2 Saan a Maseknan ti Dios—Pudno Kadi?
Ti mabalin a nangngegmon: “No talaga a maseknan ti Dios iti sangatauan, inikkatna koman ti kinadakes ken panagsagaba ditoy lubong. Ken no maseknan man kadagiti tattao, saan a maseknan iti mapaspasamak kaniak.”
Ti isursuro ti Biblia: Saan a gapuanan ni Jehova a Dios ti kinadakes. (Santiago 1:13) Nupay maikkatna dayta iti aniaman a kanito, palpalubosanna ti dakes a kagimongan tapno marisut dagiti isyu a naibangon iti rugi ti pakasaritaan ti tao. Inton agangay, punasenna ti amin a parikut a pinataud dagiti saan nga agpaspasakup iti panangiturayna.—Genesis 3:1-6; Isaias 65:17.a
Saan laeng a maseknan ti Dios iti sangatauan no di ket iti pay tunggal maysa kadatayo. Ipakita ti Mateo 10:29-31 nga ammona amin ti maipapan kadatayo nupay saantayo nga ammo: “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.”
Ti maitulong kenka ti panangammom iti kinapudno: Gagangay a liklikantayo dagiti tattao a nauyong wenno awanan pannakaseknan. Di pakasdaawan a gapu ta maibagbaga a di maseknan ti Dios, adu ti madi a mangam-ammo kenkuana, wenno umadanida laeng kenkuana no awanen ti pagkamanganda. No maammuam a talaga a maseknan ni Jehova a Dios, kayatmo la ketdi a maammuan ti ad-adu pay maipapan kenkuana ken makipagayam kenkuana.
Kas pagarigan, mabalin a nagkararagka metten iti Dios ngem nagduaduaka no dumngeg met laeng wenno ipangagnaka. Patalgedan ti Biblia a dagidiay napasnek a mangsapsapul iti Dios nawaya nga umadanida iti “Managdengngeg iti kararag.”—Salmo 65:2.
Iyaw-awis ti Dios nga “iyallatiw[tayo] kenkuana ti isuamin a pakaringgoran[tayo], agsipud ta isu maseknan kada[tayo].” (1 Pedro 5:7) Sigurado a maseknan kadatayo nangruna no nadagsen ti parikuttayo, ta kuna ti Saona: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”—Salmo 34:18.
[Footnote]
a Para iti kanayonan nga impormasion no apay a pinalubosan ti Dios ti panagsagaba, kitaem ti kapitulo 11 ti libro nga Ania a Talaga ti Isursuro ti Biblia?
[Blurb iti panid 5]
No di maseknan ti Dios, apay ngarud nga awisennatayo nga agkararag kenkuana?