Rumbeng Kadi a Maisuro iti Ubbing ti Maipapan iti Dios?

“Paggiginnuraennatayo laeng ti relihion imbes a tignayennatayo nga agiinnayat.”​—JONATHAN SWIFT, INGLES NGA AUTOR.

IMBAGA dayta ni Swift idi maika-18 a siglo, ngem adu ita ti umanamong kenkuana. Adda pay ketdi dagiti agkuna a saan kano a rumbeng nga isuro dagiti nagannak ti annakda maipapan iti Dios. Pagarupenda a pimpiman dagiti ubbing a napadakkel iti relihioso a pamilia.

Iti panagkunam, ania ngata kadagitoy nga opinion ti umiso?

● Saan koma a dagiti nagannak ti mangisuro kadagiti annakda maipapan iti Dios.

● Urayen koma dagiti nagannak a dumakkel pay dagiti annakda sadanto suruan ida maipapan iti relihion.

● Bayat nga ubbing pay dagiti annakda, masapul nga isuro ida dagiti nagannak iti mismo a patpatienda maipapan iti Dios. Ngem bayat nga agmatmataenganda, rumbeng nga idagadag dagiti nagannak a personal a tingitingen dayta dagiti annakda.

● Masapul a suroten lattan dagiti annak ti pammati dagiti nagannakda.

Pagdaksan Aya ti Ubbing ti Relihion?

Awan ti nadungngo a nagannak a mangdangran iti anakna. Ngem umiso kadi ti opinion dagidiay agkuna a di rumbeng nga isuro ti Dios kadagiti ubbing? Adun a dekada nga ad-adalen a naimbag dagiti managsirarak no ania ti epekto ti relihion ti nagannak kadagiti annakda. Ania ti natakuatanda?

Naammuan dagiti managsirarak a ti relihion ket pagsayaatan dagiti agmatmataengan nga annak, imbes a pagdaksan. Kastoy ti inreport ti magasin a Social Science Researcha idi 2008: “Natakuatan a mapasayaat ti relihion ti relasion dagiti nagannak ken annak.” Kinuna pay ti report: “Ti relihion ken espiritualidad ket nagpateg a paset ti biag dagiti ubbing ken dayta ti mangpasinged iti agkakapamilia.” Kapadpada dayta ti kinuna ni Jesu-Kristo: “Naragsak dagidiay sipapanunot iti naespirituan a kasapulanda.”​—Mateo 5:3.

Umiso kadi met ti opinion a masapul nga urayen dagiti nagannak a dumakkel dagiti annakda sadanto suruan ida maipapan iti Dios ken iti relihion? Usigem daytoy a kinapudno: Mayarig ti utek ti maysa nga ubing iti awan kargana a timba. Masapul nga agpili dagiti nagannak; mabalin a punnuenda dayta a “timba” iti uneg ti pagtaenganda kadagiti moral a prinsipio ken pammati a pagarupda a nasayaat wenno bay-anda a mapno ti panunot ken puso ti anakda iti kasla bagyo a kapanunotan iti ruar ti pagtaengan.

Ania ti Tulbek?

Paneknekan ti pakasaritaan a mabalin a ti relihion ti gapu iti panangidumduma ken guranggura. Kasano ngarud a maliklikan dagiti nagannak ti kinuna ni Jonathan Swift? Kasano a maisuroda dagiti prinsipio a makatulong iti annakda a mangayat iti sabsabali?

Maammuantayo ti tulbek iti sungbat dagitoy tallo a saludsod: (1) Ania ti masapul a sursuruen dagiti ubbing? (2) Siasino ti rumbeng a mangisuro kadakuada? (3) Ania ti kasayaatan a pamay-an ti panangisuro kadakuada?

[Footnote]