Dagiti Makapagagar a Panagbalbaliw iti Ti Pagwanawanan!
1 Iti di pay nabayag, nakaawat dagiti kongregasion iti makapagagar a pakaammo: Mangrugi iti Enero 2008, duanton ti edision Ti Pagwanawanan, maysa ti para iti publiko ken maysa ti para kadagiti Saksi ni Jehova! Mabalin a pampanunotenyo: ‘Ania ti nagdumaan dagita nga edision? Ania dagiti pagsayaatan ti kaadda ti dua nga agduma nga edision? Adda ngata dagiti baro a bennegna?’
2 Dagiti Nagdumaanda: Maawagan kas Publiko nga Edision ti ruar a napetsaan iti umuna nga aldaw ti bulan. Nairanta nga agpaay iti publiko dagiti amin nga artikulo iti daytoy a ruar. Maawagan met kas Pagadalan nga Edision ti ruar a napetsaan iti maika-15 nga aldaw ti bulan ken saan daytoy a maipaima iti tay-ak. Naglaon daytoy kadagiti amin nga artikulo a maadal para iti maysa a bulan ken kasta met kadagiti kanayonan nga artikulo nga agpaay kadagiti dedikado a Kristiano. Nupay makaallukoy kadagiti Saksi ti Publiko nga Edision Ti Pagwanawanan, nangnangruna a makaallukoy dayta kadagiti saan a Saksi a mamati iti Biblia. Iti sabali a bangir, ti Agriingkayo! ket nairanta nga agpaay latta iti amin, a pakairamanan dagiti agduadua no maipapan iti relihion ken dagiti saan a Kristiano ti relihionda.
3 Dagiti Pagsayaatanna: Iti Pagadalan nga Edision, saanen a nasken nga ilawlawag dagiti termino a kas iti “payunir” iti wagas a maawatan dagiti saan a Saksi. Mabalin a karaman met iti linaon daytoy nga edision dagiti maitutop nga impormasion nga agpaay kadagiti Saksi ni Jehova ken kadagiti mayad-adalan iti Biblia a rumangrang-ay ti espiritualidadda. Ti ngay Publiko nga Edision? Yantangay nairanta nga agpaay iti publiko dagiti topiko ken ti estilo ti pannakaisuratda, magustuan la ketdi dagiti saan a Saksi a basaen ti intero a magasin. Siempre, mabenepisiaran ti tunggal Saksi ni Jehova iti panangbasada iti tunggal ruar. Gapu ta maysa laeng a Pagwanawanan a mapakuyogan iti maysa nga Agriingkayo! ti itukontayo iti tunggal bulan iti tay-ak, makaisaganatayo kadagiti epektibo a presentasion a mausar iti makabulan.
4 Dagiti Baro a Bennegna: Adda dagiti makapagagar a benneg ti Publiko nga Edision Ti Pagwanawanan. Ti maysa a benneg ilawlawagna iti nakasimsimple a pamay-an dagiti pamunganayan a Nainkasuratan a sursuro. Adda met benneg a mangipakita no kasano a makatulong ti Biblia kadagiti pamilia. Mairaman met dagiti proyekto nga agpaay kadagiti agtutubo tapno ad-adu pay ti masursuroda maipapan iti Biblia. Naglaon ti tunggal ruar iti artikulo a mangitampok kadagiti espesipiko a teksto iti Biblia a pakasursuruantayo maipapan kadagiti kualidad ni Jehova.
5 Ikarkararagtayo a bendisionan ni Jehova daytoy a baro nga urnos mainaig iti Pagwanawanan. Sapay koma ta ad-adunto pay a maikari a tattao ti makaammo iti naimbag a damag babaen dayta a magasin ken ti Agriingkayo!—Mat. 10:11.