a padi ti Israel ti mangyanninaw iti Mesias

[Ladawan iti panid 28]

No maipapan iti di maartapan a panagsakripisio ni Jehova, adu ti masursurotayo iti situtulok a panangidaton ni Abraham iti anakna