Baro a Pagadalan nga Edision Ti Pagwanawanan
DAYTOY a magasin ti umuna nga isyu ti pagadalan nga edision Ti Pagwanawanan. Kayatmi nga ilawlawag ti sumagmamano a benneg ti baro a pannakaiparang daytoy a magasin.
Naipablaak ti pagadalan nga edision para kadagiti Saksi ni Jehova ken kadagiti narang-ay a mayad-adalan iti Biblia. Maminsan daytoy iti kada bulan ken naglaon iti uppat wenno lima a mapagadalan nga artikulo. Adda iti parupa ti magasin dagiti eskediul no kaano a mausig dagiti mapagadalan nga artikulo. Maisupadi iti publiko nga edision Ti Pagwanawanan, saan a mabalbaliwan ti ilustrasion iti akkub ti tunggal isyu yantangay saan a maipaima ti pagadalan nga edision.
Iti panid 2 daytoy a magasin, adda sumario a mangilawlawag iti panggep ti tunggal mapagadalan nga artikulo wenno serye agraman ti listaan dagiti kanayonan nga artikulo. Makatulong daytoy a benneg kadagiti mangikonkondukta iti Panagadal iti Pagwanawanan bayat ti panagsaganada tapno agbalin a makaisuro ti panagadal kadagiti artikulo bayat dagiti gimong ti kongregasion.
No madlawyo, ab-ababa itan dagiti artikulo a mapagadalan. Ad-adun ti panawen a mangusig kadagiti kangrunaan a teksto bayat ti Panagadal iti Pagwanawanan. Paregtaendakayo a mangbasa iti amin a naisitar a teksto iti kada lawas. Dadduma a naisitar a teksto ti namarkaan iti “basaenyo.” Masapul a mabasa ken mapagsasaritaan dagita bayat ti Panagadal iti Pagwanawanan. Mabalin met a basaen ti dadduma a teksto no ipalubos ti tiempo. Iti dadduma nga artikulo, adda dagiti teksto a namarkaan iti “idiligyo.” Tangay dida direkta a paneknekan dagiti kangrunaan a punto iti parapo, masansan a saan a mabasa dagita bayat ti gimong. Kaskasdi, dagiti teksto a namarkaan iti “idiligyo” addaanda kadagiti napateg a kanayonan nga impormasion, wenno mabalin a saan a direkta a pasingkedanda ti punto a maus-usig. Paregtaendakayo a mangbasa kadagitoy no agsagsaganakayo iti Panagadal iti Pagwanawanan. Nalabit mabalin nga iramanyo dagitoy kadagiti komentoyo.
Saanen nga agparang ti tinawen a report iti Ti Pagwanawanan. Mangrugi iti 2008, agparang dayta kas suplemento Ti Ministeriotayo iti Pagarian agraman iti Tinawen a Libro. Kas nadakamat itay, naglaon kadagiti kanayonan nga artikulo ti pagadalan nga edision. Nupay adu kadagitoy ti saan a mausig iti gimong, paregtaendakayo a mangbasa a naimbag kadagitoy. Naespirituan a taraon latta dagita a naggapu iti “matalek ken masirib nga adipen.”—Mat. 24:45-47.
Kamaudiananna, saan nga agduma a magasin ti pagadalan nga edision ken ti publiko nga edision Ti Pagwanawanan. Agpada dagitoy a Ti Pagwanawanan Mangibumbunannag iti Pagarian ni Jehova. Iti panid 2, addaanda iti pareho a parapo a mangilawlawag iti panggep Ti Pagwanawanan. Agpadada a mairaman iti tinawen a bound volume. Ti benneg a “Malagipyo Kadi?” nga agparang iti pagadalan nga edision, ket naglaon kadagiti artikulo a naggapu iti dua nga edision.
Sipud idi 1879, bayat ti panawen ti gubat, rigat ti panagbiag, ken pannakaidadanes, nagtultuloy nga inwaragawag Ti Pagwanawanan dagiti kinapudno maipapan iti Pagarian ti Dios. Ikarkararagmi a buyogen iti pamendision ni Jehova, agtultuloy a maibanag dayta a panggep iti baro a pannakaiparangna. Ken ikarkararagmi a dakayo nga agbasbasa bendisionannakayo ni Jehova bayat ti panangusaryo a naimbag iti baro a pagadalan nga edision Ti Pagwanawanan.