Wen, Daytoy ti Pagadalan nga Edision!
Binaliwanmi ti disenio ti pagadalan nga edision tapno ad-adda a makaatrakar ken makatulong iti panangadalmo iti nagpateg a kinapudno a Sao ni Jehova.—Sal. 1:2; 119:97.
Uppat a tawenen manipud rinugianmi nga ipablaak ti dua nga edision Ti Pagwanawanan, maysa para iti publiko ken maysa para kadatayo a Saksi ni Jehova ken kadagiti rumangrang-ay nga iyad-adalantayo iti Biblia.
Kuna ti maysa a nabayagen nga adipen ni Jehova: “Ti impresionko iti umuna a pagadalan nga edision Ti Pagwanawanan ket nagpintas ken makagutugot. Immukuok iti pusok dagiti kinapudno iti Biblia gapu iti detalyado a panangilawlawagna. Agyamanak unay iti daytoy nagsayaat a baro a probision.” Insurat ti maysa pay a kabsat: “Segseggaak nga adalen daytoy nga edision nga usarek ti Reference Bible.” Agtalekkami a kasta met ti mariknam.
Kas pagaammomon, maipabpablaaken Ti Pagwanawanan manipud pay idi 1879. Nagbalin laeng a posible dayta gapu iti espiritu ken tulong ni Jehova. (Zac. 4:6) Iti napalabas a 133 a tawen, adun ti naaramid a panagbalbaliw iti akkub ti magasin. Iti tawen 2012, maitampok iti akkub ti tunggal pagadalan nga edision ti maysa a namaris a pinta a mangiladawan iti trabaho a panangasaba, a mangipalagip iti inted-Dios nga annongentayo a naan-anay a panangikasaba iti Pagarian ni Jehova. (Ara. 28:23) Iti panid 2, makitam ti retrato a nakaibatayan ti ladawan, ken ti ababa nga impormasion maipapan iti eksena ken ti lugar a nakaalaanna. Iti daytoy a tawen, dayta ti mangipalagip kadatayo nga ikaskasaba ti ili ni Jehova ti naimbag a damag “iti intero a mapagnaedan a daga.”—Mat. 24:14.
Ania pay dagiti naaramid a panagbalbaliw iti daytoy a magasin? Nayakar ti pangrepaso a kahon iti rugi ti tunggal maadal nga artikulo tapno ammom dagiti kangrunaan a punto a nasken a siputam bayat a basbasaem ken ad-adalem ti artikulo. Siempre, dagiti mangikondukta iti Panagadal ti Pagwanawanan usarenda latta dagita a saludsod a pangrepaso iti artikulo iti ngudo ti panagadal. Napatpatak met dagiti numero ti panid ken parapo.
Kas mailawlawag iti daytoy a ruar, adda nainayon a baro a benneg a “Gameng iti Archive” a mangipakita iti nagpateg a rimmang-ayan ti moderno a pakasaritaan dagiti Saksi ni Jehova. Ken sagpaminsan nga agparang dagiti pakasaritaan ti biag iti paulo a “Situtulok nga Indatonda ti Bagbagida.” Ipakita dagitoy ti kinaragsak ken pannakapnek dagiti kakabsat nga agserserbi iti lugar nga agkasapulan iti ad-adu nga agibumbunannag iti Pagarian.
Sapay koma ta matagiragsakmo ti panagadalmo iti Sao ti Dios iti tulong daytoy a magasin.
Dagiti Nangipablaak
[Ladawan iti panid 3]
1879
[Ladawan iti panid 3]
1895
[Ladawan iti panid 3]
1931
[Ladawan iti panid 3]
1950
[Ladawan iti panid 3]
1974
[Ladawan iti panid 3]
2008