Umadanika iti Dios

“Lagipennak, O Diosko, Maipaay iti Pagimbagan”

“IMPAGARUPKO a pulos a dinakto ayaten wenno anamongan ni Jehova, a makaam-ammo unay kaniak.” Kasta ti insurat ti maysa a matalek a Kristiano a babai gapu iti marikriknana a kinaawan serserbi. Adda kadi gundaway a nariknam met ti kasta, a pampanunotem a ti Dios dinanto pulos ipaay ti atensionna kenka, ket nangnangruna pay ti anamongna? No kasta, maparegtanaka dagiti sasao iti Nehemias 13:31.

Ni Nehemias, a gobernador dagiti Judio idi maikalima a siglo K.K.P., inaramidna ti amin a kabaelanna a mangparagsak iti Dios. Indauluanna ti pannakaibangon manen dagiti pader ti Jerusalem iti laksid ti ibubusor. Impatungpalna ti Linteg ti Dios, impaayna ti kasapulan dagiti mairurrurumen, ken inkagumaanna a pinabileg ti pammati dagiti padana nga Israelita. Ammo kadi ti Dios ti naimbag a naaramidan daytoy a matalek a lalaki? Nagun-odan kadi ni Nehemias ti anamong ni Jehova? Maammuantayo dagiti sungbat iti pangserra a sasao ti libro a naipanagan kenkuana.

Inkararag ni Nehemias: “Lagipennak, O Diosko, maipaay iti pagimbagan.”a Amken kadi ni Nehemias a di makitkita ti Dios dagiti naimbag a nagapuananna wenno isu ket malipatanto ti Dios? Saan. Ammo la ketdi ni Nehemias ti kinuna dagiti nagkauna a mannurat ti Biblia a ni Jehova ket interesado unay kadagiti matalek nga agdaydayaw kenkuana ken kadagiti naimbag a naaramidanda. (Exodo 32:32, 33; Salmo 56:8) Ania ngarud ti kidkiddawenna iti Dios? Sigun iti maysa a reperensia, ti Hebreo a sao a naipatarus a “lagipen” ipasimudaagna “ti pagayatan ti isip ken ti tignay a naibuyog iti panangtandaan.” Buyogen ti naan-anay a panagtalek iti bileg ti kararag, kidkiddawen ni Nehemias ti siaayat a pananglaglagip ken panangbendision ti Dios kenkuana.​—Nehemias 2:4.

Sungbatan ngata ni Jehova dayta a kararag ni Nehemias? Iti maysa a pamay-an, sinungbatannan dayta. Manamnamatayo a siaayat a linagipna ni Nehemias yantangay nakitana a rumbeng laeng a permanente a mairekord ti kararag ni Nehemias, nga agbalin a paset ti naipaltiing a Kasuratan. Ngem ad-adu pay ti aramiden ti “Managdengngeg iti kararag” kas sungbat ti naimpusuan a kiddaw ni Nehemias.​—Salmo 65:2.

Ti Dios gunggonaannanto pay ni Nehemias gapu iti amin a naimbag nga inaramidna maipaay iti nasin-aw a panagdayaw. (Hebreo 11:6) Iti um-umay a nalinteg a baro a lubong nga inkari ni Jehova, bendisionannanto ni Nehemias babaen ti panangpagungarna kenkuana.b (2 Pedro 3:13; Apocalipsis 21:3, 4) Iti panagbiagnanto nga agnanayon iti paraiso a daga, mapaneknekan ni Nehemias nga isu ket talaga a linaglagip ni Jehova.

Ti kararag ni Nehemias patalgedanna ti kinapudno ti sasao ni Ari David: “Bendisionamto ti asinoman a nalinteg, O Jehova; kas iti maysa a dakkel a kalasag, palikmutamto ida iti anamong.” (Salmo 5:12) Wen, ammo ken ipatpateg ti Dios ti napasnek a panagreggettayo a mangparagsak kenkuana. No la ketdi ta ar-aramidem ti amin a kabaelam nga agserbi kenkuana, makapagtalekka a siaayat a lagipennakanto ket sibabaknang a bendisionannaka.

Singasing a basaen iti Biblia iti Pebrero:

◼ Nehemias 1-13

[Footnotes]