Ipakita iti Talek ken Jehova Babaen ti Panagpayunir
1 Ti panangisaad iti intereses ti Pagarian nga umuna kasapulanna iti talek ken Jehova. (Sal. 56:11; Prov. 3:5; Mat. 6:33) Masapul nga ibaw-ingtayo iti panunottayo manipud kadagiti bambanag ditoy lubong a pagarupenda nga importante ket ipamaysa dagiti espiritual a gameng. Bayat a daytoy lubong ket umapelo iti gartem a maipaay ti material a bambanag, kiddawen met ni Jehova a kontentotayo koman kadagiti pudno a nasken a bambanag.—1 Tim. 6:8; Fil. 1:10.
2 Nangruna a maysa a karit daytoy kadagiti Kristiano nga agtutubo nga agngayangay a mangtungpal a serioso iti bilbilin ni Jehova. Mabalin a puersaen dagiti maestro ken kaeskuelada a pausig kadakuada iti nangatngato nga edukasion a kas nasken iti naballigi a biag. Bayat a bigbigen a nasken iti material a kasapulanda, adu dagiti Kristiano nga agtutubo ti mangresiste iti kasta a panangpuersa ket pilienda iti payunir a ministerio a kas karerada. Iti panagtalekda kadagiti kari ni Jehova, kumitada kenkuana a maipaay iti kasapulanda.—Sal. 62:2; 68:19; 1 Tim. 5:8; 6:9, 10.
REPASUEN DAGITI BUKOD A KASASAAD
3 Idiay The Watchtower a Nobiembre 15, 1982 pinaregtana iti tunggal maysa kadatayo nga isaludsod: “Pudno kadi a maikalintegak iti saklang ni Jehova iti kinapudno no apay a saanak a payunir?” Adu idi dagiti awanan iti takder a makapagpayunir. Ngem saanda a naupay, ta ammoda nga ti napusuan a serbisio uray kasano iti gatadna ket makaay-ayo ken Jehova. (Mik. 6:8; 2 Cor. 8:12) Kamaudiananna, bayat a nagbaliw iti kasasaad, ti nainkararagan a panangusig iti dayta a 1982 nga artikulo ti Watchtower isut’ timmulong iti dadduma a maysadan kadagiti rinibo a simrek itay kallabes iti regular payunir a serbisio.
4 No ti personal a sirkumstansia ket linapdannakayo nga agpayunir idi a naimaldit dayta a sasao idi 1982, ti kadi kasasaadyo ket nagbaliwen? Ditoy Pilipinas, adda 3,427 nga aplikasion iti payunir ti nataming bayat iti 1989 a tawen ti serbisio! Awan duadua nga adu kadagitoy nga aplikante ti nagngayangay idi nga agpayunir ngem nagurayda agingga a nagbaliw iti kasasaadda.
5 Iti dadduma a kaso, ti laeng kasapulan a mabaliwan isut’ maipapan iti mental a panangmatmat maipapan iti payunir a trabaho. Wenno nalabit a ramanenna laeng iti panangaramid iti nasayaat nga iskediol ti serbisio. No dadduma ti panagbaliw iti personal a responsabilidad ken obligasion isut’ kasapulan tapno maluktan iti ruangan ti payunir a serbisio. Gapuna, naimbag a banag no aramiden daytoy a regular a banag nga ikararag ken Jehova agraman iti napudno a panangbaluar iti bagbagitayo ken iti kasasaadtayo. Rinibo dagiti nangaramid iti daytoy ket ita sagsagrapendan dagiti bendision iti payunir a trabaho.
6 No ti napudno a pananggatad iti kasasaadyo ket ipakitana a maysakayo kadagiti mabalinanna iti mangrugi nga agpayunir iti saan unay nga adayo a masakbayan, apay a dikay rugian itan ti agserbi a kas regular auxiliary payunir? Ti Abril ken Mayo isudat’ ekselente a bulbulan a pangrugian iti daytoy, ken mangted kadakayo iti oportunidad a kumita no maragpatyo dagiti kasapulan iti regular payunir iti masanguanan. Iti sumagmamano a bulan mabalin a makaparnuaykayo iti panagsarungkar ken panagadal ti Biblia. Daytoy ti bumadang kadakayo a mangaramid iti naannayas nga iyaallatiw iti regular payunir a serbisio, nalabit a sakbay iti panangrugi ti baro a tawen iti serbisio inton Setiembre.
7 Itungtungpal ni Jehova dagiti naindaklan a bambanag kadagitoy maudi nga al-aldaw daytoy agdama a sistema dagiti bambanag. Itan ti tiempo kadatayo amin nga umadani kenkuana ken bendituen iti naganna “iti agmalmalem.” (Sal. 145:2; Sant. 4:8) Dagiti payunir isudat’ adda iti makinsango a beddeng daytoy dakkel a trabaho, nga idi napan a tawen nagreportda iti 69% iti dagup ti oras ken 71% iti dagup ti panagadal iti Biblia ditoy Pilipinas. No ngarud ta ti kasasaadyo ket palubosanna nga aramidenyo dayta ken maikarikayo, aramidenyo ti payunir a serbisio a kas maysa nga ebidensia iti panagtalekyo ken Jehova a saan a babaen laeng iti bukodyo a pigsa. Kumitakami iti masanguanan a mangabrasa iti ad-adu pay a bilang iti ranggo dagiti payunir iti 1990!—Sal. 94:18.