Okupado Ngem Naragsak nga Agserbi iti Dios

KAYAT ni Jehova nga agbalinka a naragsak. (Sal. 100:2) Kas maysa kadagiti adipenna, nalabit nga okupadoka met. Mabalin a saanka unay nga okupado sakbay nga indedikarmo ti biagmo iti Dios. Ngem ita, nalabit a dimo pay ammon no ania ti un-unaem gapu iti kaadu ti sekular ken naespirituan nga annongem. Mabalin a makariknaka iti pannakapaay no saanmo a maitungpal ti amin nga inkeddengmo nga aramiden. Kasanoka nga agbalin a balanse tapno mataginayonmo ti “rag-o ni Jehova”?​—Neh. 8:10.

Agbibiagtayo iti napeggad a tiempo ken maipaspasangotayo iti adu a pakarigatan isu a masapul nga agbalintayo nga organisado. Makatulong iti dayta ti dadduma a naipaltiing a balakad ni apostol Pablo: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.”​—Efe. 5:15, 16.

Mainaig iti dayta a nainsiriban a balakad, kasano a makaipasdekka kadagiti realistiko a kalat ken mabalansem ti personal a panagadal, panangaywan iti pamilia, panangasaba, sekular a trabaho, ken dadduma pay a napateg nga aktibidad?

Malagipmo pay kadi ti rag-om idi indedikarmo ti biagmo iti Dios ken nabautisaranka? Ti rag-o ket aggubuay iti pannakaammo maipapan ken ni Jehova ken kadagiti panggepna. Nalabit a siaanep a nagadalka iti adu a bulan tapno magun-odmo dayta a pannakaammo ken rag-o. Ngem saan a nasayang ti bannogmo. Dayta a panagadal pinasayaatna ti biagmo.

Tapno mataginayonmo ti rag-om, masapul nga itultuloymo ti mangipauneg kadagiti naespirituan a taraon. No marigatanka a mangiwaya iti panagbasa ken panagadal iti Biblia, sukimatem ti eskediulmo. Ad-adda a sumingedka ken Jehova no adalem ken utobem ti Biblia iti uray sumagmamano laeng a minuto iti kada aldaw, ken sigurado a mangnayon dayta iti rag-om.

Kaaduan nga adipen ti Dios ti mabalin a mangkissay iti panawenda kadagiti saan unay a napateg a banag tapno adda panawenda kadagiti napatpateg nga aktibidad. Isaludsodmo, ‘Kasano kaadu ti panawen a busbusbosek nga agbasa kadagiti sekular a magasin wenno diario, agbuya iti telebision, agdengngeg iti musika, wenno aglinglingay?’ Mabalin a makaparagsak dagita no pagtalinaedem a balanse. (1 Tim. 4:8) No matingitingmo a saan nga umiso ti panangusarmo iti tiempom, balbaliwam ti eskediulmo.

Ni Adam, a maysa nga asawa, ama ti tallo nga annak, ken panglakayen, inlawlawagna ti nakatulong kenkuana: “Ikagkagumaak a pagtalinaeden a simple ti biagko. Liklikak dagiti pagesman ken sanikua nga agkalikagum iti adu a tiempo. Diak met ketdi papaidaman ti bagik. Kaykayatko la ngamin dagiti simple a paglinglingayan.”

No utobem dagiti nasayaat a resulta dagiti pangngeddengmo, mapabaro ti rag-om ken mataginayon ti positibo a panangmatmatmo. Kas pagarigan, ni Mariusz a maysa a panglakayen ken addaan iti tallo nga annak, kinunana: “Nagbalin a positibo ti panangmatmatko kadagiti bambanag idi nagadalak iti Biblia. Pasaray a maipasangoak latta kadagiti pakarigatan, a ni laeng Jehova ti makaammo iti adu kadagita. Ngem babaen iti tulongna, matmatak ti masanguanan buyogen ti rag-o.”

Kas iti napasaran ni Mariusz, ti kinapositibo dina ikkaten ti amin a panagdandanag. Ngem pagbalinenna a nalaglag-an ti riknam ken nalaklakam a daeran dagiti karit iti biag. Mabasatayo: “Amin dagiti aldaw daydiay naparigatan dakesda; ngem daydiay maay-ayatan ti pusona addaan padaya a patinayon.” (Prov. 15:15) Utobem met ti ayat nga impakita kenka ti Dios. Ti kasta a panangutob paunegenna ti ayatmo kenkuana ken parayrayenna ti rag-om.​—Mat. 22:37.

Naragragsak ti pamilia no iyun-unada ni Jehova ken dagiti interesna. No maiparangarang dagiti Nakristianuan a galad, maksayan ti di panagkikinnaawatan ken agresulta dayta iti nasingsinged ken naragragsak a pamilia. Iti kasta, agraira ti talna ken panagkaykaysa iti uneg ti pamilia.​—Sal. 133:1.

Matagiragsak ti pudno a rag-o no sangsangkamaysa nga aramiden ti intero a pamilia dagiti naespirituan nga aktibidad. Kuna ni Mariusz: “Napateg kaniak ti tiempo a busbusbosenmi kas maysa a pamilia. Kanayon a saranayennak ni baketko. No posible, kaduaennak a mangasaba wenno agdalus iti estadium sakbay ti kombension, ken no agpalawagak iti sabali a kongregasion. Makapabileg kaniak dagita.”

Ibilin ti Kasuratan a rumbeng nga ipaay dagiti Kristiano ti material a kasapulan ti pamiliada. (1 Tim. 5:8) Ngem no ti sekular a trabaho ti mangibus iti tiempo ken pigsam, mapukaw ti rag-om nga agserbi iti Dios. Ikararagmo dayta ken Jehova. (Sal. 55:22) Nabigbig ti dadduma a masapul a baliwanda ti panggedanda tapno mayun-unada ti Pagarian ti Dios. Saan koma nga ipalubos ti Kristiano a ti napintas a trabaho ti manglapped kenkuana a mangyun-una kadagiti napatpateg a naespirituan a bambanag.​—Prov. 22:3.

Makatulong no isuratmo dagiti pagsayaatan ken pagdaksan ti agdama wenno pampanunotem a panggedan. Siempre, asino met ti madi iti dakkel a sueldo ken makapnek a trabaho? Ngem ti kadi agdama a panggedam ipalubosna a mayun-unam ti espiritualidad ti pamiliam? Sipupudno koma nga ikabilangam ti amin a banag, ket mangaramidka kadagiti pangngeddeng a tumulong kenka a mangipangpangruna iti relasionmo ken Jehova.

No ti agdama a panggedam lapdanna ti panagrang-aymo iti naespirituan, masapul a mangaramidka iti panagbalbaliw. Adu a Kristiano ti nangaramid iti dakkel a panagbalbaliw tapno maiwayaanda dagiti naespirituan a bambanag. Kuna ti maysa a kabsat a taga-Poland: “Masapul nga ikeddengko idi ti umikkat iti kompania a pagtartrabahuak gapu ta kalikagumanna ti masansan a panagbiahek. Awan ti panawenko a mangasikaso a naimbag iti pamiliak wenno kadagiti naespirituan a bambanag.” Ti trabahona itan ket agkalikagum iti basbassit a tiempo ken pigsa.

Pagrag-oam ti Panangtulong iti Sabsabali

Kinuna ni Jesus nga “ad-adu ti kinaragsak iti panangted ngem iti panangawat.” (Ara. 20:35) Adu ti gundaway a maaramid dayta dagiti Kristiano. No dadduma, ti nainggayyeman a panangisem, panangalamano, wenno naimpusuan a panagyaman iti maysa a sireregget a nangitungpal iti teokratiko nga annongenna ket umdasen a mangyeg iti rag-o kadakayo a dua.

Pinaregta ni apostol Pablo dagiti pada a Kristiano: “Agsaokayo iti makaliwliwa kadagiti malmaldaangan a kararua, saranayenyo dagiti nakapuy.” (1 Tes. 5:14) Nalabit a marikna dagiti malmaldaangan a dida kabaelan a daeran dagiti parikutda iti bukodda a pigsa. Mabalinmo kadi a tulongan ida? No makitam a ti maysa a kabsat mapukpukawna ti rag-ona nga agserbi ken Jehova, ikagumaam a paregtaen. No aramidem dayta, maparegtaka met. Adda dagiti parikut a saan a kabaelan a risuten ti tao. Ngem mabalinmo a pakitaan ti kabsatmo iti napasnek a pannakaseknan ken paregtaem nga agtalek iti mapangnamnamaan a tulong ni Jehova. Saanto a pulos a mapaay dagidiay agtalek Kenkuana.​—Sal. 27:10; Isa. 59:1.

Matulongam met ti maysa a mapukpukaw ti rag-ona no awisem a mangkadua kenka iti ministerio. Idi imbaon ni Jesus ti 70 nga adalan, imbaonna ida a “sagdudua.” (Luc. 10:1) Sigurado nga umanamongka nga imbilin dayta ni Jesus tapno agpinnaregta ti agkadua. Mabalinmo kadi a tuladen dayta a pamay-an tapno matulongam ti dadduma a mangpasubli iti rag-oda?

Nainkalintegan met ketdi ti adu ita a pakaseknan. Kaskasdi, indagadag kadatayo ni Pablo: “Kankanayon nga agrag-okayo iti Apo. Maminsan pay a kunaek, Agrag-okayo!” (Fil. 4:4) Adda panggep ti biagmo gapu ta ay-ayatem ti Dios, agtultulnogka kenkuana, ken sireregta nga itungtungpalmo ti trabaho nga intalekna kenka. Mangyeg kenka dayta iti rag-o. Kanayonanna, tulongannaka ni Jehova a mangdaer kadagiti pakaipaspasanguam a pakarigatan ken parikut.​—Roma 2:6, 7.

Babaen ti mata ti pammati, makitkitatayo ita no kasanotayo kaasidegen iti inkari ni Jehova a baro a lubong. Nagadu la ketdi ti bendision ken rason nga agrag-otayo! (Sal. 37:34) Gapuna, mabalintayo ti agragsak uray ita gapu iti nagadu a pamendision ni Jehova. Iti kasta, ‘makapagserbitayo ken Jehova buyogen ti rag-o.’​—Sal. 100:2.

[Diagram iti panid 8]

(Para iti aktual a pannakaurnosna, kitaem ti publikasion)

Nalabit a masapul a baliwam ti panangbingaymo iti panawenmo tapno mataginayonmo ti rag-om

PAGLINGLINGAYAN

PAGTAENGAN ken PAMILIA

TRABAHO

NAKRISTIANUAN A GIMONG

PERSONAL A PANAGADAL

MINISTERIO

[Dagiti Ladawan iti panid 10]

Mabalinmo kadi a tulongan ti dadduma a mangpasubli iti rag-oda?