Umadanika iti Dios
“Ipalubosnanto nga Isu Masarakam”
AM-AMMOM kadi ti Dios? Saan a nalaka a sungbatan dayta a saludsod. Ti panangam-ammo iti Dios ramanenna ti panagbalin a naan-anay a pamiliar kadagiti pagayatan ken daldalanna. Masapul ngarud a patanorentayo ti nasinged a pannakirelasion kenkuana ta dayta ti mangimpluensia iti intero a wagas ti biagtayo. Talaga kadi a posible ti makisinninged iti Dios? No wen, kasano? Adda sungbat nga ipasimudaag ti balakad ni Ari David iti anakna a ni Solomon a masarakan iti 1 Cronicas 28:9.
Iladawam iti panunotmo ti eksena. Dandani 40 a tawenen nga iturturayan ni David ti nasion ti Israel, ket rimmang-ay ti Israel iti sidong ti panangiturayna. Ubing pay unay idi ni Solomon a sumuno kenkuana. (1 Cronicas 29:1) Ania dagiti pammakada a balakad nga imbaga ni David iti anakna?
Maibatay iti kapadasanna iti panagserbina iti Dios, rinugian ni David nga imbalakad: “Solomon nga anakko, ammuem ti Dios ni amam.” Saan laeng a ti pannakaammo maipapan iti Dios ti kayat a sawen ni David. Ni Solomon ket agdaydayawen ken Jehova, a Dios ni David nga amana. Agarup kakatlo ti Hebreo a Kasuratan ti nakompleton idi, ken sigurado a pamiliar ni Solomon iti saritaen ti sagrado a sursurat maipapan iti Dios. Maysa nga eskolar ti agkuna a ti Hebreo a sao nga “am-ammo” mabalin a tukoyenna ti “maysa a kasinged unay.” Wen, kayat ni David a patanoren a mismo ti anakna ti banag nga ipatpategna—ti nasinged a pannakirelasion iti Dios.
Ti kasta a kinasinged iti Dios rumbeng nga apektaranna ti panangmatmat ken wagas ti panagbiag ni Solomon. Imparegta ni David iti anakna: “Agserbika kenkuana [ti Dios] buyogen ti naan-anay a puso ken buyogen ti naragsak a kararua.”a Usigem ta naibalakad ti panagserbi iti Dios kalpasan ti panangam-ammo kenkuana. Talaga a ti panangam-ammo iti Dios ti mangituggod iti panagserbi kenkuana. Ngem saan a rumbeng a mapilpilit wenno mabingay ti panagserbi iti Dios. (Salmo 12:2; 119:113) Indagadag ni David iti anakna a naimpusuan ken situtulok koma a pagserbianna ti Dios.
Apay a pinaregta ni David ti anakna nga agdaydayaw iti Dios buyogen ti umiso a motibo ken pampanunot? Inlawlawag ni David: “Ta amin a puspuso sukimaten ni Jehova, ket tunggal pagannayasan ti pampanunot mailasinna.” Saan koma nga agserbi ni Solomon iti Dios tapno maay-ayona laeng ni David nga amana. Sapsapulen ti Dios dagidiay agtartarigagay nga agserbi Kenkuana buyogen ti naan-anay a puso.
Agtignay ngata ni Solomon tapno maaddaan met iti nasinged a relasion iti Dios a kas ken amana? Ni Solomon ti makaammo a mangngeddeng. Kinuna ni David iti anakna: “No birokem, ipalubosnanto nga isu masarakam; ngem no panawam, iwaksinakanto iti agnanayon.” Tapno agbalin a nasinged ni Solomon iti Dios kas managdaydayawna, nasken a pagreggetanna nga am-ammuen ni Jehova.b
Ti naamaan a balakad ni David ipatalgedna kadatayo a kayat ni Jehova nga agbalintayo a nasinged kenkuana. Ngem tapno mapatanortayo ti kasta a kinasinged, masapul a ‘birokentayo’ ti Dios, a pagreggetantayo nga am-ammuen a naimbag babaen ti panagsukimat iti Kasuratan. Bayat nga am-ammuentayo ti Dios, matignaytayo koma a situtulok ken naimpusuan nga agserbi kenkuana. Dayta ti tarigagayan ni Jehova kadagiti agdaydayaw kenkuana ta isu ket maikari iti dayta.—Mateo 22:37.
[Footnotes]
a Kastoy ti panangipatarus ti dadduma a Biblia: “Agservica kencuana a buyogen ti maysa a puso a sipapalungdo ken iti maysa a nakem a natulnog.”
b Nakalkaldaang ta nupay naimpusuan a nagserbi ni Solomon iti Dios idi damo, saan a nagtalinaed a matalek.—1 Ar-ari 11:4.