Sekreto 1
Ayatem Dagiti Tattao, Saan a ti Kuarta ken Sanikua
ANIA TI ISURSURO TI BIBLIA? “Ti ayat iti kuarta isu ti ramut dagiti amin a kita ti makadangran a bambanag.”—1 Timoteo 6:10.
ANIA TI KARIT? Dagiti agar-aramid ti adbertismen pagbalinendatayo a saan a mapmapnek kadagiti adda kadatayo. Kayatda a kanayontayo nga agtrabaho tapno adu ti masapulantayo ket makagatangtayo kadagiti kabbaro, napimpintas, ken daddadakkel nga alikamen. Makaatrakar ti kuarta, ken nalakatayo nga agbalin a managayat iti dayta. Nupay kasta, namakdaar ti Biblia a dinto pulos agbalin a kontento ti tao a managayat iti kinabaknang. “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul,” insurat ni Ari Solomon.—Eclesiastes 5:10.
ANIA TI MABALINMO NGA ARAMIDEN? Tuladem ni Jesus ken sursuruem nga ad-adda nga ayaten dagiti tattao ngem dagiti bambanag. Situtulok nga insuko ni Jesus ti amin nga adda kenkuana—uray ti biagna—gapu iti ayatna kadagiti tattao. (Juan 15:13) Kinunana: “Ad-adu ti kinaragsak iti panangted ngem iti panangawat.” (Aramid 20:35) No iyugalitayo ti mangiranud iti tiempo ken sanikuatayo iti sabsabali, kastanto met ti isubadda kadatayo. “Iyugaliyo ti mangted,” kuna ni Jesus, “ket mangtedto kadakayo dagiti tattao.” (Lucas 6:38) Dagidiay agtarigagay iti adu a kuarta ken sanikua agsagrapda laeng iti ut-ot ken panagsagaba. (1 Timoteo 6:9, 10) Iti sabali a bangir, dagidiay agay-ayat ken maay-ayat makariknada iti pudno a kinakontento.
Apay a dimo tingitingen no mabalinmo a pasimplien ti biagmo? Mabalin ngata a kissayam dagiti sanikuam wenno dagiti kayatmo a gun-oden a sanikua? No aramidem dayta, ad-adunto ti tiempo ken pigsam nga agpaay kadagiti napatpateg a banag—ti panangtulong kadagiti tattao ken panagserbi iti Dios a gubuayan ti amin a sanikuam.—Mateo 6:24; Aramid 17:28.
[Ladawan iti panid 4]
“Iyugaliyo ti mangted, ket mangtedto kadakayo dagiti tattao”